Tavini ia Iehova, te Atua o te tu Rangatira

1, 2. (a) Eaa ra te tu tuikaa e te tu rangatira i puapinga ai i to Paulo tuatau? (e) Koai ta Paulo i karanga e ko te Tumu o te tu rangatira mou?

I NOO ana te au Kerititiano mua ki roto i te Patireia o Roma, te ngai e ngakau parau ana te tangata i te au ture, te akatereanga akavaanga, e te tu rangatira. Inara, kua irinaki te reira patireia ririnui ki runga i te au tuikaa kia rave i te maata anga o te angaanga. I tetai atianga, e 1 i roto i te 3 tangata, e tuikaa aia i roto i te Patireia o Roma. E tikai, e apinga puapinga te akatuikaa e te tu rangatira ki te tangata noa ua nei, kapiti mai te au Kerititiano.

² E tata putuputu ana te apotetoro ko Paulo no runga i te tu rangatira. Inara kare aia i tauta ana kia rapakau i te au manamanata o teianei ao, koia oki ta te tangata ïa i inangaro i te rave i te reira tuatau. Mari ra, kua angaanga pakari a Paulo e tona au taeake Kerititiano i te apii i te tangata i te nuti meitaki o te Patireia o te Atua, e kia mārama i te atinga oko akaperepereia o Iesu Karaiti. Akakite a Paulo ki tona au taeake Kerititiano, akapeea e kitea ai te Tumu o te tu rangatira mou. Tata aia: “Ko [Iehova] taua Vaerua ra, e tei iaia te vaerua o [Iehova], tei reira te rangatira.”—2 Korinetia 3:17.

3, 4. (a) Eaa ta Paulo i uriuri i te au irava i mua ake ia 2 Korinetia 3:17? (e) Eaa ta tatou ka rave kia rauka te tu rangatira no ko mai ia Iehova?

³ I roto i te rua o tana reta ki to Korinetia, kua taiku a Paulo eaa tei tupu kia Mose i tona eke anga mai mei te Maunga Sinai, mei ko mai i tetai angera a Iehova. Kua kaka tona kiri mata! Te kite anga te ngati Iseraela ia Mose, mataku atura ratou, no reira kua tapoki aia i tona kiri mata ki te arai. (Exodo 34:29, 30, 33; 2 Korinetia 3:7, 13) Akataka a Paulo: “Kia ariu ra te tangata [kia Iehova] ra, e kiriti keia ïa taua arai ra.” (2 Korinetia 3:16) Eaa te aiteanga o ta Paulo tuatua?

⁴ Apii mai tatou i te atikara mua e ko Iehova, Tei Anga i te au mea ravarai, nona anake te tu rangatira kare i kotingaia. No reira, e mea papu e te vaira te tu rangatira i mua i te aroaro o Iehova, e tei reira “te vaerua o [Iehova].” Inara, karanga a Paulo e me ka inangaro tatou i teia tu rangatira, kia aere tatou kia Iehova. Tera te aiteanga, kia rauka tetai pirianga vaitata kiaia. Kua kite ua te ngati Iseraela i te metepera i te akara anga a te tangata, kare i ta Iehova. Mei te mea atura, kua araiia to ratou manako e te ngakau. Kua inangaro ratou i te taangaanga i to ratou tu rangatira ou ei akamerengo i to ratou uaorai anoano.—Ebera 3:8-10.

5. (a) Eaa te tu rangatira te ka orongaia mai e te vaerua o Iehova? (e) Akapeea tatou e kite ei e ka rauka i tetai tuikaa me kore mouauri te tu rangatira no ko mai ia Iehova? (ng) Eaa te au uianga ka anoanoia tatou kia pau?

⁵ Ka oronga mai te vaerua o Iehova i te tu rangatira, tei maata atu i te tu rangatira o tetai tuikaa. E maata atu te tu rangatira ta te reira ka akatupu i te ka rauka i te tangata nei. Ka akarangatira te reira ia tatou mei te tuikaa ki te ara e te mate, e te tuikaa ki te akamorianga pikikaa e tana au peu. (Roma 6:23; 8:2) Mei teaa atura teia tu rangatira! Ka rauka rai i tetai tuikaa me kore mouauri, teia tu rangatira. (Genese 39:20-23) Kua tapekaia te Tuaine Nancy Yuen e te Taeake Harold King no tetai tuatau roa no to raua akarongo, inara kua rauka rai ia raua teia tu rangatira. Ka kite koe i to raua tua i runga i te JW Broadcasting. (Akara i raro ake i te INTERVIEWS AND EXPERIENCES > ENDURING TRIALS.) I teianei, ka pau ana tatou e rua uianga. Akapeea tatou me akapapu e te akaperepere ra tatou i to tatou tu rangatira? E akapeea tatou me taangaanga meitaki i te reira?

