Ko Teia te Taime i te Tutu Aere!
1. No teaa ra e ko teia te taime i te tutu aere?
1 “Ka mataku i te Atua, e akakakā iaia.” I raro ake i te aratakianga a te angera, te akakitekiteia nei teia karere “ki te pa enua katoa, e te au kopu, e te au reo, e te au iti-tangata.” No teaa ra? “Kua tae oki ki te ora akautunga anga [a te Atua ra.]” I teia tuatau, te noo nei tatou i roto i taua ‘ora akautunga anga,’ te ka akaoti mai ma te akapouanga o teia akatereanga o te au mea nei. E mea puapinga tikai no te au tangata kia ‘akamori iaia i tei anga i te rangi, e te enua, e te tai, e te au vai pupui ra.’ Kare atu e angaanga e raveia ra i teia tuatau nei e rauka i te akaaite atuia i te tu puapinga me kore te tu rapurapu ma te akakiteanga i te ‘evangelia mutu kore.’ Ae, ko teia te taime i te tutu aere!—Apo. 14:6, 7.
2. Akapeea te au tavini o Iehova e akaari maira e te kite ua ra ratou i te rapurapuanga o te au tuatau?
2 I roto i te ngauru mataiti i topa akenei, kua akapou te au tavini o Iehova e vaitata rai e 12 pirioni ora i roto i te angaanga tutu anga i te Patireia e te angaanga akariroanga i te au tangata ei pipi. E manganui tei akono i te au tauianga ki to ratou oraanga na te piri maata atu anga ki roto i te kokotianga pae vaerua. (Mata. 9:37, 38) I te mataiti i topa akenei, ei akaraanga, kua tere atu i te 850,000 papuritia i te avereti i te marama taki tai tei tavini atu ei painia. No te au painia tamou, te umuumu maira teia kia akapouia e 70 ora i te avereti i te au marama ravarai i roto i te angaanga tutu anga. No te au painia tauturu, e 50 ora te umuumuia ra.
3. Eaa te au tauianga ta te au papuritia e rave putuputu ana e rauka ai i te painia?
3 Akapeea te Painia Anga: I te kiteanga e “te poto nei te tuatau,” te aruaru ra te au painia i te akono i to ratou oraanga kia mama ua. (1 Kori. 7:29, 31) Te akara ra ratou i te au ravenga kia akameangiti mai i te au kaiou kia meangiti mai to ratou taime i te angaanga anga i te ao nei. Ei akaraanga, kua neke atu tetai pae ki roto i te au ngai noo anga meangiti mai. Tetai atu kua akapae ke takiri i te au apinga materia kare e inangaro tikaiia ana. (Mata. 6:19-21) E putuputu ana te taime, ka tipu katoa rai ratou i te au aruaruanga uaorai. Kua rave pouroaia teia ma te akakoroanga i te akapou maata atu i te taime e te akamanakoanga ki te angaanga orometua. (Ephe. 5:15, 16) Ma te aruaru, tetai tu akaatinga uaorai, e te irinakianga ia Iehova na roto i te pure, kua rauka i te au papuritia e manganui i te akanoo i tetai akapapaanga tau tikai te akariro ra ia ratou kia painia.
4. Eaa te au takainga tau te ka tauturu ia koe i te angaanga atu ki te akakoroanga no te painia anga?
4 Ka rauka ainei koe i te painia? Kore e ui atu ki te au painia marama atu e akapeea ratou i te raveanga i te reira? E angaanga kapiti atu kia ratou i roto i te angaanga koro, e kite katoa mai i to ratou rekareka. E akamanako i te au atikara no runga i te painia anga tei kiteaia mai i roto i ta tatou au puka. E akanoo i te au akakoroanga tau noou uaorai te ka rauka i te akonoia ei au toka takainga ki te painia anga. Me e au araianga tetai i teianei te arai ra ia koe mei te tavinianga ei painia, e taiku atu i te reira kia Iehova na roto i te pure, e te patianga kiaia kia tauturu mai ia koe i te akakoreanga i te reira.—Maseli 16:3.
5. Akapeea te painia anga i te tauturu ia tatou i te akameitaki atu i to tatou kite karape i roto i te angaanga orometua?
5 Au Akameitakianga e te Au Rekareka: Te akakokoi ra te painia anga i to tatou kite karape i te taangaanga anga i te Tuatua a te Atua, tei rauka maira i reira te rekareka maata. “I te rauka anga i te akono meitaki i te Tuatua a te Atua no te tuatua mou e akameitakianga tikai te reira,” i karanga ai tetai tuaine painia mapu. “Me painia ana koe, ka taangaanga maata tikai koe i te Pipiria. I teianei me aere ana au mei tera ngutupa ki tera ngutupa, ka rauka ua iaku i te akamanako i te au tuatua tapu te tau ra no te ngutuare tangata tataki tai.”—2 Timo. 2:15.
6. Eaa te terenianga ta te painia anga e oronga maira?
6 Te apii katoa maira te painia anga ia tatou i te au kite karape puapinga tikai no te oraanga. Ka rauka te reira i te tauturu i te aronga mapu i te kite mai e akapeea i te akono meitaki tikai i te tuatau, akapeea i te akonoanga i te au moni, e akapeea e meitaki ei te pirianga ki tetai ke. No te painia anga e manganui tei akatupu maata mai i tetai akaraanga pae vaerua no runga i te oraanga. (Ephe. 4:13) Pera katoa, e kite putuputu mai ana te au painia i to Iehova rima i te angaanga tikai anga no ratou.—Anga. 11:21; Philipi 4:11-13.
7. Akapeea te painia anga i te tauturu anga ia tatou kia akavaitata atu kia Iehova?
7 Penei ko tetai o te au akameitakianga maata rava atu no te painia anga koia oki te tauturu ra te reira ia tatou i te akavaitata atu kia Iehova. Ka rauka teia i te akaora atu ia tatou na roto i te au timataanga. Kua karanga mai tetai tuaine tei akakoromaki atu i tetai tuatau ngata tikai: “Te pirianga vaitata taku i akatupu kia Iehova i roto i te painia anga kua tauturu mai iaku i roto i taua au manamanata ra.” Kua karanga katoa aia: “Kua mataora tikai au e kua akapou oki au i toku oraanga ei aronga mamaata i te tavini tamou anga ia Iehova. Kua akariro te reira iaku kia oronga iaku uaorai i roto i te au mataara e kare roa au i manako mai ana e ka rauka iaku.” (Anga. 20:35) Kia kite katoa mai rai tatou i te au akameitakianga maata tikai ia tatou e rave maroiroi ra i roto i te angaanga puapinga rava roa atu no te tutu anga.—Maseli 10:22.