Te Iero Vaerua Maata o Iehova

“E taunga maata to tatou, . . . e taunga no te ngai-tapu, i roto i te puakapa mou, ta te Atu i patia, kare ta te tangata.”​—EBERA 8:1, 2.

1. Eaa te apinga aroa ta te Atua i akanoo mai no te au tangata ara nei?

NO TE aroa maata o te Atua ko Iehova no te tangata nei, kua oronga mai i tetai atinga ei apai ke atu i te ara a to te ao. (Ioane 1:29; 3:16) Kua umuumuia e te reira te apai mai anga i te oraanga o tana Tamaiti anau mua mei te rangi mai ki te vairanga tamariki o tetai paretenia ko Maria te ingoa. Kua akataka meitaki atu te angera a Iehova kia Maria e ko te tamaiti ka nui ra aia “e tuatuaiaʼi oki tenana tamaiti tapu, i te Tamaiti na te Atua.” (Luka 1:34, 35) Kua akakiteia atu kia Iosepha momokoia ra kia Maria, te tu temeio o to Iesu ra vai anga ki roto i te kopu e kua kite e ka riro e “e akaora oki aia i tona au tangata i ta ratou ara.”​—Mataio 1:20, 21.

2. Eaa ta Iesu i rave i tona vaitata anga i te 30 mataiti, e no teaa ra?

² Ia Iesu e tupu akera, kua mou iaia etai o teianei au tika no runga i tona anau anga temeio. Kua kite aia e e angaanga akaora oraanga ta tona Metua nana kia rave i runga i te enua nei. No reira, ei tetai tangata kua pakari e vaitata i te 30 mataiti, kua aere mai a Iesu ki te peroveta a te Atua kia Ioane kia papetitoia i te Kauvai i Ioridana.​—Mareko 1:9; Luka 3:23.

3. (a) Eaa te aite anga o ta Iesu tuatua e, “Kare koe i inangaro i te tarangaara e te atinga ra”? (e) Eaa te akatauanga meitaki ta Iesu i akanoo mai no te aronga katoatoa te ka inangaro kia riro ei pipi nana?

³ Te pure ra a Iesu i te taime o tona ra papetito angaia. (Luka 3:21) Te akara anga, mei teia ngai atu i tona oraanga, kua akatupu aia i te au tuatua ia Salamo 40:6-8, mei tei akakiteia mai i muri akera e te apotetoro ko Paulo: “Kare koe i inangaro i te tarangaara e te atinga ra, e kopapa ra taau ïa i akono noku.” (Ebera 10:5) E no reira kua akakite a Iesu e kua marama aia e kare te Atua “i inangaro” i te au atinga manu kia oronga uaia i te iero i Ierusalema ra. Mari ra, kua kite aia e kua teateamamaoia e te Atua tetai kopapa tangata apa kore nona, no Iesu, kia oronga ei tetai atinga ra. Na teia e akaatea ke atu i tetai ua atu umuumu anga no te au atinga manu ra. I te akaarianga i tona anoano no tona ngakau mai kia kauraro ki to te Atua ra anoano, kua pure ua atu a Iesu: “I na, e taku Atua, te aere nei au e akatika i toou anoano, (kua tataia te tuatua noku ra i roto i te pokaikai tuatua ra).” (Ebera 10:7) Mei teaa ra tetai akatauanga meitaki roa no te maroiroi e te akamori noinoi kore ta Iesu i akanoo i taua ra ra no te aronga katoatoa te ka riro ei pipi nana i muri akera!​—Mareko 8:34.

4. Akapeea ta te Atua akakite anga i tona mareka anga no ta Iesu ra orongaanga iaia uaorai?

⁴ I akaari ainei te Atua i te mareka anga i ta Iesu ra pure no tona papetito anga? E tuku tatou na tetai o ta Iesu ra au apotetoro i iki e oronga mai kia tatou i te pauanga: “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te Vaerua o te Atua i te eke anga mai mei te kukupa, e te to anga mai ki rungao iaia: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.”​—Mataio 3:16, 17; Luka 3:21, 22.

