Akamatutu i to Tatou Aroa ia Tatou Uaorai

1-2. (a) Eaa te tumu i tuatua ai te apotetoro ko Paulo e ko te aroa te tu “maata”? (e) Eaa te au uianga ka uriuri tatou?

I TE uriuri anga te apotetoro ko Paulo no runga i te akarongo, te manakonakoanga, e te aroa, kua taopenga aia na te karanga anga, “ko tei maata ra [o teia au tu] ko te aroa.” (1 Kori. 13:13) Eaa ra a Paulo i tuatua ai i teia? A te tuatau ki mua, kare e anoanoia te akarongo i roto i ta te Atua taputou no te ao ou, no te mea ka akatupuia teia manakonakoanga. No reira ka anoanoia ainei tatou kia akaperepere ia Iehova e tona iti tangata? Ae, ka akaperepere ua atu tatou ia ratou e tuatau ua atu.

² I te mea ka anoanoia tatou kia akaari ua rai i te aroa, ka uriuri tatou e toru uianga. Te mea mua, eaa ra tatou ka aroa ua ai ia tatou uaorai? Te rua, akapeea tatou me aroa ia tatou uaorai? Te toru, akapeea tatou me akamatutu i to tatou aroa ia tatou uaorai?

EAA RA TATOU KA AROA UA AI IA TATOU UAORAI?

3. Eaa tetai au tumu ka aroa tatou ia tatou uaorai?

³ Eaa i puapinga ai kia aroa tatou ia tatou uaorai? Ko tetai tumu, te akaari ra tatou e e au Kerititiano mou tatou. Kua akakite a Iesu ki tana au apotetoro: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:35) Pera katoa, na te aroa e taokotai ia tatou. Karanga a Paulo no te aroa e “tatua apa kore” ïa. (Kolo. 3:14) Inara te vaira tetai tumu puapinga kia aroa tatou ia tatou uaorai. Kua tata te apotetoro ko Ioane ki te au taeake: “Ko tei anoano i te Atua ra, kia aroa aia i tona taeake.” (1 Ioa. 4:21) Me aroa tatou ia tatou uaorai, te aroa katoa ra tatou i te Atua.

4-5. Akatutu mai akapeea te aroa no te Atua i piri vaitata ei ki to tatou aroa i tetai e tetai.

⁴ Eaa te pirianga no to tatou aroa i te Atua e to tatou aroa i te au taeake e te au tuaine? Ei akatutuanga, e akamanako ana i te pirianga i rotopu i to tatou pukuatu e tetai atu au mero kopapa. Me akarongo te taote i to tatou pulse, ka kite aia me e paruparu te reira e me maroiroi. Na roto i teia ka kite aia i te tu o to tatou pukuatu. Eaa te apiianga mei teia no runga i te aroa?

⁵ Mei te taote rai ka kite i te tu o to tatou pukuatu mei te pulse, ka kite katoa tatou i te tu maroiroi o to tatou aroa i te Atua, mei to tatou aroa anga i te au taeake. Me kite tatou e kua paruparu to tatou aroa no te au taeake, penei kua paruparu katoa to tatou aroa i te Atua. Inara me aroa putuputu tatou i te au taeake, te maroiroi ra to tatou aroa i te Atua.

6. Eaa tatou ka matakite ei me kare e maroiroi ana to tatou aroa i te au taeake e te au tuaine? (1 Ioane 4:​7-9, 11)

⁶ Kia matakite tatou me kare to tatou aroa i te au taeake e te au tuaine e maroiroi ana. No teaa ra? No te mea ka takino teia i to tatou pirianga kia Iehova. Te akamaara maira te apotetoro ko Ioane e: “Ko tei kore e aroa i tona taeake tei akaraia e ia ra, eaa e tika’i iaia kia anoano i te Atua tei kore i akaraia e ia ra.” (1 Ioa. 4:20) Eaa te apiianga? Ka mareka a Iehova ia tatou me “aroa katoa tatou ia tatou uaorai.”—E tatau ia 1 Ioane 4:​7-9, 11.

AKAPEEA TATOU ME AROA IA TATOU UAORAI?

7-8. Eaa tetai au mataara ka akaari tatou i te aroa ki tetai e tetai?

⁷ I roto i ta te Atua Tuatua, ka kite putuputu tatou i teia akauenga “kia aroa kotou ia kotou uaorai.” (Ioa. 15:​12, 17; Roma 13:8; 1 Tesa. 4:9; 1 Pete. 1:22; 1 Ioa. 4:11) E tu te aroa no te ngakau, kare e kiteaia e te tangata. No reira akapeea tatou me aroa ia tatou uaorai? Na roto i ta tatou au tuatua e te angaanga.

