Akamaaraanga i te Oko ma te Akameitakianga
1, 2. Eaa tatou ka akamaara ai i te oko ma te akameitakianga?
1 I te akarongo anga ki te akaueanga a Iesu, ka uipa mai te au Kerititiano takapini i te ao katoa i muri ake i te opunga ra i te Maanakai, Mati 22, 2008, kia akamaara i te mate anga o Iesu Karaiti. (Luka 22:19; 1 Kori. 11:23-26) Kua akakeuia tatou kia rave i te reira no te akameitakianga oonu no te au apinga pouroa tei akatupuia i taua ra ra e 1,975 mataiti i topa. Na te akono tamou anga i te tiratiratu apa kore na roto i tetai mate kino pakari i runga i tetai rakau tamamaeanga, kua akatapu a Iesu i te ingoa o tona Metua, i te oronga mai anga i te pauanga meitaki rava ki te au akakinoanga a Satani.—Iobu 1:11; Mase. 27:11.
2 Kua akamana te toto akamaringiia o Iesu i te koreromotu ou, kia rauka i te au tangata apa kia angaiia ei au tamariki na te Atua ma te manakonakoanga i te tutaraanga ma Karaiti i roto i tona Patireia i te rangi. (Iere. 31:31-34; Mare. 14:24) Pera katoa, te oonu o to te Atua aroa no te au tangata ravarai, kua kite puia i roto i tona akaatinga anga i tana Tamaiti akaperepere maata, mei ta Iesu uaorai i akamarama atu kia Nikodemo.—Ioa. 3:16.
3. Akapeea te aronga ka tae mai ki te Akamaaraanga e puapingaia ai?
3 Pati Atu i Etai Ke: Te akakite maira te itiu o Tianuare o Ta Tatou Angaanga Patireia e kia tata i tetai papaanga o te au taeake e kia pati tataki tai tikai ia ratou. Kua akamata ake ainei koe i te pati i te aronga i runga i taau papaanga? Te akono ra ainei koe i te au akanoonooanga kia piri pu tikai ki roto i te kamupeini te ka akamata a te Mati 1 kia pati i te au tangata ki te Akamaaraanga? Ka akarongo te aronga ka tae mai ki tetai akakiteanga Tuatua Tapu te ka akamaroiroi i te akarongo i roto i te oko, te taki atura ki te ora mutu kore.—Roma 10:17.
4. Eaa tatou ka anoanoia ai kia tae vave no te Akamaaraanga?
4 Kia parani te aronga katoatoa te ka rauka, kia tae vave atu i te oronga i te turou anga maanaana ki te aronga tei ariki i te patianga takake. No te mea e e maata te aronga e tae mai ana ki te Akamaaraanga, e mea puapinga kia akamanako meitaki tatou i te aronga ou e tetai atu katoa e aere mai ana ki te au uipaanga i tetai taime.
5. Akapeea koe me akapapa i toou ngakau no teia atianga?
5 Akapapa i Toou Ngakau: Te vai ra tetai papaanga i roto i te Examining the Scriptures Daily—2008 e te 2008 Calendar no te tatauanga Pipiria takake no te Akamaaraanga te ka akamata ia Mati 17. I te akamanako anga i te au tupuanga puapinga tei tupu i te au ra openga o to Iesu oraanga i te enua nei, ka tauturu ia koe i te akapapa i toou ngakau no te akonoanga i te Akamaaraanga. (Ezera 7:10) Na te akamanako anga ma te pure katoa i teia au tataanga Pipiria, ka akaoonu i toou akameitakianga no te aroa o Iehova e tana Tamaiti i te oronga mai anga i te oko.—Sala. 143:5.
6. Akapeea te akamaata atu anga i ta tatou akameitakianga no te oko i te akakeuanga ia tatou?
6 I te Akamaaraanga e vaitata maira, kia akapapa meitaki tikai tatou ia tatou uaorai e tetai atu no teia atianga puapinga. I te akamaaraanga i te oko ma te akameitakianga, ka akaketaketa i to tatou pirianga kia Iehova e tana Tamaiti. (2 Kori. 5:14, 15) Ka akakeu katoa te reira ia tatou kia aru ia raua i te akaarianga i te aroa akaatinga uaorai no etai ke.—1 Ioa. 4:11.