Akaari i te Tu Akameitaki no te Apinga Aroa Maata Roa Atu a te Atua
1. Eaa tikai tatou ka akameitaki ei ia Iehova?
1 I roto i ta Iehova “au mea memeitaki” e manganui, ko te mea maata rava atu ko te oko tei orongaia mai e tana Tamaiti akaperepere. (Iako. 1:17) Na te reira i rauka ai te au akameitakianga e manganui, kapiti mai i te akakore anga i ta tatou ara. (Ephe. 1:7) Ka akameitaki ua rai tatou i teia. I te tuatau Akamaaraanga, e akataka meitaki tatou i tetai taime i te akamanakonako no runga i teia apinga aroa oko maata.
2. Akapeea tatou me akamaata atu i te tu akameitaki no te oko no tatou uaorai e no te ngutuare?
2 Akamaata Atu i te Tu Akameitaki: Ei akamaata atu i te tu akameitaki o toou ngutuare tangata, kore ei e akapou i tetai taime o te Akamorianga a te Ngutuare i te aiai, i te uriuri i te manako no runga i te oko, i te au epetoma i mua ake i te Akamaaraanga i roto ia Mati ra 30? Uriuri katoa te ngutuare tangata i te tatauanga takake o te Pipiria no te Akamaaraanga i te au ra. Akamanako tataki tai e akapeea kotou i puapingaia ai mei te oko, e eaa toou manako no runga ia Iehova, ia koe uaorai, ia etai atu, e te tuatau ki mua. Ka puapinga katoaia koe me tamoumou i nga imene ou, te numero 8 e te 109 ka taangaangaia i ko i te Akamaaraanga.—Sala. 77:12.
3. Ka akapeea ra tatou me akaari i to tatou tu akameitaki?
3 Akaari i te Au Tu Akameitaki: Ka riro te tu akameitaki no te oko, ei akakeu ia tatou kia akakite ki etai ke no runga ia Iehova e tona aroa maata i te tono mai anga i tana Tamaiti. (Sala. 145:2-7) I roto ia Mati, Aperira, e Me, e akaari ana tetai au ngutuare tangata i to ratou tu akameitaki na te akanoo anga kia painia tauturu tetai mema o te ngutuare. Me kare e rauka, ka rauka ainei ia koe i te ‘taporoporo i te tuatau’ kia akamaata atu i taau tuanga no te angaanga orometua? (Ephe. 5:16) Ka akakeu katoa te tu akameitaki ia tatou kia tauturu i etai ke kia aru mai ia tatou ki te Akamaaraanga. (Apo. 22:17) Akamata i te tata i tetai papaanga no te aronga taau ka atoro akaou, te aronga apiipii Pipiria, te kopu tangata, te au oa angaanga, e te au taeake ka patiia, e oti ka rave ei i taau ka rauka i roto i teia kamupeini takake no te Akamaaraanga.
4. Na roto i teea au mataara e rauka ai ia tatou te taangaanga meitaki i te tuatau Akamaaraanga?
4 Te oronga maira te tuatau Akamaaraanga i te au atianga ou no tatou kia akaari kia Iehova i te maata o ta tatou akameitakianga no tana apinga aroa ki te tangata nei. Kia taangaanga mari tatou i teia tuatau i te akamaata atu e i te akaari i to tatou tu akameitaki no te oko e no te katoatoa rava o “te meitaki maata ope kore o te Mesia.”—Ephe. 3:8.