E Irinaki ia Iehova e Tana Tuatua

“Te aronga i kite i toou ra ingoa, ka irinaki ia koe.”​—SALAMO 9:10.

1. Eaa ka raukaʼi ia tatou kia irinaki ia Iehova e tana Tuatua i to tatou tuatau nei?

I TE ao o teia tuatau nei, penei ka akara anga tau kore e te tika kore te patianga kia irinaki i te Atua ma tana Tuatua, koia te Puka Tapu. Inara, kua mou te pakari o te Atua no te tuatau roa. Ko Tei Anga mai i te tangata e te vaine koia Tei Akamata mai i te akaipoipo anga e te ngutuare tangata, e te kite ra aia i tei umuumuia no tatou kia meitaki atu i tetai ua atu ra. Mei te au umuumu anga tumu no te tangata nei kare i taui ake, pera katoa te au tu tumu anga no te akakianga i taua au umuumu anga te vaira mei te tu mua ra. Ko te ako anga pakari a te Puka Tapu, noatu rai e kua tataia no te au anere mataiti ua atu kua topa, te oronga ua maira i te arataki anga meitaki no te puapinga anga te oraanga e i te akakoreanga i te au manamanata. Na te akonoanga i te reira e tupu ei kia maata te mataora​—noatu i roto i teianei ao taineti, tuke tuke te manako ta tatou e noo nei!

2. (a) Eaa te au ua meitaki tei akatupuia mai no te akarongoanga i te au akauenga a te Atua i te au oraanga o te au tangata o Iehova? (e) Eaa etai atu apinga ta Iehova e taputou maira no te aronga tei akarongo ra iaia e tana Tuatua?

² Na te irinakianga ia Iehova e te akonoanga i te au kaveinga o te Puka Tapu te apai maira i te au puapinga tau i te au ra ravarai. Te akakiteia maira te akapapu anga i teia i te au oraanga o te au mirioni ua atu o te Au Kite o Iehova takapini i teianei ao tei ia ratou ra te irinaki anga e te maroiroi kia akono i te ako o te Puka Tapu. No ratou, kua akapapu mai te irinaki anga i Tei Anga maira e tana Tuatua e mea akamou meitakiia ia. (Salamo 9:9, 10) Na te akarongoanga i te au akauenga a te Atua ra i akariro ia ratou ei au tangata meitaki atu i te pae o te viivii kore, te tiratiratu, te puapingaia, te akangateitei no te oraanga e te au apinga a etai ke ra, e te kore e maata rava te kaikai e te inu anga. Kua taki atu ia ki te aroa tikai e te terenianga i roto i te ngutuare tangata​—te tu maoraora, te akakoromaki, te aroa, e te akakoreanga ara—​e etai atu apinga e manganui ra. Kua maata te rauka anga ia ratou i te kopae ke te au ua kikino no te riri, te makitakita, te ta ua, te vareae, te mataku, te kope, te tu parau, te pikikaa, te akakino, pirianga tau kore, e te akono tau kore oki. (Salamo 32:10) Inara te maata atura ta te Atua taputou i tetai tupu anga meitaki no te aronga akono marie i tana au ture. Kua karanga a Iesu e ko te aronga aru i te aerenga Kerititiano ka “rauka ia [ratou] e anere ua atu, i teianei ao, . . . te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.”​—Mareko 10:29, 30.

Kopae Ke i te Irinakianga i te Pakari o Teianei Ao

3. I te tamou marie anga i te irinaki ia Iehova e tana Tuatua, eaa etai manamanata te aro maira i te au Kerititiano i etai taime?

