E Akamaroiroi Atu Tetai i Tetai i te Vaitata Anga Mai Taua Ra Ra

“E akamaroiroi atu tetai i tetai, e kia maata atu rai i to kotou kite anga i taua ra ra i te vaitata anga mai.”​—EBERA 10:25, “NW.”

1, 2. Eaa te ra te vaitata maira, e eaa te tu manako tau no te au tangata o Iehova ra?

KO te aronga te rave ra i te tuatuaanga i teia tuatau nei, ‘E aere mai e rave i te vai ora’ kare e akataka ke ia ratou uaorai. I te vaitata anga mai taua ra maata o to Iehova ra autu anga, ka akono ratou i te ako a te Puka Tapu e: “E akamanako tatou tetai i tetai kia akamaroiroi i te aroa e te au angaanga memeitaki, auraka e akaruke i to tatou uaorai akaputuputu anga, mei ta tetai papaki ra, e akamaroiroi atu ra tetai i tetai, e kia maata atu rai i to kotou kite anga i taua ra ra i te vaitata anga mai.”​—Ebera 10:24, 25, NW.

² Te totou maira te au Tuatua Tapu i taua “ra” ra e ko te “ra o Iehova.” (2 Petero 3:10, NW) I te mea ko Iehova Tei Teitei Rava, te Atua mana maata, kare e ra e tika kia maata atu i tona ra. (Angaanga 2:20) Ka riro te reira ei akatikaanga i tona ngateitei ei Atua ki runga ake i te ao katoa e pini ua ake. Te akavaitata maira taua ra aite koreia ra tona puapinga.

3. Akapeea te akavaitata anga mai o te ra o Iehova no te au Kerititiano i te anere mataiti mua ra, e akapeea no tatou i teia tuatau nei?

³ Kua akakite atu te apotetoro ko Paulo ki te au Kerititiano i te anere mataiti mua o to tatou Tuatau Noa Nei, e te vaitata maira taua ra o Iehova ra. Kua tapapa atu ratou i te taenga mai taua ra ra, inara i reira, e tere atu i te 1,900 mataiti te mamao taua ra ra. (2 Tesalonia 2:1-3) Noatu rai te reira tika, kua tau ratou kia akamaroiroiia no te mea e papu ka tae mai taua ra ra, e me ka akono marie taua au Kerititiano ra i te reira akarongo, ka tomo atu ra ratou ki taua ra meitaki ra. (2 Timoteo 4:8) I reira roa, kua kiteia te reira ra i te vaitata anga mai. Ia tatou i teia tuatau, kua vaitata tikai taua ra o Iehova ra. Te au tupu anga umere katoatoa o te totou Puka Tapu te akapapu maira i te reira tika ei akauruanga rekareka. Kare e roa atu ana ka akatapuia te ingoa o to tatou Atua ko Iehova no te tuatau mutu kore ua atu.​—Luka 11:2.

Na Taua Ingoa Tapu ra i Akamaroiroi

4. Kia tau kia Apokalupo 19:6, koai te ka riro ei Ariki, e akapeea te kitea anga tona ingoa?

⁴ E mea tau taua ingoa tapu ra kia riro ei tumu no te manako anga o te au tangata ravarai. Te karanga ra Today’s English Ver­sion e: “E akapaapaaia a Ia! No te mea ko te Atu, to tatou Atua Mana Katoatoa, e Ariki ia!” (Apokalupo 19:6) Kia tau ki ta te reira urianga o te Puka Tapu no te 20 anere mataiti ra, koia te Atu, te Atua mana katoatoa. I tera urianga, e pera katoa etai atu urianga ou e manganui, kare i akakite mai i te ingoa o te Atua tei akamata ra i te tutara ei Ariki. Inara te kapitiia maira taua ingoa tapu ra i te tuatua anga e “Aleluia!” (“Akapaapaa ia Ia” me kare “Akapaapaa ia Iehova”) tei kitea ra i te Revised Standard Version, te New International Version, e te urianga a Moffatt ia Apokalupo 19:6. No te maata anga o to tatou Tuatau Noa Nei, kare e akakiteia mai ana taua ingoa tapu ra i te au urianga o te Puka Tapu. Inara, mei ta tatou ka kite, e akamaroiroi anga maata taua ingoa ra ki te au tangata o te Atua, i te tuatau taito ra e i teia tuatau katoa nei.

