Te Au Karatuati Gileada​—“E Au Mitinari Tika Tikai!”

“EAA te mitinari?” Kua uiia te reira uianga e tetai tata anga nuti pepa vaitata i te a ngauru au mataiti i topa. Kua maro te tangata tata e ko te au mitinari tika tikai e e au ravenga taui anga no te pupu tangata e i te pae puapinga. Inara, i te Tapati, Mati 5, 1995, i te Jersey City Assembly Hall o te Au Kite o Iehova, kua oronga maataia tetai pauanga tuke ua ake rai. Te atianga? Te karatuati anga o te pupu 98 o te Apii Puka Tapu Punanga Tiaki o Gileada​—e apii e tono ia ana te au mitinari takapini i teianei ao!

I muri ake i te imene e te pure akamata anga, kua turou pumaana atu a Albert D. Schroeder o te Pupu Akaaere i te katoatoa o te 6,430 tei tae mai. I roto i tana au tuatua akamata anga, kua akataka marama te Taeake ko Schroeder e eaa ra i tuke ei te au karatuati Gileada mei tetai atu tei kapiki ia ratou uaorai ei au mitinari. Kua tuatua aia e: “Ko te Puka Tapu te puka puapinga o Gileada.” Kua tereniia te au karatuati o Gileada kia riro mai, kare ei aronga angaanga no te oraanga, mari ra ei au puapii no te Tuatua a te Atua. No reira te tau meitaki ra ratou no te akono i te au anoano pae vaerua o te au tangata i te au enua ke ke.

Kua uriuri te au vaa tuatua tei aru maira i tetai au ngai te oronga ra te au karatuati Gileada i te akapapu anga ei au mitinari “tika tikai.” Kua tuatua a Charles Molohan kia ratou no runga i te tumu tuatua “Tamou Ua Atu i te Akakite i te Ua Meitaki ei Au Mitinari.” I te akaraanga i te au tuatua a te apotetoro ko Paulo ia Kolosa 1:9, 10, kua akamaara atu te Taeake ko Molohan ki te au karatuati e kua tauturu to ratou rima marama i pati i Gileada ia ratou kia maata atu i te “kite i te Atua.” Na teia i tauturu ia ratou kia akatupu i te ua i nga tu e rua: te akaarianga i te ua o to te Atua vaerua e te orongaanga i te au tuatua mou Puka Tapu ki tetai atu.

Tei aru mai ko Daniel Sydlik o te Pupu Akaaere ma te tumu tuatua pumaana “Auraka e Oko Ua Atu i Toou Oraanga.” Kua taiku aia i ta Iesu uianga: “Eaa ta te tangata nei kia oronga ei oko i tona vaerua?” (Mataio 16:26) Kua akara te Taeake ko Sydlik e: “Kua oko te au tangata i to ratou au meta no tetai tu oraanga ngoie ua, e te maru.” Inara, kare te aronga ma te akarongo te ora ra e tuku ua atu i te aro atu anga i te au timataanga. Te akakite maira ta Iesu au tuatua e kia puareinga ua tetai i te “oronga,” koia oki, e akaatinga, e raukaʼi to tetai meta, me kare oraanga. Kua akamaroiroiia te au mitinari ou kia oronga kia Iehova to ratou maroiroi katoa, ta ratou mea meitaki tikai, ki roto i tana angaanga!

Tei aru mai, kua tuatua a William Van de Wall o te Kumiti Tipatimani Tavini Anga no runga i te tumu tuatua “Te Apotetoro ko Paulo​—E Akaraanga ka Tau kia Aruia.” Kua akamarama te Taeake ko Van de Wall e: “Na Paulo i akamata i te angaanga mitinari i te anere mataiti mua.” No reira, e mea tau katoa, e a tuanga ngai tei akatakaia i ta te apotetoro ko Paulo i akanoo ei akaraanga meitaki no te au mitinari i teia tuatau: (1) To Paulo manako ngakau tae e te aroa i te tangata, (2) tona tu mako tikai i roto i te angaanga orometua, (3) tona tu mako i te patoi i te akamaata iaia uaorai, (4) tona irinaki ekoko kore i roto ia Iehova.

“E Akatika ia Iehova kia Unuunumou ia Koe i Roto i Taau Angaanga Ou” ko te tumu tuatua tei uriuriia e Lyman A. Swingle o te Pupu Akaaere. I te taangaangaanga i te irava o te ra, Salamo 139:16, kua akakite te Taeake ko Swingle, ei au mitinari ou, ka aravei atu ratou i te au manamanata i roto i ta ratou tuku anga angaanga e kua kite a Iehova i te au rapakau. “E aere kiaia,” i akamaroiroi atu aia, “e tuatua kiaia me e manamanata toou. E kimi e eaa tona akakoroanga.”

Kua tuatua i reira a John E. Barr o te Pupu Akaaere i runga i te tumu tuatua “Te Tupu Meitaki Ra Toou Akarongo.” (2 Tesalonia 1:3) Ia Luka 17:1, ka tatau tatou e kua tuatua a Iesu e: “Kare rava e kore te au mea e apaʼi ra.” Kua turoriia etai pae no runga i te au tu tangata o te au taeake mitinari. Inara kua akamaroiroi te Taeake ko Barr i te au mitinari kia rauka ua te akarongo tei anoanoia ra kia akakore ua atu. E tika, i roto i teia akapapa anga kua pati ta Iesu au pipi: “E akamaata mai i to matou akarongo.” (Luka 17:2-5) Penei ka timata katoaia te akarongo o te au mitinari e tetai atu au akatikatika anga akaaerenga tukeke. “E akarongo ainei to tatou no te ariki ua i teia,” i ui ei te Taeake ko Barr, “me kare ka riro ainei ei au manamanata maata no ratou?”

