Tauturu i te Tangata Kia Akarongo ki te Atua
1. Eaa te nga poroutia tei tukuia mai i ko i te Uruoaanga Tapere, “Kia Tae Mai te Patireia o te Atua!” e eaa te reira i riro ei ei nga poroutia puapinga?
1 I ko i te Uruoaanga Tapere “Kia Tae Mai te Patireia o te Atua!” kua tukuia mai tetai nga poroutia ou Akarongo ki te Atua kia Ora e Tuatau ua Atu e te tataanga mama Akarongo ki te Atua. No te mea e iti ua te au tuatua, mama ua te reira i te uri vivikiia. I mua ake ka tukuia mai ei te poroutia Akarongo ki te Atua kia Ora e Tuatau ua Atu ki roto i te reo Papaa, kua akatika keia ana te reira kia uriia ki roto i te 431 reo.
2. Koai ma te ka puapingaia mei teia nga poroutia?
2 Koai ma tikai te ka puapingaia mei teia nga poroutia? Akamanako ana i tetai au turanga ka aru mai e tupu putuputu ana takapini i te ao nei:
• Te uriuri manako ra tetai papuritia ki tetai tangata ngutuare, penei i te araveianga mua me kore te atoro akaou anga, e kua kite mai aia e kare te tangata ngutuare e kite meitaki ana i te tata e te tatau.
• E tutu ana tetai papuritia ki te au tangata e tuatua ana i te reo kare e maata ana ta tatou puka tei uriia, me kore kare e puka i uriia ki roto i to ratou reo. Me kore maata te aronga i te ngai tutu anga kare e kite ana i te tatau i te reo ta ratou e tuatua ra.
• E taangaanga ana tetai papuritia i te reo akairo kia tutu atu ki aronga turi i roto i tana ngai tutu anga.
• Te inangaro ra tetai metua i te apii i te tuatua mou ki tana tamaiti mapu kare i kite ake i te tatau.
3. Akapeea te akanooia anga te poroutia Akarongo ki te Atua?
3 Te tu i Akanooia ai te Nga Poroutia: E iti ua te au tuatua i roto i te poroutia Akarongo ki te Atua—no reira e mama ua te aerenga tuatua e te Irava tei taikuia i raro roa i te kapi tataki tai te akaari maira i te au manako maata. No teaa ra? Akamanako ana e kua oronga mai tetai tangata i tetai poroutia kia koe tei tataia i roto i tetai reo kare e rauka ia koe i te tatau, penei e au tataanga tuke tetai kare koe e marama ana. Ka inangaro ainei koe i te reira, noatu e au tutu manea to roto? Kare paa. Mei te reira katoa, te aronga kare e kite i te tatau, ka emiemi ratou i te rave i tetai au puka e tataanga to roto. No reira, kua akapapa meitakiia te au tutu i runga i te kapi tataki tai, e e ngai tetai e tou ra ki tetai atu au tutu te ka uriuriia.
4. Akapeea te akanooia anga te poroutia Akarongo ki te Atua kia Ora e Tuatau ua Atu?
4 Aiteite ua te au tutu o te nga poroutia Akarongo ki te Atua kia Ora e Tuatau ua Atu e te Akarongo ki te Atua. Kua akanooia te reira no te apiianga ki te aronga kare e kite meitaki ana i te tatau me kore te apii ra i te tatau. Ka rauka katoa i teia poroutia kia taangaangaia ei kopi na tetai tangata e rave ra i te apii me apii atu aia i te poroutia Akarongo ki te Atua ki tetai tangata. I runga roa i te tua kaui, e uianga tetai te ka pauia mai i roto i te au apiianga o te nga kapi e rua. Kapiti mai ki te au tutu, te au manako e te au irava tei taikuia. I raro roa i te au kapi, e pia tetai kua karaia e tetai au manako e tetai au Irava te ka uriuriia, tei runga ra i te tu kite o te tangata e apiiia ra.
