Patuanga i te au Tu Kerititiano ki Roto i ta Tatou Tamariki

TE MAMA o Wanda, kua akarukeia e tana tane, kua angaanga pakari i te patuanga i te au tu Kerititiano ki roto i tana tamaine. Te 12 anga a Wanda, kua timataia teia akamatauanga. I te reira taime, ko Wanda e tona tungane ou ake e te tuaine, kua akaruke i tona mama e kua noo atu ki tona papa no te tuatau poto ua. Kare oki tona papa i roto i te akarongo, no reira ka akapeea i reira a Wanda kia aaere i te mea e kare oki tona mama i reira no te akara atu iaia?

E turanga e tae ua mai ki te au metua Kerititiano, e taime oki te ka riro i ta ratou tamariki i te tuku i te au tika ia ratou rai, te timata anga i to ratou akarongo. Penei ka takake atu mei to ratou au metua Kerititiano, mei a Wanda rai. Penei ka opara ia ratou e to ratou oa i te apii kia rave tarevake. Me kare penei ka aravei atu i tetai au timata anga pakari. E pure ana te au metua Kerititiano e me tae mai te reira tuatau kia papa oki ta ratou tamariki i te au tu Kerititiano kia pakari oki i te tu atu i te au timata anga.

Ka akapeea i reira te au metua i te patu anga i te tu Kerititiano pakari ki roto i ta ratou tamariki? I mua ake ka akara ei tatou eaa tei tupu kia Wanda, ka akara atu tatou kia kite e akapeea te Puka Tapu i te tauturu anga ia tatou kia pau i te reira uianga. Te tango no te reira pauanga ka kiteaia i roto i te au tuatua a te apotetoro ko Paulo ki te au Kerititiano i Korinetia: “Kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu. E teianei, kia patu tetai tangata i te auro, te ario, te toka memeitaki, te rakau, te ngangaere, te teita, ki rungao i taua pange ra; E akakiteia ta te tangata ravarai angaanga: na taua rā ra oki e akakite, e akatakaia ïa oki e te ai; e na te ai e timata i te tu o ta tangata ravarai ra angaanga.”​—1 Korinetia 3:11-13.

Te Pange

Eaa a Paulo i tata ei i teia au tuatua? Kua akamata oki aia i tetai porokarama patuanga i te au tu Kerititiano ki Korinetia, inara kua o atu teia porokarama ki roto i tetai au manamanata. Kare oki ta Paulo uaorai au tamariki anauia i o atu ki teia porokarama. Kua o atu ra te aronga tei riro mai ei au Kerititiano na roto i tana tutu aere. Kua tamanako atu ra aia i teia ei au uanga i te pae vaerua, e ko tana i tuatua e mea puapinga katoa ia ki te au metua.​—1 Korinetia 4:15.

Kua aere mai oki a Paulo ki Korinetia i tetai taime i mua atu e kua akanoo i tetai putuputuanga Kerititiano ki reira. Te aronga tei ariu atu ki tana angaanga tutu aere kua maata te au taui anga i to ratou tu. Etai tei riro ana ei aronga akaturi, au keikeia, au akamori itoro, e ei aronga kona kava. (1 Korinetia 6:9-11) Inara kua rauka ia ratou kia taui ki te manako anga Kerititiano no te mea e pange meitaki oki ta Paulo i akanoo. Eaa ra taua pange ra? “Kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu.”​— 1 Korinetia 3:11.

Akapeea a Paulo i te tuku anga i teia pange iaia e apii nei i teia aronga ou tei irinaki i Korinetia? Te akakite mai nei aia kia tatou: “Iaku oki i aere atu ia kotou na, e te au taeake, kare au i aere atu ma te tuatua akamanea e te pakari, i te tuatua anga atu kia kotou i te tuatua-akakite a te Atua. Kua akakoro marie oki au e, kare rava aku e tuatua e akakite atu ki o kotou na, mari ra ko Iesu Mesia, ko tei [patitiia, NW] ra.” (1 Korinetia 2:1, 2; Angaanga 18:5) Kare oki aia i akaanga i te tangata kiaia me kare kua akamanea i te tuatua mou kia oronga atu i tetai tutu no vao ua nei. Mari ra, kua taki atu kia tika kia Iesu Mesia e te mataara ta teia tei raveia mai ana e te Atua.

Te tika oki, ko Iesu rai te pange ketaketa umere no te patuanga Kerititiano. Nana oki i oronga mai i te atinga oko. E Ariki oki aia i te rangi i teianei e no te reira kare e roa atu ana ka takore aia i te au enemi o te Atua i Aramakido ra. I reira ka oronga mai aia i te tuatua tika na te Atua i te tuatau o te tutara tai tauatini mataiti, e i te mea e Taunga Maata na te Atua, ka apai marie mai aia i te tangata ravarai ki te tu kino kore. Eaa atu etai pange ta tetai peretana ka inangaro?

No reira, te patuanga i te au tu Kerititiano ki roto i ta tatou tamariki, te meitaki ra tatou kia aru ia Paulo te akapapu anga e te ariki ra ratou i teia au tika puapinga. Mei to ratou pepe anga, kia apii tatou i ta tatou tamariki kia inangaro ia Iesu no tana i rave e te rave nei rai no tatou.​—1 Petero 1:8.

