Akamaroiroi i Tetai e Tetai i te Uipaanga

1. Eaa ra tatou ka paupau ei i te uipaanga?

EAA tatou i aere ei ki te uipaanga? Kia akapaapaa ia Iehova. (Sala. 26:12; 111:1) Aere katoa tatou ki te uipaanga no te akapumaana i tetai e tetai i te au tuatau taitaia tikai. (1 Tesa. 5:11) Me tāki i to tatou rima kia paupau, te akatupu nei tatou i teia nga akakoroanga.

2. Eaa te au atianga ka rauka ia tatou i te paupau i te uipaanga?

² I te epetoma tataki tai, tei ia tatou te atianga kia paupau i te uipaanga. Ei akaraanga, i te openga epetoma, ka rauka ia tatou i te paupau i te tuatau o te Apii Punanga Tiaki a te putuputuanga. I te au epetoma, ka rauka ia tatou i te paupau i te tuatau Mārama o te Tuatua Mou, te Apii Pipiria a te Putuputuanga, e tetai atu tuanga no te uriurianga.

3. Eaa te turanga ngatā ka tupu kia tatou, inara akapeea a Ebera 10:24, 25 me tauturu?

³ Inangaro tatou katoatoa i te akapaapaa ia Iehova e te akamaroiroi i to tatou au taeake akamori. Me paupau ra, penei ka ngatā ia tatou te reira. Ka taitaia tatou i te paupau, me kore te inangaro tikai ra tatou i te pau inara kare tatou e iki putuputuia ana. Eaa ta tatou ka rave me tupu teia? Ka kitea te pauanga i roto i ta Paulo reta ki to Epera. Te uriuri anga no te puapinga o te uipa kapiti anga, akakite maira a Paulo e kia akamou i te manako kia “akamaroiroi.” (E tatau ia Ebera 10:24, 25.) Me kite mai tatou e ka akamaroiroiia tetai i roto i te uipaanga e toou irinakianga, ka inangaro ua tatou i te paupau. Me kare tatou e iki putuputuia ana, ka mataora ua tatou e kua rauka i tetai pae i roto i te putuputuanga i te paupau.​—1 Pete. 3:8.

4. Eaa nga manako e toru ka uriuri teia atikara?

⁴ I teia atikara, ka uriuri tatou na mua akapeea me akamaroiroi i tetai e tetai i roto i te putuputuanga meangiti kare e maata ana te aronga paupau. Aru mai, ka akara tatou akapeea me akamaroiroi i tetai e tetai i roto i te putuputuanga nunui e maata te aronga e tāki ra i to ratou rima no te paupau. Te openga, ka uriuri tatou i te au ravenga kia akariro i ta tatou au tuatua paupau ei akamaroiroi i tetai e tetai.

AKAMAROIROI I TETAI E TETAI I ROTO I TE PUTUPUTUANGA MEANGITI

5. Akapeea tatou me akamaroiroi i tetai e tetai noatu e iti ua tei tae mai?

⁵ I roto i te putuputuanga me kore te pupu meangiti ua, kare e maata ana te aronga paupau kia iki te taeake akaaere. Penei i tetai taime, ka tiaki roa aia kia iki i tetai kia paupau. Penei akaraanga e roa te uipaanga​—kare i te mea meitaki. Eaa taau ka rave? E tāki putuputu i toou rima. Me pera koe penei ka akakeu te reira i tetai pae kia paupau.

6-7. Akapeea koe me akakore i te taitaia me paupau?

⁶ Akapeea me ka akariro te paupau anga ia koe kia ru? E maata tei kite i teia tu. Kia rauka ia koe i te akamaroiroi i toou au taeake e te au tuaine, eaa ka kore ei e akara i te au ravenga kia akakore i toou tu taitaia me paupau? Eaa taau ka rave?

⁷ Penei ka tauturu teia au ravenga na te akara akaou anga i Te Punanga Tiaki o mua ana tei neneiia.b Ei akaraanga, e akapapa meitaki. (Mase. 21:5) Me mātau meitaki koe i taau apii, ka māmā ua ia koe i te oronga i taau pauanga. Pera katoa, e tapoto i taau pauanga. (Mase. 15:23; 17:27) Me poto te pauanga ka maru te taitaia. Penei e tai e rua aerenga manako o te pauanga, ka māmā ua i te au taeake e te au tuaine i te aru i te reira, i to te pauanga roa e maata te manako. Me poto te pauanga, te akaari maira koe e kua akapapa meitaki koe e kua mārama i te apii.

