Pene 4
Koia Oki ta te Au Peroveta Katoa i Akakite Maira
1. No runga i to Iesu pirianga kia Iehova eaa ta te au tika o tona oraanga i mua ake i tona oraanga ei tangata e akaari maira?
I TE akatutuanga i tona uaorai pirianga pumaana kia Iehova, kua tuatua a Iesu e: “E akaperepere rai oki te Metua i te Tamaiti, e akakite mairai oki kiaia i te au mea katoa tana tikai e rave ra.” (Ioane 5:19, 20) Ko te piri tikai o te reira pirianga i akamata mai i te tuatau o tona angaia mai anga, e au tauatini ua atu au mataiti i mua ake i tona anauia mai anga ei tangata. Koia te Tamaiti anau tai a te Atua, koia ua ta Iehova i anga anake ra. Te apinga tini ravarai nei i te rangi e to te enua nei na te reira Tamaiti anau mua tei akaperepereia ra nana i anga mai. I rave katoa aia i te angaanga ei Tuatua na te Atua me kare ei Vaa Tuatua, na roto mai iaia te akakitekite anga i te anoano o te Atua kia etai atu. Koia, te Tamaiti ta te Atua i akaperepere maata rava, kua riro mai ei tangata koia a Iesu Karaiti.—Kolosa 1:15, 16; Ioane 1:14; 12:49, 50.
2. Eaa te maata o ta te au totou Puka Tapu e tuatua ra no Iesu?
2 I mua ake i tona anau semeio mai anga ei tangata, e rau ngauru ua atu te au totou akauruia nona tei tataia. Mei ta te apotetoro ko Petero i akakite kia Korenelio e, “Koia oki ta te au peroveta katoa i akakite maira.” (Angaanga 10:43) I te maata o ta Iesu angaanga i te pae ki te akamori anga ma tei akakiteia i roto i te Puka Tapu no reira te angera i tuatuaʼi ki te apotetoro kia Ioane e: “E akamori i te Atua: ko te akakite oki ia Iesu ra, ko te vaerua ïa o te totou.” (Apokalupo 19:10) Te akataka papu maira te reira au totou iaia e te taki ra i te manako ki etai au tuanga o ta te Atua akakoroanga nona te riro nei i teia tuatau ei apinga manako anga maata na tatou.
Ta te au Totou i Akakite Mai
3. (a) I te totou ia Genese 3:14, 15 ra, koai tei akatutuia maira e “te ovi”? “Te vaine”? E ‘te uanga o te ovi ra’? (e) Eaa te ‘akaparuparuanga i te mimiti o te ovi ra’ i tau ei ei apinga manako maataia e te au tavini o Iehova?
3 Ko te mea mua o te reira au totou kua tuatuaia mai i muri ake i te meameaau i Edene ra. Kua akapapaia mai te reira i roto i te akavaanga a Iehova i tuatuaia atura ki te ovi. Kua karanga a Iehova e: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Ge. 3:14, 15) Eaa te aite anga o te reira? I te tae anga ki ta te Atua tuatau kua akatakaia mai e etai atu totou e kua akamaataia mai te reira. Ko tei tupu kua kite tatou e ko tei tuatuaia ra, tei akatutuia maira e te ovi, ko Satani te Tiaporo ia. “Ko te vaine” ko ta Iehova uaorai akaaerenga apa kore i te rangi ra, ko tei aite ki te vaine tiratiratu kiaia ra. ‘Ko te uanga o te ovi’ te kapiti ra i te au angera e te au tangata tei akakite maira i te vaerua o te Tiaporo, koia te aronga patoi ia Iehova e tona au tangata. I te akaraanga i te mataara i taangaangaiaʼi te ovi e te Tiaporo i Edene ra, ka kiteaia mei te totou e ko te ‘akaparuparuanga i te mimiti o te ovi ra’ te akakite maira i te akapouanga takiri o te reira tamaiti meameaau a te Atua ra koia tei akakino ra ia Iehova e tei apai mai i te tumatetenga maata ki te au tangata nei. Inara no runga i te akataka anga o te “uanga” nana e rave te akaparuparuanga, e roa te tuatau i vai ei te reira ei tuatua ngaro tapu.—Roma 16:25, 26.
