Aronga Pakari​—Apii i te Akaraanga o Gideona

1. Ia 1 Petero 5:2, eaa te tikaanga ngateitei e mataora nei te aronga pakari i te rave?

KUA tukunaia ki te aronga pakari Kerititiano kia akono i ta Iehova au mamoe akaperepereia. Ka akaperepere teia au tangata tiratiratu i te tikaanga ngateitei kia tavini i to ratou au taeake e te au tuaine, e te angaanga pakari ra ratou kia riro ei “tiaki . . . te ka angai ia ratou.” (Iere. 23:4; e tatau ia 1 Petero 5:2.) Mataora tikai tatou e tei roto teia au taeake i to tatou au putuputuanga!

2. Eaa te manamanata ka tupu ki tetai aronga pakari?

² Te akono anga i ta ratou apainga, e maata te au akaaoanga ka tupu ki te aronga pakari. Tetai tumu, ka o mai tetai āka angaanga no te akono anga i te putuputuanga. Ko Tony, e tangata pakari i Marike, ka anoanoia aia kia akaari i te manako tau no te au angaanga ka āriki aia. Akamarama mai aia: “Akamataanga te maki kino COVID-19, kua tauta pakari au i te akapapa i te au uipaanga e te angaanga tutu aere. Inara, noatu te maata o te angaanga, e maata ua atu rai te angaanga ka raveia. Tei tupu mai, kua topatopa taku tatau Pipiria, taku apii, e te pure.” Ko Ilir, e tangata pakari i Kosovo, kua tupu tetai akaaoanga ke kiaia. Iaia e noo ra i tetai ngai te tupu ra te tamaki, ngatā iaia te aru i te au aratakianga a te akaaerenga. Karanga aia: “Kua timataia toku tu ngakau toa te oronga mai anga te opati Betela i tetai angaanga kia tauturu i te au taeake e te au tuaine i ko i tetai ngai kino tikai. Mataku au, te akaraanga e kare te patianga e tau ana.” Ko Tim, e mitinari i Asia, ngatā iaia te rave i te au angaanga mei tera rā ki tera rā. Karanga aia: “Tetai taime, roiroi tikai toku kopapa e toku manako.” Eaa te ka tauturu i te aronga pakari me tupu te au akaaoanga kia ratou?

3. Akapeea te katoatoa e puapingaia ai mei te akaraanga o te Akava ko Gideona?

³ Ka akara te aronga pakari ki te akaraanga o te Akava ko Gideona. (Ebe. 6:12; 11:32) E tiaki e ka paruru aia i te iti tangata o te Atua. (Aka. 2:16; 1 Para. 17:6) Mei ia Gideona rai, kua ikiia te aronga pakari kia akono i te iti tangata o te Atua i teia tuatau ngatā. (Anga. 20:28; 2 Timo. 3:1) Ka apii tatou i to Gideona tu manako tau, te akaaka, e te akarongo. Kua timataia tona tu akakoromaki iaia e rave ra i tana angaanga. Me te tavini ra tatou ei tangata pakari e me kare, ka akaperepere tatou i to tatou aronga pakari. Ka tauturu tatou i teia au taeake angaanga pakari i roto i te putuputuanga.—Ebe. 13:17.

ME TIMATAIA TOOU TU MANAKO TAU E TE AKAAKA

4. Akapeea a Gideona te akaari anga i te manako tau e te akaaka?

⁴ E tangata manako tau e te akaaka a Gideona.b Te akakite anga te angera a Iehova kia Gideona e koia tei ikiia kia akaora ia Iseraela mei te nuku ririnui o Midiana, kua pau atu teia tangata akaaka: “E kopu-tangata akaaka toku ia Manase nei, e ko au tei iti rava i te kopu-tangata o toku metua.” (Aka. 6:15) Manako aia e kare aia e tau no teia tuanga angaanga, inara kua kite meitaki a Iehova e ka rauka iaia. Ma ta Iehova tauturu, kua rauka ia Gideona i te rave meitaki i tana tuanga angaanga.

5. Akapeea te tu manako tau e te akaaka o tetai tangata pakari me timataia?

⁵ Ka akaari te aronga pakari i te manako tau e te akaaka i roto i te au mea ravarai ta ratou e rave ra. (Mika. 6:8; Anga. 20:18, 19) Kare ratou e akatietie i to ratou kite e ta ratou i rave; e kare katoa ratou e manako e puapinga kore ua ratou no te tarevake i mua ana. I tetai au taime ka timataia rai te tu akaaka e te manako tau o tetai tangata pakari. Ei akaraanga, penei e maata te au angaanga ka āriki aia inara ngatā iaia te rave i te reira. Penei ka akaapaia no tetai angaanga me kore ka akapaapaaia aia no tetai atu angaanga. Eaa ta te aronga pakari ka apii mai mei ia Gideona kia tauturu ia ratou no taua au turanga?