⁸ E maata te au ravenga no te aroa i to tatou au taeake e te au tuaine. Teia tetai au akaraanga: “Ei tuatua-mou ta te tangata katoa e tuatua ki tona tangata tupu.” (Zeka. 8:16) “E tamou oki i te au kotou kotou uaorai.” (Mare. 9:50) E akaari “i te akangateitei anga tetai ki tetai.” (Roma 12:10) “Ka āriki kotou ia kotou uaorai.” (Roma 15:7) “E . . . akakore tetai i ta tetai ara.” (Kolo. 3:13) “Ka rave atu tetai i ta tetai apainga.” (Gala. 6:2) “E akapumaana kotou tetai ki tetai.” (1 Tesa. 4:18) “E akatupu i te meitaki tetai ki tetai.” (1 Tesa. 5:11) “E pure oki tetai i tetai.”—Iako. 5:16.

9. Eaa i riro ei te akapumaana anga ei akairo no te aroa? (Akara katoa i te tutu.)

⁹ Ka uriuri ana tatou e tai irava no te aroa tei taikuia i te parakarapa i runga akenei. Ka uriuri tatou i ta Paulo akoanga: “E akapumaana kotou tetai ki tetai.” Eaa i riro ei te akapumaana anga ei akairo no te aroa? Karanga tetai tataanga Pipiria e ko te tuatua “akapumaana” ta Paulo i taiku, te aiteanga “ko te tu anga i te pae i tetai tangata kia akamaroiroi iaia me rokoia aia e te timataanga.” No reira, me akapumaanaia tetai ka tauturu tatou i te taeake taitaia kia tu e kia aere ua atu na runga i te mataara ki te ora. I te au taime ravarai me akamaroiroi tatou i tetai taeake e tetai tuaine, te akaperepere ra tatou ia ratou.—2 Kori. 7:​6, 7, 13.

10. Eaa te pirianga vaitata i rotopu i te aroa e te akapumaana?

¹⁰ E pirianga vaitata to te aroa e te akapumaana. I teea tu? Ka akakeuia te tangata aroa kia akapumaana e kia tauturu i tetai. Te mea mua, ka tangi aroa tatou e oti ka akapumaana iaia. Akaari maira a Paulo i to Iehova aroa na te akapumaana anga i te tangata. Akakite mai aia e ko Iehova “te Metua o to tatou Atu ra o Iesu Mesia, te tumu o te aroa, e ko te Atua nona anake te pumaana.” (2 Kori. 1:3) Te taangaanga nei a Paulo i te tuatua “aroa” i te akaari mai i te tangi aroa i tetai. No reira, ko te Atua te Metua e te Tumu o te aroa. E aroa maata Tona i te tangata. E na taua aroa i akakeu iaia kia akapumaana “ia matou i to matou au mate” me kore timataanga. (2 Kori. 1:4) Mei te vai mā mei roto mai i te punavai tei akaoraora i te aronga kaki vai, ka akaoraora e ka akapumaana katoa a Iehova i te aronga taitaia. Akapeea tatou me aru i to Iehova aroa e te akapumaana i tetai? Tetai mataara, na te akaari anga i te au tu te ka tauturu ia tatou kia akapumaana i tetai. Eaa teia au tu?

11. Ia Kolosa 3:12 e 1 Petero 3:​8, eaa tetai atu au tu te ka tauturu ia tatou kia aroa e kia akapumaana i tetai ke?

¹¹ Eaa te ka tauturu ia tatou kia akaari ua rai i te aroa e kia “akapumaana . . . tetai ki tetai”? Ka anoanoia tatou kia akatupu i te au tu mei te aroa, te aroa taeake, e te takinga meitaki. (E tatau ia Kolosa 3:12; 1 Petero 3:8.) Akapeea teia au tu i te tauturu anga ia tatou? Me riro te aroa e teia au tu ei tu no tatou, ka rauka ia tatou i te akapumaana i te aronga taitaia. Mei ta Iesu i akakite mai, “no te ki oki o te ngakau ra e tuatua’i te vaa. E tuku mai te tangata meitaki i te mea meitaki, no roto i tona putunga meitaki i roto i te ngakau.” (Mata. 12:​34, 35) Te akapumaana anga i to tatou au taeake e te au tuaine tei ngere, e tuanga puapinga ïa kia aroa i tetai e tetai.

AKAPEEA TATOU ME AKAMATUTU I TO TATOU AROA IA TATOU UAORAI?

12. (a) Eaa tatou ka matakite ei? (e) Eaa te uianga ka uriuri tatou i teianei?

¹² Ka inangaro tatou katoatoa kia “aroa tatou ia tatou uaorai.” (1 Ioa. 4:7) Inara, e mea puapinga kia akamaara tatou i ta Iesu akamatakiteanga e “ka riro te rai o te tangata i te mea ngiti te anoano.” (Mata. 24:12) Kare a Iesu i karanga e kare tana au pipi e akaari i te aroa ki tetai e tetai. Mari ra kia matakite tatou e auraka e tuku i te aroa kore o te tangata kia akakeu ia tatou kia kore e aroa i tetai e tetai. Ka akamanako ana tatou i teia uianga puapinga: Akapeea tatou e kite ei e e aroa matutu to tatou no te au taeake?

