Aere Mai ki te au Uruoaanga Tapere o te “Aronga Inangaro i te Tu Rangatira”!
TE TU rangatira! Mei teaa te mareka anga o teia tangi anga tuatua! Kare tetai e rekareka ana me tapekaia me kare me opukiaia. Kua kiteaia tetai neke anga i te au mataiti i vaitata mai nei ki te tu rangatira o te poritiki tei manakonakoia i tetai ua atu mataiti tei maaraia.
Tera ra, i te mea te anoanoia ra te tu rangatira o te poritiki, te vaira tetai tu rangatira tei puapinga maata rava atu e te anoanoia. Koia oki te tu rangatira ta Iesu Mesia, te Tamaiti a te Atua, i tuatua i te karanga anga aia ki tana au pipi: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:31, 32) E tu rangatira teia mei te au irinaki anga akonoanga pikikaa, e tu rangatira mei te mataku i te tangata, e tu rangatira mei te tuikaa anga ki te au inangaro i te tu ara, e te maata ua atura.
Ko teia tu rangatira ko te reira te tumu tuatua o te au Uruoaanga Tapere o te “Aronga Inangaro i te Tu Rangatira” te ka raveia e te au Kite o Iehova i teianei ao katoa te akamata anga i te tuatau maana o te 1991. Mei te mataiti 1919, tei akairoia te tukuangaia te au arairai anga a te kavamani ki runga i te aronga e apai ra i te arataki anga i rotopu ia ratou, kua rekareka ana te iti tangata o te Atua i te tu rangatira maata no runga i ta ratou akamori anga ma.
Te mea tau rava atu i reira e ko, te tumu tuatua o te tu rangatira kua tuatuaia mai ana i te au mataiti i te au uruoaanga ta te atua tutara, mei te au tumu tuatua mei “Te Akaputuputuanga ta te Atua Tutara no te ‘Pa Enua Rangatira’” e te au “Akaputuputuanga Tapere o te ‘Au Tamariki Rangatira a te Atua.’” Kua uriuri maataia rai te tu rangatira i roto i te au puka mei “The Truth Shall Make You Free” (Ka Akarangatira te Tuatua Mou ia Koe) e te “Life Everlasting—In Freedom of the Sons of God (Oraanga Mutu Kore—Tu Rangatira no te au Tamariki a te Atua).
Te tu rangatira tei orongaia mai e te Atua tei rauka i te au tavini o Iehova kare ia e no to ratou uaorai meitaki e te rekareka anga. Ka tatau tatou ia Galatia 5:13: “I kapikiia oki kotou, e te au taeake, kia rauka te rangatira; auraka ra taua rangatira ra ei akatupu i ta te kopapa nei, ei kauraro aroa ra to kotou tetai ki tetai.” Te Uruoaanga Tapere o te “Aronga Inangaro i te Tu Rangatira” ko te tauturu ia tatou kia ariki i te akakoroanga o to tatou tu rangatira, te rauka anga ia tatou i te mou ki runga i to tatou tu rangatira puapinga rava, e te akaari kia tatou e akapeea i te taangaanga meitaki i te reira.
Ka akamata te uruoaanga i te popongi Varaire i te 10:20 ma tetai porokarama akatangi anga imene te ka tuku ia tatou ki roto i tetai turanga manako no te kaikai vaerua te ka aru mai. Te tumu tuatua o te ra mua ko te “Kiteanga i te Tuatua Mou te ka Akarangatira ia Tatou,” tei akatumuia ki runga ia Ioane 8:32. I mua ake i te avatea no runga te reira i te au tuatua turou a te tiamana e te tumu tuatua, “Te Akakoroanga e te Taangaanga Anga i to Tatou Tu Rangatira Tei Orongaia Mai e te Atua.” Ka akakite mai teia tuatua i te tuke i rotopu i te tu rangatira tika tikai o Iehova e te tu rangatira tei aiteia atu ki ta te Atua ka oronga mai kia tatou. Ka akamaroiroi katoa te reira ia tatou kia taangaanga meitaki i to tatou tu rangatira koi vai ei. Ka uriuri te porokarama o teia avatea no runga i te au tu tukeke o to tatou tu rangatira e ta tatou angaanga orometua e ka taopenga ki te nuku, Akarangatiraia no te Akamaata i te Akamori Anga Mou.
