Tuatua Tika Kare na te Peu tei Tuatua Uaia

“E akakite atura au kia kotou, Kia kore kia maata atu ta kotou tuatua-tika i ta te aronga tata tuatua, e ta te aronga Pharisea, kare rava kotou e o ki te basileia o te [au rangi, NW].”​—MATAIO 5:20.

1, 2. Eaa tei tupu i mua poto ake i ta Iesu Tuatua i te Maunga ra?

KUA pou te po ia Iesu i runga i tetai maunga. Te totoa ra te au rangi e te etu i runga ake iaia ra. Kua parara aere te au manu rikiriki o te po tei totoro aere i roto i te au ngangaere ra. I te pae o te itinga ra te pakipaki maru ua maira te au vai o te Tai i Galilea ra ki taatai. Inara e meangiti ua to Iesu manako no te tu au ua, e te manea e te maru tei koropini ra iaia. Kua pou te reira po iaia i te pure anga ki tona Metua i te rangi, koia a Iehova. Kua anoano aia i te arataki anga a tona Metua. E ra puapinga maata tei vai maira ki mua iaia.

² I te pae itinga ra te maramarama maira te rangi. Te akamata ra te au manu i te rere rere aere, e te tangitangi maru ua. Te tairiiri marie uaia ra te au tiare taetaevao e te matangi anuanu e te maru. I te itinga mua mai te marama o te ra ki reira, kua kapiki a Iesu i tana au pipi kiaia e kua iki aia e 12 no roto ia ratou ra ei apotetoro nana. Ei reira kua aere atura ratou katoatoa ki raro na te pae maunga ra. Kua kitea atura e te au urupu tangata i te aere mai anga mei Galilea, mei Turia e Sidona, mei Iudea e Ierusalema katoa oki. Kua aere maira ratou kia akaoraia to ratou au maki. Kua aere atura te mana o Iehova mei roto atu ia Iesu i te akatukia atu anga te aronga e manganui iaia e kua ora to ratou maki. Kua aere katoa mai oki ratou kia rongo i tana au tuatua tei aite ra ki te manongi kia rapakauia to ratou au meta taitaia ra.​—Mataio 4:25; Luka 6:12-19.

3. Eaa ra i manakonako ei te au pipi e te au urupu tini ra i te akamata anga a Iesu i te tuatua?

³ I ta ratou au apiianga tikai, e mea matauia na te au rabi ra kia noo ki raro, e i teia popongi tupu anga rau rakau tikai i te 31 T.N., ko ta Iesu te reira i rave, i te akara anga i tetai ngai paraaraa i te pae maunga ra. I te kite anga tana au pipi e te au urupu i te reira, kua kite ratou e e apinga takake tetai te vai maira, no reira kua akaputu atura ratou takapini iaia ma te akamanako anga. I tona akamata anga i te tuatua, te akarongo meitaki maira ratou i tana au tuatua; i te oti anga tana tuatua anga i muri roa maira, kua umere tikai ratou i ta ratou i akarongo atura. E akara tatou eaa te tumu.​—Mataio 7:28.

E Rua Tu no te Tuatua Tika

4. (a) Eaa nga tu tuatua tika e rua tei maroia ra? (e) Eaa te akakoroanga a te au peu tei tuatua uaia, i tupu ainei te reira?

⁴ I tana Tuatua i te Maunga ra, tei akakiteia mai ia Mataio 5:1–7:29 e ia Luka 6:17-49, kua akataka papu maira a Iesu i nga pupu tuke e rua ra: te aronga tata tuatua e te au Pharisea e te au tangata noa ua ta ratou i takinokino ra. Kua tuatua aia no nga tu e rua o te tuatua tika, te tuatua tika pikikaa ra a te au Pharisea e te tuatua tika mou no te Atua ra. (Mataio 5:6, 20) Kua akaia to te Pharisea tu tuatua tika no ratou uaorai ki roto i te au peu tei tuatua uaia. Kua akamataia mai te reira i te rua anere mataiti M.T.N. ei “aua takapini i te Ture” ei paruru i te reira kia kore e o atu te Hellenism (peu Ereni). E kua manakoia ei tuanga no te Ture. Ko te tika, kua manako te au tata tuatua ra e tei runga atu te au peu tei tuatua uaia i te Ture tei tataia ra. Te tuatua ra te Mishnah: “E maata atu te tureture anga te tukuia ra ki runga i te akono anga i te au tuatua a te aronga Tata Tuatua [koia ta ratou au peu tei tuatua uaia] i te akono anga i te au tuatua no te Ture tei tataia ra.” No reira, kare i te “aua takapini i te Ture” ei paruru i te reira, te akaparuparu ra i te Ture i ta ratou au peu tei tuatua uaia e te akariro ra kia puapinga kore ua te reira, mei ta Iesu i tuatua ra: “E kikite ua ta kotou kopae anga i te akauenga a te Atua ra kia tamouiaʼi ta kotou peu.”​—Mareko 7:5-9, NW; Mataio 15:1-9.