³ Ko tetai manamanata no te au tangata apa ua nei ko te manako iti me kare akangaropoina i ta te Atua ra au umuumu anga. Te ngoie ua ra ratou i te manako e te kite meitaki ra ratou me kare e ko te pakari no te aronga kite o teianei ao e meitaki atu i to te Atua, e e ou atu te reira. Ka rauka katoa te au tavini o te Atua kia akatupu i teia tu manako, i te nooanga mei ia ratou nei i roto i to teianei ao. No reira, i te oronga mai anga i te patianga kia akarongo i tana ako, kua kapiti katoa maira to tatou Metua i te rangi i te au akamatakiteanga tau: “E taku tamaiti, auraka e akangaropoina i taku nei ture; e kia akono marie toou ngakau i taku nei au akauenga: E au rā roa oki, e te au mataiti ora, e te au, ta te reira e kapiti katoa mai kia koe ra. E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga, e nana e akakite kia koe i toou ra au arataa. Auraka koe kia pakari i toou uaorai manako: ko Iehova ra taau e mataku, ka akaruke ei i te kino.”​—Maseli 3:1, 2, 5-7.

4. Akapeea te akavare anga a “te pakari o teianei ao,” e eaa te reira i “nenevaʼi kia Iehova”?

⁴ Te rauka maata maira te pakari o teianei ao e mei ko mai i te au tumu e manganui. E manganui te au akaaerenga no te apiianga, e “kia akapapa tini i te buka ra, kare e akaeaanga.” (Koheleta 12:12) I teianei ko te tuatuaia ra ei mataara maata no te akakiteanga i te ao komupiuta te taputou maira kia oronga kotinga kore mai i te au kite e vaitata no tetai ua atu tumu ra. Inara te rauka anga ia ratou teia kite katoa kare ia e akariro i teianei ao kia pakari atu me kare kia akakore atu i tona au manamanata. Mari ra, te kino ua atura te turanga o teianei ao i te au ra ravarai. Te kiteia ra, ta te Puka Tapu tuatua kia tatou e “te pakari oki o teianei ao, e mea neneva ïa i te Atua.”​—1 Korinetia 3:19, 20.

5. Eaa te au akamatakiteanga ta te Puka Tapu e oronga maira no “te pakari o teianei ao”?

⁵ I te tuatau o teia tuanga openga o te tuatau openga nei, te tau ua ra kia manakoia e ka rave maata tei akavare maata ra, koia a Satani te Tiaporo, i te au pikikaa i te tauta anga kia akakore i te irinaki anga i te tuatua mou o te Puka Tapu ra. Kua maani mai te aronga akaapa teitei ra i tetai akaputu anga i te au puka manako ua e te akaaoanga i te tika e te tau kia irinakiia te Puka Tapu. Kua akamatakite atura Paulo i tona taeake Kerititiano: “E Timoteo e, e akono meitaki i tei tukuia atu ia koe na, e ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite: Ko tei tāpuia e tetai pae ra, e tatipake rava akenei i te akarongo.” (1 Timoteo 6:20, 21) Te akamatakite katoa maira te Puka Tapu e: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.”​—Kolosa 2:8.

E Maro Atu i te Tu Manako kia Ekoko

6. Eaa ra i tau ei kia matakite i te arai atu i te au ekoko anga kia kore e aka mai ki roto i te ngakau?

⁶ Ko tetai atu ravenga kikite a te Tiaporo ko te ruruanga i te au ekokoanga ki roto i te manako. Te matakite ra aia kia kite i etai tu paruparu o te akarongo e kia akatupu atu kia maata ia. Ka tau tetai tei kite ra i te tu ekokoanga kia maara e ko tei turu i taua au ekokoanga ra koia tei tuatua atura kia Eva e: “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” I te oti anga iaia te tanu i te ekoko anga ki roto i te manako o Eva, ko tetai atu takaianga kia tuatua kiaia i tetai pikikaa, ko tana ia i irinaki. (Genese 3:1, 4, 5) Ei kopae ke atu kia kore e akapouia to tatou akarongo mei to Eva ra, ka tau tatou kia matakite. Me te vaira tetai tuanga meangiti o te ekokoanga ia Iehova, i tana Tuatua, me kare i tana akaaerenga kua akamata i roto i to ngakau, e taviviki i te takore atu i te reira i mua ake ka tupu ei te reira ei tetai apinga te ka akapou i toou akarongo.​—Akaaite ia 1 Korinetia 10:12.

