Akakitekite Meitaki Anga i te Au Ngai Tangata
1. I te aruanga i te au Kerititiano i te anere mataiti mua, akapeea te au Kerititiano i teia tuatau nei i te oronga anga i te akakitekite anga i roto i te au ngai tangata ra, e eaa te au tupuanga?
1 Mei ta Iesu au pipi mua, te kimi ra te au Kerititiano i teia tuatau i te oronga atu anga i te tuatua meitaki ki te au tangata i te au ngai e kiteaia ai ratou. (Anga. 16:13; 17:17; 20:20, 21) Tei tupu no ta ratou au tautaanga i te akakitekite aere i te au ngai tangata ra, te kite maira ratou i te inangaro i roto i te au tangata i te akaraanga e penei kare ratou e aravei atuia i roto i te angaanga orometua mei tera are ki tera are.
2. Eaa ra i umuumuia ai te kite meitaki i te akakitekite anga i te au ngai tangata, e akapeea tatou i te tauturu atu anga ki te papaanga meitaki?
2 Te umuumuia ra te kite meitaki i te akakitekite anga i te ngai tangata. Tei matauia, e mea meitaki i te angaanga kia kore e kiteaia mai. Ei akaraanga, me maata roa te au papuritia e akakitekite aere ra e tai ngai me kore aiteite ua te au pitiniti e atoroia ra, penei ka riro to tatou aere atu anga e e maata roa ki tetai papaki tangata. Ka apai ke teia i te tu meitaki o ta tatou angaanga e penei ka akameangiti mai i to tatou tu puapinga meitaki. Eaa te ka raveia kia kore teia e tupu mai? Kua kiteia mai e etai au putuputuanga e maata ta ratou au ngai no te akakitekite anga i te ngai tangata e e mea meitaki i te akapapa aere i teia i roto i te au ngai tataki tai. (1 Kori. 14:40) Kapiti katoa mai, ka rauka ia tatou i te tauturu atu i te papaanga meitaki na te angaanga ua anga i roto i te ngai i akatuangaia mai ta tatou putuputuanga me kare kua raveia te au akanoonooanga tikai na roto i te Kumiti Angaanga no te Putuputuanga kia tauturu atu i tetai akaou mai putuputuanga.—Akara i te Noema 1998 Our Kingdom Ministry, kapi 5, para. 18-19.
3. Eaa tetai aravei anga ta tetai i kite mai ei meitaki i te akakitekite anga i roto i te ngai tangata?
3 Araveianga i te Au Tangata: I te tuatuaanga a Iesu ki tetai vaine i te ruavai, kua akamata atu aia ma tetai tuatua poto ua e kua akamaata marie ua atu i te pukapukaanga i te kite atu anga i tona inangaro. (Ioane 4:7-26) E meitaki katoa teia araveianga i roto i tetai au akanoonooanga tikai i teia tuatau nei. Kua kite mai etai au papuritia e kia rauka i te tu manako meitaki no te akakitekite anga i te ngai tangata, e mea meitaki i te akapou nga mea miniti i te aravei atu anga i te au tangata e te akaarianga i te inangaro uaorai i roto ia ratou i mua ake ka oronga atu ei i te karere Patireia. Kua tuatua ratou no runga i tetai tumu manako te manakoia ra i te reira ngai, e putuputu te taime kua taki atu ki tetai pukapukaanga. E te akakite maira tetai aronga i to ratou au manako, te akarongo meitaki atura ratou. Kare i roa ana, te oronga ra ratou i te pumaana mei te Tuatua a te Atua.—Roma 15:4.
4. Akapeea e rauka ai ia tatou i te tatanu i te inangaro i ta tatou i kite mai?
4 Tatanuanga i te Inangaro: Te au taime ravarai e rauka ana ia tatou tetai uriurianga meitaki, ka tau tatou kia tauta i te rave i te au akanoonooanga kia tatanu i te inangaro. Akapeea tatou i te raveanga i teia? E te taopenga marie maira te uriurianga, penei ka kiriti mai koe i taau puka tata e ka karanga atu: “Kua reka tikai au i ta taua pukapukaanga. E ravenga akaou atu ainei tetai e rauka ai ia taua i te pukapuka akaou atu a tetai tuatau ke?” Me kore e tuatua atu: “Ka inangaro au ia koe i te tatau i tetai atikara e papu iaku ka reka tikai koe. Ka rauka ainei i te apai mai i te reira ki toou ngutuare me kore ki te opati?” Penei ka ui atu tetai au papuritia: “Eaa toou numero terepaoni e rauka ai i te ringi atu ia koe?” E putuputu ana te taime kua ariki rekarekaia te reira.
5. Eaa ta tatou akakoroanga i te akakitekite anga i te ngai tangata?
5 Te au tangata e manganui tei aravei muaia i te au ngai tangata ra kua ariki mai i te au apii Pipiria. Ka rauka taua au apii ra i te raveia i te kainga o te tangata, i tana ngai angaanga, i roto i tetai ngai atea tau ua, me kore i runga i te terepaoni. Kia akariro tatou i te reira ei akakoroanga na tatou kia akamata i te au apii Pipiria ia tatou e akakitekite meitaki aere ra i te au ngai tangata.