5. (a) Eaa te tu o te au tangata noa ra tei aere mai kia akarongo atu ia Iesu, e eaa te manako o te au tata tuatua e te au Pharisea no ratou ra? (e) Eaa tei akariro i te au peu tei tuatua uaia ra ei apainga teiaa ki runga i te au pakuivi o te aronga angaanga ra?

⁵ Te au tangata noa ra tei aere kapipiti maira kia akarongo atu ia Iesu kua ngere i te pae vaerua, no te mea “kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) No te tu nengonengo o te aronga tata tuatua e te au Pharisea ra kua aviri atu ia ratou, kua karanga e e ‘am-ha·’aʹrets ratou (e au tangata no te enua), e kua akavaavaa ia ratou e e kamakura, e aronga ara tei taumaaia kare i tau no te tuakaouanga no te mea kare ratou i akono i te au peu tei tuatua uaia tei orongaia maira e te tangata ua nei. Kia tae mai ki to Iesu tuatau kua maata roa taua au peu tei tuatua uaia e no te takingakino anga a ta ratou au ture mei te kimi anga kutu rai​—te maata te au peu e kaimoumou taime—​e kare e rauka i te tangata angaanga i te akono. No reira rai a Iesu i akaapaʼi i te au peu tei tuatua uaia nei ei ‘apainga teiaa, ki runga i te au pakuivi o te au tangata ra.’​—Mataio 23:4; Ioane 7:45-49.

6. Eaa tei umere roaia no ta Iesu au akakitekiteanga akamataanga ra, e eaa te taui anga ta te reira i akakite mai no tana au pipi e no te au tata tuatua e te au Pharisea katoa oki?

⁶ No reira i to Iesu nooanga ki raro i te pae maunga ra, ko te aronga tei akavaitata atu kia akarongo atu kiaia, ko tana au pipi e te au urupu tangata tei pongi ra i te au mea vaerua. E mea tau kua kite ratou i tana au tuatua i te akamataanga ei au akakiteanga poitirere. ‘E ao to tei akaaka, e ao to tei pongi, e ao to tei aue, e ao to tei makitakitaia maira.’ Inara koai te ka rekareka me e putaua, e pongi, te aue ra, e te makitakitaia ra? E ae oki tei akakiteia atu no te aronga apinga nui, e tei ki na, te aronga e kata ra, e pera katoa te aronga tei akameitakiia mai e te tangata! (Luka 6:20-26) Na etai au tuatua tokoiti ua, kua akaanga keia e Iesu to ratou au tu tei matauia ra e to ratou au turanga te arikiia ra. E akatuke anga maata i te au turanga, kia tau ki ta Iesu au tuatua i muri akera: “Ko te akateitei iaia uaorai ra, ka taakaakaia ïa; e te taakaaka iaia uaorai, ka akateiteiia ïa.”​—Luka 18:9-14.

7. Eaa tei tupu ki te urupu tangata tei mate i te pongi i te pae vaerua i te akarongorongo atu anga ki ta Iesu au tuatua akamataanga i taua popongi ra?

⁷ Ei tuke anga ki te aronga tata tuatua e te au Pharisea tei akamerengo ra ia ratou uaorai, ko te aronga tei aere maira kia Iesu i te reira popongi tikai kua kite i to ratou tu taukore i te pae vaerua. Na tana au tuatua i te akamataanga e kia akaki ia ratou i te manakonakoanga: “E ao to te aronga kite i tei anoanoia no ratou i te pae vaerua, no ratou oki te patireia o te au rangi ra.” (NW) E mei teaa ra te kake anga to ratou vaerua ki runga i tana kapiti anga atu: “E ao to tei pongi ra e tei kaki ra i te tuatua-tika, e akakiia oki ratou”! (Mataio 5:3, 6; Ioane 6:35; Apokalupo 7:16, 17) Akakiia i te tuatua tika, ae, eiaa ra i ta te au Pharisea.