7. Eaa te ka rauka kia raveia ei akakore atu i te ekoko anga?

⁷ Eaa te mea tau kia raveia? Te pauanga, ko te irinaki ia Iehova e tana Tuatua. “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore: ko tei ekoko ra, e tau ïa i te ngaru tai e puia e te matangi, e tikitiki akera.” (Iakobo 1:5, 6; 2 Petero 3:17, 18) No reira ko te pure akatenga kia Iehova ko te takainga mua ia. (Salamo 62:8) I reira, auraka e ekoko i te pati no te tauturu mei ko mai i te au akaaere aroa i roto i te putuputuanga ra. (Angaanga 20:28; Iakobo 5:14, 15; Iuda 22) Na ratou e tauturu ia koe kia kimi i te tumu no toou ekoko anga, e penei no te tu ngakau parau me kare no tetai manakoanga tarevake ra.

8. Akapeea te akamata anga te au manako patoi i te akonoanga mou, e eaa te vairakau ei rapakau?

⁸ Kua tauru mai ainei te tatauanga me kare te akarongoanga ki etai manako patoi i te akonoanga mou me kare na te apii anga no teianei ao te au ekokoanga poitini? E pakari, ta te Puka Tapu ako: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra. Kareka te tuatua rikiriki puapinga kore ra, e patoi atu ïa; ko te tuatua kino oki te tupu i te reira, e e maata atu oki. E te kakai oki ta ratou tuatua mei te maki kakai ra.” (2 Timoteo 2:15-17) E mea tau kia manakoia e e manganui tei riro ra ei aronga patoi i te akonoanga mou kua akamataia i te aerenga tarevake na te akaapaanga na mua e i akapeea to ratou manako ngakau i te tu akonoia mai ratou i roto i te akaaerenga a Iehova ra. (Iuda 16) Te kiteanga i te tarevake ma te au irinaki anga kua aru mai i muri akera. Mei tetai taote rave viviki ra i te tipu ke i te maki kakai, kia viviki i te takore atu i roto i te manako i tetai ua atu tu i te akaapa, te kore e merengo anga ma te mataara te raveia ra te au apinga i roto i te putuputuanga Kerititiano. (Kolosa 3:13, 14) Tipu keia atu tetai ua atu apinga te angai maira i taua au ekoko anga ra.​—Mareko 9:43.

9. Akapeea te papaanga teokaratiki meitaki i te tauturu anga ia tatou kia tamou marie i te akarongo ora meitaki?

⁹ E mou piri tikai kia Iehova e tana akaaerenga. E aru tiratiratu ia Petero, tei tuatua papu ra: “E te Atu, ka aere tika matou kiaai ra? tei ia koe te tuatua o te ora mutu kore ra.” (Ioane 6:52, 60, 66-68) E akapapa i tetai porokarama meitaki no te apii i te Tuatua a Iehova ei akamaroiroi i to akarongo, mei tetai paruru maata, ei mea “e mate ei te au tao ai ravarai a te vaerua kino ra.” (Ephesia 6:16) E rave tamou i te angaanga orometua Kerititiano, e tua kapiti ma te aroa i te tuatua Patireia ma etai ke ra. I te au ra ravarai, e tamanako ariki ua i ta Iehova ra akameitaki anga ia koe na. E akameitaki e kua tu koe i te kite i te tuatua mou. Na te raveanga i teia au apinga ravarai na roto i tetai papaanga Kerititiano meitaki ka tauturu ia koe kia mataora, kia akakoromaki, e kia vai tu rangatira ma te kore e ekoko anga.​—Salamo 40:4; Philipi 3:15, 16; Ebera 6:10-12.