4. Akapeea te tauturu a te akapapaanga tupuna no Iesu i te akataka anga e ko ia tikai te Uanga tei taputouia maira?
4 I muri ake i etai 2,000 mataiti o te tuatua enua o te tangata nei kua orongaia mai e Iehova etai atu au akakitekite anga. Kua akakite mai aia e ka tae mai te Uanga no roto i te kopu o Aberahama. (Ge. 22:15-18) Inara, ko te kopu e taki atu ei ki te Uanga ra kare e na runga ua i te akapapaanga i te pae kopapa mari ra na runga i ta te Atua ra iki anga. Noatu rai te akaperepere o Aberahama no tana tamaiti ko Isemaela, tei anauia mai e te tamaine tuikaa koia a Hagara, kua akakite papu maira a Iehova e: “E akatinamou ra au i taku koreromotu ia Isaaka, ta Sara e anau naau.” (Ge. 17:18-21; 21:8-12) I muri akera kua akatinamouia te reira koreromotu, kare ki ta Isaaka tamaiti mataiapo koia a Esau, mari ra kia Iakoba, mei roto mai iaia ra nga kopu 12 o Iseraela. (Ge. 28:10-14) I te tuatau i muri mai kua akakiteia mai e ka anauia mai te Uanga i te kopu o Iuda, i te ngutuare o Davida.—Ge. 49:10; 1 Para. 17:3, 4, 11-14.
5. Noatu rai i te akamata ua anga o ta Iesu angaanga orometua i te enua nei, eaa tetai atu apinga tei akapapu e ko ia tikai te Mesia?
5 E tere atu i te 700 mataiti i mua ake, kua tapa te Puka Tapu e ko Betelehema te ngai e anauia mai ei te Uanga ei tangata e pera katoa oki kua akakiteia mai e koia tei vai takere ana i mua ana “mei tupua rava mai,” mei te tuatau o tona angaia mai anga i te rangi ra. (Mika 5:2) Te tuatau no tona mama anga mai ki runga i te enua nei e ko Tei Akatainuia e Iehova, koia te Mesia, kua totouia na roto i te peroveta ko Daniela. (Dani. 9:24-26) E i tona akatainu angaia i te vaerua tapu, na te reo no te rangi mai i akataka mai iaia. (Mata. 3:16, 17) No reira, i muri ake i tona riroanga ei pipi na Iesu, kua rauka ia Philipa te tuatua ma te ngakau papu e: “Kua kitea e matou ta Mose i tata ki roto i te ture ra, e ta te au peroveta ra, ko Iesu i Nazareta, e tamaiti [angai] na Iosepha.”—Ioane 1:45.
6. (a) I muri ake i to Iesu matenga, eaa ta tana au pipi i kite? (e) Koai, tikai, te ‘uanga o te vaine ra,’ e eaa te aite anga o tana akaparuparuanga i te mimiti o te ovi ra?
6 No muri mai i reira, i kite ei te au pipi a Iesu e e rau ngauru ua atu te au totou tikai tei tataia nona ra kua iroia ki roto i te au Tuatua Tapu akauruia ra. I muri ake i tona matenga e te tuakaouanga, kua “akakite aia kia raua i te au mea katoa nona ra i roto i te au Tuatua Tapu.” (Luka 24:27, NW) Te papu meitaki ra i teianei e ko Iesu, tikai te ‘uanga o te vaine’ nana e akaparuparu i te mimiti o te “ovi” na roto i te tu e paii takiri atu ei a Satani e e kore atu ei. Na roto ia Iesu e tupu ei te au taputou katoatoa a te Atua ki te tangata nei, pera katoa te au mea katoatoa ta tatou e tapapa akatenga nei.—2 Kori. 1:20.
7. Kapiti katoa ki te akataka anga i tei tataia i roto i teia au totou nei, eaa atu tetai apinga puapinga no te akamanako?