Tei aru mai ko etai akamaroiroi anga a te nga puapii Gileada e rua. Kua raurau a Jack Redford i te au karatuati kia tamou i te tu papu tikai. Kua akakite aia no tetai mitinari tei akaruke i tana tuku anga angaanga i te pau anga i etai tatiaeaeanga a te au taeake mitinari. Inara, te akamatakite maira te au Tuatua Tapu, ia tatou no te riri ua. (Koheleta 7:9) “Kia rauka te tu manako tau tikai,” i akamaroiroi ei aia. “E akakore ua atu i te au tarevake e te tu apa ua o tetai atu takapini ia koe.”

Kua ui atu i reira a U. V. Glass, te retita o Gileada, e: “Te papa ra ainei koe kia autu atu ma te ‘tupu anga kitea koreia’”? (Koheleta 9:11, NW) “Ka taui ua to tatou tu oraanga,” i akakite ei te Taeake ko Glass, “e ko etai ka kino rava atu.” Kua aro atu tetai au mitinari ma te tapapa koreia i te autu kore anga i te pae kopapa, te maki, e te au manamanata pamiri, te maro anga i etai kia akaruke i ta ratou tuku anga angaanga. “Noatu eaa te tupu anga kitea koreia,” i tuatuaʼi te Taeake ko Glass, “kua kite tatou e kua kite a Iehova i te reira e te manako maira. Me tuku tatou i to tatou irinaki anga ki runga iaia, ka kite tatou e ka autu tatou!”

Na tetai tuatua koia te ingoa “Akatakakeia no te Angaanga Mitinari” i akaoti i te au tuku anga tuatua o te popongi. Kua taiku a Theodore Jaracz o te Pupu Akaaere i te uianga i te akamata anga, koia oki, “Eaa te mitinari?” I te pau anga, kua uriuri aia ia Angaanga pene 13 e te 14 no runga i te angaanga mitinari a Paulo e Banaba. Te taka marama ra, e kia akara atu i te angaanga, kare e ki runga i te akaoraanga i te maki o te tangata, mari ra ki runga i te ‘akakiteanga i te tuatua meitaki.’ (Angaanga 13:32) Kua ui te Taeake ko Jaracz: “Kare ainei koe e akatika e kua akaari a Paulo raua ko Banaba e mei teaa ra te tu o te mitinari tika tikai?” Kua patiia atu tetai mitinari kite ko Robert Tracy o Meiko kia oronga mai i etai o tana au kiteanga pumaana ei tangata orometua.

Kua taeaia e te porokarama popongi tona take i te oronga anga te Taeake ko Schroeder i te au tiporoma ki te 48 au karatuati. Kua rekareka tikai te aronga akarongo i te akarongo anga i te au ingoa o te 21 enua tei tukuia atu te au mitinari: ki Ekuatoa, Etonia, Kini Ekuata, Kini-Pitau, Kota Rika, Kote Tivua, Mauritiati, Motamapiki, Nikarakua, Onotura, Papaeto, Parakuai, Penini, Peru, Porivia, Rativia, Repapuriki Aperika Rotopu, Rivoti Airani, Taiuana, Tenekara, e Venetuera.

I muri ake i te akaangaroi anga no te kaikai avatea, kua oki akaou mai te aronga akarongo e kua rekareka atu i tetai apii oraora o Te Punanga Tiaki, tei raveia e Robert P. Johnson o te Tipatimani Tavini Anga. Kua pau te au mema o te pupu 98 i te au uianga. Tei aru mai ko tetai uiui anga tuatua reka tikai tei raveia e te au mema angaaanga o Gileada. Kua akamaroiroi maataia te aronga akarongo i te au karatuati e oronga ra i to ratou au kiteanga i roto i te koro e te akakite anga i to ratou au manako no runga i ta ratou tuku anga angaanga i te ngai ke ke.

No tetai ono e te apa mataiti, kua akatumuia a Gileada i ko i te au are o te Totaiete Punanga Tiaki i Wallkill, New York. Inara, ia Aperira 1995, kua nekeia atu te apii ki te Ngai Apiipii Anga Punanga Tiaki ou i Patterson, New York. Akapeea te pamiri Betela i Wallkill i te manako anga no runga i teia taui anga? I teia karatuati anga kua uiuiia atu etai mei Wallkill mai. Kua oronga mai ta ratou au tuatua akatukia i te kite anga e kua akaruke te aronga apii o Gileada i tetai akara anga mutu kore kia ratou. Te taka marama ra, e ko teia au tane e te au vaine puareinga e au mitinari tika tikai​—tei akaaka, tei tuku atinga-uaorai, tei manako oonu atu i te tauturu i tetai atu.

I te karatuati e vaitata maira ki te openga, kua papu tikai i te katoatoa tei tae mai e ko te Apii Gileada ka tamou autu ua atu i te rave anga i tei raveia ana tere atu i te 50 au mataiti​—te akatupu anga i te au mitinari tika tikai!

[Pia i te kapi 18]

Te Au Tu o te Pupu:

Numero o te au enua tei komonoia: 8

Numero o te au enua tei tukuia: 21

Numero o te aronga apiipii: 48

Mataiti averiti: 32.72

Au mataiti averiti i roto i te tuatua mou: 15.48

Au mataiti averiti i roto i te angaanga orometua tamou: 10.91

[Tutu i te kapi 18]

Te 98 Pupu Karatuatianga o te Apii Puka Tapu Punanga Tiaki o Gileada

I roto i te papaanga i raro ake, kua numeroia te au pa mei mua ki muri, e kua papaia te au ingoa mei te tua kaui ki te tua katau i roto i te pa takitai.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.