Au Poroutia ka Orongaia i Roto ia Noema
1. Eaa ta tatou ka oronga i roto ia Noema?
1 Ia tatou e kite maira i te tupuanga o te au totou Pipiria, ka mataora tatou i to tatou manakonakoanga Patireia, e ka akakeuia tatou kia tuatua atu i te reira ki tetai ua atu ka akarongo mai. (Luka 6:45; Roma 12:12) Te akaari anga i te poroutia i roto i te ngai tutuanga ia Noema, tetai mataara i te akakite i to tatou manakonakoanga Patireia ki etai ke, mei ta Iesu i akaue mai.—Mata. 24:14.
2. Eaa te akaaoanga kia tatou uaorai no runga i te au poroutia?
2 I te mea e e maata ta tatou au poroutia karakara e te puapinga ka iki, teea i reira te ka tau meitaki no te aronga i roto i ta tatou ngai tutuanga te ka akakeu i to ratou inangaro? Kia taangaanga meitakiia te au poroutia, ka inangaroia tatou kia kite meitaki e eaa to roto i te reira. Ka tauturu teia uriurianga poto e aru mai nei ia tatou.
3-6. Akapeea tatou me oronga i te (a) poroutia “I na!”? (e) poroutia Kia Matakite!? (ng) poroutia Umuumu?
3 “I na! Te Akariro Nei Au i te Au Mea Ravarai ei Mea Ou”: Te akatutu maira teia poroutia i te parataito e te akakeu ra i te akameitakianga no te Pipiria e Tei Anga ia tatou. Muri ake i te uriuri anga i te tumu i akatika ai te Atua i te kino, te akamou ra te reira ki runga i te apiianga Pipiria puapinga e toru: te oko, te tuakaouanga, e te Patireia. E au uianga katoa tei raro roa i te au kapi o teia poroutia, te akangoie ra ia tatou kia rave i tetai apii Pipiria i roto i te reira.
4 Kia Vai Matakite ua Atu! Penei ka karanga koe e: “Maata te tangata e manakonako ana i te au manamanata kino e te au tupuanga mataku e kitea ra i teia tuatau. [Oronga i tetai akaraanga e kitea ra i toou ngai.] Kua kite ainei koe e ko te reira au apinga, e tuanga no tetai akairo i te ao katoa te akaari ra e, kare roa atu ka akatere te kavamani a te Atua i te au mea o te enua? [Tiaki no te pauanga. E oti, tatau i tetai irava tuatua tau mei ia Mataio 24:3, 7, 8; Luka 21:7, 10, 11; me kore 2 Timoteo 3:1-5.] Te uriuri ra teia poroutia i te tumu tikai ka inangaroia ai te tu rapurapu kia matakite i te puapinga o teia au tupuanga i teianei.”
5 Tetai tuatuaanga, penei e karanga e: “Maata te tangata i teia tuatau e taitaia ra i te au tupuanga mataku me kore i te tu ngere anga kino kia ratou uaorai. Manako tetai pae e, eaa ra te Atua kore ei e o mai i te arai i taua au tupuanga ra. Te akapapu maira te Pipiria ia tatou e kare roa atu ka rave te Atua i te akakore i te tamamae anga i te tangata. [Tatau ia Apokalupo 14:6, 7.] Kite ra koe i te aiteanga o te akavaanga a te Atua no te tangata. [Tatau ia 2 Petero 3:10, 13.] Te oronga maira teia poroutia i te akakiteanga maata atu no runga i teia tumu manako puapinga.”
6 Eaa ta te Atua e Umuumu Maira ia Tatou? Penei e taangaanga i teia: “Toou manako e kua akakoro te Atua ia tatou kia koropiniia e te au manamanata mei ta tatou e aro atu nei i teia tuatau? [Tiaki no te pauanga. E oti tatau ia Mataio 6:10.] Akamanako ana koe e eaa tikai te Patireia o te Atua?” Akara i te Apiianga 6, e e tatau i te au uianga e uiia ra i te akamataanga o te apiianga. Akamata i tetai uriurianga i te apiianga, me kore akanoo i te rave i te reira me atoro akaou. Kia o atu tatou pouroa i te oronga pu tikai i te au poroutia i roto ia Noema!