5. Eaa tei akatutuia mai e te atarau tikai i te iero ra?

⁵ I to te Atua ra ariki anga i te oronga anga o te kopapa o Iesu ei atinga kua riro te aite anga e, na roto i tetai tu i te pae vaerua, kua akatuia mai tetai atarau maata atu i to roto i te iero i Ierusalema ra. Kua akaata mai te atarau kopapa te ngai i orongaia ra te au manu ei atinga i taua atarau vaerua ra, koia oki to te Atua “anoano” me kare akanoonoo anga no te arikianga i to Iesu oraanga tangata ei atinga. (Ebera 10:10) No reira i raukaʼi i te apotetoro ko Paulo kia tata ki tona au taeake Kerititiano e: “E atarau ta tatou, ko tei kore rava e tau i te aronga e akamori ki roto i te puakapa [me kare, iero] ra kia kai.” (Ebera 13:10) I etai atu au tuatua, ka puapingaia te au Kerititiano mou i tetai atinga tapokiangaara teitei roa atu, ta te maata anga o te au taunga ngati Iuda ra i kopae ke ra.

6. (a) Eaa tei tupu mai i te tuatau o to Iesu papetito angaia ra? (e) Eaa te aiteanga o te taoonga Mesia, me kare Karaiti ra?

⁶ I te akatainuanga o Iesu ma te vaerua tapu ra kua riro te aite anga e i teianei kua akamata te Atua i tana akanoonoo anga iero vaerua katoa ra, ma Iesu i te tavini anga ei Taunga Maata. (Angaanga 10:38; Ebera 5:5) Kua akauruia te pipi ko Luka ra kia tou papu mai i te mataiti o teia tupu anga meitaki e tae akera ki “te ngauru ma rima o te mataiti i te au o Kaisara Tiberio” ra. (Luka 3:1-3) Kua tau te reira ki te mataiti 29 T.N.​—tano tikai ki te 69 epetoma mataiti, me kare e 483 mataiti, mei te tuatau mai o ta te Ariki ko Aretekasaseta oronga anga i te akaue anga kia patu akaouia te au paruru o Ierusalema ra. (Nehemia 2:1, 5-8) Kia tau ki ta te totou ra, ka mama mai “te Mesia te Ariki ra” i taua mataiti akairoia ra. (Daniela 9:25) E manganui to te au ngati Iuda ra i kite i teia. Kua ripoti maira a Luka e “te tapapa ua ra te au tangata katoa” i te mama anga mai o te Mesia, me kare Karaiti, ko nga taoonga no nga tuatua Epera e te Ereni maira te aiteite ra te aiteanga, koia “tei akatainuia” ra.​—Luka 3:15.

7. (a) I naea te Atua i akatainu ei i “te Ngai Tapu Roa” ra, e eaa te aite anga o teia? (e) Eaa tetai atu tupu anga kia Iesu i te tuatau o tona papetito angaia ra?

⁷ I te tuatau o to Iesu ra papetito anga, kua akatainuia to te Atua ra ngai nooanga i te rangi, me kare kua akatakaia ei “te Ngai Tapu Roa” i te akanoonoo anga iero vaerua maata ra. (Daniela 9:24, NW) Kua tu mai “te puakapa mou [me kare, iero], ta Iehova i patia e kare ta te tangata.” (Ebera 8:2) Pera katoa oki, na tona papetito anga ma te vai e te vaerua tapu, kua anau akaouia te tangata ra ko Iesu Karaiti ei tetai Tamaiti vaerua na te Atua. (Akaaite ia Ioane 3:3.) Ko te aite anga o teia e kia tae ki te tuatau tau ka kapiki akaou te Atua ra i tana Tamaiti ki te oraanga i te rangi, te ngai e tavini ei aia i te rima katau o tona Metua ei Ariki e ei Taunga Maata “e tuatau ua atu, mei ia Melekizedeka ra.”​—Ebera 6:20; Salamo 110:1, 4.

Te Ngai Tapu Rava i te Rangi Ra

8. Eaa te au tu ou tei tupu i teianei ki te terono o te Atua i te rangi ra?

⁸ I te ra o to Iesu papetito anga, kua akaouia te au tu o te terono o te Atua i te rangi ra. Te akataka anga i tetai atinga tangata apa kore ua e tapoki anga no te au ara o te ao kua akaketaketa mai i to te Atua ra tu tapu i te tuke anga ma te tu ara o te tangata nei. Kua akakite maata katoaia oki to te Atua ra aroa ua i te mea kua akaari aia i teianei i tona rekareka anga kia akaauia, me kare kia akamarekaia. E no reira kua riro te terono o te Atua i te rangi ra mei te pia i roto roa o te iero ra, te ngai i tomo atura te taunga maata e okotai ua taime i te mataiti ma te toto manu ra no te tapoki i te ara na roto i tetai tu akatutu anga.