5, 6. (a) Eaa ra i tau ei a Mose kia kite i te ingoa o te Atua tana i tavini ra? (e) Eaa te tupu anga ki to Iseraela i ta Mose akakite ketaketa atu anga i te ingoa tapu ra?

⁵ Ka maara ia tatou i te tono anga te Atua Teitei Rava ia Mose ki te au tangata o Iseraela ra tei tuikaaia i te enua ko Aiphiti, kua tu mai te uianga ki roto i te manako o taua au tangata i tonokia atura a Mose kia ratou e naai aia ra i tono atu. Kua manako ra a Mose e ka inangaro to te ngati Iuda te tamamaeia ra kia kite ratou i te Atua tei unga atu ra iaia. No teia tu ka tatau tatou ia Exodo 3:15: “Kua tuatua mairai oki te Atua kia Mose, E na ko atu koe ki te tamariki a Iseraela, Na te Atua o to kotou ai metua ra, ko Iehova, te Atua o Aberahama, te Atua o Isaaka, e te Atua o Iakoba, au i tono mai kia kotou nei: ko toku ïa ingoa e tuatau ua atu, e ko toku ïa akakite ki tera uki ki tera uki.”

⁶ I te akaketaketa atu angaia te reira akakite anga kia ratou ra, kua akamaroiroiia to Iseraela e te reira. Kua akapapuia to ratou akaora anga e te Atua mou ra, koia a Iehova. Mei teaa ra te akamaroiroianga a te reira kia rauka ia ratou te manakonako anga no te matau anga i te Atua i tana akakite anga i te aiteanga o tona uaorai ingoa​—kare na te akataka ke anga iaia uaorai ma te tu nengonengo!​—Exodo 3:13; 4:29-31.

7. (a) Akapeea tatou i kite ei e i matau te au pipi a Iesu i taua ingoa tapu ra? (e) Akapeea te opara anga i te ingoa o te Atua ki te ngai i muri ra?

⁷ Kua maata katoa te akamaroiroi angaia te au pipi a te Atu ra ko Iesu Mesia e taua ingoa tapu ra, koia a Iehova, e ma tona aiteanga katoa. (Ioane 17:6, 26) I te tuatau o ta Iesu angaanga i te enua nei, kare rava aia i opara i taua ingoa tapu ra ki te ngai i muri, e kare oki tana akakoroanga e kia riro ko tona uaorai ingoa, ko Iesu, ki mua. No muri anake i te akamataanga o te aronga tei akaruke i te akarongo Kerititiano mou tei totouia maira no reira i oparaiaʼi te ingoa tapu ra ki te ngai i muri ra, ae, kua vaitata i te akakoreia i roto i te tuatua anga i rotopu i te au Kerititiano ra. (Angaanga 20:29, 30) I te riro anga ko te ingoa o te Tamaiti a te Atua ki runga atu, i te arai anga i to te Metua ra, kua kite te aronga tei karanga ra e Kerititiano ratou e ko ta ratou akamori anga i te Metua ra kua tupu te tu kite kore i te Atua ra, kua ngere i te pirianga mou tikai ei ngutuare tangata, e no reira kare e akamaroiroianga.

8. Eaa te tupu anga tei tamouia ki runga i te au tangata o te Atua ra i te rave anga i te ingoa au Kite o Iehova ra?

⁸ E no reira, e tumu tikai no te rekareka kare i rauka kia tuatuaia i te rave anga te International Bible Students, tei kapitiia atura ki te Watch Tower Society, i te ingoa te au Kite o Iehova i te 1931 ra. Kare e no te akatupuanga anake i te rekareka mari ra e akamaroiroianga maata katoa ia. No te reira tu, kua rauka i te aronga ou tei apiiia ra i te Puka Tapu i te akamaroiroi atu tetai i tetai.​—Akaaiteia atu kia Isaia 43:12.

