Eaa Tatou ka Mataku ei ia Iehova?

1-2. Ia Salamo 25:14, eaa ta tatou ka rave me ka inangaro tatou i tetai pirianga oa kia Iehova?

EAA i toou manako, te au tu puapinga ka anoanoia kia rauka tetai pirianga oa ki tetai? Ae, e akaperepere e e akono te au oa meitaki i tetai e tetai. Penei kare te mataku i manakoia ei tu puapinga kia rauka tetai pirianga oa meitaki. Inara, mei ta te tumu manako o teia atikara e akakite maira, ka anoanoia te aronga tei inangaro i tetai pirianga oa kia Iehova kia “mataku iaia.”—E tatau ia Salamo 25:14.

² Noatu eaa te roa to tatou tavini anga ia Iehova, ka anoanoia tatou kia mataku iaia. Inara eaa te aiteanga kia mataku i te Atua? Akapeea tatou me mataku ia Iehova? Eaa ta tatou ka apii mai no te mataku i te Atua mei te akaaere ko Obadia, te Taunga Maata ko Iehoiada, e te Ariki ko Ioasa?

EAA TE AITEANGA KIA MATAKU I TE ATUA?

3. E akatutu mai eaa te akakeu ra ia tatou kia mataku e eaa te tupu ana.

³ Ka kite tatou i te mataku me irinaki tatou e ka tupu tetai mea kino kia tatou. Ka riro teia mataku ei mea meitaki e ka akakeu ia tatou kia rave i te au ikianga meitaki. Na te mataku e tapupu ia tatou eiaa e aere na te pae i tetai maunga tariva. Na te mataku e akakeu ia tatou kia oro ke atu mei tetai turanga tumatetenga. Na te mataku e arai ia tatou kia kore e takino i te pirianga oa ki tetai tei akaperepere tatou e kare tatou e tuatua e kare e rave i tetai apinga tau kore.

4. Eaa te tu mataku ia Iehova ta Satani e inangaro ra?

⁴ Ka inangaro a Satani ia tatou kia mataku ia Iehova. Te akatupu ra a Satani i te manako o Eliphaza—e e Atua akaoko a Iehova, e riririri e te ngata i te akamareka. (Iobu 4:18, 19) Ka inangaro a Satani ia tatou kia mataku ia Iehova e kia akamutu i te tavini Iaia. Kia kopae i te reira ereere, ka anoanoia tatou kia mataku i te Atua ma te tau.

5. Eaa te aiteanga kia mataku i te Atua?

⁵ Te tangata tei mataku i te Atua ma te tau, te akaperepere ra aia Iaia e kare e rave i tetai apinga te ka takino i tona pirianga Kiaia. Kua rauka ia Iesu te reira tu “mataku” i te Atua. (Ebe. 5:7) Kare aia i mataku tau kore ana ia Iehova. (Isa. 11:2, 3) Mari ra, kua akaperepere aia iaia e kua inangaro i te akarongo kiaia. (Ioa. 14:21, 31) Mei ia Iesu, ka akangateitei tatou ia Iehova ma te tapu no te mea e aroa, e pakari, e tika, e te mana ririnui Aia. Kua kite katoa tatou e te akaperepere ra a Iehova ia tatou e te pakia ra tona ngakau me aru tatou i tana arataki anga. Ka tamamae tatou iaia me kore ka akarekareka tatou i tona ngakau.—Sala. 78:41; Mase. 27:11.

APIIANGA KIA MATAKU I TE ATUA

6. Eaa tetai mataara ka apii tatou kia mataku i te Atua? (Salamo 34:11)

⁶ Kare tatou i anauia mai kia mataku ia Iehova; ka apii tatou i te reira. (E tatau ia Salamo 34:11.) Ka rave tatou i teia na te akara matatio anga i te au mea tei angaia. Ko te maata atu ta tatou e kite ra i to te Atua pakari, tona ririnui, e tona akaperepere ia tatou i roto i “te au mea i angaia,” ko te maata atu ïa ta tatou akangateitei e te akaperepere iaia. (Roma 1:20) Karanga tetai tuaine ko Adrienne e, “umere tikai au i to Iehova pakari i roto i tana au mea i anga e kua tauturu iaku e kua kite aia i tei meitaki noku.” Kua taopenga aia, “Eaa au ka akatupu ei i tetai arai i rotopu iaku e Iehova, koia oki toku Ora? Ka rauka ainei ia koe te akapae i tetai taime i teia epetoma no te akamanako i te au mea tei angaia? Na te rave anga i te reira, ka akangateitei e ka akaperepere atu koe ia Iehova.—Sala. 111:2, 3.