7 I toou tatau mua anga i etai o teia au totou nei penei kua ui koe, mei te eunuka Etiopia rai, “Noai ta te peroveta nei tuatua?” Inara kare te eunuka i tuku ua i te reira tumu i te rauka anga iaia te pau anga. I muri ake i te akarongorongo papu anga i ta Philipa akamarama anga i oronga atu, kua kite te reira tangata e te akatu maira te manako ariki anga i akapeea ta Iesu akatupu anga i te totou ra i te angaanga no tana uaorai tuanga, na roto i tona papetito angaia. (Angaanga 8:32-38; Isaia 53:3-9) Te ariu atura ainei tatou kia tau ki te reira? I etai taime na te tu o te oronga anga mai i te totou e akakeu oonu ia tatou, me kare penei ka puta to tatou ngakau i te au manako tei akakiteia i te Puka Tapu uaorai i te tou anga mai o te tupu anga.
8. E a au akara anga totou no Iesu Karaiti te uriuri manakoia nei i konei. E akamanako ana no runga i te au uianga e te au tuatua tapu tei orongaia mai ei akakite e eaa te akatupu anga a teia au totou kia tatou. E akamanako no te tumu okotai ua i te taime.
8 E akara e i akapeea teia i te tupu anga i te au taputou totouia mai i muri akenei e te au akaraanga no Iesu Karaiti. Naau e pau i te au uianga ma te tauturu a te au tuatua tapu tei tataia ra.
(1) Akapeea tei papaia no runga i ta Aberahama tauta anga i te oronga ia Isaaka ei atinga i te tauturu anga ia tatou kia manako ariki i ta Iehova i rave i te orongaanga i te oko na roto i tana Tamaiti? (Ioane 3:16; Ge. 22:1-18 [e akara i akapeea te akataka anga ia Isaaka i te Ge. 22 irava 2.])
Eaa te irinakianga tau ta te reira e oronga mai kia tatou? (Roma 8:32, 38, 39)
Inara eaa te umuumuia ra no ta tatou tuanga? (Ge. 22:18; Ioane 3:36)
(2) I te akatakaanga mai e ko Iesu te peroveta mei ia Mose rai, eaa te apainga maata ta te Puka Tapu e akamaaraara maira kia tatou? (Angaanga 3:22, 23; Deu. 18:15-19)
Eaa etai au mea ta Iesu i tuatua mai kia tatou, e eaa ra i tau ei no teia tuatau? (Mata. 28:18-20; 19:4-9; 18:3-6)
(3) I te akamaramaanga e eaa tei akaataia mai e te taoonga taunga o Aarona ra, eaa te au tu meitaki o Iesu ei taunga maata te takiia maira e te Puka Tapu kia manakoia? (Ebera 4:15–5:3; 7:26-28)
No reira eaa te manako tau no tatou i te akavaitata anga ki te Atua na te pure na roto ia Karaiti ra no te tauturu kia akakore atu i to tatou au tu paruparu?
(4) I te mea e maata roa atu te meitaki o to Iesu atinga (i te monoanga i te katoatoa tei orongaia i raro i te Ture a Mose ra), eaa ra i tau ei kia matakite roa tatou i te o anga ki roto i te raveanga i tetai apinga te kite ra tatou e ka akamareka kore i te Atua? (Ebera 10:26, 27)
Mei te mea e ariki tika tatou i te manakonakoanga no te oraanga tei akapapuia mai ei openga no ta Iesu atinga, eaa te au apinga te ka tau ia tatou kia rave maroiroi? (Ebera 10:19-25)
Akapeea Tatou me Akaari i to Tatou Akarongo Kia Karaiti?