8. Eaa to Iehova manako i ta tatou tauta anga meitaki?

⁸ Akapeea me kua tamata ana koe i teia au tauturu inara te ru ra koe me paupau e tai e rua taime? E irinaki papu e te āriki ua maira a Iehova i taau e tauta ra. (Luka 21:1-4) Kare e anoanoia te tu taitaia me oronga i toou meitaki kia Iehova. (Phili. 4:5) E akara i taau ka rauka i te rave, e akanoo i te akakoroanga kia rave i te reira, e e pure no te ngakau maru. Ei akamata i te reira akakoroanga e oronga i te pauanga poto ua.

AKAMAROIROI I TETAI E TETAI I ROTO I TE PUTUPUTUANGA NUNUI

9. Eaa te turanga ngatā ka tupu i roto i te putuputuanga nunui?

⁹ Me e maata te au papuritia i roto i te putuputuanga, penei ka tuke toou turanga ngatā. Penei e maata rai te au taeake e te au tuaine i te paupau e kare e kiteaia atu toou rima. Ei akaraanga ko Danielle, e reka ua ana aia i te paupau i te uipaanga.c Manako aia i te reira ei tuanga no tana akamorianga, no te akamaroiroi i tetai, e e ravenga katoa no te akaketaketa i te au tuatua mou Pipiria kiaia. Te neke anga aia ki tetai putuputuanga nunui kare aia i iki putuputuia ana​—e i te uipaanga katoa kare roa aia i ikiia ana. Kua “riri au,” i karanga aia. “Manako au kua ngere au i tetai akameitakianga. Me tupu putuputu ra teia, ka manako koe e mea akakoro.”

10. Akapeea tatou me akamaata i ta tatou ka rauka i te pau?

¹⁰ Kua kite ainei koe i to Danielle tu? Me koia ia, penei ka timataia koe kia tuku i te ’au e kia akarongo ua i te uipaanga. Eiaa ra e akamutu i te paupau. Eaa taau ka rave? E akapapa kia maata taau ka pau i te uipaanga. Me kare koe e ikiia i te akamata anga o te apii, penei ka rauka ia koe i te paupau i te toenga o te uipaanga. Me akapapa no te Apii Punanga Tiaki, akamanako akapeea te au parakarapa i te turuturu anga i te tumu tuatua o te atikara. Me pera koe, papu e e pauanga taau ka oronga i roto i te apii. Penei ka akapapa koe i te pau i te au parakarapa te uriuri ra i te au apiianga pakari kare e māmā i te akatakaia. (1 Kori. 2:10) No teaa ra? E iti ua te aronga ka pau i te reira. Akapeea me kua aru koe i teia au tauturu e kua kite mai e kare rai i ikiia kia pau i te uipaanga? Penei e aravei koe i te akaaere apii i mua ake i te uipaanga e e akakite kiaia e ko teea uianga taau ka inangaro koe i te pau.

11. Eaa ta Philipi 2:4 e akamaroiroi maira ia tatou kia rave?

¹¹ E tatau ia Philipi 2:4. Ma te aratakianga a te vaerua, kua akamaroiroi a Paulo i te au Kerititiano kia akara i te meitaki o tetai ke. Akapeea tatou me taangaanga i te reira ako i te uipaanga? Na te akamaara anga e te inangaro ra tetai pae mei ia tatou rai i te paupau.

12. Eaa tetai mataara no te akamaroiroi i tetai i te uipaanga? (Akara katoa i te tutu.)

¹² Akamanako ana i te reira na teia tu. Me pukapuka koe ki toou au taeake, ka tuatua ua ainei koe e kare o ratou taime i te pau mai? Kare! Ka inangaro rai koe kia akakite mai ratou i to ratou manako. Aiteite katoa i te uipaanga, ka inangaro tatou e kia rauka te pauanga a tetai. Ko tetai mataara meitaki tikai i te akamaroiroi i te au taeake e te au tuaine koia oki kia akaruke i tetai tuatau no ratou kia akakite mai i to ratou irinakianga. (1 Kori. 10:24) Ka akara ana tatou akapeea me rave i teia.