9. (a) Eaa tei akatutuia mai e te paruru i rotopu i te Ngai Tapu e te Ngai Tapu Rava ra? (e) I akapeea a Iesu i tomo ei ki roto roa o te paruru o te iero vaerua o te Atua ra?

⁹ Kua akatutu mai te paruru tei akataka ke i te Ngai Tapu mei te Ngai Tapu Rava ra i te kopapa kiko o Iesu ra. (Ebera 10:19, 20) Ko te reira te arai tei arai ra kia kore a Iesu e tomo atu ki mua tikai i te aroaro o tona Metua iaia e tangata ra i runga i te enua. (1 Korinetia 15:50) I te tuatau o to Iesu matenga ra, “kua ngae iora te paruru o te nao ra, mei runga mai e raro rava.” (Mataio 27:51) Na teia i akakite tika mai e kua akaateaia te arai tei arai ra kia kore a Iesu e tomo atu ki te rangi. E toru ra i muri akera, kua rave te Atua ko Iehova i tetai temeio meitaki. Kua akatu mai aia ia Iesu mei te mate mai, kare ei tetai tangata matemate ua e kiko e te toto, mari ra ei tetai mea ora vaerua kaka “e tika i te noo anga e tuatau ua atu.” (Ebera 7:24) E a ngauru ra i muri akera, kua kake atu a Iesu ki te rangi e kua tomo atu ki te “Ngai Tapu Roa” tikai, “kia akakite aia iaia uaorai ki mua i te aroaro o te Atua no tatou i teianei rai.”​—Ebera 9:24.

10. (a) Eaa tei tupu i muri ake i ta Iesu ra oronga anga i te puapinga o tona atinga ki tona Metua i te rangi ra? (e) Eaa te aiteanga o te akatainuanga ma te vaerua tapu no te au pipi a Karaiti ra?

¹⁰ I ariki ainei te Atua i te puapinga o to Iesu ra toto tei akamaringiia ei tapoki anga i te au ara o te ao? E tika rava kua pera aia. Kua rauka mai te akapapu anga i teia e 50 ra i muri tika mai i to Iesu tuakaouanga ra, i te ra oroa o Penetekote. Kua riringiia mai te vaerua tapu o te Atua ki rungao i ta Iesu au pipi e 120 tei akaputu atura i Ierusalema. (Angaanga 2:1, 4, 33) Mei to ratou Taunga Maata ra, ia Iesu Karaiti, kua akatainuia ratou i teianei kia tavini “ei kau taunga tapu, ei apai i te atinga vaerua” i raro ake i te akanoonoo anga o to te Atua ra iero vaerua maata. (1 Petero 2:5) Pera katoa oki, kua riro teia aronga akatainuia ra ei tetai iti tangata ou, ei “iti-tangata tapu” no te Atua no te Iseraela vaerua. Mei reira mairai, pouroa te au totou no te au mea memeitaki no Iseraela, mei te “koreromotu ou” ra te taputou tei tataia ia Ieremia 31:31, ka piri atu te reira ki te putuputuanga Kerititiano akatainuia ra, koia te “Iseraela o te Atua” tikai.​—1 Petero 2:9; Galatia 6:16.

Etai atu Au Tu o te Iero Vaerua o te Atua

11, 12. (a) Eaa tei akatutuia maira e te paepae o te kau taunga i to Iesu tu ra, e eaa ia te tu o tana au pipi akatainuia ra? (e) Eaa te akatutuia maira e te ariki vai maata ra, e akapeea te taangaanga angaia te reira ra?

¹¹ Noatu rai i akatutu mai te Ngai Tapu Rava i “te rangi mou ra,” te ngai o to te Atua terono ra, pouroa etai atu tu o te iero vaerua o te Atua ra te akakiteia maira i te au apinga i runga i te enua nei. (Ebera 9:24) I te iero i Ierusalema ra, e paepae tetai i roto no te kau taunga e atarau tona no te atinga e tetai ariki maata no te vai, te ngai tama anga no te kau taunga ia ratou uaorai i mua ake i te raveanga i te angaanga tapu ra. Eaa ta teia au apinga i akatutu maira i ta te Atua akanoonoo anga iero vaerua ra?