Te Patuanga

Inara, noatu kua akanoo a Paulo i teia pange meitaki, te angaanga patu kua taii ki etai au arairai i muri ake tona akaruke anga. (1 Korinetia 3:10) Te manata kare te reira i aiteite ki ta te au metua e kite ana i teia tuatau. Kua tupu mai ta ratou au tamariki i roto i te akarongo Kerititiano e kua manako tikai e te marama ra ta ratou tamariki i te tuatua mou. Kia pakari mai ratou, kua panu ke atu me kare kua kopae i te akarongo. No teaa ra i pera ei? I pera ei, no te mea no te au apinga i patuia ei.

Kua tuatua a Paulo e ka rauka te tu tangata i te patu mei te au mea memeitaki: te auro, te ario, e te au toka memeitaki. Me kare ka rauka ia ratou i te patu mei te apinga mamaua: te rakau, mauku, e te rara tita. (1 Korinetia 3:12) Inara, me ka rave mai te tangata patu i te auro, te ario e te au toka memeitaki, te akatu ra i reira aia i tetai apinga matutu, i tetai mea meitaki tikai. Inara, te tangata patu ra tei rave mai i te rakau, te mauku, e te rara tita, te patu ra i tetai mea kapakapa ua, mamaua, e no te reira taime ua.

Ko te reira apinga vaerua paruparu oki tei taangaangaia i Korinetia. Etai pae tei aru atu i ta Paulo pange i akanoo kua patu mamaua ra, kare i akatu kia ketaketa, i te tu kia roa. Kua akamata to Korinetia i te akara ki te au tangata, tei riro oki ei maveteanga, ei vareae, e te maroanga i rotopu ia ratou. (1 Korinetia 1:10-12; 3:1-4) Akapeea ratou e raukaʼi kia kore teia e tupu mai? Na roto oki ia ratou i te rave anga mai i te au mea meitaki, kia roa te tuatau.

Te mono nei teia i te au tu mako tei anoanoia ei tuanga no te tu tangata Kerititiano. Ko teea au tu? Kua akakite mai te apotetoro ko Petero okotai o teia: “Kia riro te timata anga o to kotou akarongo, ko tei maata rava i te meitaki i to te auro.” (1 Petero 1:6, 7) Kua tuatua te ariki ko Solomona e rua akaou: te pakari e te kite e ko tei rauka ra, “e meitaki maata ïa i to te ario.” (Maseli 3:13-15) E kua akamaara mai a Davida ia tatou e ko te mataku ia Iehova e te mareka anga o tana au akauenga e “anoano maataia ïa i to te auro.”​—Salamo 19:9, 10.

Ko teia e tetai atu au apinga memeitaki ka rauka kia patuia ki roto i te au tu Kerititiano ei tauturu iaia kia ora atu i te au timata anga. Akapeea ra, e papu ei e te patu nei ma teia au apinga nei? Na te akara anga e te akono anga i te au ngakau, to te tamariki e to tatou uaorai.

E Manuia te Angaanga Patuanga

Te tuanga ta te ngakau o te au metua ka rave i roto i teia angaanga patu ka kiteaia te reira i roto i tetai akauenga tei orongaia e Iehova ki te au metua i roto i te iti tangata taito o Iseraela: “E teianei au tuatua taku e akaue atu kia koe i teianei ra, ei roto i toou ngakau vai ei.” E kua tuatua atu rai e: “E ka apii tamou tikai koe i te reira ki taau au tamariki.” (Deuteronomi 6:6, 7) No reira, i mua ake ka patu ei tatou i etai ke, kia patu oki tatou ia tatou uaorai. E tau oki te au tamariki kia kite i te au mea ta tatou e tuatua ra e te rave ra e ko to tatou tu kua maaniia te reira mei te au apinga tau meitaki.​—Kolosa 3:9, 10.

I reira, kua taea to ratou ngakau e ta tatou apiianga. Ko Iesu, tei manuia i te patu i te au tu tangata Kerititiano, kua taena te au ngakau i te rave mai anga i te au akatutu anga, e te au uianga. (Mataio 17:24-27; Mareko 13:34) Te kite nei oki te au metua i te puapinga o te reira tu apiianga. Te taangaanga nei ratou i te au akatutu anga kia akariro i te au tuatua mou Kerititiano kia akamareka i te au ngakau o ta ratou au tamariki ou, e rave mai nei i te au uianga tei manako meitakiia kia kitea mai e eaa tikai ta ratou au tamariki te mamaata mai ra e manako nei, te akapeea nei ta ratou uriurianga i roto i to ratou au ngakau.​—Maseli 20:5.