9. Eaa i kore ei e ora no tatou i tetai ke i te pae atu ia Iesu Karaiti?
9 I muri ake i te akakite atu anga ki te akavaanga teitei o te ngati Iuda i Ierusalema e i akapeea te tupu anga o te totou ia Iesu, kua akaoti ketaketa atura te apotetoro ko Petero e: “Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei.” (Angaanga 4:11, 12; Sa. 118:22) Pouroa to Adamu uanga e aronga ara anake, no reira kua tupu kia ratou te mate no te utunga i te ara e kare e puapinga te ka rauka i te oronga ei oko no tetai tangata. Inara ko Iesu e apa kore ua aia, e i te tukuanga i tona oraanga kia mate e atinga puapinga ia. (Sa. 49:6-9; Ebera 2:9) Kua oronga aia ki te Atua i te oko tei tau tikai tona puapinga ki tei ngaro ia Adamu no tona au uanga. Akapeea tatou i puapingaiaʼi i teia?—1 Timo. 2:5, 6.
10. Akamarama mai i tetai mataara i puapinga maataiaʼi tatou i te atinga o Iesu.
10 Kua rauka i te reira te akava ngakau ma no tatou no te akakore anga i te ara—e apinga maata rava atu te reira i tei rauka no to Iseraela na te au atinga manu i raro i te Ture a Mose. (Angaanga 13:38, 39; Ebera 9:13, 14) Inara, i te raukaanga te reira, te anoanoia ra kia tiratiratu tatou kia tatou uaorai e kia akono tatou i te akarongo tika tikai kia Iesu Karaiti. Te ariki tatakitai nei ainei tatou i te maata o te anoano i te atinga o Karaiti no tatou? “Kia karanga tatou e kare a tatou ara, te pikikaa nei tatou ia tatou uaorai, e kare te tuatua-mou i roto ia tatou nei. Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.”—1 Ioane 1:8, 9.
11. Eaa ra te taruku anga ki te vai i tau ei ei tika puapinga no te raukaanga te akava ngakau meitaki ra i te Atua?
11 Inara, ka tuatua tetai papaki e te kite ra ratou e e aronga ara ratou e te karanga ra e te irinaki ra ia Karaiti, te o atu ra i tetai tuanga i te tuatuaanga kia etai ke no runga i te Patireia o te Atua mei ta Iesu rai i rave ana, tera ra kare i tae ki te ki anga o te akarongo kia Iesu. I teea mataara? I na, mei tei akakiteia maira i te Puka Tapu, i te riro anga o te au tangata i te anere mataiti mua ra ei aronga akarongo tikai, akapeea ta ratou akakite anga ki te atea i te reira? Kua papetitoia ratou. No teaa ra? No te mea kua akaueia e Iesu kia papetitoia te au pipi. (Mata. 28:19, 20; Angaanga 8:12; 18:8) Me akakeu tikaia te ngakau o te tangata na te akapapaanga aroa ta Iehova i akono na roto ia Iesu Karaiti, kare rava aia e tapupu ua. Ka rave ra aia i te au akatikatika anga i tona oraanga, ka akatapu iaia uaorai ki te Atua e ka akatutu i te reira na te taruku anga ki te vai. Mei ta te Puka Tapu i akaari mai, na te akakiteanga i te akarongo i teia mataara nei te “tuatua ra i te akava-ngakau meitaki ra i te Atua.”—1 Pe. 3:21.
12. Me kite tatou e kua rave ara tatou, eaa ta tatou ka rave no te reira, e no teaa ra?
12 Tera ra, noatu i muri ake i te reira, ka akakite mai te au tu ara ia ratou uaorai. Ka peea i reira? “Te tata nei au i teianei au tuatua kia kotou, kia kore kotou e rave i te ara,” i na te apotetoro ko Ioane ei. No reira kare e tau kia manako kore ua tatou i te ara i roto ia tatou uaorai, noatu me te kiteia ra i te angaanga, i te tuatua me kare i te tu manako. “Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra: Koia oki te tarangaara i ta tatou nei ara; kare oki i ta tatou anake ra, i ta to te ao katoa nei ra.” (1 Ioane 2:1, 2) Ka riro ainei te aite anga e noatu eaa ta tatou ka rave, me ka pure tatou ki te Atua, ‘E akakore mai i ta matou ara,’ ka meitaki ua te au mea katoatoa? Kare. Ko te taviri ki te akakore anga ara ko te tataraara papu tikai ia. Penei ka anoanoia te tauturu mei ko mai i te aronga pakari o te putuputuanga Kerititiano ra. E mea tau kia kite tatou i te tarevake tei raveia e kia tataraara ma te ngakau tae tikai no te reira kia rave ei tatou i te tautaanga akatenga kia kore rava e rave akaou i te reira. (Angaanga 3:19; Iakobo 5:13-16) Me ka rave tatou i teia, ka papu ka rauka ia tatou ta Iesu tauturu. Na runga i te tumuanga o to tatou akarongo i te puapinga o te tapokianga ara o tona atinga, ka rauka te akaora i te akaperepere a Iehova, e e mea puapinga maata teia kia ariki mai ei aia i ta tatou akamori anga.