KA AKAPEREPEREIA TE TU RANGATIRA NO KO MAI I TE ATUA

6. Akapeea te ngati Iseraela te akaari anga e kare ratou i mareka i te tu rangatira ta Iehova i oronga kia ratou?

⁶ Me āriki tatou i tetai apinga aroa akaperepere, mareka tikai tatou i te tangata tei oronga mai i te reira. Inara, kare te ngati Iseraela i mareka ana i te tu rangatira ta Iehova i oronga kia ratou. I nga marama i muri ake te akarangatira anga a Iehova ia ratou mei ia Aiphiti, kua kaki akaou ratou i te kai e te vai no reira mai. Kua kopekope ratou i te māna, te kai ta Iehova i oronga kia ratou. Kua inangaro katoa ratou i te oki ki Aiphiti! E puapinga rava atu ‘te ika, te kukuma, te meleni, te kesira, te oniani, e te sumi,’ i te tu rangatira ta Iehova i oronga kia akamori iaia. No reira a Iehova i riri ei ia ratou. (Numero 11:5, 6, 10; 14:3, 4) Te apii maira teia i tetai apiianga puapinga.

7. Akapeea a Paulo te taangaanga anga i tana uaorai ako anga ia 2 Korinetia 6:1, e akapeea tatou me akapera katoa?

⁷ Akamatakite a Paulo i te au Kerititiano katoatoa, auraka e mareka kore i te tu rangatira ta Iehova i oronga kia ratou na roto i tana Tamaiti, ko Iesu Karaiti. (E tatau ia 2 Korinetia 6:1.) E tu apa ua to Paulo, ei tuikaa ki te ara e te mate, e kua riro ei mea taitaia kiaia. Noatu ra, karanga aia: “E akameitaki au i te Atua i te mea e ora i to tatou Atu ra ia Iesu Mesia.” Eaa aia i tuatua ai i teia? Akamārama a Paulo ki tona au taeake Kerititiano: “Kua akaora mai oki te ture a te vaerua ora i roto i te Mesia ra ia Iesu iaku, i te ture ra o te kino e te mate.” (Roma 7:24, 25; 8:2) Mei ia Paulo, auraka rava tatou e akangaropoina e na Iehova tatou i akarangatira mai mei te tuikaa ki te ara e te mate. Na te atinga oko i rauka ai ia tatou i te tavini i te Atua ma te akava ngakau mā, e ka akatupu teia i te rekareka.—Salamo 40:8.

8, 9. (a) Eaa te akamatakiteanga ta te apotetoro ko Petero i oronga mai, e akapeea tatou me taangaanga i to tatou tu rangatira? (e) Akapeea tetai me taangaanga tarevake i tona tu rangatira?

⁸ Auraka tatou e tuatua ua e te mareka ra tatou ia Iehova, mari ra kia matakite katoa tatou auraka e taangaanga tarevake i to tatou tu rangatira. Ei akaraanga, akamatakite te apotetoro ko Petero auraka e taangaanga i to tatou tu rangatira ei kotoeanga kia rave i te au mea tarevake. (E tatau ia 1 Petero 2:16.) Te akamaara maira teia akamatakiteanga i tei tupu ki te ngati Iseraela i te metepara. Ka anoano katoa tatou i teia akamatakiteanga i teia tuatau. Te oronga maira a Satani e tona ao i te au mea manea no te aao, te kai, te inu, e te tarekareka. Te taangaanga ra te aronga karape i te akaariari i te aronga manea kia akakeu ia tatou kia oko i te au mea kare tatou e anoano tikai ana. Ka māmā ua i teianei ao i te akavare ia tatou kia taangaanga tarevake i to tatou tu rangatira.