6. Eaa ta te aronga pakari ka apii mai mei to Gideona tu manako tau? (Akara katoa i te tutu.)

⁶ Pati i te tauturu. Kua kite te tangata manako tau e te vaira tetai au mea kare e rauka iaia i te rave. Kua akaari a Gideona i te tu manako tau na te pati anga i tetai aronga kia tauturu mai. (Aka. 6:27, 35; 7:24) Mei te reira katoa te aronga pakari. Akamārama mai a Tony, tei taikuia i mua ana: “No te tu i utuutuia mai au, e āriki ua ana au i te au angaanga noatu kare e rauka iaku i te rave. No reira kua iki au i te kapiti mai i te tumu tuatua no te manako tau ki roto i ta maua akamorianga ngutuare e kua pati au i taku vaine kia oronga mai i tona manako. Kua akara katoa au ki runga i te jw.org no te vitio Train, Trust, and Empower Others, as Jesus Does.” Kua pati a Tony i tetai au taeake kia tauturu mai. Eaa tei tupu? Karanga a Tony: “Te akonoia nei te angaanga i roto i te putuputuanga, e i teianei e maata toku taime i te akaketaketa iaku i te pae vaerua.”

7. Me akaapaia, akapeea te aronga pakari me aru i to Gideona tu? (Iakobo 3:13)

⁷ Ariu maru ua me akaapaia. Tetai mea ka tupu ki te aronga pakari koia oki me akaapaia ratou. Ka riro to Gideona akaraanga ei tauturu. Kare ekoko no tona tu apa ua, kua ariu maru ua aia te akaapa anga te au tangata o Epheraima iaia. (Aka. 8:1-3) Kare a Gideona i pau riri ana kia ratou. Kua akaari aia i te tu akaaka na te akarongo anga i to ratou manamanata, e kua akatikatika maru atu i te reira. No reira ka aru te aronga pakari i to Gideona tu na te akarongo meitaki anga e kia ariu maru ua me akaapaia mai. (E tatau ia Iakobo 3:13.) No reira ka akatupu ratou i te ʼau i roto i te putuputuanga.

8. Eaa ta te aronga pakari ka rave me akapaapaaia ratou? Oronga mai i te akaraanga.

⁸ E akapaapaa ia Iehova. Te akapaapaa anga te tangata ia Gideona te autu anga i rungao ia Midiana, kua akamou aia ki runga ia Iehova. (Aka. 8:22, 23) Akapeea te aronga pakari me aru i to Gideona tu? Na te akapaapaa anga ia Iehova no ta ratou i rave. (1 Kori. 4:6, 7) Ei akaraanga, me akameitakiia tetai tangata pakari no te tu o tana apiianga, e akapaapaa aia i te tumu o te apiianga, te Tuatua a te Atua, me kore ki te tereni anga na roto mai i ta Iehova akaaerenga. Kia akamanako rai te aronga pakari e me te akapaapaa ra ratou ia ratou uaorai. Akamanako ana i tei tupu ki tetai tangata pakari ko Timothy. Te tavini anga aia ei tangata pakari, e reka ana a Timothy te oronga i te au akoanga ki te katoatoa. Karanga aia: “E oronga ana au i te au akamataanga e te au akatutuanga roa e te ngata. E akameitaki mai ana te katoatoa iaku. Te mea kino ra, kua akapaapaa te katoatoa iaku kare i te Pipiria me kore ia Iehova.” Muri mai, kua taui a Timothy i tana tu apii kia kore te reira e akamou ua ki runga iaia. (Mase. 27:21) Eaa tei tupu? Akamārama aia: “Kua akakite mai te au taeake e te au tuaine e kua tauturu taku akoanga ia ratou kia akakoromaki i tetai manamanata, timataanga, me kore kia akavaitata atu kia Iehova. E maata atu toku rekareka i teianei kare mei to mua ana te akapaapaa anga mai ratou iaku.”