Kare e Rava Kia Tika ‘Ua ki Mua i te Aroaro o te Tangata’

8. Eaa tetai papaki ka kimi manako ei e akapeea ta ratou tuatua tika e maata atu ei i ta te au tata tuatua e te au Pharisea, inara eaa i tau ei kia akapera?

⁸ “Kia kore kia maata atu ta kotou tuatua-tika i ta te aronga tata tuatua, e ta te aronga Pharisea,” e na Iesu ei, “kare rava kotou e o ki te basileia o te [au rangi, NW].” (Mataio 5:17-20; akaraia a Mareko 2:23-28; 3:1-6; 7:1-13.) Penei kua manako tetai papaki: ‘Kia maata atu te tuatua tika i ta te au Pharisea? Te akakore kai ra ratou e te pure ra e te oronga ra i te ngauru e te oronga ra i te moni tauturu i te putaua e te akapou ra i to ratou oraanga i te apiianga i te Ture. Akapeea e tere atu ei ta matou tuatua tika i ta ratou?’ Inara te anoanoia ra kia maata atu. Penei te akangateiteiia ra te au Pharisea e te tangata, kare na te Atua. I tetai atu atianga kua karanga a Iesu ki teia au Pharisea: “Ko kotou na te aronga e akatika ia kotou uaorai i mua i te aroaro o te tangata nei; kua kite ra te Atua i to kotou ngakau: ko taua mea i akameitaki uaia e te tangata ra, e mea viivii ïa i te Atua.”​—Luka 16:15.

9-11. (a) Eaa tetai ravenga i manakoia e te au tata tuatua e te au Pharisea katoa e ka rauka ia ratou te turanga tuatua tika ki mua i te aroaro o te Atua ra? (e) Eaa te rua o te ravenga tei manakoia e ratou e ka rauka te tuatua tika? (ng) Eaa te toru o te ravenga ta ratou i manako ana, e eaa ta te apotetoro ko Paulo i tuatua tei akariro i te reira kia puapinga kore ua?

⁹ Kua akapapa te au rabi ra i ta ratou uaorai au ture kia rauka ta ratou tuatua tika. Ko tetai na te tika e e uanga no Aberahama: “Te rekareka nei te au pipi a Aberahama to matou metua i teianei ao e ka riro no ratou te ao te aere maira.” (Mishnah) Penei ei patoi i te reira peu i akamatakite ei a Ioane Papetito i te au Pharisea tei aere maira kiaia e: “Ka tuku mai na i te akonoanga e tau i te tataraara: Auraka e manako i roto ia kotou uaorai e, E metua to matou ko Aberahama [mei te mea rai e kua rava te reira].”​—Mataio 3:7-9; akara katoa ia Ioane 8:33, 39.

¹⁰ Ko te rua o te ravenga e raukai te tuatua tika, ta ratou i karanga, na te orongaanga i te tauturu na te putaua. Te akakite maira nga puka Apocryphal e e rua na te au ngati Iuda ngakau tae o te rua anere mataiti M.T.N. i te manako no te apiianga a te tangata. Tera tetai tataanga i roto i te Tobit: “Na te orongaanga i te tauturu na te putaua e akaora kia kore te tangata e mate e ka tapoki katoa oki i te ara katoatoa.” (12:9, The New American Bible.) Te akatika ra The Book of Sirach (Ecclesiasticus) e: “Ka mate te mura ai i te vai, e ka tapoki te tauturu i te aronga putaua i te au ara.”​—3:29, NAB.

¹¹ Te toru o te ravenga no te kimi tuatua tika na te au angaanga a te Ture. Kua apii maira ta ratou au peu tei tuatua uaia e me ko te maataanga o ta te tangata angaanga e meitaki, ka ora ia aia. Ko te akavaanga “na runga i te maata o te angaanga me e meitaki me kare e kino.” (Mishnah) E tu meitaki ei i te akavaanga, ko to ratou manako na “te rauka anga te au tika kia maata atu i te au ara.” Me e tere atu te au angaanga meitaki a te tangata i tana au angaanga kikino, ka ora ia aia​—mei te mea rai e te akava ra te Atua na te tareanga i ta ratou au angaanga rikiriki ra! (Mataio 23:23, 24) Te orongaanga i te manako tika, kua tata a Paulo e: “Kare rava e tangata akatikaia i mua i te aroaro o te Atua i te angaanga a te ture ra.” (Roma 3:20) E mea papu, ka tau te tuatua tika a te Kerititiano kia maata atu i ta te au tata tuatua e ta te au Pharisea katoa oki!

