Akapeea i te Tutu Anga i te Tuanga Ngai Pitiniti
1. Eaa tetai au akameitakianga no te akakitekite anga ki te tuanga ngai pitiniti?
1 Ka inangaro ainei koe i te tutu aere i te tuanga ngai e ariki uaia ana te aronga atorotoro e te ngai e kitea koreia te au kainga kare e tangata? Penei ka rauka ia koe i te rave i te reira i roto tikai i te tuanga ngai o taau putuputuanga. Akapeea? Na te atoro atu anga i te au pitiniti tei kiteaia i reira. Te au papuritia te akakitekite aere ra mei tera toa ki tera toa kua reka putuputu i te au tupuanga meitaki.
2. Akapeea te akakitekite anga pitiniti i te akapapaia anga?
2 Tei tetai au putuputuanga te au tapere no te pitiniti ei tuanga oki no ta ratou tuanga ngai akatuangaia. Penei ka akapapa te taeake te akono ra i te tuanga ngai i te au kati takake no te mapu o teia au potonga ngai e apinga tikai te maata i te pitiniti. Ko tetai ua atu au kati e mapu no te tuanga ngai e au are ua te kapiti katoaia maira ki te reira ka tau kia akataka meitakiia e auraka oki te au pitiniti e taangaanga ia ei tuanga no te tuanga ngai. I te au tuanga ngai ke mai, ka rauka te au pitiniti kia angaanga kapitiia ma te au ngai e au are ua. Me kare oki koe i rave ake ana i te akakitekite anga pitiniti, e akamata na te tamataanga e takitai ua o te au toa rikiriki aere.
3. Eaa te ka tauturu ia tatou kia puapinga i te akakitekite anga mei tera toa ki tera toa?
3 Taangaanga i Tetai Araveianga Ngoie Ua: I te akakitekite anga mei tera toa ki tera toa, e mea puapinga kia akamanea ia koe mei te aere ra rai no tetai uipaanga i te Are Uipaanga Patireia. E mea meitaki katoa kia iki i te taime e kare oki e angaanga i roto i te toa. Me ka rauka, e tomo atu me kare oki e aronga okooko e tiaki ra kia akonoia. E pati kia tuatua atu ki te manitia me kare te tangata akaaere ra. Kia tapoto ua e kia tano meitaki. Eaa taau ka tuatua?
4-6. Eaa ta tatou ka tuatua me te akakitekite ra ki te tangata tiaki toa ra me kare ki te manitia?
4 Me te tuatua ra ki te tangata tiaki toa me kore ki te manitia, penei ka rauka ia koe i te tuatua i tetai apinga mei teia rai: “E ki ua ana te au akapapaanga a te aronga pitiniti e e ngata ana ia matou i te aravei ia ratou i te kainga, no reira te atoro nei matou ia koe i taau ngai angaanga. Te oronga nei ta matou au makatini i te akaraanga mei te ao katoa no runga i te au tupuanga no teia taime nei.” E akaari i reira i tetai tumu poto ua mei tetai makatini.
5 Me kare penei ka tamata koe i teia aravei anga ngoie ua: “E maata te tangata te inangaro ra i te kite maata atu no runga i te Pipiria inara e meangiti ua tikai oki te taime. Te akataka maira teia aenga pepa i tetai porokaramu apii kare e tutakiia te vai ua ra ei tauturu ia koe i te kite i te au pauanga ki taau au uianga Pipiria.” E tou atu i reira ki te kapi 4-5 o te aenga pepa Ka Inangaro Ainei Koe kia Kite Maata Atu i te Pipiria?
6 Mei te akaraanga e kare o te tangata akono ra taime, penei ka rauka ua ia koe i te oronga i te aenga pepa i te na ko anga: “Ka oki akaou mai au me va mai koe. Ka inangaro au i te kite e eaa toou manako no runga i teia aenga pepa.”
7. Akapeea tatou i te tatanu anga i te inangaro i ta tatou i kite mai i roto i te tuanga ngai pitiniti?
7 Tatanu Anga i te Inangaro i Akaariia Mai: Penei ka rauka ia koe i te akono i tetai apii Pipiria i roto i te tuanga ngai pitiniti. E tua putuputu ana tetai painia takake i te au makatini ki tetai tangata pitiniti. I te akaari anga mai te tangata i te arikianga no tana e tatau ra, kua akaariari atu te painia i te akanoonooanga no te apii Pipiria, i te taangaanga anga i te poroutia Umuumu. Kua akamataia tetai apii i reira tikai i te ngai angaanga a teia tangata. I te akamanakoanga i te au turanga, kua kotinga te painia i te reira ki te 10 me kore e 15 miniti i te taime okotai. Kia tamou ua atu rai, tatou katoa, i te kimi i te aronga te tau ra na te akakitekite anga i te tuanga ngai pitiniti.