Akaari i ta Tatou Akameitakianga
Ka Raveia te Akamaaraanga ia Aperira Ra 17
1. Eaa te manako ngakau o te tata taramo ka tau meitaki ei no te tuatau Akamaaraanga?
1 Akakeuia e te au angaanga aroa e te akaora anga e manganui a Iehova, kua ui te tata taramo e: “Eaa ra taku e apai atu na Iehova, i te au takinga-meitaki katoa nona iaku nei?” (Sala. 116:12) Teia tuatau, e maata atu te au tumu a te au tavini o te Atua no te akameitaki. No te au anere mataiti i muri ake i te tataia anga teia au tuatua akauruia, kua oronga a Iehova i te apinga aroa maata roa atu ki te tangata—ko te oko. Ia tatou e akapapa ra i te akamaara i te matenga o Karaiti ia Aperira Ra 17, e tumu tau to tatou kia akaari i to tatou tu mareka uaorai.—Kolo. 3:15.
2. Eaa tetai au tumu i akameitaki ei tatou i te oko?
2 Au Akameitakianga no te Oko: No te oko i rauka ai ia tatou “te ara i akakoreia.” (Kolo. 1:13, 14) No reira katoa i rauka ai ia tatou te akamori ia Iehova ma te akava ngakau ma. (Ebe. 9:13, 14) Rauka katoa ia tatou te tuatua ma te mataku kore e Iehova me pure tatou kiaia. (Ebe. 4:14-16) Ka rauka i te aronga e taangaanga ra i te akarongo i roto i te oko te ora mutu kore!—Ioa. 3:16.
3. Akapeea tatou me akaari kia Iehova i ta tatou akameitakianga no te oko?
3 Akaari i te Akameitakianga: Tetai mataara i te akaari i ta tatou akameitakianga oonu, koia oki kia akamanako i te tatauanga Pipiria no te Akamaaraanga i te ra tataki tai, e kia akamanako oonu i te reira. Kua tataia te atikara “Kua Papa Ainei Koe no te Ra Puapinga Rava Atu o te Mataiti?” i roto i te Watchtower o Peperuare 1, 2011 ei tauturu ia tatou kia rave i teia. E akakite katoa tatou kia Iehova na roto i ta tatou pure ngakau tae i ta tatou akaperepere no te oko. (1 Tesa. 5:17, 18) Me tae mai tatou ki te Akamaaraanga i te akono anga i te akauenga a Iesu, te akaari ra tatou i te tu mareka. (1 Kori. 11:24, 25) Tetai atu, ka rauka ia tatou te aru i te aroa maata o Iehova na te pati anga i te au tangata e manganui kia uipa mai e tatou.—Isa. 55:1-3.
4. Eaa ta tatou ka tauta i te rave?
4 Kare te au tavini akameitaki o Iehova e akamanako i te rave anga i te Akamaaraanga e ko tetai uipaanga ua. Ko te uipaanga puapinga rava atu te reira o te mataiti! I te Akamaaraanga e vaitata maira, kia aite ta tatou tautaanga mei ta te tata taramo rai i tata e: “E akameitaki ia Iehova, e taku vaerua, e auraka tona katoa ra au takinga-meitaki e akangaropoinaia.”—Sala. 103:2.