ME TIMATAIA TOOU TU AKARONGO E TE NGAKAU TOA

9. Akapeea to Gideona akarongo e te tu ngakau toa te timataia anga? (Akara i te tutu i te kapi mua.)

⁹ Muri ake te ikiia anga a Gideona ei akava, kua timataia tona akarongo e te tu ngakau toa. Kua orongaia te apainga maata kia takore aia i te atarau o Baala o tona metua tane. (Aka. 6:25, 26) Muri ake te akaputuputu anga i tetai pupu vaeau, e rua taime kua akaueia a Gideona kia akaiti mai i tona pupu vaeau. (Aka. 7:2-7) I te openga, kua akakiteia kiaia kia ta i te enemi i taua po.—Aka. 7:9-11.

10. Akapeea to tetai tangata pakari akarongo me timataia?

¹⁰ E mea tau kia “akarongo ngoie” ua te aronga pakari. (Iako. 3:17) Ka āriki ua te tangata pakari akarongo i ta te Tuatua Tapu e akakite ra e ka aru i te aratakianga a te akaaerenga. No reira ka akanoo aia i te akaraanga meitaki no etai ke. Inara ka timataia rai tona akarongo. Ei akaraanga, penei ka ngatā iaia te aru i te au akakiteanga tei orongaia mai. Tetai au taime, ka ekoko aia me e tau me kore e meitaki tikai ainei tetai au akakiteanga. Me kore ka patiia mai aia kia akono i tetai angaanga te ka tuku iaia ki roto i te kino. Akapeea te aronga pakari me aru i to Gideona tu akarongo i roto i taua au turanga?

11. Eaa te ka tauturu i te aronga pakari kia akarongo ua?

¹¹ Akarongo meitaki ki te aratakianga e e aru i te reira. Kua akakite te Atua kia Gideona e akapeea me takore i te atarau a tona metua tane, kiea me akatu i tetai atarau ou kia Iehova, e teea manu ka akaatingaia. Kare a Gideona i kimi akaapa ana i te akaueanga—kua aru ua aia i te reira. I teia tuatau, ka rauka ta te aronga pakari au akakiteanga no ko mai i ta Iehova akaaerenga na roto i te au reta, te au akakiteanga, e te au arataki anga no te tauturu ia tatou i te pae vaerua e te pae kopapa. Akaperepere tatou i te aronga pakari no tei aru tiratiratu i te aratakianga a te akaaerenga. Ka puapingaia te katoaanga o te putuputuanga.—Sala. 119:112.

12. Akapeea te aronga pakari me taangaanga ia Ebera 13:17 me e taui anga tetai i roto i tetai aratakianga a te akaaerenga?

¹² Kia puareinga ua i te taui. E akamaara kua akakite a Iehova kia Gideona kia akaiti mai i tona pupu vaeau e 99 patene. (Aka. 7:8) Penei kua manako aia: ‘Ka anoano tikaiia ainei teia tauianga? Ka rauka ainei teia?’ Noatu rai, kua akarongo ua a Gideona. Ka aru te aronga pakari o teia tuatau i to Gideona tu na te rave anga i te au tauianga tei akakiteia mai e te akaaerenga. (E tatau ia Ebera 13:17.) Ei akaraanga, i te 2014 kua taui te Pupu Akaaere i te tu me orongaia te moni no te akatu anga i te au Are Uipaanga Patireia e te au Are Akaputuputuanga. (2 Kori. 8:12-14) Kare te au putuputuanga e anoanoia kia tutaki akaou atu i te moni. Mari ra, ka akaputuputu te au putuputuanga i te ao katoa i ta ratou moni ei tauturu i te akatu i te au Are Uipaanga e te au Are Akaputuputuanga ka anoanoia, noatu e manga ua ta te putuputuanga o te reira ngai ka oronga mai. I to José akarongo anga i te taui anga, ekoko aia e me ka rauka te reira, te manako anga: ‘Kare rava tetai Are Uipaanga e akatuia. Kare roa teia mea e raveia ana i teia ngai.’ Eaa tei tauturu ia José kia turuturu i te aratakianga. Karanga aia: “Te akamaara maira te au tuatua a Maseli 3:5, 6 kiaku e e irinaki kia Iehova. E mea umere tikai tei tupu mai! E maata te au Are Uipaanga Patireia e akatuia nei e kua apii matou kia oronga ua atu i te au apinga ei tauturu i tei ngere ra.”

13. (a) Eaa tei papu ia Gideona? (e) Akapeea te aronga pakari me aru i to Gideona tu? (Akara katoa i te tutu.)