13. Akapeea tatou me tuku kia maata te aronga paupau i te uipaanga?

¹³ E tapoto i ta tatou pauanga, kia rauka i tetai pae i te paupau. Ka akaari mai te aronga pakari e te au taeake tukatau i te akaraanga. Noatu me poto taau pauanga, eiaa e pau i te katoatoa. Me pou ia koe i te pau i te au manako i roto i te parakarapa, kare i reira a tetai. Ei akaraanga, i roto i teia parakarapa, kua orongaia mai e rua manako​—tapoto i taau pauanga e eiaa e pau i te katoatoa. Me ikiia koe na mua i te pau i te parakarapa, eaa ka kore ei e pau e tai ua manako?

14. Eaa te ka tauturu ia tatou kia akamanako e eia taime ka tāki i te rima? (Akara katoa i te tutu.)

¹⁴ E akamanako e eia taime ka paupau koe. Me tāki ua i to tatou rima i te au taime ravarai, penei te māro ra tatou i te taeake akaaere kia iki ua mai ia tatou noatu kare tetai pae i paupau ake. Ka akamaromaroa teia i tetai pae kia tāki i to ratou rima.​—Kohe. 3:7.

15. (a) Eaa to tatou tu me kare e ikiia mai kia paupau? (e) Akapeea te au taeake akaaere me akamanako i te katoatoa? (Akara i te pia “Me te Akaaere ra Koe.”)

¹⁵ Me maata te au taeake e tāki ra i to ratou rima i te tuatau o te apii, penei kare o tatou taime kia paupau. I tetai taime kare e rauka i te akaaere i te iki mai ia tatou. Ka maromaroa rai tatou, inara eiaa tatou e taitaia me kare tatou e ikiia mai.​—Kohe. 7:9.

16. Akapeea tatou me akamaroiroi i tetai tei paupau ana?

¹⁶ Me kare e rauka ia koe te pau putuputu, e akarongo meitaki i te pauanga a tetai e me akamutu te uipaanga e akameitaki ia ratou. Ka riro taau akameitaki anga ei akamaroiroi maata i te au taeake e te au tuaine. (Mase. 10:21) Ko te akameitakianga tetai tuanga no te akamaroiroi i tetai e tetai.

TETAI ATU MATAARA NO TE AKAMAROIROI I TETAI E TETAI

17. (a) Akapeea te au metua me tauturu i ta ratou tamariki kia paupau meitaki? (e) Kia tau ki te vitio, eaa nga takainga e a no te akapapa i te paupau? (Akara katoa i te tuatua rikiriki i raro.)

¹⁷ Akapeea tatou me akamaroiroi i tetai i te uipaanga? Me e metua koe, e tauturu i ta kotou tamariki kia papa no te pau kia tau ki to ratou mataiti. (Mata. 21:16) I tetai taime ka uriuriia te au manako pakari mei te manamanata o te akaipoipo e te oraanga, inara te vaira tetai parakarapa ka rauka i taau tamaiti i te paupau. Pera katoa, e tauturu i taau tamariki kia mārama i te tumu me kare ratou e ikiia i te au taime ravarai me tāki i to ratou rima. Me akamārama i teia kare ratou e maromaroa me kare e ikiia.​—1 Timo. 6:18.d

18. Akapeea tatou me kopae kia kore e akapaapaa ua ia tatou me paupau? (Maseli 27:2)

¹⁸ Pouroa tatou ka rauka i te akapapa i te au pauanga akamaroiroi te ka akangateitei ia Iehova e ka akamaroiroi i te au taeake. (Mase. 25:11) Ia tatou e akakite ra i tetai akaraanga poto eiaa e maata te tuatua. (E tatau ia Maseli 27:2; 2 Kori. 10:18) Mari ra, e akamou ki runga ia Iehova, tana Tuatua e tona iti tangata katoa. (Apo. 4:11) Me ui mai te uianga i roto i tetai parakarapa i to tatou uaorai akaraanga e akakite i te reira. Ka oronga mai te parakarapa ka aru mai i teia.

19. (a) Eaa te ka tupu me akamanako rai tatou i tetai i te uipaanga? (Roma 1:11, 12) (e) Eaa taau e mareka ana me pau i te uipaanga?

¹⁹ Noatu e kare e ture akapeea me paupau, ka tauta ua rai tatou kia akamaroiroi na roto i ta tatou pauanga. Tetai taime ka maata te pauanga. Me kore ka mataora ua tatou e kua rauka te tuatau kia paupau e kua mareka tetai i te reira. Na te akamou anga ki te anoano o tetai i te uipaanga, ka rekareka tatou katoatoa i te ‘akapumaana’ i tetai e tetai.​—E tatau ia Roma 1:11, 12.