13. Eaa te ka tauturu ia tatou kia kite me te matutu ra rai to tatou aroa no to tatou au taeake?

¹³ Ko tetai mataara kia kite me e aroa matutu to tatou koia oki me tupu te au turanga taitaia i roto i te oraanga. (2 Kori. 8:8) Te taiku maira te apotetoro ko Petero i teia turanga: “Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.” (1 Pete. 4:8) No reira ka akatupu te tu apa o to tatou au taeake i te mamae kia tatou.

14. Ia 1 Petero 4:​8, eaa te tu aroa ta tatou e inangaro ra? Akatutu mai.

¹⁴ E akamanako meitaki tatou i te au tuatua a Petero. Te akataka maira te tuanga mua o te irava 8—“ko te aroa rai, kia maata tikaia ïa.” Te tuatua ta Petero i taangaanga no te “maata tikaia” te aiteanga “kia oora.” Te akataka maira te tuanga rua o te irava te ka tupu me aroa maata tatou i tetai ke. Ka ngaro oki te apa o to tatou au taeake. Akamanako ana i teia: Ka mou tatou i te aroa mei te kakau rai e ka oora kia tapoki kare e tai, kare e rua, mari ra i te ‘apa e manganui.’ Te tuatua ngaro te akakata maira e kua akakoreia te au ara a te au taeake. Mei te kakau ka tapoki i te ngai toutou, pera katoa te aroa ka tangaro i te au ara a tetai ke.

15. Me matutu to tatou aroa no te au taeake e te au tuaine, eaa te ka rauka ia tatou i te rave? (Kolosa 3:13)

¹⁵ Kia matutu to tatou aroa i te akakore i te au apa a to tatou au taeake—noatu te ngatā i tetai au taime. (E tatau ia Kolosa 3:13.) Me akakore tatou i te apa a tetai ke, te akaari ra tatou i te aroa maata te ka akamareka ia Iehova. Eaa atu te ka tauturu ia tatou kia akakore i te au apa a tetai ke?

16-17. Eaa te ka tauturu ia tatou kia akangaropoina i te apa rikiriki a tetai ke? Akatutu mai. (Akara katoa i te tutu.)

¹⁶ Akamou ki runga i te au tu meitaki o toou au taeake e te au tuaine. Akamanako i teia akaraanga. Tei te pae koe i te au taeake e te au tuaine mataora e kua nenei koe i tetai tutu. Kua nenei koe kare e tai mari ra e toru tutu. Inara e tai tutu e mata tumatuma to tetai taeake. Eaa taau ka rave? Ka takore koe i te reira e ka toe mai e rua tutu e mata katakata to te katoatoa.

¹⁷ E akaaite tatou i te au tutu ki ta tatou ka akamaara. Ka maara ua ia tatou te au taime i kapiti mataora ai tatou ki te au taeake e te au tuaine. Inara, i tetai atianga ka tuatua mai te taeake me kore te tuaine i tetai mea tau kore. Eaa taau ka rave? Ka akangaropoina koe i te reira mei te tutu kino i takore ei koe. (Mase. 19:11; Ephe. 4:32) Ka rauka ia tatou i te akangaropoina i te tarevake a te au taeake e te au tuaine no te mea ka maara ua ia tatou te taime mataora kia ratou. Ko te reira ta tatou ka akaperepere.

EAA KA ANOANOIA AI TE AROA I TEIA TUATAU?

18. Eaa te apiianga maata no te aroa ta tatou i uriuri i roto i teia atikara?

¹⁸ Eaa tatou ka inangaro ei kia matutu to tatou aroa ia tatou uaorai? Mei ta tatou i uriuri, me aroa tatou i te au taeake e te au tuaine, te akaperepere ra tatou ia Iehova. Akapeea tatou me akaari i te aroa no te au taeake? Tetai mataara, na te akapumaana anga ia ratou. Ka akakeu te aroa ia tatou kia ‘akapumaana i tetai e tetai.’ Akapeea atu tatou me aroa ia tatou uaorai? Na te akakore anga i te au ara a te au taeake.

19. Eaa ra i puapinga ai i teia tuatau kia aroa i tetai e tetai?

¹⁹ Eaa i puapinga ai kia aroa ia tatou uaorai i teia tuatau? Akara i ta Petero i akakite mai: “Kua vaitata ra te openga o te au mea ravarai nei: e teianei, . . . te aroa rai, kia maata tikaia ïa ia kotou uaorai.” (1 Pete. 4:​7, 8) Te vaitata maira te openga o teianei ao kino, eaa ta tatou ka tapapa atu? Kua akakite mai a Iesu: “E makitakitaia mai kotou e te pa enua ravarai i toku nei ingoa.” (Mata. 24:9) Kia akakoromaki i taua makitakita, ka anoanoia tatou kia taokotai. Me rave tatou i te reira, ka puapinga kore ta Satani tautaanga, no te mea ka piri vaitata tatou no te aroa—“ko taua tatua apa kore ua ra ïa.”—Kolo. 3:14; Phili. 2:​1, 2.