E Mea Meitaki te Tuatua a te Atua ei Apiianga

1. Eaa te tumu manako maata o te uruoaanga tapere no te mataiti tavinianga o te 2014, e eaa te uianga ka pauia i roto i te porokaramu?

¹ Ko to tatou ‘Orometua’ ko Iehova, te puapii meitaki rava atu i te ao katoa e pini ua ake. (Isa. 30:20, 21) Akapeea ra a Iehova i te apii mai anga ia tatou? Kua oronga mai aia i tetai puka tei ngateitei roa atu i te au puka ravarai koia oki, tana Tuatua akauruia te Pipiria. Akapeea ra te apiianga a te Atua i te tauturu anga ia tatou kia puapingaia i te pae kopapa, pae manako, pae ngakau, e te pae vaerua? Ka uriuriia te pauanga ki teia uianga i ko i ta tatou uruoaanga tapere no te mataiti tavinianga o te 2014. Te tumu manako maata o te porokaramu, “Te Tuatua a te Atua e Mea Meitaki ei Apiianga,” kua akatumuia te reira ki runga ia 2 Timoteo 3:16.

2. Ka akakiteia mai te au manako maata na roto i te au pauanga ki teea au uianga?

² Akara e Eaa te au Manako Maata: Ka akakiteia mai te au manako maata o te porokaramu na roto i te au pauanga ki teia au uianga ka aru mai:

• Eaa ta te apiianga a te Atua ka akatupu i roto i to tatou oraanga? (Isa. 48:17, 18)

• Me tauta tatou i te akatanotano i to tatou turanga kia rauka i te tavini tamou ia Iehova, eaa te akapapuia maira no tatou? (Mala. 3:10)

• Eaa ta tatou ka rave me aro atu i te “tuatua rikiriki ke ke tau kore”? (Ebe. 13:9)

• Akapeea tatou te aru anga i te tu o ta Iesu “tuatua anga” koia oki i te tu o tana apiianga? (Mata. 7:28, 29)

• No teaa te au puapii i roto i te putuputuanga ka apii ei ia ratou uaorai? (Roma 2:21)

• Eaa te puapinga o te Tuatua a te Atua? (2 Timo. 3:16)

• Eaa ra te tupu nei ki te tangata no te ‘akangaueueia’ ra te pa enua katoa? (Haga. 2:6, 7)

• Mei teaa ra to Iehova manako ia tatou? (Ephe. 5:1)

• No teaa ka anoanoia ai kia tauta pakari tatou i te noo tamou i roto i ta Iehova apiianga? (Luka 13:24)

3. Eaa i puapinga ai kia tae tatou e kia akarongo meitaki ki teia porokaramu tei akapapaia i te tuatau tau?

³ I te tuanga mua o 2 Timoteo pene 3, i mua ua ake i te tata anga i te au tuatua tei akatumuia te tumu manako maata o teia porokaramu ki runga, kua akataka mai a Paulo i te kino maata te ka tupu i te tuatau openga. Tata aia e: “Te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” (2 Timo. 3:13) Kia kore tatou e akavareia, e mea puapinga tikai no tatou kia akarongo e kia aru i te apiianga a te Atua! No reira, e akapapu e kia tae tatou, e kia akarongo meitaki ki teia porokaramu tei akapapaia i te tuatau tau.