¹² No to Iesu Karaiti tu, kua akatutu mai te paepae kau taunga i roto ra i tona tu ara kore ei tetai Tamaiti tangata apa kore ua na te Atua. Na te akonoanga i te akarongo i te atinga o Iesu, kua tutakiia te au pipi akatainuia a Karaiti ma te tuatua tika. E no reira, ka rauka tikai i te Atua te akono ia ratou mei te mea rai e aronga ara kore ratou. (Roma 5:1; 8:1, 33) No reira, kua akatutu katoa mai teia paepae i te tu tangata tuatua tika tutakiia te rekarekaia ra e te au mema tataki tai o te kau taunga tapu ki mua i te Atua ra. I taua tuatau rai, te vai apa ua ra te au Kerititiano akatainuia e ka rauka ua kia rave i te ara. Te ariki vai maata i te paepae ra te akatutu maira i te Tuatua a te Atua, ta te Taunga Maata e akono ra ei tama marie i te kau taunga tapu ra. Na te kauraro anga ki teia rave tamaanga, kua rauka ia ratou tetai akara anga meitaki tei akangateitei ra i te Atua e te akavaitata atura i te au tangata o vao ake ki tona akamori anga ma.​—Ephesia 5:25, 26; akaaite ia Malaki 3:1-3.

Te Ngai Tapu

13, 14. (a) Eaa ta te Ngai Tapu o te iero ra i akatutu mai no Iesu e tana au pipi akatainuia ra? (e) Eaa ta te tu anga ramepa auro i akatutu maira?

¹³ Te tuanga mua o te iero te akatutu maira i tetai turanga teitei ake i to te paepae ra. I te tuanga no te tangata apa kore ua ra no Iesu Karaiti, te akatutu maira i tona anau akaou anga ei tamaiti Vaerua na te Atua tei papa ra kia oki akaou ki te oraanga i te rangi. I muri ake i te akatika angaia ei aronga tuatua tika kua tupu katoa oki teia angaanga taka ke a te vaerua o te Atua ki teia aronga pipi akatainuia ra. (Roma 8:14-17) Na “te vai [koia oki, to ratou papetito anga] e te Vaerua,” kua “anau akaouia” ratou ei tamariki vaerua na te Atua. Ei pera, tei ia ratou te manakonako anga kia akatuakaouia ki te oraanga i te rangi ei tamariki vaerua na te Atua, kia vai tiratiratu ra ratou tae roa ki te matenga.​—Ioane 3:5, 7; Apokalupo 2:10.

¹⁴ Te kau taunga tei tavini ra ki roto i te Ngai Tapu o te iero i te enua nei kare i akaraia atu e te aronga akamori i vao ra. Pera katoa, te kite ra te au Kerititiano akatainuia i tetai turanga vaerua kare ra i kapitiia atu me kare i kite meitakiia e te maata anga o te aronga akamori i te Atua ra, no ratou ra te manakonako anga kia ora e tuatau ua atu ki runga i tetai enua parataito. Te akatutu maira te tu anga auro o te ramepa i te tapenakara ra i te tu akamaramaia o te au Kerititiano akatainuia ra. Te angaanga a te vaerua tapu o te Atua, mei te inu i roto i te au ramepa ra, te akaka maira i te marama ki runga i te Pipiria. Te kite maramaanga te rauka ra i te au Kerititiano ei tupu anga, kare ratou e tapu kia ratou uaorai. Kareka ra, te akarongo ra ratou ia Iesu, tei tuatua ra: “Ko kotou te mārama o te ao nei. . . . Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.”​—Mataio 5:14, 16.