“Kua Rongo Kotou e i Tuatuaia”

12. (a) Eaa te taui anga mei tana i rave i mua ana no te akakite mai anga i te au Tuatua Tapu Ebera ta Iesu i rave i tana Tuatua i te Maunga ra, e eaa te tumu? (e) Eaa ta tatou ka apii mai mei te ono o te taiku anga e “Kua tuatuaia maira” i te akapapu anga e e tika teia manako?

¹² I ta Iesu taiku anga i mua akera no te au Tuatua Tapu Ebera, kua karanga aia e: “Kua tataia.” (Mataio 4:4, 7, 10) Inara e ono taime i tana Tuatua i te Maunga ra, kua tuatua mai aia i tei aite te tangi anga e no te au tuatua o te au Tuatua Tapu Ebera maira ma te au tuatua e: “I tuatuaia mai.” (Mataio 5:21, 27, 31, 33, 38, 43) Eaa ra te tumu? No te mea te taiku maira aia i te au Tuatua Tapu te akatakaia i te marama anga o te au peu a te Pharisea ra tei patoi ra i ta te Atua au akauenga. (Deuteronomi 4:2; Mataio 15:3) Te akatakaia maira teia i te ono koia te openga ta Iesu taiku anga i te reira tuatua: “Kua akarongo kotou e, i tuatuaia maira, ‘E aroa atu koe i toou tangata tupu,’ e makitakita atu i toou enemi.” Inara kare te ture a Mose i karanga e, “E makitakita atu i toou enemi.” Na te au tata tuatua e te au Pharisea i tuatua te reira. Na ratou te reira akataka anga i te Ture kia aroa atu i toou tangata tupu​—toou tangata ngati Iuda i te pae ia koe, kare ia etai ke atu.

13. Akapeea ta Iesu akamatakite anga e noatu rai ko te akamataanga o te tu akono ra ka rauka i te taki atu ki te ta ua?

¹³ E akamanako ana i teianei i te tumu mua o teia nga tuatua e ono nei. Kua karanga a Iesu e: “Kua akarongo oki kotou e i tuatuaia mai e te aronga taito ra e, ‘Auraka rava koe e ta ua:’ e te ta ua ra, e tau iaia te akavaanga: Te karanga atu nei ra au kia kotou, Ko te tangata e riri ua ki tona taeake, e tau katoa iaia te akavaanga.” (Mataio 5:21, 22) Ka rauka i te riri o te ngakau i te taki atu kia tuatua akakino e mei reira atu ki te au akavaanga akaapaia, e penei ka taki atu i te openga kia rave i te ta ua. Ko te riri akamoupuku roaia i te ngakau e mea kino rava ia: “Ko tei makitakita i tona taeake, e ta tangata ïa.”​—1 Ioane 3:15.

14. Akapeea ta Iesu ako ia tatou e auraka e akamata na te mataara te ka taki atu ki te akaturi ra?

¹⁴ I muri akera kua tuatua a Iesu e: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:27, 28) Kare koe e akaturi? Auraka koe i reira e akamata na te reira mataara i te tukuanga i te manako no te reira. E paruru i toou ngakau, no reira mai oki te tumu anga o te reira au mea. (Maseli 4:23; Mataio 15:18, 19) Te akamatakite maira a Iakobo 1:14, 15 e: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” Kua tuatua te au tangata i etai tuatau e: ‘Auraka e akamata i te apinga kare e oti ia koe.’ Inara i teia tu ka tau tatou kia tuatua: ‘Auraka e akamata i te apinga kare e rauka ia koe i te akamutu.’ Ko tetai papaki kua tiratiratu e noatu kia akaokoia i te mate ki mua i te pupu rave pupui ra inara i muri akera kua tuku ua ki te maunu no te akaturi.

15. Eaa te tuke takiri o ta Iesu akataka anga i te kopae mei ta tei akakiteia maira i te au peu tei tuatua uaia a te au ngati Iuda ra?

