E Ririnui te Tuatua a te Atua
1. Eaa te tumu manako no te ra akaputuputuanga takake no te mataiti tavinianga o te 2014?
1 Kare te Pipiria i aite ki tetai ua atu apinga ta te tangata apa ua nei i maani, mari ra e mana ririnui to te Pipiria i te taui ia tatou, i te akarotai i to tatou aerenga manako e ta tatou au peu ki to Iehova anoano. Mei teaa ra te ririnui i te Tuatua a te Atua? Akapeea tatou te taangaanga meitaki anga i te mana ririnui o te Pipiria i roto i to tatou oraanga? Akapeea tatou te taangaanga meitaki anga i te reira ei tauturu i etai ke? Te irinaki nei matou e ka akamatutuia te katoatoa i te pae vaerua me uriuriia teia au manako a te ra akaputuputuanga takake tei akapapaia no te mataiti tavinianga 2014. Te tumu manako “E Ririnui te Tuatua a te Atua,” tei raveia mai no roto ia Ebera 4:12.
2. Kia akarongo tatou i te au pauanga ki teea au uianga?
2 Kimi i te au Pauanga no Teia au Uianga: Ia koe e akarongo ra ki te porokaramu, tata i te au pauanga ki te au uianga i raro akenei.
• No teaa ka rauka ai to tatou irinaki i roto i te Tuatua a te Atua? (Sala. 29:4)
• Akapeea tatou e kite ei i te mana ririnui o te Tuatua a te Atua i roto i to tatou oraanga? (Sala. 34:8)
• Akapeea tatou me taangaanga i te mana ririnui o te Tuatua a te Atua i roto i ta tatou angaanga orometua? (2 Timo. 3:16, 17)
• Akapeea e rauka ai ia tatou i te kopae i te akakeuanga pikikaa o to Satani ao? (1 Ioa. 5:19)
• Ia koe e mapu ra rai, ka akapeea koe e puapingaia ai i te pae vaerua? (Iere. 17:7)
• Akapeea tatou e maroiroi ei, noatu te paruparu ra tatou? (2 Kori. 12:10)
• Eaa te ka anoanoia kia rauka ia tatou te akatupu ua atu rai te au tauianga i roto i to tatou oraanga, noatu kua roa te vai ua anga to tatou au tu viivii, e ta tatou au peu kino? (Ephe. 4:23)
3. Kapiti mai ki te akarongo anga ki te porokaramu, eaa atu tetai au mataara ka puapingaia tatou mei te ra akaputuputuanga takake?
3 E maata ua atu te meitaki ka rauka ia tatou me akarongo ki teia au akoanga puapinga! Ka oronga katoa mai teia akaputuputuanga takake i te tuatau no tatou kia akaoaoa atu, e kia ariki atu i te au taeake e te au tuaine mei te au putuputuanga ke mai. (Sala. 133:1-3; 2 Kori. 6:11-13) No reira e akataka i tetai taime i te kapiti atu ki te au oa muatangana e ki te au oa ou. Me tukuia mai tetai vaa tuatua mei te akaaere tapere te tu, me kore tetai taeake no Betela ki ta tatou ra akaputuputuanga takake, kia ariki maoraora atu tatou ia raua ko tana vaine. E maata te au tumu tau no tatou kia tapapa atu i te ra akaputuputuanga takake!