Akapeea i te Taangaanga Anga i te Akaraanga no te Au Tuatua Akamataanga
1. Akapeea tatou i te manako anga i te akaraanga no te au tuatua akamataanga te oake ia maira?
1 E kite putuputuia ana te au akaraanga no te tuatua akamataanga no te oronga anga i ta tatou au makatini e tetai atu au puka i roto i Ta Tatou Angaanga Patireia. I te piri atu anga i roto i te angaanga orometua, kare tatou e umuumuia kia ripiti i tei tata tikaiia o teia au tuatua akamataanga tamanakoia. Kua oake ia mai te reira kia oronga mai kia tatou i tetai papaanga e eaa ta tatou ka tuatua. Tei matauia e meitaki atu tatou me taangaanga tatou i te au tuatua akamataanga i roto i ta tatou uaorai au tuatua. Ia tatou uaorai i te tuatua anga i roto i te tu natura te tauturu ra i te ngutuare tangata kia maru mai e te akaata ra i te ngakau tae e te irinaki.—2 Kori. 2:17; 1 Tesa. 1:5.
2. Eaa ra tatou e umuumuia ai kia akamanako i te au peu o tetai ngai i te akapapaanga i te au tuatua akamataanga?
2 Akatano i Taau Au Tuatua Akamataanga: Te akakeu maataia ra ta tatou tuatua akamataanga o te tuatua meitaki e te au peu o te reira ngai. Ka rauka ainei ia koe i te aroa atu i te ngutuare tangata e i reira tauru atu i taau tuatua akamataanga i roto i te pukapukaanga, me te inangaro ra te au tangata i te ngai e angaanga ra koe kia akakite tika atu i akakoroanga tikai? E tuke ana te reira mei tetai ngai ki tetai ngai e i tetai taime rai mei tetai tangata ki tetai tangata. Te umuumu katoaia ra te manako tau i te taangaanga anga i te au uianga. Te au uianga te tau ra i roto i tetai au ngai penei ka akariro i te au tangata i tetai ngai ke mai kia emiemi. No reira, ka inangaroia tatou kia akono i te akavaanga meitaki e kia akatano i ta tatou au tuatua akamataanga kia tau ki tei arikiia e te reira ngai.
3. No teaa ra ka akamanako atu ei i te turanga e te manakoanga o te aronga ta tatou e tuatua ra?
3 Kapiti katoa atu, i te akapapaanga no te angaanga koro ka inangaroia tatou kia akamanako i te turanga e te manako anga o te tangata i roto i to tatou ngai e angaanga ra. Ei akaraanga, penei e tuke ana taau uriurianga ia Mataio 6:9,10 ma tetai Katorika maroiroi mei taua ra e rave ra ki tetai tangata kare aia e matau ana i te pure “To Matou Metua.” Ma tetai akamanako anga meangiti ua, ka rauka putuputu ia tatou i te akatano i ta tatou au tuatua akamataanga kia rekarekaia e te tangata ta tatou e aravei ana i roto i te angaanga orometua.—1 Kori. 9:20-23.
4. No teaa ra e umuumuia ai te akapapaanga meitaki?
4 Noatu me ka parani tatou i te taangaanga i te akaraanga no te tuatua anga e vaitata rai ki tei tataia, kare rai e tupauanga no te akapapa meitaki anga. Ka tau tatou kia tatau meitaki i te atikara me kore te pene ta tatou e parani ra i te akaari e kia akara i te au tumu manako te ka akakeu i te inangaro. E kapiti atu i reira i teia i roto i ta tatou tuatua akamataanga. Na te akamatau ua anga ma te akakiteanga meitaki tikai i roto i ta tatou au puka e rauka ai ia tatou i te oronga i te reira ma te maoraora.
5. Eaa ra tatou ka akapapa ai i tetai tuatua akamataanga ke mai, e akapeea tatou i te raveanga i te reira?
5 Tetai Atu Au Araveianga: Kua kotingaia ainei tatou ki te taangaanga ua anga i te au araveianga akapapaia i roto i te akaraanga no te au tuatua akamataanga.? Kare. Me reka atu koe i tetai araveianga akaou mai me kore i tetai irava ke mai, e taangaanga i te reira. Koia tikai i te au makatini, e akarakara i te au tuatau i te akaari atu i te au atikara o roto ake e penei te manako maataia ra i roto i te ngai e angaanga ra koe. Me akaariariia te au tuatua akamataanga no te angaanga koro, ka rauka i te akono i te au akanoonooanga i te akaari i tetai ua atu aravei anga te taangaanga meitakiia ra i roto i te ngai angaangaia ra o reira. Penei na roto i teia mataara ka tauturuia te katoatoa i te oronga meitaki tikai i te tuatua meitaki.