9. Eaa te manako o te au Kerititiano mou ra no runga i Tei riro ra ko ratou ei au Kite nona?

⁹ No reira katoa, te au Kerititiano mou o teia tuatau kua kite e e mea tau kia akataka i Tei totou maira e ko ratou tona au Kite, mei ta Iesu Mesia i rave iaia i te enua nei koia ra to ratou arataki. (Apokalupo 1:1, 2) Ae, kua akataka ratou iaia e koia anake ra a Iehova e nona te reira ingoa.​—Salamo 83:18.

Kiia i te Rekareka e te Vaerua Tapu

10-12. (a) Eaa te tupu anga no te mana angaanga ki runga i te au pipi a Iesu ra? (e) Eaa te anoano o te au Kite o Iehova tei akauruia ra i te rekareka kia akono atu ia ratou uaorai?

¹⁰ Kua karanga atura a Iesu Mesia i tana au tuatua i te akaruke mai anga i tana au apotetoro ra: “E teianei, ka aere kotou, e akariro i to te pa enua ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.”​—Mataio 28:19, 20.

¹¹ E akamanako ana e ko te au Kerititiano ou tei apiiia ra kua tau kia papetitoia i te ingoa o te vaerua tapu. Kare teia vaerua tapu i te peretana mari ra ko te mana rave angaanga o te Atua ko Iehova, ko Tana e taangaanga ra na roto ia Iesu Mesia. I te Penetekote, kua riringi maira te Atua ko Iehova i teia mana rave angaanga na roto ia Iesu ki runga i te au pipi tei akatapuia a Iesu Mesia ra. (Angaanga 2:33) Kua akakiia ratou i teia vaerua tapu, e ko tetai akakite anga, me kare au ua, o taua vaerua tapu ra ko te rekareka ia. (Galatia 5:22, 23; Ephesia 5:18-20) E tu akamatutu anga to te rekareka. Kua akakiia te au pipi ra i te rekareka no te vaerua tapu. E tau tikai te au tuatua o te pure a te apotetoro ko Paulo ra: “Kia akakiia mai kotou i te rekareka ravarai e te au i te akarongo anga, e te Atua e raukaʼi te irinakianga; kia maata to kotou irinaki i te mana o te Vaerua Tapu ra.”​—Roma 15:13.

¹² I te ki anga i teia vaerua tei akauru kia rekareka, ka inangaro te au Kite o Iehova kia kapiti katoa te “urupu maata” i teia tuatau, ae, ka akakeuia, kia akamaroiroi atu tetai i tetai i roto i teianei akatereanga oaoa kore o te au mea nei. No reira rai, te apotetoro ko Paulo i tuatuaʼi no te “oronga anga i te akamaroiroi tetai ki tetai.”​—Apokalupo 7:9, 10, NW; Roma 1:12, NW; Roma 14:17.

Au Tumu Ravarai no tei Akamaroiroiia

13. Eaa ta tatou au tumu no te akamaroiroi anga e kia akamaroiroi atu oki tetai i tetai?

¹³ I te kiteanga ia ratou uaorai i roto i te akatereanga o te au mea nei, e ko tona tutara ko te atua ia te patoi ra i te au mea tuatua tika katoatoa, ka tau ra te au Kerititiano kia anoano i te akamaroiroi tetai i tetai i roto i te putuputuanga Kerititiano i te ao katoa nei, te ki ra i te vaerua tapu o te Atua ko Iehova. (Ebera 10:24, 25; Angaanga 20:28) Tei ia tatou te au tumu ravarai no tei akamaroiroiia. Ae, e akameitaki anga tikai to tatou i te kite tika ia Iehova e i Tana Tamaiti e pera katoa te mana rave angaanga ta ratou e taangaanga nei, koia oki, te vaerua tapu! E rekareka tikai to tatou i te manakonako anga ta ratou e oronga maira! Te ki ra to tatou akamori anga i te rekareka. Kua akakite atura te apotetoro ko Paulo ki te au Kerititiano tana i tata atura i tana reta e kia akamaroiroi ratou tetai i tetai e kia akamatutu atu tetai i tetai i to ratou akarongo tapu ra. E tau ratou kia rave i te reira ‘e kia maata atu rai no te mea te akara akatutu ra ratou i taua ra ra i te vaitata anga mai.’ Pera katoa oki, kia takoreia atu e te au mana poritiki o te enua nei te akonoanga Kerititiano ingoa ua nei, ma etai atu au akonoanga atua pikikaa, ka riro i reira te turanga e kia maata rava atu ta tatou akamaroiroi anga tetai i tetai e tikai.

