Ka Rauka Ainei ia Koe te Piri Atu ki te Akakitekiteanga i te Aiai?

1. Kia tau ki tetai tangata kite karape, eaa te taime e aere ana te apotetoro ko Paulo i te tutu aere mei tetai are ki tetai?

¹ Kia tau ki te puka Daily Life in Bible Times, e piri ua ana te apotetoro ko Paulo ki roto i te angaanga orometua mei tetai are ki tetai, “mei te ora a i te aiai e tae ua atu ki te roaanga po.” Kare tatou i kite e me ko teia rai ta Paulo akanoonooanga, kua kite ra tatou e kua rave puareinga ua a Paulo i teia “no te evangelia.” (1 Kori. 9:19-23) Kua kapiti mai teia i te akanooanga i tana au angaanga no te aere anga mei tetai are ki tetai, i te taime ka rauka iaia i te tuatua ki te maataanga o te tangata.

2. Eaa ra i meitaki ei kia piri ki roto i te angaanga orometua i te au aiai?

² E peu matau na te au papuritia i te au ngai e manganui, i te aere mei tetai are ki tetai i te au popongi o te epetoma. Inara, e tuatau meitaki ainei teia i roto i toou ngai? Akakite mai tetai painia no runga i tana ngai tutuanga e: “Kare e maata ana te tangata i te kainga i te au popongi. Inara ka kite koe ia ratou i te kainga i te aiai.” Penei e atianga meitaki kia akakitekite i te tuatua meitaki i te aiai, tei te kainga te au tane. Maataanga o te taime te akangaroi ra te tangata ngutuare e ka inangaro ratou i te pukapuka. Me ka meitaki i te rave i te reira, kia akanoo te aronga pakari i tetai au uipaanga no te angaanga tutu i te aiai.

3. Akapeea tatou me akaari i te tu akamanako meitaki me piri atu ki roto i te akakitekiteanga i te aiai?

³ Akamanako Meitaki: Me piri ki roto i te akakitekiteanga i te aiai, e mea puapinga kia akamanako meitaki. Ei akaraanga, me kite koe e kare teia i te taime meitaki no te tangata ngutuare, mei te taime kaikai i te aiai, e mea meitaki kia karanga e ka oki akaou mai koe. Me kua poiri, e tu ki te ngai ka kite mai te tangata ngutuare ia koe, e kia akakite e koai koe e taau akakoroanga. E mea puapinga katoa kia angaanga kapiti e tetai tokorua me kore ei pupu, e kia aere na te au mataara e mori tetai kare ko koe anake ua. Auraka e aere i te taime poiri, ka tamanamanata koe i te tangata ngutuare e aere ra ka moe. (2 Kori. 6:3) Me kare e meitaki ana tetai ngai me poiri, e tutu aere na reira i te taime kare i poiri ake.​—Mase. 22:3.

4. Eaa te au akameitakianga ka rauka mai mei te akakitekiteanga i te aiai?

⁴ Au Akameitakianga: E mataora atu te angaanga orometua me rauka ia tatou i te tuatua ki te tangata. E te maata atu ta tatou akakitekiteanga, te maata atu ia te au atianga no tatou kia tauturu i etai ke “kia ora, e kia rauka te kite i te tuatua-mou.” (1 Timo. 2:3, 4) Ka rauka ainei ia koe i te akatano i taau papaanga kia piri atu ki te akakitekiteanga i te aiai?