TUMU MANAKO I TE KAPI MUA: TA TATOU I APII MAI MEI IA MOSE
Koai a Mose?
Eaa toou manako me akarongo koe i te ingoa o Mose? Te manako ra ainei koe . . .
i tetai pepe tei uunaia e tona mama ki roto i te kete i roto i te Kauvai Nile?
i tetai tamaiti tei utuutuia e te tamaine a Pharao i roto i tetai oraanga puapinga i Aiphiti—e kare rava i ngaropoina iaia e e tangata Iseraela aia?
i tetai tangata tei riro ana ei tiaki mamoe i Midiana no tetai 40 mataiti?
i tetai tangata tei pukapuka ana kia Iehovaa i mua i te pu ngangaere e ka ra i te ai?
i tetai tangata tei tu ki mua i te ariki o Aiphiti, te pati mataku kore anga kia akamataraia te ngati Iseraela mei te tuikaaanga?
i tetai tangata tei akakite, na roto i ta te Atua aratakianga, e ka tupu te Mate Ngauru kia Aiphiti me akarongo kore tona ariki i te Atua mou?
i tetai tangata tei arataki i te ngati Iseraela te akaruke anga ratou ia Aiphiti?
i tetai tangata tei taangaangaia kia akatakake i te Tai Muramura?
i tetai tangata tei oronga i te Ture Ngauru no ko mai i te Atua ki te ngati Iseraela?
KUA rave a Mose i teia e tetai atu au mea. No reira rai teia tangata akarongo mou i akangateiteiia ai e te au Kerititiano, ngati Iuda, e te au tangata Muslim!
Te taka ua ra e e peroveta a Mose tei rave i te “au mea mataku maata.” (Deuteronomi 34:10-12) Kua tuku aia i te Atua kia taangaanga iaia kia rave i te au angaanga maata. Noatu te reira, e tangata noa ua nei a Mose. Mei te peroveta rai ko Elia, tei tu i te pae ia Mose i roto i tetai orama i te tuatau o ta Iesu angaanga orometua i te enua nei, e tangata ua a Mose “mei ia tatou katoa te tu.” (Iakobo 5:17; Mataio 17:1-9) Kua na roto ana a Mose i te au manamanata mei ta tatou e na roto ana, e kua autu meitaki aia i te reira.
Ka inangaro ainei koe i te kite e akapeea aia te autu anga i te reira? Akamanako ana e toru au tu meitaki ta Mose i akaari e ta tatou ka apii mai mei tona akaraanga.
a Ko Iehova te ingoa o te Atua tei akakiteia i roto i te Pipiria.