14. Koai ma te tau ra kia akamaroiroi atu tetai i tetai, e na ea?

¹⁴ E tika rai na te aronga pakari e arataki te akamaroiroianga i te anana o to ratou au putuputuanga tatakitai, ka anoanoia ra te au Kerititiano katoatoa kia akamaroiroi tetai i tetai, mei ta Ebera 10:25 e ako maira. Ko te tika rai, e umuumuanga teia no te Kerititiano. Me ko koe tetai e mema no te putuputuanga, te oronga ra ainei koe i teia akamaroiroi anga? Penei ka kimi toou manako, ‘Akapeea e raukai iaku? Eaa taku ka rave?’ Te mea mua, na toou taenga ki te au uipaanga e taau turu anga i te akanoonoo anga a te Kerititiano, kare ainei te reira e akamaroiroi atu i te au tungane e te au tuaine, mei ia koe uaorai tei akamaroiroiia ra me kite koe ia etai atu i te taenga ki te au uipaanga o te putuputuanga e kare e kore ana? Ka akamaroiroi katoaia ratou e taau akaraanga kia akakoromaki tamouia. Na toou rave tamou anga i te mataara o te Kerititiano noatu eaa te au manamanata e te au tu ngata o te oraanga, auraka e akamutu, ka rauka ia koe i te akanoo i te akaraanga ei akamaroiroi.

Kopae Atu i te Akaapikepike Anga Mei ko Mai i te Tiaporo Ra

15. Eaa ra i “riri maata” ei te Tiaporo, e kiaai?

¹⁵ Kare ko tatou anake ua te kite nei e te vaitata maira te ra o Iehova. Te kite katoa ra a Satani te Tiaporo. Te akakite maira Apokalupo 12:12 kia tatou e e mate to te enua i teianei “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” Mei ta Apokalupo 12:17 e akakite maira, te tukuia maira tona riri maata ki “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” Kare e ekoko anga no te reira​—te anoano ra te Tiaporo i te akaapikepike ia tatou! E kua kite aia e akapeea te tauta anga kia rave i te reira. Kua kite aia i to tatou au tu apikepike e te au manamanata, e ka kanga aia ki runga i te reira.

16. Eaa ra a Satani i taangaangaʼi i te akaapikepike anga ei taonga akaparuparu nana?

¹⁶ Eaa ra te Tiaporo ka rave ei i te akaapikepike anga ei taonga taparu nana? No te mea e putuputu te reira i te manuia. Noatu rai kua akakoromaki tetai tangata i te patoi anga e te takinga kino anga tikai penei ka topa ua ia i te akaapikepike anga. Te anoano ra a Satani kia akakino atu i te Atua ko Iehova e kia akapapu ka rauka iaia te akaariu ke i te tangata kia kore e tavini atu Kiaia. (Maseli 27:11; akaaiteia atu kia Iobu 2:4, 5; Apokalupo 12:10.) Me ka rauka iaia i te akaapikepike ia koe, penei ka rauka iaia i te akariro kia meangiti ua taau angaanga ki te Atua; e penei ka rauka iaia te akariro kia akamutu takiri koe, e riro atu ei kia kore e rave i te tutu aere i te tuatua meitaki o te Patireia.​—2 Korinetia 2:10, 11; Ephesia 6:11; 1 Petero 5:8.