15. Eaa te akatutuia maira e te varaoa i runga i te kaingakai varaoa aroaro ra?

¹⁵ Kia vai tamou ei ki roto i teia turanga akamaramaia, ka tika te au Kerititiano akatainuia kia kaikai putuputu i tei akatutuia mai e te varaoa i runga i te kaingakai o te varaoa aroaro ra. Ta ratou tumu maata no te kaikai vaerua ko te Tuatua a te Atua ia, ta ratou e tauta ra kia tatau e kia tamanako i te au ra tataki tai. Kua taputou katoa a Iesu kia tua atu “i te kai na ratou i te ora mou ra” na roto i tona “tavini akono meitaki e te pakari.” (Mataio 24:45) Ko teia “tavini” ko te pupu katoa ia o te au Kerititiano akatainuia ra i runga i te enua nei i tetai ua atu tuatau akatakaia. Kua taangaanga a Karaiti i teianei pupu akatainuia kia nenei i te akakite anga no runga i te tupu anga o te au totou Pipiria e kia oronga i te arataki anga tau no runga i te aite anga o te au kaveinga Pipiria no te oraanga i te au ra tataki tai i teia tuatau nei. No reira, ka kaikai ariki ua te au Kerititiano akatainuia i taua au kai vaerua katoa ra. Inara ko te akamatutu anga i to ratou oraanga vaerua tei runga ia i te tere atu i te tuku anga anake i te kite i te Atua ki roto i to ratou manako e te ngakau. Kua tuatua a Iesu: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Mei te reira katoa oki, te kite ra te au Kerititiano akatainuia i te merengo anga na te akonoanga ratou uaorai i te raveanga i to te Atua ra anoano akakiteia mai i te au ra tataki tai ra.

16. Eaa te akatutuia maira e te angaanga i te atarau o te rakau kakara ra?

¹⁶ I te popongi e i te aiai, kua oronga tetai taunga i te atinga akakakara ki rungao i te atarau akakakara i te Ngai Tapu ra. I taua tuatau rai, ka pure te aronga akamori kare no te kau taunga ki te Atua ia ratou e tu ra i te paepae o vao o tona iero. (Luka 1:8-10) “Te rakau kakara,” te akataka maira te Pipiria e, “koia te pure a te aronga tapu ra.” (Apokalupo 5:8) “Kia ana atu taku pure ki mua ia koe mei te atinga kakara ra,” ta te tata taramo ko Davida i tata. (Salamo 141:2) Te akaperepere katoa ra te au Kerititiano akatainuia ra i to ratou tika no te akavaitata atu kia Iehova i te pure na roto ia Iesu Karaiti ra. Te aite ra te pure akatenga no te ngakau maira mei te aunga kakara ra. Te akapaapaa katoa ra te au Kerititiano akatainuia i te Atua na etai atu mataara, na te taangaanga i to ratou vaa kia apii ia etai ke atura. To ratou akakoromaki anga i te au tu ngata e to ratou tiratiratu i raro ake i te timataanga e mea marekaanga taka ke ia ki te Atua.​—1 Petero 2:20, 21.

17. Eaa te o atura ki te akatupu anga o te tutu totou tei akakiteia maira na te tomo anga mua o te taunga maata ki roto i te Ngai Tapu Rava i te Ra Tapokiangaara ra?

¹⁷ I te Ra Tapokiangaara, kua tomo atu te taunga maata o Iseraela ki roto i te Ngai Tapu Rava e kua tutungi i te akakakara ki runga i tetai ariki auro ma te ai ngarau. Kua raveia teia i mua ake i tana apai mai anga i te toto atinga no te ara. I te akatupu anga i teia tutu totou anga, kua tamou marie te tangata ra ko Iesu i tona tiratiratu ki te Atua ko Iehova i mua ake i te orongaanga i tona oraanga ei tetai atinga mutu kore no to tatou au ara. E no reira kua akakite aia e ka rauka i tetai tangata apa kore ua kia tamou marie i tona tiratiratu ki te Atua ra noatu eaa te taomi anga ta Satani te ka apai mai ki runga iaia ra. (Maseli 27:11) I te tuku anga kia timataia, kua pure a Iesu “ma te aue maata e te roi-mata i Tei tika kia akaora iaia mei te mate maira, e i akarongoia aia i tana i mataku ra.” (Ebera 5:7) Na roto i teia mataara kua akakaka aia ia Iehova ei te Ngateitei tuatua tika e te tau tikai o te ao katoa e pini ua ake. Kua tutaki atu te Atua ia Iesu na te akatuakaouanga iaia mei te mate mai ki te oraanga mate kore i te rangi ra. I roto i teia turanga teitei, kua akamanako atu a Iesu ki te rua o tona tumu i aere mai ei ki te enua nei, koia oki, kia akaongi i te au tangata tataraara i ta ratou ara ma te Atua ra.​—Ebera 4:14-16.

