Taporoporo Meitaki i Toou Taime i Roto i te Angaanga Tutu
No te mataiti tavini o te 2014 e 1,945,487,604 ora tei pou i te Au Kite o Iehova i roto i te angaanga tutu—e akapapuanga tikai tera i to tatou inangaro ngaueue kore kia tavini ua atu rai ia Iehova! (Sala. 110:3; 1 Kori. 15:58) I te mea “te poto nei te tuatau,” ka rauka ainei ia tatou kia akapou i to tatou taime i roto i te angaanga tutu kia maata atu te tangata ka taeria e tatou?—1 Kori. 7:29.
E rauka ai te taangaanga meitaki i te taime i roto i te angaanga tutu, kia papa ua tatou i te taui no tetai ua atu turanga. Ei akatauanga, me kua tere atu i te ora taau e akapou ua ana i roto i tetai tuanga o te angaanga orometua, ka rauka ainei ia koe te rave i tetai au tauianga kia maata atu taau tangata ka tuatua? Kare e aiteite ana te au turanga mei tetai ngai ki tetai. Inara, penei ka riro teia au manako ei tauturu ia koe kia taporoporo meitaki i toou taime kia kore koe ‘e moto ua i te matangi.’—1 Kori. 9:26.
Tutu Aere Mei Tera Are ki Tera Are: No te au rau ngauru mataiti, e mea matau na te au taeake i te aere mei tera are ki tera are i te rave i ta ratou angaanga tutu aere. Inara, no te mea e maata te angaanga ana i te au rā, penei e tamata i te aere mei tera are ki tera are i te avatea me kore i te aiai, e maata atu te tangata i te kainga e akangaroi ra. I te rā katoa, e maata atu te tangata ka aravei tatou i runga i te mataara me kore i ko i ta ratou ngai angaanga.
Akakitekite i te Ngai Tangata: Akanoo i te au kaingakai e te au pereo puka ki ko i te au ngai tutu a te putuputuanga i te ngai e maata te tangata e aere maira. (Akara i Ta Tatou Angaanga Patireia o Tiurai 2013, kapi 5.) Me kare e maata ana te tangata i te ngai i akanooia no te akakitekite, penei ka inangaro te Kumiti Tavini o te Putuputuanga kia akanooia te pereo me kore te kaingakai puka ki tetai ngai e maata te tangata e aere ra na reira.
Aronga ka Atoro e te Aronga Apii Pipiria: Ka rauka ainei ia koe i te akatano i te taime no te atoro i te aronga taau i tuatua ana e taau au apii Pipiria, ki te taime kare e maata ana te tangata i te ngai tutu aere? Ei akatauanga, me e maata te tangata i te kainga i te au popongi Maanakai, ka rauka ainei ia koe i te rave i taau apii Pipiria i te avatea me kore i te aiai? Me oki akaou i te atoro ka rauka ainei i te au taeake kia akaiti mai i te tangata i roto i te motoka okotai kia maata atu ta ratou ka rave i roto i te angaanga tutu aere?
Ka rauka ia tatou i te tare i to tatou ora i te taime ua atu ka piri tatou ki roto i te angaanga tutu aere, inara e maata atu to tatou mataora me ariu mai te tangata ki ta tatou karere. Me piri koe ki tetai tuanga o ta tatou angaanga tutu e te kite ra koe e kare e tano roa ana tera taime, tamata i tetai tuanga ke mai. Pure kia Iehova, “te Atu o te mou,” no tana aratakianga kia rauka ia koe te taangaanga meitaki i toou taime i roto i te angaanga tutu aere!—Mata. 9:38.