Kimi Anga i te Aronga e Tau
1 Ta Iesu au ikuikuanga no te rave anga i te angaanga tutu anga te oronga maira te reira i tetai akaaoanga kia tatou. Kua karanga aia: “E te oire e te vila ta kotou e tomo, e ui atu i to reira tangata e tau.” (Mata. 10:11) Ma te tangata i teia tuatau e meangiti e te meangiti ua atura te taime e pou nei ki te kainga, ka akapeea ra e rauka ai ia tatou i te rave kia puapingaia teia kimianga?
2 E Makitoro Marie i Taau Ngai ka Angaanga: E akamata na te makitoro marie anga i taau ngai ka angaanga. Aea ra te taime tau atu no te tangata i te noo ki te kainga? Ki ea te ngai ka kitea ai ratou i te ra? E ra ainei tetai o te epetoma me kore e taime ainei tetai o te ra penei ka ariki ua mai ratou i tetai atoroanga? Na te akatanotano anga i taau angaanga orometua ki te mataara matauia e te au turanga o te tangata i roto i te ngai e angaangaia ra e tauturu ia koe kia akatupu kia maata roa atu te meitaki.—1 Kori. 9:23, 26.
3 E maata te au papuritia tei kite i te puapinga i te au ora aiai. Tetai aronga o te ngutuare e maru ake e te varenga ake i te akarongo mai i tera taime. Me e iti ua te au ora avatea aiai i te au marama anu, penei ka puapingaia te akakitekiteanga na roto i te terepaoni (i te ngai ka akatikaia) i te aiai. Te angaanga ki te au ngai pitiniti e te akakitekiteanga i te au ngai o te papuriki e au mataara katoaia e tae atu ei te tuatua meitaki ki te tangata.
4 I tetai marama o te angaanga takake, kua akamata atu tetai putuputuanga i te akakitekiteanga i te avatea aiai i te au Maanakai e te au Tapati e te akakitekiteanga i te aiai i te au Ruitoru e te au Varaire. Kua akaaere katoa ratou i te akakitekiteanga na roto i te terepaoni e te akanoo kia angaanga i te ngai pitiniti. Kua riro teia au akanoonooanga nei i te akatupu maata atu i te tu oraora no te angaanga orometua e kua iki te putuputuanga kia rave tamou ua atu rai ia ratou.
5 Kia Maroiroi i te Oki Ua Rai: Me te riro ra ei akaaoanga te kite i te tangata i te kainga me oki i te atoro i roto i ta kotou ngai e angaanga ra, e tamata i te akanoo i tetai taime takake no te oki i te atoro akaou i te openga o te au atoroanga tataki tai, te ka kapiti mai i te atoroanga mua. E oti, kia papu i te tamou ki te akanooanga o te taime. (Mata. 5:37) Me ka tau, penei e pati koe i te numero terepaoni o te tangata ngutuare. Ka tauturu katoa teia ia koe i te aravei akaou atu i tera tangata.
6 Ta tatou au tautaanga maroiroi i te kimi i te aronga e tau e te oki ua ra rai i te akono i te inangaro ta tatou i kite e mea papu roa e ka rauka mai ta Iehova akameitakianga.—Maseli 21:5.