⁹ Te ako katoa ra a Petero no te au mea puapinga o te oraanga, mei te apii e te ngai angaanga. Ei akaraanga, te māroia nei te au mapu kia angaanga pakari kia ārikiia ki te apii teitei meitaki rava atu. E manganui te tangata te akakite ra kia ratou e me rauka te apii teitei, ka rauka te ngai angaanga meitaki, te moni maata, e te turanga ngateitei. Penei ka akaari ratou i te akakiteanga tei akapapu e, ko te aronga tei rauka te apii teitei ka maata atu ta ratou moni i te aronga tei aere ua ki te apii tua rua. Ki te au mapu, ka akara anga meitaki rai te apii teitei me anoanoia ratou kia rave i te au iki anga i to ratou oraanga katoa. Inara, eaa ta ratou e te au metua ka tau kia akamaara?

10. Eaa ta tatou ka akamaara me iki i te au ikianga o te oraanga?

¹⁰ Penei ka manako tetai pae, e tikaanga to ratou te iki i ta ratou i inangaro, e kare to ratou akava ngakau e kangaia. Penei ka manako ratou i te tuatua a Paulo: “Eaa te mea i tika iaku nei kia akaapaia’i e to etai ke ra akava-ngakau?” (1 Korinetia 10:29) Noatu e e tu rangatira to tatou kia iki i te au ikianga no te apii e te ngai angaanga, kia akamaara tatou e kua kotingaia to tatou tu rangatira e ka tupu mai te au mea ke ke. No reira a Paulo i karanga ai: “E tika te au mea katoa iaku, kare ra e tau katoatoa kia rave: e tika te au mea katoa iaku, kare ra te au mea katoa e tamaata i te meitaki.” (1 Korinetia 10:23) Noatu e e tu rangatira to tatou kia iki i te au ikianga i te oraanga, ko ta tatou e inangaro ra kare ïa ko te mea puapinga rava atu.

E TAANGAANGA MEITAKI I TO TATOU TU RANGATIRA ME TAVINI IA IEHOVA

11. Eaa te tumu i akarangatira ai a Iehova ia tatou?

¹¹ Te akamatakite anga mai a Petero ia tatou auraka e taangaanga tarevake i to tatou tu rangatira, te karanga maira aia e ko te mataara tau, koia oki kia riro ‘ei tavini no te Atua.’ Te tumu i taangaanga ei a Iehova ia Iesu kia akarangatira ia tatou mei te tuikaa ki te ara e te mate, e rauka ai te taangaanga i to tatou oraanga katoa no te tavini Iaia.

12. Eaa te akaraanga ta Noa e tona ngutuare i akanoo no tatou?

¹² Te mataara meitaki rava atu no te taangaanga i to tatou tu rangatira, koia oki kia taangaanga i to tatou taime e te maroiroi no te tavini ia Iehova. Na te rave anga i teia, ka paruruia tatou kia kore te au akakoroanga o teianei ao, e to tatou uaorai anoano e riro ei mea puapinga rava atu i to tatou oraanga. (Galatia 5:16) Akamanako ana i ta Noa e ta tona ngutuare i rave. Kua noo ratou ki roto i tetai ao tā ua e te akaturi. Inara kare ratou i piri ana ki roto i te au akakoroanga e te angaanga a te tangata. Kua iki ratou kia vai maroiroi ua i te rave i te angaanga ta Iehova i oronga kia ratou. Kua akatu ratou i te araka, kua koi i te kai na ratou e te au manu, e kua akamatakite i te tangata no te Vaipuke. “Kua pera oki a Noa; i te au mea katoa ta te Atua i akaue mai iaia ra, ko tana ïa i rave marie.” (Genese 6:22) Tei tupu mai, kua ora mai a Noa e tona ngutuare i te openga o te reira ao.—Ebera 11:7.

13. Eaa ta Iehova i akaue mai ia tatou kia rave?

¹³ Eaa ta Iehova e akaue maira ia tatou kia rave i teia tuatau? Ei au pipi na Iesu, kua kite tatou e te akaue maira a Iehova ia tatou kia tutu aere. (E tatau ia Luka 4:18, 19.) I teia tuatau, kua akapoiri a Satani i te maata anga o te tangata e kare e kite ana e e tuikaa ratou no te akonoanga pikikaa, te apinganui, e te akatereanga poritiki. (2 Korinetia 4:4) Mei ia Iesu rai, e tauturu tatou i te tangata kia kite e kia akamori ia Iehova, te Atua o te tu rangatira. (Matatio 28:19, 20) Kare i te mea māmā kia tutu aere ki te tangata. I tetai au ngai, kare te tangata e inangaro i te kite i te Atua e ka riri mai me tutu atu kia ratou. Inara, mei te mea kua akaue a Iehova ia tatou kia tutu aere, ka tau kia ui tatou, ‘Ka rauka ainei iaku i te taangaanga i toku tu rangatira no te tavini maata atu ia Iehova?’

