Tutuanga i te Ngai Pitiniti ma te Papu Tikai
1. Eaa ra tatou kare e manamanata me ru tatou i te tutuanga i te ngai pitiniti?
1 E ru ana ainei koe i te tutuanga i te ngai pitiniti? Me koia ia, auraka e manamanata, kua “maroiroi” katoa a Paulo, e orometua ngakau toa e te mataku kore i te tutu aere. (1 Tesa. 2:2) Tei raro mai tetai au manako matauia e te tau te ka uriuriia.
2. Eaa ra tatou kare e manamanata e ka akariri tatou i te aronga angaanga?
2 Ka Riri Ainei te Aronga Angaanga me Tamanamanataia Ratou? I roto i te au ngai pitiniti, ka tauturu te aronga angaanga i tetai ua atu tangata ka oko apinga. Ka maru ua rai ratou, no te mea te manako maira ratou ia koe ei tangata oko apinga. E na te aao anga i te kakau ma te tu akangateitei e te akaari anga i te tu oaoa, ka akangateitei mai ratou ia koe.
3. Akapeea me kopae i te akariri i te aronga oko apinga?
3 Ka Rave Ainei Au i Taku Tuatua Akamataanga ki Mua i te Aronga Oko Apinga? Me ka rauka, e iki i te taime me kare e maata te tangata e oko apinga ra, mei te tuatau koi ngaa ua akera te toa. Tiaki kia noo te manitia me kore te tangata angaanga koia anake ua i mua ake ka aravei ei koe iaia. E rave i taau tuatua anga kia poto ua.
4. Eaa taau ka tuatua me tutu aere i te ngai pitiniti?
4 Eaa Taku ka Tuatua? Tuatua ki te manitia me e maata te aronga angaanga. Penei ka tuatua koe e: “E ngata tikai i te aravei i te au tangata angaanga pitiniti i te kainga, no reira te atoro mai nei matou ia koe i taau ngai angaanga. Kua kite au e te angaanga ra koe, no reira ka tapoto ua au i taku tuatua.” Kia kore tatou e manakoia mai e e aronga okooko, e mea meitaki kia kore e taiku atu i te moni tauturu, kia ui roa mai ratou e akapeea ta tatou angaanga e tutaki ia nei. Tei runga i te tu o te pitiniti, penei ka pati koe ki te manitia kia akatika mai ia koe kia tuatua ki te aronga angaanga. E ripiti i taau tuatua akamataanga kia ratou. Me te manamanata ra te tangata angaanga, tapoto i taau tuatua akamataanga e kia akaruke i tetai aenga pepa kiaia. Me kare e rauka i te tuatua ki te tangata angaanga, penei ka akatika ia koe kia akaruke i tetai puka ki roto i te ngai akangaroianga me kore i tetai ngai ke atu.
5. Eaa te au tumu ka piri ei tatou ki te tutuanga i te ngai pitiniti ma te papu tikai?
5 Kua tutu aere a Iesu e Paulo ki te au tangata i te ngai pitiniti ma te papu tikai, e ka rauka katoa ia koe i te rave i te reira. (Mata. 4:18-21; 9:9; Anga. 17:17) E pati kia Iehova kia tauturu mai ia koe kia maru e kia mataku kore. (Anga. 4:29) Me kare e maata ana te tangata i te kainga i te ngai tutuanga pitiniti, eaa ra koe kare e tauta i te rave i teia tu tutuanga?