5. Aea e akapeea koe me oronga i teia nga poroutia?
5 Me Taangaanga i te Reira: Ka rauka ia koe i te oronga i te nga poroutia mei tera are ki tera are i te angaanga orometua me kite atu koe e e mea meitaki i te rave i te reira, noatu e kare te nga poroutia e orongaia ra i te reira marama. (Akara i te pia “Me Oronga i te Nga Poroutia.”) Ka akaari koe i te reira me atoro akaou koe na te akakiteanga ki te tangata e akaari maira i te inangaro e e apinga taau ka inangaro i te akaari kiaia e kia oronga atu i te reira kiaia.
6. Akapeea tatou me rave i te apii Pipiria me taangaanga i teia nga poroutia?
6 I te mea e kare e au uianga i tataia i roto i te poroutia Akarongo ki te Atua, kare e au uianga e te au pauanga i roto i te uriurianga o te apii mei tei matauia i roto i te apii anga i te puka ta te Pipiria e Apii Maira. E peu matau na te au tangata i te akarongo ki te au tua. No reira e taangaanga i te au tutu i te akakite i te au tua akauruia tei tataia i roto i te Pipiria. Akamarama eaa te akatutuia ra e kia oraora te apii anga. Ui ki te tangata e apiiia ra e eaa tona manako. Tatau i te au irava i raro roa i te kapi e kia uriuri manako kiaia no runga i ta te reira e tuatua ra. Ui i te au uianga kia o mai aia ki roto i te uriurianga e kia akapapu e kua marama aia i te reira. Me te taangaanga ra aia i te poroutia Akarongo ki te Atua kia Ora e Tuatau ua Atu, e tatau kapiti i te au manako e te au irava me uriuri i te tutu tataki tai.
7. Akapeea tatou me tauturu i ta tatou tangata apii Pipiria kia tere ki mua?
7 Tauturu i te Tangata Apii Kia Tere ki Mua: Penei ka akakeu tatou i te uriurianga i taau tangata apii kia inangaro i te apii akapeea me tatau kia rauka iaia i te kite no runga ia Iehova. (Mata. 5:3; Ioa. 17:3) No reira, me te uriuri ra koe i te poroutia Akarongo ki te Atua, penei e pati atu ki te tangata apii kia apii koe iaia kia kite i te tatau, e kia taui atu i te apii ki te poroutia Akarongo ki te Atua kia Ora e Tuatau ua Atu. Noatu eaa taau poroutia ka taangaanga, kare te tangata apii i papa ake no te papetitoanga me kua pou iaia i te apii i te poroutia. Kia apii atu i te puka ta te Pipiria e Apii Maira me kore tetai atu puka ka tau i te tauturu iaia kia marama atu i te Pipiria.
8. Eaa ra koe ka akameitaki ei ia Iehova no teia nga poroutia no te angaanga orometua?
8 Ka anoanoia te au tangata kia akarongo ki Tei Ngateitei i te ao e pini ua ake kia ora e tuatau ua atu. (Isa. 55:3) To Iehova anoano kia apii “te tangata katoatoa” kapiti mai i te aronga kare e kite i te tatau, e akapeea me akarongo kiaia. (1 Timo. 2:3, 4) E akameitaki tatou ia Iehova no teia nga poroutia ta tatou e taangaanga nei i te apii i te au tangata akapeea me akarongo ki te Atua!
[Pia i te kapi 3]
Me Oronga i te Nga Poroutia
Akaari i te kapi 2-3 ki te tangata ngutuare, e e tuatua e: “Ka inangaro ainei koe kia noo i roto i tetai ao mei teia rai? [Tiaki no te pauanga.] Te taputou maira te au Tuatua Tapu [me kore, teia puka tapu] e kare e roa atu ka taui te Atua i teianei ao ki roto i tetai ngai manea tikai e te au, e kare e au tangata putaua e te maki e noo ki reira. Akara ana eaa ta tatou ka rave kia rauka ia tatou i te noo ki reira. [E tatau ia Isaia 55:3, tei taikuia i runga roa i te kapi 3.] Te akakite maira teia kia tatou e kia ‘aere mai’ ki te Atua e kia ‘akarongo’ kiaia. Inara akapeea tatou me akarongo ki te Atua?” Uri ki te kapi 4-5, e kia uriuri atu i te pauanga kiaia. Me kare ona taime, akaruke i te poroutia kiaia e kia akanoo i tetai atoro akaou anga no te uriuri anga i te pauanga kiaia.