Viivii Kore, e Tu Akaraanga Uaorai Akapaapaaia
1. I te akapapaanga no te uruoaanga tapere, eaa ra tatou ka oronga atu ei i te akamanakoanga ki to tatou tu akaraanga?
1 “E meitaki tikai te Au Kite o Iehova! E takinga meitaki tikai to kotou iti tangata e manea ana me kakau mai, e te akaari ra i te tu ngateitei tikai.” I karanga ai tetai komono no tetai otera no runga i te au taeake e te au tuaine i tetai uruoaanga tapere i te mataiti i topa akenei. I tetai mai uruoaanga, kua tuatua tetai tangata angaanga otera e: “Te kite uaia ra e te akamanea ra to kotou iti tangata no te Atua.” Ae, te kiteia ra te au tereketi uruoaanga e tetai ke. Ka inangaro tatou i reira i te akamanea “tei tau i te tuatua meitaki” e te akakeu putuputu ra teia i te aronga i vao mai i te akameitaki ia tatou e te kitea ua ia ra e e au orometua tatou no te Atua. (Philipi 1:27, NW) Ia tatou e akapapa ra no te uruoaanga tapere, e mea tau kia akamanako i mua ake ki to tatou tu akaraanga.
2. Eaa oki ei akaaoanga kia kakau e kia akamanea i tetai uaorai i roto i te tu viivii kore?
2 “Te pakari no runga maira, e mea viivii kore ïa,” i tata mai ei te pipi ko Iakobo. (Iakobo 3:17) I te akaataanga i te tu viivii kore i roto i to tatou tu akaraanga ka riro ia ei akaaoanga. Te akakeu ra to Satani ao tau kore i te au tangata kia akono i te au tu kakau marikonga kore, te akameamea, e te tuke ake rai kare oki e tau ana. (1 Ioane 2:15-17) No reira, i te akonoanga i te au tukuanga tika no runga i te kakauanga e te akamaneaanga, ka inangaroia tatou i te akono i te akoanga Pipiria kia “kopae ke i te tu akono kore i te Atua e te au anoano o teianei ao e kia noo ma te manako tau . . . i roto i teianei akatereanga o te au mea nei.” (Tito 2:12, NW) Auraka roa tatou e inangaro i te akariri atu i tetai ke na to tatou tu akaraanga, noatu e e au taeake ratou no tatou, e aronga angaanga i te otera e i te ngai kaikai anga, me kore tetai atu au aronga e akarakara maira.—1 Kori. 10:32, 33.
3. Eaa te au uianga te ka tauturu ia tatou kia akara matatio i to tatou uaorai tu akaraanga?
3 Tu Mako, Rakei i te Kakau Tau: I te akapapa anga no te uruoaanga, e ui kia koe uaorai: ‘Te tau ra ainei toku kakau, me kore te apai maira i te akaraanga maata kiaku uaorai? Te akaari ra te reira i te tu ngateitei no te au manako ngakau o tetai ke? E tautau roa me kore e poto roa ainei toku au rima pona i te ngai o te kaki? E akaraanga pipiri me kore te akaari maata ra toku au pona roaroa? Te ma ra toku kakau e kare e aunga piro ana? Me te tiki ra i te au kaikai i te popongi i te otera me kore te akaangaroi ra i muri ake i te porokaramu, ka rauka ainei iaku te tu akaraanga mako, te manea ei orometua ra, me ka mako kore ainei toku kakau, te akaari ra i te au tu ou, me kore kare e tano roa ana, e kare e tau ana no tetai tereketi uruoaanga te aao ra i tetai kati pine. Ka akariro ainei toku kakau e aao ra i te tuatau akaangaroi i te taakama iaku kia akakitekite aere ua?’—Roma 15:2, 3; 1 Timo. 2:9.
4. Akapeea tatou i te tauturu atu i tetai ke kia akaari i te tu akaraanga viivii kore?
4 Ka puapingaia tatou mei te au akarakaraanga o te au Kerititiano pakari. Ka tau te au vaine i te ui atu ki ta ratou au tane e mei teaa te akaraanga o tona kakau ki tetai ke. Ka rauka i te au metua tu akono i te Atua i te tauturu i ta ratou tamariki mapu no runga i teia turanga. Pera katoa, ka rauka i te au tuaine pakari akono “kia ako marie ra ratou i te au vaine ou kia manako meitaki mai . . . kia manako tau, kia viivii kore,” i roto i to ratou tu akaraanga “kia kore e akakinoia te tuatua a te Atua.” (Tito 2:3-5, NW) Te oronga maira ta tatou au puka i te au akatutu anga tauturu te akaari maira i te tu mako, e rakei i te kakau tau.
5. Akapeea tatou katoatoa i te apai mai anga i te akapaapaaanga kia Iehova i te tuatau o te uruoaanga?
5 Apai Mai i te Akapaapaa kia Iehova: Te oronga maira te au uruoaanga tapere i tetai tuatau meitaki tikai no tatou katoatoa, e kare ua ki te aronga tei runga i te porokaramu, kia akapaapaa ia Iehova. E tika oki, ka akangateitei to tatou tu Kerititiano e te tuatua iaia. Inara te apinga mua ta te aronga akarakara e manganui ka kite mai no runga ia tatou koia oki to tatou kakau e te akamanea anga. Kia akapaapaa tatou katoatoa ia Iehova na roto i to tatou tu akaraanga viivii kore akapaapaaia.—Sa. 148:12, 13.
[Pia i te kapi 6]
Au Tauturu ki te Tu Akaraanga Akapaapaaia
◼ Tuatua a te Atua
◼ Akara matatio ia koe uaorai
◼ Au akaraanga i tetai ke
◼ Au puka Kerititiano