14, 15. Eaa ta te manganui o te iti tangata o Iehova i rave? (Akara i te tutu mua.)

¹⁴ E manganui te iti tangata o Iehova tei kite e te vaitata maira te openga o teia akatereanga, e kua akamāmā mai i to ratou oraanga kia rauka i te painia. (1 Korinetia 9:19, 23) Te painia ra tetai pae i to ratou ngai nooanga, tetai pae kua neke ki te au putuputuanga tei anoano i te tauturu. No te rima mataiti i topa akenei, tere atu i te 250,000 tei akamata i te painia, e i teianei tere atu i te 1,100,000 painia tamou. Mei teaa atura te rekareka, e manganui te taangaanga ra i to ratou tu rangatira no te tavini ia Iehova!—Salamo 110:3.

¹⁵ Eaa tei tauturu ia ratou kia taangaanga meitaki i to ratou tu rangatira? Akamanako ana ia John e Judith, tei tavini i te au enua e manganui no tetai 30 mataiti. Akamārama mai raua e te akamata anga te Apii Angaanga Painia i te 1977, kua akamaroiroiia te aronga apii kia neke ki te ngai ka anoanoia te tauturu. Kia rauka teia akakoroanga, ka anoanoia a John e Judith kia akamāmā i to raua oraanga. No reira a John i taui putuputu ei i tana angaanga. I muri mai, kua aere raua i te tutu aere i te au enua ke. Eaa tei tauturu ia raua kia autu i te au manamanata, mei te apiianga i te reo ou e te akamatau anga ki te au peu e te reva ou? Kua pure raua kia Iehova e kua irinaki iaia no te tauturu. Eaa to raua manako no te tavini anga ia Iehova i taua au mataiti ra? Karanga a John: “Manako au e tei roto au i te angaanga meitaki rava atu. Kua riro mai a Iehova ei mea tika tikai kiaku, ei metua aroa noku. Te mārama nei au i te tuatua a Iakobo 4:8: ‘E akavaitata atu ki te Atua, e nana e akavaitata mai kia koe.’ Kua kitea mai taku e kimi ra, ko tetai oraanga ma te akakoroanga meitaki.”

16. Akapeea tetai tauatini ua atu aronga te taangaanga meitaki anga i to ratou tu rangatira?

¹⁶ Mei ia John e Judith, ka rauka i tetai pae i te painia no tetai tuatau roa. No te au turanga tukeke, ka rauka i tetai pae i te painia no tetai tuatau poto. Noatu ra, e manganui te oronga ua ra ia ratou uaorai no te angaanga akatu anga i teianei ao. Ei akaraanga, mei te 27,000 au taeake e te au tuaine tei aere i te tauturu i te akatu anga o te opati maata o teianei ao i Warwick, New York. Kua aere mai tetai pae no nga epetoma, tetai pae no nga marama, e tetai pae no te mataiti e roa atu. E manganui te au taeake e te au tuaine tei rave i te au akaatinga anga no te tavini i Warwick. E akaraanga meitaki ratou no te aronga te taangaanga ra i to ratou tu rangatira kia akapaapaa e te akangateitei ia Iehova, te Atua o te tu rangatira!

17. Eaa ta tatou ka tapapa atu me taangaanga meitaki i to tatou tu rangatira i teianei?

¹⁷ Te mareka nei tatou e kua kite tatou ia Iehova e kua rauka te tu rangatira no tei akamori iaia. Kia akapapu tatou e e tu rangatira akaperepereia teia kia tatou. Auraka e taangaanga tarevake i te reira, mari ra kia taangaanga i te reira na te tavini maroiroi anga ia Iehova. Ka rekareka tatou i te au akameitakianga ta Iehova i taputou mai me akatupuia teia totou: “Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.”—Roma 8:21.