‘Kia Akonoia to te Atua Anoano’

1. Eaa te tumu manako no te porokaramu no te ra akaputuputuanga takake no te mataiti tavinianga 2012, e eaa ra i tau ei kia akamanako tatou i teia?

¹ No to Iehova anoano i angaia ai tatou. (Apo. 4:11) No reira, kare e rauka i te akatupu i te akakoroanga no tatou kia ora mai, me kare tatou e apii ra e e rave ra i to te Atua anoano. Kare teia i te mea ngoie ua no te mea e patoianga ta tatou kia kore e ‘akatupu i ta te kopapa e ta te ngakau i inangaro ra’ me kare kia kore e rave “i to te etene inangaro.” (Ephe. 2:3; 1 Pete. 4:3; 2 Pete. 2:10) Naringa kare te tauturu a te Atua, ka ‘riro tatou ei tuikaa na te Tiaporo no tona ra anoano.’ (2 Timo. 2:26) Ta tatou porokaramu no te ra akaputuputuanga takake no te mataiti tavinianga 2012, ka tauturu ia tatou kia aru rotai ki te toru o te patianga puapinga no te pure akaraanga, koia oki “kia akonoia toou anoano.”​—Mata. 6:9, 10.

2. Eaa te au uianga te ka pauia i te tuatau o te porokaramu?

² Au Uianga te ka Pauia: Ia koe e akarongo ra ki te porokaramu, akara i te au pauanga no teia au uianga: Eaa te mea puapinga atu i te akarongo anga i te Tuatua a te Atua? Akapeea tatou e kite ei e eaa to te Atua anoano no tatou? Eaa tatou ka inangaro ei i te tauturu i te au tangata ravarai? Akapeea e rauka ai ia tatou tetai oraanga puapinga tikai e te merengo? E te au mapu, eaa ta kotou ka inangaro i te akapapu kia Iehova? Eaa te au akameitakianga no te rave anga i to te Atua anoano? Eaa ra tatou ka rapurapu ei i te akaketaketa e te akamaroiroi i tetai ke?

3. Akapeea ra tatou e puapinga maata ai mei teia porokaramu pae vaerua?

³ Kia tae atu e kia akarongo meitaki ki te porokaramu. Te reira tetai tangata no Betela me kore tetai akaaere tutaka ei vaa tuatua. I mua ake e i muri ake i te porokaramu, e tuatua atu kiaia e tana vaine me kua akaipoipo aia. Me oki koe ki te kainga, eiaa ‘e akangaropoina i te au tuatua,’ e akara kapiti te pamiri i te porokaramu e kia uriuri e akapeea me aru rotai pu tikai ki te anoano o te Atua.​—Iako. 1:25.

4. Eaa ra i puapinga ai kia tuku tatou i te rave anga i te anoano o te Atua ei mea mua?

⁴ Kare e roa atu ana ka takoreia atu te aronga e rave ra i to ratou uaorai au anoano e kare e kauraro ana ki to Iehova anoano. (1 Ioa. 2:17) Te ariki rekareka nei tatou e kua akapapa a Iehova i teia au akakiteanga tau tikai ei tauturu ia tatou ki tuku i te anoano o te Atua ei mea mua!