17. Akapeea te kitea anga o te tupu anga te tu paruparu no te akaapikepike i to Mose tuatau ra?

¹⁷ Te kitea ra te tupu anga kino no te aka­apikepike anga tei akakiteia maira i to Iseraela i Aiphiti i taito ra. I muri ake i to Mose tuatua anga kia Pharao, kua akamaata atu te reira tangata tangi kore ra i ta ratou apainga e tana takinga kino anga ia ratou. Kua tuatua atura te Atua kia Mose kia akapapu atu ki to Iseraela e ka akaora Aia ia ratou, e ka rave mai ia ratou ki te enua taputouia ra. Kua tuatua akapera atura a Mose ki te tamariki a Iseraela. Inara te akakite maira a Exodo 6:9: “No te tumatetenga ngakau ra, e te tinai-mate anga, kare akerai ratou i akarongo mai ia Mose.” Tae roa na Iehova i akapapu atu kia Mose e i akamaroiroi atu iaia ra, kua akaapikepike katoatoaia a Mose e te reira tupu anga kia kore e anoano i te tuatua atu kia Pharao mei tei akaueia atura kiaia.​—Exodo 6:10-13.

18. Eaa ra i anoano maataia te au tangata o te Atua kia patoi atu i te akaapikepike anga no ko mai i te Tiaporo ra?

¹⁸ Kua kite meitaki a Satani te Tiaporo ra i te tupu anga ei akakino e te akaapikepike anga ki runga i te tavini o te Atua ra. Mei ta Maseli 24:10 (NW) e tuatua ra: “Kua akaari ainei koe e te akaapikepike ra koe i te ra tumatetenga? Ka mea ngiti roa ia toou maroiroi.” I te mea te noo nei tatou i roto i te oonu roa o te tuatau openga ra, ka anoanoia tatou kia ririnui e kia maroiroi i te pae vaerua. Kua rava rai te kino e kia akakoromaki tatou i to tatou au tu tau kore, te tu paruparu, e te au tarevake te ka tapupu ia tatou; inara ma ta Satani tautaanga kia taangaanga i teia au tu kino, ka anoano tikai tatou i te tauturu.

E Irinaki Ngaueue Kore i te Atinga o te Mesia

19. Eaa te ka tauturu ia tatou kia patoi atu i te akaapikepike anga, e no teaa ra?

¹⁹ Ko tetai tauturu maata i teia turanga ko te apinga oko ta Iehova i akapapa mai ia Iesu Mesia ra. Ka rauka kia autu tatou na te irinakianga ngaueue kore i te oko ra. Ka riro ei kino kia akameangiti mai i teia apinga. Ae, ka akatupu tatou i te apa, me kare te ara, ia tatou e vai apa ua nei. Inara kare tatou e tau kia akaapikepike e kia akamutu ua, ma te manakoanga e kare e manakonakoanga, e ka topa atu ei ki roto i te ereere a Satani. Ka rauka i te oko i te akakore atu i te ara. Me no te “urupu maata” tatou, ka tau tatou kia akarongo papu e kia irinaki ka rauka ia tatou i te orei i to tatou kakau e kia akateatea i te toto o te Punua Mamoe ra.​—Apokalupo 7:9, 14, NW.

20. Akapeea ta Apokalupo 12:11 akakite mai anga e ka rauka kia autu atu ki runga i te Tiaporo, koia ra tei akaapikepike maata mai ra?

²⁰ Ia Apokalupo 12:10 te akatakaia maira a Satani e ko “te akaapa i to tatou au taeake . . . ko tei akaapa ia ratou ki mua i te aroaro o to tatou Atua i te po e te ao.” Akapeea e vi ei ia tatou te reira akaapa kino e te akaapikepike maata mai ra? Te oronga maira te irava 11 o taua pene rai i te pauanga: “Vi atura ra aia ia ratou i te toto o te Punua-mamoe, e i te tuatua ta ratou i akakite ra; kare oki ratou i inangaro i to ratou uaorai ora, kua akakoromaki ra e tae ua atu ki te mate.” No reira ka anoanoia te au tangata o Iehova kia irinaki papu i te atinga oko ra, koia te toto o te Punua Mamoe. Kia akaketaketa i te akamaroiroi anga te rauka maira i te tutu aere anga, ma te tua putuputu anga i te tuatua meitaki o te Patireia o te Atua ma te aronga katoatoa te ka rauka ia koe na kia rave.