Aruanga i ta Iehova Arataki Anga i te Akaipoipo Anga

10. Eaa ra i puapinga maataʼi kia akara atu kia Iehova no te arataki anga i te akaipoipo anga Kerititiano ra?

¹⁰ I te akanoonooanga no te tane e te vaine kia noo kapiti ei nga tokorua akaipoipoia, kare a Iehova i akakoro e kia akaki anake i te enua nei kia tau mari katoa ra kia akatupu i to ratou mataora anga. Inara, kua apai mai te ara e te tu apa ua i te au manamanata kikino ki roto i te pirianga akaipoipo. Kare te au Kerititiano e atea ke ana i te reira, no te mea e tu apa ua oki to ratou e kua kite i te au taomi anga no te oraanga o teia tuatau nei. Inara, i te tuanga o to ratou irinaki ia Iehova e tana Tuatua, ka rauka i te au Kerititiano te autu anga meitaki i te akaipoipo anga e i te akonoanga i ta ratou tamariki. Kare e ngai i roto i te akaipoipo anga Kerititiano no te au ravenga o teianei ao e te tu akono oki. Te ako maira te Tuatua a te Atua ia tatou: “Kia akameitakiia te akaipoipo i te tangata ravarai, e te viivii kore oki te roi: e akava oki te Atua i te akaturi e te moeana ra.”​—Ebera 13:4.

11. I te akakoreanga i te au manamanata akaipoipo anga, eaa te mea tau kia kiteia e nga tokorua ra?

¹¹ Te akaipoipo anga te ka akatupuia kia tau ki ta te Puka Tapu apiianga e reva tona no te aroa, te apainga, e te tinamou. Te kite ra te tane e te vaine i te ngateitei e te kaveinga no te upoko anga. Me tupu mai te au tu ngata, e putuputu te reira no te manako kore i te akono anga i te apiianga a te Puka Tapu. I te akakore anga i tetai manamanata roa te tupuanga, e mea puapinga maata no nga tokorua kia manako tiratiratu ki runga tikai i taua manamanata ra e ka akono ei i te au tumu tikai eiaa te au akara anga ua. Me kua taki atu te au uriurianga manako ki tetai akaoti anga meangiti ua me kare ainei e akaoti anga, penei ka tau aua nga tokorua ra kia pati atu no tetai tauturu akara kore i te tu papaki tai mei ko mai i tetai akaaere aroa ra.

12. (a) No teea au manamanata matauia i te akaipoipo anga ta te Puka Tapu e oronga maira i te ako anga? (e) Eaa ra i umuumuiaʼi i te tuanga a nga tokorua kia rave i te au apinga kia tau ki ta Iehova mataara?

¹² Te kapiti ra ainei te manamanata i te komunikeiti anga, te akangateitei i te manako ngakau o tetai e tetai, te akangateitei no te upoko anga, me kare no te tuku anga au tika? Te piri ra ainei ki te akonoanga i te tamariki, me kare te akatauanga i te au umuumuanga no te ainga? Me ko te akapou anga moni ainei no te ngutuare tangata, te tamataora anga, te pirianga oa, me ka tau kia rave angaanga te vaine, me kare te ngai e noo ei korua? Noatu eaa te manamanata, te oronga maira te Puka Tapu i te ako tau me no te au ture tika maira me kare no te au kaveinga ra. (Mataio 19:4, 5, 9; 1 Korinetia 7:1-40; Ephesia 5:21-23, 28-33; 6:1-4; Kolosa 3:18-21; Tito 2:4, 5; 1 Petero 3:1-7) Me akakore nga tokorua i te au akaueue anga noinoi e ka tuku i te aroa kia akakite pu i tona meitaki i roto i to raua akaipoipo anga, ka tupu kia maata te mataora. Ka tau kia maata te anoano o nga tuanga e rua i nga tokorua akaipoipo ra kia akono i te au tauianga anoanoia ra, kia rave i te au apinga kia tau i ta Iehova mataara. “Ko tei pakari i tana akonoanga, e rauka iaia te meitaki: e ao ra tona, to tei irinaki kia Iehova.”​—Maseli 16:20.