I to Mose tauta anga i te patu ki roto i te au Iseraela i te inangaro kia noo kia akarongo, kua tuatua aia e: “Kia akono tikai koe i te au akauenga a Iehova, e tana au akonoanga . . . kia meitaki koe ra.” (Deuteronomi 10:13) Aiteite rai, ka meitaki te au metua kia akamarama papu ki ta ratou au tamariki i ta te Atua au turanga pera katoa kia akaari akakeu tikai eaa te reira au mea mei te tiratiratu, te noo anga ma, e te au pirianga mako e riro e ei meitaki no ratou.

Ei taopenga, kua tuatua a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Me kite tikai te au tamariki ia Iehova i te ou anga, te kite i te tuatua kiaia i to ratou au manamanata, e kia kite ake i tana pauanga ki ta ratou au pure, ka akatupu i reira ratou i te tuanga puapinga rava atu i te au tu Kerititiano: e pirianga no ratou uaorai ki Tei Anga ra.

Te Ai

Kua kite mai a Paulo no te mea kare te angaanga patuanga i Korinetia i rave makoia, te au peu a te ao mei te akapae, e te taumaro kua akamata mai te reira. E kino tikai teia no te mea, mei tana i akamarama, “e na te ai e timata i te tu o ta te tangata ravarai ra angaanga.”​—1 Korinetia 3:13.

Eaa i reira te ai? Penei ko tetai ua o te timata anga a Satani te ka apai mai ki runga i tetai Kerititiano. Penei ko te taomi anga o te piri oa, timata anga o te kopapa, anoano apinganui, takinga kino, pera katoa te au tu manako ekoko. Ko te reira au timata anga kua papu e ka tae mai. “E akakiteia ta te tangata ravarai ra angaanga: na taua rā ra oki e akakite, e akatakaia ïa oki e te ai.” Ka patu te au metua pakari i te au tu o ta ratou tamariki i te tapapa anga e ka timataia ta ratou tamariki. Mei te mea e ka pera te au metua, ka akameitaki maataia ratou.

Te Tutaki

Kua tuatua a Paulo: “Kia toe ra ta tetai ra angaanga, tana i patu ki rungao i taua pange ra, e rauka iaia te tutaki.” (1 Korinetia 3:14) Kua rauka i te apotetoro ko Paulo tetai tutaki. Ki te au Kerititiano i roto i te oire o Tesalonia, te ngai i rave ana aia i te angaanga patuanga, kua tata aia: “Eaa oki to matou irinaki anga, e te rekareka anga, e te korona rekareka anga? Kare aina ko kotou i mua i te aroaro o to tatou Atu ra, ko Iesu Mesia kia tae mai aia ra? Koia ïa, ko kotou to matou kakā e to matou rekareka.”​—1 Tesalonia 2:19, 20.

Kua rauka i te mama o Wanda teia tutaki anga. Te kite anga a Wanda e 12 mataiti ra iaia uaorai i te akatakake angaia mei tona mama, kua aue aia e moe ua atu aia? I reira kua maara iaia i te ako a tona mama e kia uriuri aia i tona au manamanata kia Iehova na roto i te pure. Kua pure aia e kare i roa ana kua manako aia no te akara na roto i te puka tereponi te kimi me e au Kite rai o Iehova tetai i te pae mai. Kua tuatua atu aia kia ratou e kua kite mai e e ngutuare tangata tetai te noo ra i raro ua ake i te mataara mei te are o tona papa. “Kua rekareka tikai au!” i na Wanda ei.

Ma te akamaroiroi anga a teia ngutuare tangata, kua akaaere a Wanda i tona tungane e te teina no te oki akaou ki te angaanga Kerititiano. “Tei iaku te apainga no te akapapa ia matou no te au uipaanga,” i akamaramaʼi aia. “Naku e pua ana i to matou kakau, te peru i to matou rauru, e te akapapu e te ma ra e te manea ra matou.” E aka angaanga tikai no tetai tamaine meangiti ua, inara kua rave aia i te reira. I tetai taime kua tauta tona papa i te tapu ia ratou mei te aereanga ki te au uipaanga, inara kua pati te tamariki kiaia, e kua akatika aia ia ratou kia aere.

I muri mai, kua taokotai akaouia te tamariki ma to ratou mama. I to Wanda 15 mataiti anga, kua riro mai aia ei Kerititiano papetitoia, e i teianei kua tuatua aia e ko tana angaanga mua ko te angaanga evangeria. Ae, kua paati te angaanga a to Wanda mama i te timata anga. Kua rekareka aia i te tutaki o te kiteanga i tana tamaine i te tu ketaketa anga no te tuatua mou. Kia manuia katoa rai te au metua Kerititiano mei teia, ia ratou e angaanga ra no te akamaroiroi i te au tu Kerititiano i roto i ta ratou tamariki.

[Pia i te kapi 27]

Koi akaari atu ei teia atikara, te tauta pakari ra te au metua no te akamaroiroi i te au tu Kerititiano ki roto i ta ratou tamariki, e apainga katoa rai ta te au tamariki. Mei te au Kerititiano ravarai kia rave ratou i tetai angaanga patuanga ia ratou uaorai. (Ephesia 4:22-24) Noatu e e tuatau umere to te au metua no te tauturu i roto i teia, kia rave tatakitai tikai tetai i tana uaorai tukuanga no te tavini ia Iehova.