¹⁵ Kua tae mai tatou i teianei ki te toru o ta Iesu ra tuatua anga. Kua karanga aia e: “I tuatuaia oki Ko tei inangaro i te kopae i tana vaine, e e kave atu i tetai tuatua kopae kiaia ra; Te karanga atu nei ra au kia kotou, Ko te kopae i tana vaine, auraka no te akaturi, kua akariro aia iaia ei akaturi, e te akaipoipo i tei kopaeia ra [e kare no te akaturi i kopaeiaʼi] kua akaturi katoa ïa.” (Mataio 5:31, 32) Ko etai ngati Iuda kua pikikaa ua i ta ratou vaine e kua kopaeia no te au tumu rikiriki ua. (Malaki 2:13-16; Mataio 19:3-9) Kua akatikaia te tangata kia kopae i tana vaine e te au peu tei tuatua uaia nei “e me i kino iaia tana kai i tunu nana ra” me kare “kua kitea e ia tetai ke atu tei manea atu i tana vaine ra.”​—Mishnah.

16. Eaa te ravenga a te ngati Iuda ra tei akariro kia puapinga kore te au taputouanga, e eaa te turanga ta Iesu i rave?

¹⁶ Mei te reira tu manako katoa kua tuatua ua atu a Iesu: “Kua akarongo oki kotou e i tuatuaia mai e te aronga taito ra e, Auraka koe e taputou pikikaa ua . . . Te karanga atu nei ra au kia kotou, Auraka e taputou, auraka rava.” I te reira tuatau te rave tau kore ua ra te au ngati Iuda i te taputou anga e e manganui ta ratou taputou no te au mea rikiriki ua kare ra i raveia. Inara kua karanga a Iesu: “Auraka e taputou, auraka rava . . . Kia riro ra ta kotou Koia, ei koia; e ta kotou Kare, ei kare.” E mama ua tana akauenga: Kia tika te tuatua i te au tuatau ravarai, auraka e kia taputouia taau tuatua. E akatakake i te au taputou no te au tumu puapinga maata.​—Mataio 5:33-37; akaaiteia atu kia 23:16-22.

17. Eaa te mataara meitaki atu ta Iesu i apii mai, i ta te “mata no te mata e te nio no te nio”?

¹⁷ E kua tuatua katoa maira a Iesu: “I akarongo kotou e i tuatuaia mai, ‘E mata no te mata e e nio no te nio.’ Inara, te karanga atu nei au kia kotou: Auraka e akaoki atu i te kino: ko te moto mai i toou paparinga katau nei, e ariu katoa atu i tetai.” (Mataio 5:38-42) Kare ta Iesu tuatua e no te moto tei akakoroia ei akakino, mari ra no te papaki na muri o te rima ra ei ta akama. Auraka e taeke mai ia koe ki raro na te tutakianga taakama. Auraka e tutaki i te kino no te kino. Mari ra, e tutaki atu i te meitaki e “kia mate ra te kino ia koe i te meitaki.”​—Roma 12:17-21.

18. (a) Akapeea ta te au ngati Iuda taui anga i te ture no te aroa atu i toou tangata tupu, inara akapeea ta Iesu akaapa anga i te reira? (e) Eaa ta Iesu pau anga ki tetai roia tei anoano ra kia kotingaia te akonoanga i te “tangata tupu”?

¹⁸ I te ono koia te akaraanga openga, kua akaari meitaki mai a Iesu e i akapeea te akaapikepike anga a te apiianga rabi, i te Ture a Mose ra: “Kua akarongo kotou e, i tuatuaia maira, ‘E aroa atu koe i toou tangata tupu,’ e makitakita atu i toou enemi: Te karanga atu nei ra au kia kotou, E aroa atu i to kotou aronga enemi, . . . e pure oki no te aronga e akakino mai e tei takinga-kino mai ia kotou.” (Mataio 5:43, 44) Kare e kotinga no te aroa i tukua ki roto i te Ture a Mose tei tataia ra: “E aroa ra koe i to tangata tupu mei toou aroa ia koe uaorai na.” (Levitiku 19:18) Ko te au Pharisea tei akaapa atu i te reira akauenga, e kia kopae ke ei i te reira kua kotingaia e ratou te tuatua “tangata tupu” ki te aronga anake tei akono i te au apiianga na te tangata. E no reira i ta Iesu taiku atu anga i te akauenga ki tetai roia kia ‘aroa atu i toou tangata tupu mei toou aroa ia koe uaorai na,’ kua manga patoi taua tangata ra: “Koai oki toku tangata tupu?” Kua pau atura Iesu ma te akatutu anga o te tangata Samaria meitaki ra​—e akariro ia koe uaorai ei tangata tupu no tei anoano maira kia koe.​—Luka 10:25-37.