Au Mapu​—E Akarongo i te Tuatua a te Atua

13. Eaa ra i kore ei e ngoie ua no te au mapu Kerititiano kia tupu ake ma te akarongo maroiroi ia Iehova e tana Tuatua?

¹³ Kare i te mea ngoie ua no te au mapu Kerititiano kia tupu maroiroi i te akarongo me te takapini nei te ao rave kino ia ratou. Ko tetai tumu e “te vai ua nei rai to te ao ravarai i raro ake i taua vaerua kino ra,” koia Satani te Tiaporo. (1 Ioane 5:19) Tei raro ake te au mapu i te maro anga a teianei enemi kino te rauka ra iaia te akariro i te kino kia akara anga meitaki. Te au tu akono ko au na mua, te au anoano noinoi, te au inangaro no te akono tau kore e te rave takino, e te aruaruanga i te au mareka anga tau kore​—pouroa teia au mea te aere kapiti maira ki roto i tetai akaraanga tutara i te manako tei akatakaia maira i te Puka Tapu e ko “te vaerua e angaanga ririnui nei i roto i te aronga akarongo kore.” (Ephesia 2:1-3) Kua akatupu kikite mai a Satani i teianei “vaerua” ki roto i te au puka apii, ki roto i te akatangi anga imene, i te au tarekareka, e etai atu tu tamataora anga. Ka tau te au metua kia matakite kia akakore i taua au mea mana ra na te tauturuanga i ta ratou tamariki kia tupu ake ma te irinakianga ia Iehova e tana Tuatua.

14. Akapeea e raukaʼi i te aronga ou i ‘te rere ke ratou i te au anoano o to ratou mea ou anga ra’?

¹⁴ Kua oronga a Paulo i te apiianga metua ki tona oa tangata ou kia Timoteo: “E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au, ko koe e te aronga katoa e akamori i te Atu ma te ngakau mā ra.” (2 Timoteo 2:22) Noatu rai e kare te katoatoa o “te au anoano o to mea ou anga ra” i te kino uaorai, ka tau te au mapu kia “rere ke” ia ratou i te mea kare ratou e tau kia tuku i te reira au mea kia akapou i to ratou taime, ma te akarukeanga, me e taime toe mai no te au aruaruanga tu Atua. Te akamatutuanga kopapa, te tarekareka, te akatangi imene, te tamataora, te raveanga mea rekaia, te ori aere, noatu rai e kare i te tarevake, ka rauka ra kia riro ei ereere me ka akariroia ratou ei au apinga maata i te oraanga. E rere ke takiri i te tuatua anga puapinga kore, i te tautau mai anga, i te manako tau kore i te ainga, i te noonoo uaanga e te maromaroa, e te akaapaanga no te kore e kiteia mai e te au metua.

15. Eaa te au apinga te ka rauka kia tupu i te ngai taka ke o te ngutuare te ka tauturu i te takianga i te aronga mapu ki tetai oraanga tu rua?

¹⁵ Noatu rai i te ngai taka ke o te ngutuare, penei ka ori aere te tu kino no te au mapu. Me ka akarakaraia te au akaari anga tau kore me kare ta ua i te tivi e te vitio, ka rauka kia akatupuia te anoano kia rave i te au mea kikino. (Iakobo 1:14, 15) Te ako maira te Puka Tapu e: “Ko kotou, tei inangaro ia Iehova, kia rikarika i te kino ra.” (Salamo 97:10; 115:11) Te kite ra a Iehova me te tamata ra tetai kia akono i te oraanga tu rua. (Maseli 15:3) Te au mapu Kerititiano, e akarakara takapini i to kotou pia. Te akaariari ra ainei kotou i te au tutu i te paruru no te aronga teata akono tau kore to te tarekareka me kare to te ao akatangi anga imene, me te akakite ra koe i te au apinga meitaki te meitaki ra no te maaraaraia? (Salamo 101:3) I roto i to ngai vairanga kakau, e au kakau mako ainei toou, me kare te akaata maira ainei tetai papaki o toou kakau i te au tu kakau tuke roa o teianei ao? Na roto i te au tu kikite ka rauka i te Tiaporo kia ereere ia koe me ka tuku ua koe ki te timataanga kia tamata ua i te apinga kino ra. Te ako pakari maira te Puka Tapu: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”​—1 Petero 5:8.