7. Akapeea te pure me tauturu ia koe kia mataku ia Iehova ma te tau?

⁷ Tetai mataara ka rauka ia koe te akatupu i te mataku i te Atua na te pure putuputu anga kiaia. Ko te maata atu ta tatou pure, ka maata atu to tatou kite ia Iehova. Me pati ua tatou no te maroiroi kia akakoromaki i tetai timata anga, ka kite tatou i tona mana ririnui. Me akameitaki tatou i te apinga aroa o tana Tamaiti, ka kite tatou i ta Iehova akaperepere ia tatou. Me pati akatenga tatou kia Iehova no tona tauturu no tetai manamanata, ka pakia to tatou ngakau te kite i tona tu pakari. Ka riro te reira au pure ei akangateitei maata atu ia Iehova. E ka akamaroiroi ia tatou kia kopae i tetai ua atu apinga te ka takino i to tatou pirianga oa kiaia.

8. Eaa ta tatou ka rave kia mataku ua i te Atua?

⁸ Ka mataku ua tatou i te Atua me apii tatou i te Pipiria ma te kite i te au akaraanga meitaki e te au akaraanga kino i reira. Ka uriuri tatou e rua tavini tiratiratu o Iehova—te akaaere o te Ariki ko Ahaba ko Obadia e te Taunga Maata ko Iehoiada. E oti ka akara tatou eaa ta tatou ka apii mai mei te Ariki ko Ioasa o Iuda, tei akamata meitaki e oti kua akaruke atura ia Iehova.

KIA NGAKAU TOA, MEI IA OBADIA TEI MATAKU I TE ATUA

9. Akapeea te mataku ia Iehova te tauturu anga ia Obadia? (1 Ariki 18:3, 12)

⁹ Kua akakite mai te Pipiria ia Obadiab kia tatou na roto i te au tuatua: “Te maata ra to Obadia ra mataku ia Iehova.” (E tatau ia 1 Ariki 18:3, 12.) Akapeea teia mataku te tauturu anga ia Obadia? Okotai tumu, kua akariro te reira iaia ei tangata tu tika e te irinakiia; no reira te ariki i tuku ei iaia ei akaaere i tona ngutuare ariki. (Akaaite ia Nehemia 7:2.) Kua riro katoa to Obadia mataku i te Atua ei akangakau toa iaia—e tu tei anoano tikai aia. Kua noo aia i te tuatau o te tutara o te Ariki kino ko Ahaba, tei rave “i te kino i mua i te aroaro o Iehova, maata rava atura tana i [te au ariki] na mua katoa iaia ra.” (1 Ari. 16:30) Pera ta Ahaba vaine akamori-ia-Baala, ko Iezebela, kua makitakita maata aia ia Iehova e kua tauta i te takore i te akamorianga mou i roto i te patireia apatokerau. Kua tamate katoa aia i te au peroveta a te Atua. (1 Ari. 18:4) Kare e ekoko, kua akamori a Obadia ia Iehova i te tuatau manamanata.

10. Akapeea a Obadia te akaari anga i te tu ngakau toa?

¹⁰ Akapeea a Obadia te akaari anga i te tu ngakau toa? Te kimi anga a Iezebela i te au peroveta a te Atua kia tamate ia ratou, kua uuna a Obadia e 100 “e rima ngauru i roto i te ana okotai, e kua angai [atu] ia ratou ki te areto e te vai.” (1 Ari. 18:13, 14) Naringa aia i mou, kua tamateia rai a Obadia noatu te ngakau toa. E tika, e tangata ua a Obadia, kare i inangaro kia mate aia. Inara e akaperepere maata to Obadia ia Iehova e te aronga tei tavini Iaia, e puapinga atu ratou i tona uaorai oraanga.

