Tutu Aere Anga mei Tera Are ki Tera Are
1. Eaa te uianga tei akatupuia te piri atura ki te angaanga orometua mei tera are ki tera are, e no teaa ra?
1 “Te aronga tei tu katau i roto i te au tu tukeke i te totoaanga i te Tuatua Mou ka akatika e te angaanga tutu anga mei tera are ki tera are ma te puka MILLENNIAL DAWN, i teia tuatau nei, ko te mataara puapinga rava atuia i te akakitekite aere anga i te Tuatua Mou.” Taua tuatua ra mei te Tiurai 1, 1893, itiu o te Zion’s Watch Tower te akakite maira i te puapinga o te angaanga orometua mei tera are ki tera are. Kua kite mai te au tangata takapini i te ao katoa i te reira ei akatakaanga o te Au Kite o Iehova. Te puapinga nei rai ainei teia ravenga, i te mea e i tetai au enua kua ngata rava atu i te kite mai i te au tangata i te kainga?
2. Eaa te tumuanga Tuatua Tapu no te tutu aere anga mei tera are ki tera are?
2 Tau ki te Tuatua Tapu e te Puapinga: Te tutu aere anga mei tera are ki tera are e tumuanga Tuatua Tapu. Kua ikuiku a Iesu e 70 pipi kia aere taki rua ratou ki te au are o te au tangata. (Luka 10:5-7) I muri poto ua mai i to Iesu mate anga, te akakite maira te Pipiria i tana au pipi: “Kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.” (Anga. 5:42) Kua maroiroi katoa te apotetoro ko Paulo i te apiianga mei tera are ki tera are.—Anga. 20:20.
3. Eaa te au apinga meitaki i te tutu aere anga mei tera are ki tera are?
3 Te tutu aere anga mei tera are ki tera are ko te ravenga maata rai i teianei i te totoaanga i te tuatua meitaki i teia tuatau. Te tauturu ra te reira ia tatou i te ‘kimi atu’ i te aronga tau na roto i tetai tu akanoo meitakiia e te mako. (Mata. 10:11) Te maataanga te au tangata te akangaroi ra i te kainga. Te tuatuaanga kia ratou mata ki te mata—te akarongo anga i to ratou reo, te kiteanga i te au akatutuanga o to ratou mata, e te kiteanga i te au apinga takapini ia ratou—te akatika ra te reira ia tatou i te kite meitaki i to ratou au inangaro e te au apinga i runga i to ratou manako. Te oronga maira te reira kia tatou i te atianga meitaki tikai kia piri roa atu i roto i tetai pukapukaanga.
4. Eaa ta tatou ka rave kia puapinga rava atu ta tatou tutu aere anga mei tera are ki tera are?
4 Akono i te Au Tauianga Uaorai: Kua inangaro rai te apotetoro ko Paulo i te akono i te au tauianga uaorai “no te evangelia.” (1 Kori. 9:23) Penei ka rauka ia tatou i te taui i ta tatou papaanga kia tutu aere me i te akaraanga e maata ake te au tangata i te kainga, penei i muri roa mai i tera ra, i te au openga epetoma, me kore i te au orote. E rekoti i te au kainga e kare e tangata, e tamata akaou a tetai ra ke i roto i te epetoma me kore i tetai ora ke i roto i tera ra.
5. Akapeea te aronga ma te au kotingaanga i te pae kopapa i te kapitiia atu anga i roto i te angaanga mei tera are ki tera are?
5 Noatu te aronga ma te au kotingaanga i te pae kopapa penei ka rauka ia ratou i te piri atu i te akakitekite aere anga mei tera are ki tera are. Penei ka rauka ia tatou i te parani kia aru mai taua aronga ra ia tatou ki te au kainga e mama ua i te itae, tukuanga ia ratou i te angaanga ua ki to ratou maroiroi. No te potopoto ao o tetai tuaine kua akatika ua te reira iaia kia atoro atu e tai ua are i te au apa ora. I na, mei teaa tikai tona mataora e te rekareka i tona kapitiia atu anga ki roto i taua pupu ra!
6. Eaa tatou ka akariro ei i te tutu aere anga mei tera are ki tera are ei tuanga matauia o ta tatou angaanga orometua?
6 E manganui te aronga mei te tu mamoe rai te kiteaia nei rai i roto i te angaanga mei tera ngutupa ki tera ngutupa. Kua topapa atu tetai papuritia i tetai ngutupa e kua akakiteia mai kiaia: “E tomo mai ki roto. Kua kite au e koai koe. No te pure ana au kia tono mai te Atua i tetai tangata kia tauturu iaku, e oti kua rongo atu au i te topapa i te ngutupa. Kua rongo mai aia iaku e kua tono mai aia ia koe.” Te akapapu maira te au tupuanga e te akameitaki nei a Iehova i teia ravenga no te akakitekite aere anga. (Mata. 11:19) E tauta tikai kia akariro i te tutu aere anga mei tera are ki tera are ei tuanga matauia o taau angaanga orometua.