Tutu Anga Meitaki Tikai i te Pae Mataara
1. Eaa tetai ravenga ka rauka ia tatou te aru ia Iesu?
1 Te tuatau o tana angaanga orometua i te enua nei, kare a Iesu i emiemi ana i te tuatua ki te au tangata tana i aravei ana i te pae mataara e i te ngai tangata. (Luka 9:57-61; Ioa. 4:7) Kua inangaro aia i te akakite i tana karere puapinga ki te au tangata e manganui. I teia tuatau, e ravenga meitaki tikai te tutu anga i te pae mataara i te tauturu i te tangata kia rauka te pakari o te Atua. (Mase. 1:20) Ka puapinga atu me aravei tatou i te tangata na mua, e kia akamanako meitaki atu ia ratou.
2. Akapeea te aravei mua anga te o mai anga ki te tutu anga i te pae mataara?
2 Aravei Atu na Mua: Meitaki atu i te aravei i te tangata i te tu ua me kore te noo ua i te tiaki i te tangata e na te pae maira kia aravei mai ia koe. E katakata, e kia akara ki te tangata, e kia maru e te oaoa. Me te angaanga kapiti ra koe ki tetai au papuritia, e mea meitaki i te aravei takake i te au tangata. Ka anoano katoaia kia na mua i te akanoo kia atoro akaou atu i te tangata tei akaari mai i te inangaro. Me ka tau, i te openga o te pukapukaanga, e pati maru atu ki te tangata e ka akapeea koe me aravei akaou iaia. E rave putuputu ana tetai au papuritia i te tutu anga i te pae mataara i taua ngai rai, kia tuatua atu ki taua aronga rai, e kia akamaata atu i te inangaro.
3. Akapeea tatou me akamanako meitaki me tutu aere i te pae mataara?
3 Akamanako Meitaki: Akara meitaki i te ngai ka tu koe i te pae mataara e koai taau ka aravei atu. Kare e anoanoia kia tutu atu ki te au tangata ravarai te ka na te pae mai ia koe. Akara meitaki. Ei akaraanga, me te rapurapu ra te tangata, e mea meitaki kia tuku iaia kia aere. Me ka tutu atu ki mua i te ngai pitiniti, kia matakite kia kore te manitia e manamanata mai. E meitaki atu kia tutu ki te tangata ia ratou e akaruke ra i te ngai pitiniti, kare i te taime e tomo atu ra ratou ki roto. Aravei i te au tangata na te tu kare ratou e poitirere mai. E akamanako meitaki katoa me oronga i te au puka. Me kare te tangata e inangaro mai, penei e oronga atu i tetai aenga pepa me kore tetai au makatini.
4. Eaa ra te angaanga tutu anga i te pae mataara i puapinga ai e te mataora?
4 Ka riro te tutu anga i te pae mataara ei akatotoa maata atu i te au ua tuatua mou i roto i tetai tuatau poto ua. (Kohe. 11:6) Penei ka aravei tatou i tetai au tangata kare tatou e aravei ana i te kainga me tutu aere tatou mei tera are ki tera are. Eaa ka kore ei e rave i tetai akanoonoo anga kia piri atu ki te angaanga tutu anga i te pae mataara, tetai ravenga mataora no te tutu anga meitaki?