19. Eaa ta Iehova e rave ra no te aronga rave kino tei akaueia mai e Iesu kia aru katoa tatou?

¹⁹ I te rave ua atu anga i tana tuatua, kua akakite a Iesu e ‘kua akono te Atua i te tu aroa ki te aronga rave kino ra. Kua akaiti aia i te ra e kua akatopa mai i tana ua ki runga ia ratou. Kare i te mea maata atu i reira kia aroa atu i te aronga tei aroa maira ia koe. Te akapera ra te aronga rave kino. Kare e tumu no te tutaki i te reira. E akapapu ia kotou uaorai ei tamariki na te Atua. E aru iaia. E akariro ia koe uaorai ei tangata tupu no te katoatoa e ka aroa atu i toou tangata tupu. E na reira “kia apa kore oki kotou, mei to kotou Metua i te [rangi, NW] ra e apa kore.”’ (Mataio 5:45-48) Mei teaa ra te akaaoanga a te reira turanga kia akonoia! Mei teaa katoa oki te ngere i te tuatua tika te au tata tuatua e te au Pharisea ra!

20. Akapeea to Iesu kore anga i akatakake atu i te Ture a Mose, mari ra kua akapararauare atu e kua akaoonu atu i ta te reira ravenga e kua akanoo i te reira kia teitei atu te turanga?

²⁰ No reira i ta Iesu taiku anga i etai tuanga o te Ture e kua kapiti mai “Inara, te karanga atu nei au kia kotou,” kare tana i te kopae ke anga i te Ture a Mose e te monoanga ki etai mea ke. Kare, mari ra te akaoonu atura e te akapararauare atura i tona mana na te akaarianga i te vaerua te akakeu ra i te reira. E ture teitei atu tetai no te au taeake te akava ra i te tamou i te riri ei ta ua ia. Te akaapa ra te ture teitei no te tu ma, i te manakoanga akatupu i te inangaro e akaturi ia. Te akaapa ra te ture teitei no te akaipoipo i te kopaeanga no te tumu rikiriki ua e ei tumu ia no te taki atu ki te akaipoipo akaou e akaturi ra. Ko te ture teitei no te tuatua mou te akakite maira e e tau kore ua te au taputou taokiokiia ra. Ko te ture teitei no te aroa te akaue maira i te aroa tau i te Atua kare ra ona kotinga.

21. Eaa tei akakiteia mai e ta Iesu ra apiianga no te tu tuatua tika o te au rabi uaorai, e eaa katoa oki ta te au urupu ra ka kite?

²¹ Mei teaa ra te akatukia anga, a te reira au akamaroiroi anga kare ra i rongoia ana i mua ana, i te topa anga ki runga i te au taringa o te aronga tei akarongo atura i te reira no te taime mua ra! Kua akakite tikai ratou i te puapinga kore, o te tuatua tika pikikaa, tei rauka mai no te tuikaa anga a te au peu rabi ra! Inara i ta Iesu rave ua atu anga i tana Tuatua i te Maunga ra, kua tau te aronga tei pongi ra e tei kaki ra no te tuatua tika na te Atua kia apii papu e akapeea e raukai te reira, mei ta te tumu tuatua te aru mai nei e akakite.

Au Uianga Akamanako Akaou

◻ Eaa ra te au ngati Iuda i maani ei i ta ratou au peu tei tuatua uaia?

◻ Eaa te akatuke anga maata ta Iesu i akakite no te aronga tata tuatua ratou ko te au Pharisea ra i to te au tangata noa ua ra?

◻ Eaa te manakonako anga o te au tata tuatua e te au Pharisea kia raukai ia ratou te turanga tuatua tika ma te Atua ra?

◻ Eaa te mataara ta Iesu i akakite mai e ko te mataara no te kopae ke i te kanga akaturi e te akaturi katoa oki?

◻ Na te akakiteanga i te vaerua te turu ra i te Ture a Mose, eaa te au turanga teitei atu ta Iesu i akanoo maira?