¹³ Rave ngakau toa i to Iehova anoano. Kua akarongo a Gideona kia Iehova noatu tona mataku e te kino ka tupu kiaia. (Aka. 9:17) Muri ake i ta Iehova akapapuanga, kua papu ia Gideona e ka tauturu mai te Atua iaia, me paruru aia i te iti tangata o te Atua. Ka aru te aronga pakari e noo ra i te au ngai kua araiia te angaanga i to Gideona tu. Ka arataki ngakau toa ratou i te au uipaanga e te angaanga tutu aere noatu ka opuia, ka uiuiia, ka ngere i te ngai angaanga, e noatu te kino.c I te tuatau tumatetenga maata, ka anoano te aronga pakari i te ngakau toa kia akarongo ki te au akakiteanga ka orongaia mai kia ratou—noatu ka tupu te kino. Penei ka orongaia mai te au akakiteanga kia oronga i te karere akavaanga o te ua toka e kia ora atu i te tamaki a Goga o Magoga.—Eze. 38:18; Apo. 16:21.

ME TIMATAIA TOOU TU AKAKOROMAKI

14. Akapeea to Gideona tu akakoromaki te timataia anga?

¹⁴ Kua anoanoia a Gideona kia angaanga pakari ei akava. Te oro anga te nuku o Midiana i te po i te tuatau tamaki, kua arumaki atu a Gideona ia ratou mei te o ko Iezereela e tae ua atu ki te Kauvai Ioridana, tei koropiniia e te au ngangaere. (Aka. 7:22) Kua akamutu ainei a Gideona ki Ioridana? Kare! Noatu te roiroi, kua arumaki atu aia e tona au tangata e 300 i taua nuku ra. Rokoia atura e ratou te nuku o Midiana e kua ta atu ia ratou.—Aka. 8:4-12.

15. Akapeea te tu akakoromaki o tetai tangata pakari me timataia?

¹⁵ Penei ka roiroi kino tetai tangata pakari i te pae kopapa, te manako, e te ngakau, te akono i te putuputuanga e tona ngutuare tangata. I roto i taua turanga, akapeea te aronga pakari me aru i to Gideona tu?

16-17. Eaa tei tauturu ia Gideona kia akakoromaki, e eaa tei papu i te aronga pakari? (Isaia 40:28-31) (Akara katoa i te tutu.)

¹⁶ Kia irinaki e ka akamaroiroi a Iehova ia koe. Kua irinaki a Gideona e ka oronga mai a Iehova i te maroiroi kiaia, kua tupu rai te reira. (Aka. 6:14, 34) I tetai atianga, na raro ua a Gideona e tona au tangata i te arumaki i nga ariki o Midiana ia raua e na runga ra i te kamera. (Aka. 8:12, 21) Inara, ma te tauturu a te Atua, kua autu te ngati Iseraela. Ka rauka katoa i te aronga pakari i te irinaki kia Iehova, “kare aia e paruparu, e kare oki e roiroi.” Ka oronga mai aia i te maroiroi kia ratou me anoanoia te reira.—E tatau ia Isaia 40:28-31.

¹⁷ Akamanako ana i tei tupu kia Matthew, e mema no te Kumiti Are Maki. Eaa tei tauturu iaia kia akakoromaki? Karanga a Matthew: “Kua kite mai au i te tikaanga o Philipi 4:13. I te tuatau roiroi tikai au, kua pure akatenga au te pati ki te Atua no te maroiroi i te pae kopapa e te manako, no te tauturu i toku au taeake. I taua au atianga, kua kite au i to Iehova vaerua te akamaroiroi e te tauturu mai anga iaku kia akakoromaki.” Mei ia Gideona rai, ka tupu te manamanata ki to tatou aronga pakari akaperepereia ia ratou e tiaki ra i te anana. Ae, ka anoanoia ratou kia manako tau e kare e rauka ia ratou te rave i te au mea ta ratou e inangaro ra i te rave. Inara ka irinaki ratou e ka akarongo mai a Iehova i ta ratou patianga tauturu e ka akamaroiroi ia ratou kia akakoromaki.—Sala. 116:1; Phili. 2:13.

18. Akamanako akaou, akapeea te aronga pakari me aru i to Gideona tu?

¹⁸ Te vaira te au apiianga meitaki ta te aronga pakari ka apii mai mei to Gideona tu. E mea puapinga no te aronga pakari kia manako tau e kia akaaka i te maata o te angaanga ka āriki ratou e akapeea me ariu atu ki te akaapa anga me kore te akapaapaa anga. Ka akaari ratou i te tu akarongo e te ngakau toa, i te openga o teia akatereanga e vaitata maira. E kia irinaki ratou e noatu te manamanata ta ratou e akakoromaki ra, ka akamaroiroi ua te Atua ia ratou. Ae, ka akaperepere tatou i teia au tiaki angaanga pakari e “kia manako meitaki” ia ratou.—Phili. 2:29.