16. Akapeea e raukaʼi i te ako a te Puka Tapu kia tauturu i tetai mapu kia akariro i te aronga ravarai e manakoia ra kia akaparau iaia?

¹⁶ Te tuatua maira te Puka Tapu kia koe kia matakite i toou pirianga oa. (1 Korinetia 15:33) Ka tau te au oa noou ei aronga mataku ia Iehova. Auraka e tuku ua ki te taomianga a tetai no toou pupu. (Salamo 56:11; Maseli 29:25) E akarongo ki toou nga metua mataku i te Atua. (Maseli 6:20-22; Ephesia 6:1-3) E akara atu ki te aronga pakari no te arataki anga e te akamaroiroi anga. (Isaia 32:1, 2) E tamou marie i toou manako e nga mata ki runga i te au puapinga e te au akakoro anga i te pae vaerua. E akara atu i te au tuatau no te akatupu anga i te pae vaerua e kia rave i te au angaanga i te putuputuanga. E apii kia kite ka akapeea te rave i te au apinga ma toou nga rima. E tupu kia maroiroi e kia ora meitaki i te akarongo, e ei reira ka papu ia koe e e tangata tikai a koe​—ko tetai tangata tau no te oraanga ki roto i to Iehova ra ao ou! Ka ngakau parau to tatou Metua i te rangi ra ia koe, ka mareka toou nga metua i te enua nei ia koe, e ka akamaroiroi koe i toou au taeake e te au tuaine Kerititiano ra. Ko te reira te apinga maata!​—Maseli 4:1, 2, 7, 8.

17. Eaa te au puapinga te ka rauka i te aronga tei irinaki ra ia Iehova e tana Tuatua?

¹⁷ Na roto i te takiota atu kua akauruia te tata taramo kia tata: “Ka oronga mai a Iehova i te meitaki, e te kakā: kare rava ona meitaki e tāpu i te aronga aerenga tiratiratu ra. E Iehova Sabaota e, e ao to te tangata e irinaki ia koe ra.” (Salamo 84:11, 12) Ae, ko te mataora e te autu anga, kare i te reka koreanga e te puapinga kore, te ka rauka mai i te aronga katoatoa tei irinaki kia Iehova e tana Tuatua, koia te Puka Tapu.​—2 Timoteo 3:14, 16, 17.

Akapeea Koe me Pau?

◻ Eaa te au Kerititiano i kore ei e tuku i to ratou irinaki ki roto i “te pakari o teianei ao”?

◻ Eaa te mea tau kia raveia me te kite ra tetai i te au ekoko anga?

◻ Akapeea te raveanga i te au apinga na ta Iehova mataara i te apai mai anga i te autu anga e te mataora i te akaipoipo anga?

◻ Akapeea te Puka Tapu i te tauturu anga i te au mapu kia ‘rere ke ratou i te au anoano o to ratou mea ou anga ra’?

[Tutu i te kapi 23]

Ka ariu atu te au Kerititiano kia Iehova e tana Tuatua, ia ratou e kopae ke atura ei mea neneva “te pakari o teianei ao”

[Tutu i te kapi 25]

E autu anga meitaki e te mataora to te au ngutuare tangata te irinaki ra ia Iehova e tana Tuatua