Akapeea me Taangaanga i te Poroutia Koai ma te Rave ra i to Iehova Anoano i Teia Tuatau?
Poroutia ou Tei Tataia ei Arataki i te Aronga Apii Pipiria ki te Akaaerenga
1. Eaa te au tumu e toru i neneiia ai te poroutia to Iehova Anoano?
1 Kua akamata ainei koe i te taangaanga i te poroutia ou Koai ma te Rave ra i to Iehova Anoano i Teia Tuatau? Te akakoroanga (1) kia akamatau atu i te aronga apii Pipiria ki te Au Kite o Iehova, (2) kia tauturu ia ratou kia kite no runga i ta tatou e rave nei, e te (3) kia akaari kia ratou akapeea me raveia te au angaanga i roto i ta tatou akaaerenga. Ka rauka i te uriuri i te poroutia to Iehova Anoano i roto i te rima ki te tai ngauru miniti i te openga o te apii tataki tai no te mea e tai rai apii i te au kapi.
2. Akataka mai i te tu i tataia ai teia poroutia e tetai au tuanga i roto.
2 Te tu i Tataia Ai: Kua akanooia te poroutia e toru tuanga, ei uriuri i te au tuanga tukeke no runga i te akaaerenga o Iehova mei tei akakiteia i runga atu. Kua tataia te au upoko tuatua o te 28 apii ei au uianga, e na te au tumu manako rikiriki tei akatouia e pau i taua uianga ra. Kua kapitiia mai te au tutu mei te 50 tuma enua ei akaari i te maata o ta tatou angaanga i te ao katoa nei. Tetai au apii, e au pia “Kimi Maata Atu” tetai, tei roto i reira te au akakiteanga kia rauka ia koe i te akamaroiroi i taau tangata apii kia aru.
3. Akapeea tatou me oronga i te poroutia to Iehova Anoano?
3 Peea Koe me Oronga i te Reira: Akamata na te akaari anga i te uianga, koia oki te upoko tuatua o te apii. E oti, me tatau kapiti korua i te apii, akaari i te au tumu manako rikiriki tei akatouia. Taopenga na te uriuri anga i te au uianga i raro roa i te kapi. Ka rauka ia koe i te tatau i te katoaanga o te apii me kore tetai tuanga ua e oti uriuri i te reira. Akamanako e eaa te irava tei taikuia taau ka tatau. Eiaa e ngaropoina i te uriuri i te au tutu e te au pia “Kimi Maata Atu.” E mea meitaki kia uriuri i te au apii mei te akamataanga o te poroutia. Tera ra, ka rauka i te uriuri i tetai apii ke ta te tangata apii ka inangaro. Ei akaraanga, me ka raveia tetai akaputuputuanga me kore uruoaanga, uriuri i te apii 11.
4. Eaa ra koe i mataora ai i teia poroutia ou?
4 Me apii tatou i tetai tangata no runga i te Pipiria, te tauturu ra tatou iaia kia akamatau atu ki to tatou Metua i te rangi. Inara, ka anoanoia tatou kia apii kiaia no runga i to Iehova akaaerenga. (Mase. 6:20) Mataora tikai tatou i teia poroutia ou, kia rauka ia tatou i te rave i te reira!