‘Kai i te Ora Mou’
1. Akapeea te porokaramu o te ra akaputuputuanga takake i oti akenei, i te tauturu anga ia koe e etai ke?
1 Muri ake i te tae anga ki ta tatou ra akaputuputuanga takake, e karanga ua ana tatou e, “Ta matou tikai tera e inangaro nei!” Kua ripoti tetai akaaere kotinga e i muri ake i te akarongo anga i te porokaramu, kua akakite tetai aronga i roto i tana ngai kotinga i te manako kia akamaata i ta ratou angaanga orometua. Kua tuatua tetai akaaere tutaka e, “Kua tauturu te reira ia matou kia manako meitaki e teiea matou i roto i teia tuatau, ia matou e akara akaou ra i ta matou au ikianga i roto i te oraanga.” Kua karanga tetai e, “Kua akakite tetai au papuritia i te manako e e akamaaraanga taka tikai teia kia ratou kia akapapu e te akara mou ra ki runga i te mea puapinga maata rava atu, te angaanga orometua.” Akapeea te ra akaputuputuanga takake i te tauturu anga ia koe?
2. Eaa te ka akamanakoia i roto i te porokaramu o te mataiti tavini anga e tu maira?
2 Te porokaramu o te mataiti tavini anga e tu mai nei ka riro katoa e ko ta tatou e inangaro ra. Te tumu tuatua e “Irinaki ia Iehova,” no roto ia Salamo 118:8, 9. Teia tetai au tumu manako ka uriuriia: “E Punanga a Iehova i te Tuatau Tumatetenga,” “Tauturu i Etai Ke kia Kimi i te Ngai Akaruruanga i Raro i Nga Peau o Iehova,” “Aru ia Iehova i te Oronga i te Ngai Akaruruanga,” “Au Mapu, Akariro ia Iehova ei Irinaki Anga no Kotou!” e “To Tatou Parataito Vaerua—E Ngai Akaruruanga na Iehova i Akanoo.”
3. Akapeea tatou e puapinga pu tikaiia ai no tei tae atu?
3 Kia Puapingaia: Me akakiteia te ra, akapapuia te au parani kia tae atu, e e pati i taau aronga apii Pipiria kia aru ia koe. E rauka ai ia tatou te “uua anga i te ua ma te akakoromaki,” ka inangaroia tatou kia tamou i ta tatou ka akarongo. (Luka 8:15, NW) No reira, akarongo meitaki ki te porokaramu, e tata poto ua no runga i te au tumu manako e te ikuikuanga taau e parani ra i te taangaanga i roto i toou oraanga e te angaanga orometua. Akapou i te taime i muri i te akaputuputuanga i te uriuri i te porokaramu ei pamiri, e e akamanako i te au mataara taka meitaki taau e toou pamiri ka taangaanga i te akakiteanga.
4. Eaa tatou ka tapapa atu ei ki ta tatou ra akaputuputuanga takake e tu mai nei?
4 Mei tetai kai reka e te meitaki, kua akapapaia te ra akaputuputuanga takake o teia mataiti ma te aroa e te manako tau. Kia akameitaki mai a Iehova i taau tautaanga kia tae atu e kia puapinga mei teia ‘kai i te ora mou’ ei akamatutu i te au orometua Kerititiano i te pae vaerua.—Mata. 24:45.