Ka Akono Ainei Koe i Teia?
Tuatau Akamaaraanga ei Akaari i to Tatou tu Akameitaki
1. Eaa te atianga takake no tatou i te tuatau o te Akamaaraanga?
1 Te Akamaaraanga i roto ia Aperira ra 14, e atianga takake teia no tatou i te akatupu e te akaari i te tu akameitaki no to Iehova tu takinga meitaki. I roto ia Luka 17:11-18 te akaari maira i to Iehova e to Iesu manako no runga i te tu akameitaki. Te mea tangi, e tai rai tangata i roto i te tai ngauru repera tei oki mai i te akameitaki ia Iesu. A te tuatau ki mua, ka riro te atinga oko o Iesu ei ravenga no te rapakau anga i te au maki katoatoa, e ka riro te oraanga mutu kore ei mea tika tikai! Mea papu e, ka akameitaki tatou ia Iehova i te au ra ravarai no taua au akameitakianga ra. Ka akapeea ra tatou te akaari anga i to tatou tu akameitaki i te au epetoma e tu mai nei?
2. Ka akapeea tatou me akatupu i te tu akameitaki no te oko?
2 Akatupu i te tu Akameitaki: Ka akamata te tu akameitaki i te tupu na roto i ta tatou e manako ra. Ei tauturu ia tatou kia akatupu i te tu akameitaki no te oko, e akara i te papaanga no te tatauanga Pipiria no te Akamaaraanga i roto i te 2014 Calendar of Jehovah’s Witnesses e te Examining the Scriptures Daily 2014. Ka tuku katoaia teia papaanga ki runga i te jw.org i mua ake i te Akamaaraanga. E mea meitaki kia uriuri te ngutuare tangata i teia. Ka maata atu to tatou ariki rekareka no te oko. E na teia e akakeu ia tatou kia akaari i te tu akameitaki.—2 Kori. 5:14, 15; 1 Ioa. 4:11.
3. Eaa tetai au mataara ka rauka ia tatou i te akaari i to tatou tu akameitaki i te tuatau o te Akamaaraanga?
3 Akaari i te tu Akameitaki: Na roto i ta tatou ka rave e akaariia ai te tu akameitaki. (Kolo. 3:15) Kua tauta te tangata repera i te kimi ia Iesu e te akameitaki iaia. E kare e kore no te mea kua ki tona ngakau i te rekareka, kua akakite aere aia i te temeio ta Iesu i rave i te rapakau iaia. (Luka 6:45) Ka riro ainei te tu akameitaki no te oko ei akakeu ia tatou kia piri maroiroi ki roto i teia angaanga puapinga i te akakite aere no runga i te Akamaaraanga? Tetai mataara meitaki i te akaari i to tatou tu akameitaki koia oki, na roto i te painia tauturu me kore te akamaata atu anga i ta tatou angaanga orometua i te tuatau o te Akamaaraanga. I te aiai o te Akamaaraanga, ka rauka ia tatou i te akaari i to tatou tu akameitaki na te aravei anga i te aronga ou tei tae mai e kia pau i ta ratou au uianga.
4. Akapeea tatou te akariro anga i teia Akamaaraanga ei atianga te kare roa e ngaropoina ia tatou?
4 Ko teia ainei ta tatou Akamaaraanga openga? (1 Kori. 11:26) Kare tatou i kite. Tera ra, kua kite tatou e me ko teia te Akamaaraanga openga, kare roa e rauka ia tatou tetai atianga takake mei teia rai te tu i te akaari i to tatou tu akameitaki. Ka akono ainei koe i te reira? Kia riro te au tuatua a to tatou vaa e te manako o to tatou ngakau ei akamareka ia Iehova, Tei Oronga aroa ua mai i te oko no tatou.—Sala. 19:14.