Pene 98

Te Taumaro ra te au Pipi i te Vaitata anga to Iesu Matenga

TE VAITATA atura a Iesu e tana au pipi ki te Kauvai i Ioridana, te ngai ta ratou i aere mai ei mei te tapere o Perea ki Iudea. E manganui etai te aere ra ma ratou ki te Pasa o te 33 T.N., e okotai ua epetoma te mamao atu.

Te aaere ra a Iesu i mua ake i te au pipi, e te umere ra ratou i tona manako mataku kore. E akamanako e i etai nga epetoma tokoiti ua i mua akera i mate ei a Lazaro e te vaitata ra a Iesu i te aere atu mei Perea ki Iudea, kua akamaroiroi atura a Toma i etai ra: “E taki aere tatou, kia mate katoa atu.” E akamanako katoa oki e i muri ake i ta Iesu akatuakaou anga ia Lazaro, kua akapapa te Sunederi e tamate iaia. No reira rai te mataku i tupu ei ki te au pipi ra ia ratou i aere akaou atu ei ki Iudea.

No te teateamamao ia ratou i te au mea e tapapa maira, kua arataki muna atura a Iesu i te 12 ra ki te pae, na ko atura kia ratou: “I na, te aere nei tatou ki Ierusalema; e e tukuia te Tamaiti a te tangata nei ki te kau taunga nunui ra, e te au tata tuatua; e e akaapa mai ratou iaia kia mate, E tukuia atu oki ki te etene ra: E e taitoito mai ratou iaia, e e pāpā mai, e tutua mai oki i te uavare, e tamate rava mai oki; ka tu akaou ra aia i te po toru ra.”

Ko te toru teia o te taime i nga marama poto ua i tuatuaʼi a Iesu ki tana au pipi no runga i tona matenga e tona tuakaouanga. E noatu rai i akarongo ratou kiaia, kare ra ratou i marama. Penei no to ratou irinaki e ka akaoraia te patireia o Iseraela ki te enua nei, e te akara atura ratou i te rekareka anga kaka e te ngateitei i roto i tetai patireia ma te Mesia katoa i te enua nei.

Ko Salome tetai koia te metua vaine o nga apotetoro ra ko Iakobo raua ko Ioane i roto i te tere te aere atura ki te Pasa. Kua tapaia e Iesu teia nga tangata e ko te “Tamariki a te Mangungu,” kare e ekoko anga e no to raua tu mura. No te mea i etai tuatau kua akono teia nga tangata tokorua i te anoano ei turanga maata to raua i te Patireia o te Mesia ra, e kua akakite raua i to raua anoano ki to raua metua vaine. Kua aere atu aia i reira kia Iesu no raua, e kua tupou atu ki mua iaia, e kua pati atu i te akaperepere anga.

Kua ui atura Iesu kiaia, “Eaa toou inangaro?”

“Kia tae i toou basileia, kia noo aku tamariki nei, tetai ki toou rima katau, tetai oki ki toou rima kaui.”

I te kite anga i te tumu no te reira patianga, kua tuatua atu a Iesu kia Iakobo raua ko Ioane: “Kare kotou i kite i ta kotou i pati mai nei. Ka tika aina ia korua kia inu i te kapu taku e vaitata i te inu nei?”

“Ka tika ïa ia maua,” ta raua i pau. Noatu rai e koi oti ua ake ra ia Iesu i te akakite atu kia raua e te aro atura aia i te takinokino anga kino roa e ka tamate ravaia, te akara anga kare raua i marama e ko te reira tana i tuatua ra no “te kapu” tana e vaitata ra i te inu.

Inara, kua karanga atura Iesu kia raua: “E inu tikai korua i taku kapu, . . . kareka te noo i taku rima katau, e i taku rima kaui, kare ïa e tika iaku kia oronga atu, mari ra no te aronga i akonoia e taku Metua no ratou ra.”

I muri akera kua kite katoa te tai ngauru apotetoro ke atura i te pati anga a Iakobo raua ko Ioane ra, e kua riri ratou. Penei kua tu katau a Iakobo raua ko Ioane i te taumaroanga mua i rotopu i te au apotetoro ra, e koai tei maata ia ratou. Na teia pati anga na raua i akakite e kare i aru i te ako a Iesu i oronga no te reira tumu. E mea tangi, te vai ketaketa ra to raua inangaro no te turanga teitei.

E no reira kia akatikatika i teia maroanga e te manamanata ta te reira i akatupu, kua kapiki a Iesu i te 12 kia akaputu mai. Na te ako aroa anga ia ratou, kua akakite atu aia: “Kua kite oki kotou e, te tutara nei te ui mana o te etene ki runga ia ratou, e te aronga mamaata ra, te mana ra ïa i runga i to ratou. Kare ra e tika kia akapera ki roto ia kotou; ko te anoano i te akamaata i o kotou, kia riro ïa ei tavini no kotou; E ko te inangaro kia maata aia i o kotou na, ei tavini akaaka aia no kotou.”

Kua oti ia Iesu i te akanoo i te akaraanga no ratou kia aru, mei tana i akataka maira: “Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui.” Kare e kua rave anake a Iesu i te tavini anga no etai ke ra, mari ra kua rave katoa oki e tae roa ki te mate anga no te au tangata katoa. Ka tau katoa te au pipi kia aru i te turanga mei to te Mesia rai i te inangaro anga kia tavini atu e kare ra kia taviniia mai e kia riro koia kia mea meangiti mai eiaa e koia ki te turanga teitei. Mataio 20:​17-28; Mareko 3:17; 9:​33-37; 10:​32-45; Luka 18:​31-34; Ioane 11:⁠16.

▪ Eaa ra i tupu ei te mataku ki te au pipi ra?

▪ Akapeea ta Iesu teateamamao anga i tana au pipi no te au mea te vai maira i mua?

▪ Eaa te pati anga tei patiia kia Iesu, e eaa tei tupu ki etai atu o te au apotetoro ra?

▪ Akapeea ta Iesu akono anga i te manamanata i rotopu i tana au apotetoro ra?