11. Akapeea to Iehova au tavini i teia rā mei ia Obadia? (Akara katoa i te tutu.)

¹¹ E maata to Iehova au tavini i teia rā te noo ra i te au enua kua araiia ta tatou angaanga. Te akangateitei ra ratou i te au kavamani inara, mei ia Obadia, te oronga ra teia au taeake e te au tuaine akaperepere i tei tau kia Iehova—te akamori iaia anake! (Mata. 22:21) Te mataku ra ratou i te Atua na te akarongo anga kiaia kare te tangata. (Anga. 5:29) Te rave ra ratou i teia na te tutu aere anga i te nuti meitaki e te aravei kapiti anga i te ngai muna. (Mata. 10:16, 28) Te akapapu ra ratou kia tae te au mea pae vaerua ki to ratou au taeake e te au tuaine. Akamanako ana i te akaraanga o Henri, e noo ra i tetai enua Aperika kua araiia ta tatou angaanga no tetai tuatau. I te tuatau o te arai anga, kua piri a Henri ki roto i te tuʼa aere anga i te kai pae vaerua ki tona au taeake Au Kite. Tata aia: “E tangata akamā ua au. No reira kua papu iaku e na te akangateitei maata anga ia Iehova i rauka ai iaku te tu ngakau toa.” Te kite ra ainei koe e ka ngakau toa koe mei ia Henri? Ka rauka ia koe me akatupu koe i te mataku i te Atua ma te tau.

KIA TIRATIRATU, MEI TE TAUNGA MAATA KO IEHOIADA

12. Akapeea te Taunga Maata ko Iehoiada e tana vaine te vai tiratiratu anga kia Iehova?

¹² Kua mataku te Taunga Maata ko Iehoiada ia Iehova, e kua akakeuia aia kia vai tiratiratu e kia turu i te akamorianga mou. Kua kiteaia teia te rave anga te tamaine a Iezebela, ko Atalia, i te terono i Iuda. E tumu ta te tangata kia mataku ia Atalia. E tu kino tona e te noinoi no te mana akatere e kua tauta i te tamate i te kopu ariki—tana uaorai au mokopuna tamaroa! (2 Para. 22:10, 11) Tetai o te reira au tamariki—ko Ioasa—tei ora mai no te mea kua akaora te vaine a Iehoiada, ko Iehoseba, iaia. Kua uuna aia e tana tane i te tamaroa e kua akono iaia. Kua tauturu a Iehoiada e Iehoseba i te akono i te kopu ariki o Davida. Kua tiratiratu a Iehoiada kia Iehova e kare i mataku ana ia Atalia.—Mase. 29:25.

13. I to Ioasa itu mataiti, akapeea a Iehoiada te akaari anga i te tu tiratiratu?

¹³ I to Ioasa itu mataiti, kua akaari akaou a Iehoiada i te tu tiratiratu kia Iehova. Kua akatupu aia i tetai parani. Me ka tupu te reira, ka riro a Ioasa ei ariki, to Davida tutara ariki. Me ka puapinga kore te reira parani, ka mate a Iehoiada. Ma te akameitakianga a Iehova, kua autu te reira parani. Kua turuia a Iehoiada, e te au rangatira e te ngati Levi, e kua akariro ia Ioasa ei ariki e kua tamateia a Atalia. (2 Para. 23:1-5, 11, 12, 15; 24:1) E oti “kua papau iorā Iehoiada i te koreromotu i te ariki raua ko Iehova e te au tangata ravarai, ei tangata ratou no Iehova.” (2 Ari. 11:17) “E kua tuku [a Iehoiada] i te aronga tiaki ngutupa i te au ngutupa i te are o Iehova, kia kore rava tei viivii e tomo ua atu ki roto.”—2 Para. 23:19.

14. Na teea au tu te akangateiteiia anga a Iehoiada no tei akangateitei ia Iehova?

¹⁴ Akakite a Iehova i mua atu ana: “Ko tei akangateitei mai iaku ra, ko taku ïa e akangateitei atu.” Ae, kua tutaki aia ia Iehoiada. (1 Samu. 2:30) Ei akaraanga, kua rekotiia te au angaanga memeitaki a te taunga maata ei apiianga na tatou. (Roma 15:4) Te mate anga a Iehoiada, kua akangateiteiia aia ma te tanumanga “i te Oire o Davida i roto i te au ariki ra, no te mea e meitaki tana i rave ia Iseraela i te Atua, e tona are.”—2 Para. 24:15, 16.

