Tetai Mataara ou e te Mataora no te Akakitekiteanga
1. Eaa tei akamaroiroiia ki te au putuputuanga kia rave me e maata te au ngai tutuanga e na reira ua ana te tangata?
1 Kua akamaroiroiia te au putuputuanga e maata te au ngai tutuanga e na reira ua ana te tangata, kia akanoo i tetai kaingakai me kore i tetai pereoo ei akaari i te au puka. Me ka tukuia tetai pereoo ki tetai ngai, e okotai rai papuritia te ka tu me kore te ka noo ki te pae. Inara, ka anoanoia kia tu me kore kia noo e rua papuritia ki te pae i te kaingakai puka. Te au taeake na ratou tera au apainga, kia tauta ratou i te akaari i te tu oaoa, te tu takinga meitaki, e te tu te ka akakeu i te tangata kia akavaitata mai. Me ka akara tetai tangata i te au puka, ka rauka i tetai papuritia i te komakoma kiaia penei i te na ko anga e, “I manako ana ainei koe i ta te Pipiria i akakite no runga i tera tumu manako?” Ka rauka i tetai papuritia ke mai me kore e rua papuritia i te tutu aere vaitata ua ki tera ngai.
2. Akakite mai i tetai tupuanga e akaari maira i te puapinga no tetai kaingakai me kore tetai pereoo puka no te akakitekiteanga.
2 Na roto i teia mataara, e maata te au apii Pipiria ou tei akamataia. Kua iki tetai tamaine i te apii tuarua i te tata no runga i te Au Kite o Iehova, inara kare aia i kite ana i tetai Are Uipaanga Patireia. I tera mai epetoma, kua kite aia i tetai kaingakai puka a te Au Kite o Iehova i ko i tana apii. Kua akamataia tetai apii Pipiria kiaia e i teianei kua papetitoia aia e e piri ana aia ki roto i teia tu akakitekiteanga.
3. Eaa te manako o tetai au papuritia no runga i teia tu akakitekiteanga?
3 Tetai tuaine e reka ana i teia tu akakitekiteanga, kua karanga aia e: “E aere mai ana tetai aronga i te tiki i ta ratou au makatini ou. Tetai aronga, kare roa ratou i rongo ana no runga i te Au Kite o Iehova i mua ana. Te kite nei au e e maata te ka kite i te tuatua mou na roto i teia mataara.” Karanga katoa tetai tuaine e, “E mataara ou teia e te mataora no te mea ka aere mai te tangata kia koe e noatu kare ratou i akaari mai i to ratou inangaro no te au puka, te inangaro ua ra ratou i te kite e eaa to roto.”
4. Eaa i puapinga ai i te au epetoma kia akanoo i tetai kaingakai me kore i tetai pereoo puka i te ora e te ngai tei matauia?
4 E mea meitaki kia tuku i te kaingakai me kore i te pereoo ki taua ngai rai, taua rā rai, e i taua ora rai i te au epetoma. Na roto i tera mataara, ka matau ua te tangata i te kite i te au kaingakai e te au pereoo puka e me kare ratou e emiemi, ka aere mai ratou ka ui i te au uianga me kore ka tiki i tetai puka na ratou. Kua oti ainei i taau putuputuanga i te akanoo i teia tu akakitekiteanga? Me kua akanooia, penei ka rauka ia koe i te piri ki roto i teia mataara mataora e te puapinga i te “tutu aere i te basileia no te Atua.”—Luka 9:60.