21. Akapeea tatou i te rave manako kore anga i te angaanga a te Tiaporo i te akaapikepike anga i to tatou au taeake?

²¹ I etai tuatau, penei ka rave tau kore ua tatou i te angaanga a te Tiaporo i te akaapikepikeanga i to tatou au taeake. Na ea? Na te akaapa anga maata, e te noinoi roa, me kare e maata ua i te ketaketa kia tika. (Koheleta 7:16) Pouroa tatou te ngere ra e te apikepike ra i tetai tu. Auraka tatou e kanga ua i te reira mei ta te Tiaporo rai. Kareka ra, e tuatua akamaroiroi tatou no to tatou au taeake ma to Iehova au tangata katoa ei pupu kia akapapaia. E rave tamou tatou i te akapumaana i te ngakau o tetai i tetai e auraka e taparuparu atu tetai i tetai.

Akamaroiroianga i te Vaitata Anga Taua Ra Ra

22, 23. (a) Eaa tatou ka kore ei e akaruke ua atu na te aronga pakari e rave te akamaroiroi anga? (e) Akapeea e raukai i te akamaroiroi atu anga i te au akaaere o te putuputuanga Kerititiano ra?

²² Ka tau tatou kia tuku i ta tatou tika ngaueue kore kia tamou i te akamaroiroi anga tetai i tetai i te vaitata anga taua ra ra. E akamaroiroi atu ia etai ke ra na toou akaraanga pikikaa kore e te au tuatua akapumaana. E aru ia Iehova e te Atu ia Iesu Mesia ra i teia tu. Auraka e akaruke atu ko te aronga pakari anake o te putuputuanga ei tumu no te akamaroiroi anga. Eaa, te anoanoia ra te akamaroiroi anga no te aronga pakari uaorai oki. E au tu apikepike to ratou e tu paruparu mei to te anana katoa ra, e te akakoromaki ra ratou i taua au manamanata rai i te rapuanga no to ratou ngutuare tangata i roto i teianei ao te pe atu nei. Kapiti katoa ki te reira, tei ia ratou oki ta Paulo i akataka maira e ko te apiapi no te au putuputuanga. (2 Korinetia 11:28, 29) E angaanga ngata ta ratou​—te anoano ra ratou i te akamaroiroi anga.

²³ Ka rauka ia koe i te akamaroiroi maata atu i te aronga e taoonga akaaere to ratou i roto i te putuputuanga Kerititiano na te angaanga taokotaianga ma ratou katoa ra. Te aru ra koe i reira i te ako ia Ebera 13:17 (NW) ra: “E akarongo atu i to kotou aronga arataki ka kauraro atu ia ratou, no te mea ko ratou te tiaki ra i to kotou meta ko ratou oki te akono ra kia tika; kia rave ratou i te reira ma te rekareka e eiaa ma te mii, ka riro oki te reira ei kino no kotou.”

24. I teia tuatau o te akaapikepike anga, eaa ta tatou ka tau kia rave, e no teaa ra?

²⁴ Te noo nei tatou i te tuatau no te aka­apikepike anga. Te taravai anga o te ngakau tangata i te mataku, e te manako anga i taua au mea ra i te vaitata anga mai i te enua nei, mei ta Iesu i totou maira. (Luka 21:25, 26) I te maata o te au manamanata te akamaromaroa ra e te mamae ngakau ra, “e akamaroiroi atu tetai i tetai, e kia maata atu rai i to kotou kite anga i taua ra ra i te vaitata anga mai.” E aru i te ako meitaki a te apotetoro ko Paulo ia 1 Tesalonia 5:11: “E akapumaana kotou tetai ki tetai, e akatupu i te meitaki tetai ki tetai, mei ta kotou rai oki e rave nei.”

Akapeea Koe me Pau?

◻ Eaa i tau ei te au Kerititiano kia akamaroiroi tetai i tetai, kia maata atu i tei raveia i mua ana?

◻ Akapeea te akamaroiroianga i te au tangata o Iehova a te kite anga i te ingoa tapu ra?

◻ Na teea au mataara e raukaʼi ia tatou tatakitai i te akamaroiroi tetai i tetai?

◻ Eaa tatou ka tau ei kia kore e kapiti atu i te angaanga akaapikepikeanga a te Tiaporo i to tatou au taeake?

[Tutu i te kapi 17]

Na te aronga pakari e arataki i te akamaroiroi anga i te anana i to ratou au putuputuanga