Aru i te Akaraanga o te au Peroveta—Zephania
1. Eaa te tuatau e tavini ra a Zephania ei peroveta, e akapeea aia te riro anga ei akaraanga meitaki no tatou i teia tuatau?
1 I te itu anere mataiti M.T.N., te akamori ra te iti tangata i Iudea ia Baala. Kua tamateia te ariki kino ko Amona e te tutara ra te ariki mapu ko Iosia. (2 Para. 33:21–34:1) I taua tuatau rai, kua tono a Iehova ia Zephania kia akakite i Tana karere akavaanga. Noatu e no roto mai a Zephania i te uanga ariki o Iudea, kare roa aia i mataku ana i te akakite i te tika o ta Iehova karere ki te aronga mana taoonga o Iudea. (Zepha. 1:1; 3:1-4) Mei te reira katoa tatou i te aru anga i te tu ngakau toa o Zephania e kare tatou e tuku i te pirianga kopu tangata kia tamanamanata i ta tatou akamori anga ia Iehova. (Mata. 10:34-37) Eaa te karere ta Zephania i akakite, e eaa tei tupu mai?
2. Eaa ta tatou ka tau kia rave kia paruruia i te rā o to Iehova riri?
2 Kimi ia Iehova: Ko Iehova anake te ka rauka i te akaora mai i te tangata i te rā o tona riri. No reira a Zephania i tauta pakari ei i te akakite ki te iti tangata o Iudea kia kimi ia Iehova, kia kimi i te tuatua tika, e kia kimi i te akaaka koi vai ei te tuatau. (Zepha. 2:2, 3) Ko teia katoa te ka anoanoia i to tatou nei tuatau. Mei ia Zephania rai, ka akamaroiroi tatou i te tangata kia kimi ia Iehova, inara kia akapera katoa tatou, kia aruaru tikai e auraka e ariu ke i te aru anga ia Iehova. (Zepha. 1:6) Mari ra, kia kimi tatou ia Iehova na te apii meitaki anga i tana Tuatua e te pure anga kiaia no tana aratakianga. Ka kimi tatou i te tuatua tika na te noo anga i te oraanga mā. Ka kimi tatou i te tu akaaka na te akatupu anga i te tu kauraro e na te ariu atu anga ki te aratakianga a te akaaerenga o Iehova.
3. Eaa ra tatou ka vai tamou ei to tatou irinaki i roto i te angaanga orometua?
3 Au Mea Meitaki ka Tupu: Kua riro te karere akavaanga ta Zephania i akakite ei akakeu i tetai pae i Iudea, inara ko tei akakeu maataia ko te mapu ko Iosia tei kimi ia Iehova iaia e mapu tamariki ra. I muri mai, kua maroiroi tikai a Iosia i te takore atu i te au itoro e akamorimoriia ra i roto i te enua. (2 Para. 34:2-5) I teia tuatau, noatu te topa ra tetai au ua o te Patireia i te pae mataara, i te ngai tokatoka, me kore i roto i te ngangaere, te topa ra rai tetai i runga i te one meitaki e kua uua mai. (Mata. 13:18-23) Te irinaki nei tatou e ka akameitaki mai a Iehova i ta tatou tautaanga no te maroiroi i te akatotoa i te ua o te Patireia.—Sala. 126:6.
4. Eaa ra tatou ka tapapa ai ia Iehova?
4 Kua manako tetai pae i Iudea e kare roa a Iehova e akatupu i tana akautunga anga. Inara, kua akapapu a Iehova kia ratou e kua vaitata tona rā maata. (Zepha. 1:12, 14) Ko te aronga anake tei irinaki ki roto iaia te ka ora mai. (Zepha. 3:12, 17) Ia tatou e tapapa ra ia Iehova, kia mataora tatou i te tavinianga taokotai i to tatou Atua maata ma te au taeake akamori!—Zepha. 3:8, 9.