I Painia Tamou ana Koe i te Taime Mua?
1. Eaa te tikaanga ta te manganui o te tangata i rekareka, inara eaa ta etai i tau kia rave?
1 I te au mataiti i aereia, tauatini ua atu tangata tei rekareka i te tikaanga no te “apiianga e te akakitekiteanga i te tuatua meitaki” ei au orometua tamou. (Anga. 5:42) Tetai pae ra, kua akamutu ratou i te angaanga painia no te au tumu ke. Me i painia ana koe i te taime mua, kua akara ainei koe i toou au turanga i teianei kia kite e me ka rauka ia koe i te piri akaou atu ki roto i te angaanga painia?
2. Eaa ra ka anoanoia ai te aronga tei painia i te taime mua kia akara i to ratou turanga i teianei?
2 Taui te Au Turanga: Penei kua ngaro taua turanga ra, tei akariro ia koe kia akamutu i te painia. Ei akaraanga, me kua akamutu koe i te painia no te mea kare e taeria e koe te 90 ora i te marama, ka rauka ainei ia koe i te akamata akaou no te mea kua topa te ora tei umuumuia ki te 70? Kua akaiti ainei koe i toou ora angaanga moni me kore au apainga o te pamiri mei te taime i akaruke ei koe i te angaanga painia? Tetai tuaine tei akaruke i te angaanga painia no te makimaki, kua rauka iaia i te akamata akaou i te 89 anga tona mataiti. Kare aia i aere ki roto i te are maki no te tai mataiti e kua manako aia e ka rauka iaia i te akamata akaou i te painia!
3. Akapeea te au mema pamiri i te angaanga kapiti kia tauturu i tetai i roto i te pamiri kia painia?
3 Penei kare koe i painia ana, inara kua akamutu tetai o toou pamiri i te painia kia rauka i te akono i tetai mema pamiri, mei tetai metua ruaine. (1 Timo. 5:4, 8) Me koia ia, ka rauka ainei ia koe me kore tetai atu i roto i te pamiri i te tauturu? Kore ei koe e uriuri kapiti i taua au turanga ra? (Mase. 15:22) Me angaanga kapiti te au mema o te pamiri kia rauka e tai o ratou i te painia, ka rauka ia ratou i te turuturu i tetai atu kia painia.
4. Akapeea me kare koe e rauka i te piri akaou ki te angaanga painia i teia taime?
4 Auraka e akaparuparu me kare toou au turanga i teianei i akatika ia koe kia akamata i te painia akaou. Ka mareka a Iehova i toou tu papa ua i te rave i te reira. (2 Kori. 8:12) Taangaanga i te au tu karape taau i rauka ei painia i roto i taau angaanga orometua i teianei. E pure no toou akakoroanga, e e akara i te au atianga no te akatano i toou au turanga. (1 Ioa. 5:14) Penei, i te tuatau i aereia, ka akatuera a Iehova i te “ngutupa maata te taki atura ki te angaanga” kia rauka ia koe te au rekareka o te painia tamou!—1 Kori. 16:9.