15. Eaa ta tatou ka apii mai mei te tua o Iehoiada? (Akara katoa i te tutu.)

¹⁵ Ka tauturu te tua o Iehoiada ia tatou kia mataku i te Atua. Ka rauka i te au akaaere Kerititiano i te aru i te akaraanga o Iehoiada na te vai matakite anga e te paruru tiratiratu anga i te anana a te Atua. (Anga. 20:28) Ka apii te aronga pakarikari i te akaraanga o Iehoiada e me mataku ratou ia Iehova ma te tiratiratu, ka taangaanga Aia ia ratou ei akatupu i Tona akakoroanga. Kare aia e kopae ia ratou. Ka apii te au mapu akapeea a Iehova te akono anga ia Iehoiada e kia aru i Tona akaraanga na te akangateitei anga i te aronga tiratiratu pakarikari, te aronga kua roa to ratou tavini tiratiratu anga. (Mase. 16:31) Te openga, ka apii tatou i te akaraanga o te au rangatira e te ngati Levi tei turuturu ia Iehoiada. E turu tiratiratu tatou i te aronga “arataki” na te akarongo anga kia ratou.—Ebe. 13:17.

EIAA E AITE MEI TE ARIKI KO IOASA

16. Eaa te akaari maira e paruparu te Ariki ko Ioasa?

¹⁶ Kua puapingaia te Ariki ko Ioasa mei te tu meitaki o Iehoiada. (2 Ari. 12:2) Kua inangaro te ariki mapu i te akamareka ia Iehova. Inara te mate anga a Iehoiada, kua akarongo a Ioasa ki te au tamariki ariki pikikaa. Tei tupu? Kua ‘akamori ratou i te au asetoreta, e te au idolo.’ (2 Para. 24:4, 17, 18) Ma te mamae, “kua tono mairai [a Iehova] i te au peroveta kia ratou e akaoki mai ia ratou . . . , kare ra ratou i tuku mai i te taringa.” Kare ratou i akarongo ana ki te tamaiti a Iehoiada, ko Zekaria, e peroveta e te taunga na Iehova e ka akataeake a Ioasa iaia. Te tika, kare i maara ana iaia e na teia pamiri i akaora iaia, kua tamate atura te Ariki ko Ioasa ia Zekaria.—2 Para. 22:11; 24:19-22.

17. Eaa tei tupu kia Ioasa?

¹⁷ Kare a Ioasa i mataku ana ia Iehova, e kua tupu te kino kiaia. Akakite a Iehova: “Kareka tei akavaavaa mai iaku ra, ka akavaavaaia ïa ratou.” (1 Samu. 2:30) I muri mai kua autu te vaeau meangiti o Arama i te “nuku maata rava” o Ioasa e kua “maata rava tona au maki.” Te akaruke anga te au Arama, kua tamateia a Ioasa e tona uaorai au tavini no tei tamate ia Zekaria. Kare te reira ariki kino i tau kia tanumia ki roto i “te menema o te au ariki ra.”—2 Para. 24:23-25.

18. Ia Ieremia 17:7, 8, eaa ta tatou ka rave kia kore e aite mei ia Ioasa?

¹⁸ Eaa ta tatou ka apii mai mei te akaraanga o Ioasa? Kua aite aia mei tetai tumu rakau ma te au aka paruparu e kua anoanoia tetai rakau toko. Te takake anga atu te rakau toko—ko Iehoiada—e kua pupui mai te matangi o te akarongo pikikaa, kua inga a Ioasa ki raro. Te akatutu ririnui maira teia e kare to tatou mataku i te Atua e irinaki ua ki runga i te au taeake Kerititiano memeitaki, pera te kopu tangata. Kia vai tiratiratu ma te maroiroi, ka akamatutu tatou i te akono i te Atua anake ma te mataku na roto i te apii, te akamanako oonu, e te pure putuputu.—E tatau ia Ieremia 17:7, 8; Kolo. 2:6, 7.

19. Eaa ta Iehova e pati maira ia tatou?

¹⁹ Kare a Iehova e pati mārō mai ana ia tatou. Kua akakiteia tana e umuumu maira ia Koheleta 12:13, te karanga ra: “Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.” Me mataku tatou i te Atua, ka rauka ia tatou te akakoromaki i te au timata anga a te tuatau ki mua e kia tu ngaueue kore mei ia Obadia e Iehoiada. Kare e apinga e takino i to tatou pirianga oa kia Iehova.