13. (a) E akamarama mai i tetai atu mataara i puapingaiaʼi tatou i to Iesu atinga. (e) Eaa ra i kore ei e rauka i ta tatou angaanga ki te Atua te reira tutaki? (ng) Inara me e akarongo tikai to tatou, eaa i reira ta tatou ka rave?
13 Kua akatuera mai te atinga o Iesu i te tika kia tatou no te oraanga mutukore—ki te au rangi no te “anana iti,” e ki runga i te enua Parataito no te au tangata e pirioni ua atu. (Luka 12:32; Apokalupo 20:11, 12; 21:3, 4) Kare teia i te tutaki no ta tatou i rave. Noatu eaa te maata o ta tatou rave i te angaanga na Iehova, kare e rauka ia tatou te akaputu kia maata te puapinga e kia kaiou te Atua i te oraanga no tatou. Ko te ora mutukore “e mea oronga uaia mai e te Atua i roto i to tatou Atu ia Iesu Mesia.” (Roma 6:23; Ephe. 2:8-10) Inara, me e akarongo to tatou i te reira mea oronga uaia mai e te ariki no te ravenga i rauka mai ei, ka akakitekite rai tatou i te reira. I te kiteanga i te umere tikai o ta Iehova taangaanga anga ia Iesu i te akatupuanga i Tona anoano e pera katoa te puapinga maata no tatou ravarai kia aru vaitata ua i to Iesu au takainga vaevae, ka rave tatou i te angaanga orometua Kerititiano ko tetai o te mea maata roa atu i roto i to tatou oraanga. Ka kite papuia to tatou akarongo i te manako irinaki tikai o ta tatou tuatua anga kia etai ke no runga i teia apinga aroa umere roa na te Atua ra.—Akaaiteia atu kia Angaanga 20:24.
14. Akapeea ta te reira tu akarongo ki roto ia Iesu Karaiti i te akatupu anga i te taokotaianga?
14 Mei teaa ra te meitaki, o te akatupu taokotaianga o te reira tu akarongo! Na te reira e akapiri vaitata ia tatou kia Iehova, ki tana Tamaiti e pera katoa tetai ki tetai i roto i te putuputuanga Kerititiano. (1 Ioane 3:23, 24) Ka akatupuia te rekareka no tatou i ta Iehova oronga aroa ua mai anga ki tana Tamaiti “i te ingoa i maata ua atu i te teitei i te au ingoa ravarai nei nona [kare ra i to te Atua ingoa]: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua ra.”—Philipi 2:9-11.
Uriuri Akaou Anga
● I te mama anga mai o te Mesia, eaa ra i taka meitaki ei aia ki te aronga tei irinaki papu i te Tuatua a te Atua ra?
● Akapeea te akatupu anga kia tatou i te au akaraanga totou tei akatupuia i roto ia Iesu, mei tei akakiteia maira i te kapi 34?
● Na teea au mataara i puapinga takereiaʼi tatou i to Iesu atinga? Akapeea tatou i te akaari anga i to tatou ariki anga no te reira?
[Pia/Tutu i te kapi 34]
Au Akara Anga Totou no Iesu—Eaa ta Ratou ka Akatupu kia Koe?
Orongaanga a Aberahama ia Isaaka
Ko Mose te vaa tuatua no te Atua
Ko Aarona te taunga maata
Te au atinga manu