Te tumu tuatua i te rua o te ra ko te “Tu Tamou Anga i to Tatou Tu Rangatira Tei Orongaia mai e te Atua,” tei akatumuia ki runga ia Galatia 5:1. Te porokarama o te popongi no runga te reira i tetai tuatua kapiti anga te akaarianga e akapeea te au mema tatakitai o tetai ngutuare e mataoraʼi i te tu rangatira tei orongaia mai e te Atua i roto i te koropini o te ngutuare tangata. Te aronga tei papa kia papetitoia ka ariki tikai ratou i te au tuatua e akapeea te tu rangatira e raukaʼi na roto i te akatapu anga e te papetito anga. Kapiti atu ki te porokarama o te avatea koia oki ko tetai uriuri anga oraora, e me ko te akaipoipoanga ainei te taviri ki te rekareka e me kare. Ka vai katoa rai tetai tuatua kapiti anga no runga i te tu tukeke o te tu rangatira e oti ko tetai tuatua tei kimi tamou i te Tumu o te Ora a te Atua no te orongaanga mai te rangatira e te ora mutu kore.
I te Tapati, te tumu tuatua “Taangaanga Anga i to Tatou Tu Rangatira kia Rotai ki te Vaerua o te Atua,” tei akatumuia ki runga ia 2 Korinetia 3:17. No runga te porokarama i tetai tuatua kapiti anga reka rava atu no ta Iesu parapore tei papaia ia Mataio 13:47-50, te akakiteanga mai e akapeea te au Kite o Iehova te tavini anga ei au ravakai tangata. Te tuatua ki te katoatoa i te avatea ko te “Turouanga Mai i te Ao Ou o te Atua no te tu Rangatira!” ka aru mai i te reira i tetai akara anga ou no te uruoaanga tapere: te akapoto anga o Te Punanga Tiaki Anga no te reira epetoma. E ka akamutu te porokarama ma te ako anga Tuatua Tapu kia tatou katoatoa kia tamou ua rai i te tere ki mua te taangaanga meitaki anga i to tatou tu rangatira tei orongaia mai e te Atua na roto i to tatou tu akono i ta tatou tutu aereanga.
Ki te aronga inangaro i te tu rangatira, ka tuatua matou i te au tuatua a te tata salamo ko Davida: “Ka tongi ana kia kite i te meitaki o Iehova! e ao to te tangata i irinaki iaia ra.” (Salamo 34:8) Auraka e akaruke i tetai toka kia akaariuke i toou tauta anga kia tae ki teia uruoaanga. E akariro i te reira ei angaanga naau kia tae atu mei te tuanga o te akatueraanga i te popongi Varaire e tae ua atu ki te tuatua topirianga i te avatea Tapati. Me aere mai koe ma tetai kaki anga oraora i te pae vaerua, te kite tikai anga i toou anoano i te pae vaerua, ka rekareka i reira koe! (Mataio 5:3) Auraka rava tatou e uri ke i te kaveinga, “Ko tei maata ra tana e ruru ka maata katoa tana e kokoti.” Te tau katoa ra teia e akapeea tatou me akapapa akatenga tikai i mua ake ka tae ei, e akapeea tatou i te aruaru anga i te akarongo atu i te porokarama e orongaia maira, e mei teaa te oraora i to tatou rave anga i te au puapinga o te au angaanga te va ua ra te oronga ua anga ia tatou, i te Uruoaanga Tapere o te “Aronga Inangaro i te Tu Rangatira.”—2 Korinetia 9:6, NW.