Te Kaka Maata Rava Atu o to te Atua ra Iero Vaerua

18. Akapeea ta Iehova apai mai anga i te kaka meitaki roa ki tona iero vaerua ra?

¹⁸ “Te kakā o teianei are openga, e maata ïa i to tei muatangana ra,” ta Iehova i totou mai. (Hagai 2:9) Na te akatuakaouanga ia Iesu ei tetai Ariki mate kore e ei Taunga Maata, kua apai mai a Iehova i te kaka meitaki ki tona iero vaerua. Kua tau to Iesu turanga i teianei kia apai mai i “te ora mutu kore no te aronga katoa e akarongo iaia ra.” (Ebera 5:9) Te aronga mua tei akaari i taua tu akarongo ra ko te 120 au pipi tei rauka ra ia ratou te vaerua tapu ia Penetekote 33 T.N. Kua akakiteia mai i te puka o Apokalupo e ko teia au tamariki vaerua o Iseraela e 144,000 te katoa. (Apokalupo 7:4) Kia mate ratou, e manganui io ratou ra ka takoto kite kore ua i roto i te vaarua tanumanga o te tangata nei, ma te tatarianga i te tuatau no to Iesu parutia i te mana ei ariki. Kua tou mai te totou akapapa anga ia Daniela 4:10-17, 20-27 ki te 1914 ei te tuatau e akamataʼi a Iesu i te tutaraanga i rotopu i tona au enemi. (Salamo 110:2) No etai rau ngauru mataiti i mua ake, kua tatari matariki te au Kerititiano akatainuia i taua mataiti ra. Na te tamaki mua o te ao e te au mate tei kapitiia mai ki te tangata i akapapu mai e kua akaterono tikaia mai a Iesu ei Ariki i te 1914. (Mataio 24:3, 7, 8) E poto ua i muri maira, kua tae te tuatau no “te akavaanga kia akamataia ma te are o te Atua ra,” ka akatupu a Iesu i te taputou ki tana au pipi akatainuia tei moe ra i te mate: “Ka oki mai au, e arataki ia kotou ki oku ra; ei reira katoa kotou.”​—1 Petero 4:17, NW; Ioane 14:3.

19. Ka akapeea te toenga o te 144,000 ra e tae ei ki te Ngai Tapu Rava i te rangi ra?

¹⁹ Kare i oti ake te 144,000 au mema o te kau taunga tapu ra i te akairoia e te akaputuia ki to ratou kainga i te rangi ra. E toenga to ratou te ora nei i te enua nei i te tu vaerua tei akatutuia mai e te Ngai Tapu, te taka ke ra i to te Atua ngai tapu na te “paruru,” me kare arai, no to ratou kopapa kiko ra. Me mate atu teia aronga ma te tiratiratu, kua akatuakaou puia ratou ei au mea ora vaerua mate kore kia kapitiia atu ki te aronga o taua 144,000 kua tae ke ana ki te rangi ra.​—1 Korinetia 15:51-53.

20. Eaa te angaanga puapinga maata ta te toenga o te kau taunga tapu e rave nei i teia tuatau nei, e eaa te au tupu anga?

²⁰ Ma taua kau taunga e manganui te tavini kapiti ra ma te Taunga Maata ra i te rangi, kua rauka kia maata atu te kaka o te iero vaerua o te Atua ra. I teianei, te rave nei te toenga o te kau taunga tapu ra i tetai angaanga puapinga maata i te enua nei. Na roto i ta ratou tutuanga te ‘akangaueueia ra te au enua katoa’ e te Atua ma te au akakite anga i tana au akavaanga, mei tei akakiteia maira ia Hagai 2:7. I taua taime rai, e au mirioni ua atu te aronga akamori tei akatakaia maira ei “tei inangaroia e te au enua katoa ra” te aere maira ki te paepae i te enua nei o te iero o Iehova ra. Akapeea teia aronga e o atu ei ki roto i ta te Atua akanoonoo anga no te akamori, e eaa te kaka no te tuatau ki mua ka tau tatou kia tapapa atu no tona iero vaerua maata ra? Ka akara matatioia teia nga uianga i te atikara i muri akenei.

Au Uianga Akamanako Akaou

◻ Eaa te akatauanga meitaki ta Iesu i akanoo mai i te 29 T.N.?

◻ Eaa te akanoonoo anga tei akamataia i te 29 T.N.?

◻ Eaa tei akatutuia maira e te Ngai Tapu e te Ngai Tapu Rava?

◻ Akapeea te iero vaerua maata ra i te akakaka angaia?

[Tutu i te kapi 17]

I to Iesu akatainu angaia ma te vaerua tapu i te 29 T.N., kua akamata to te Atua ra iero vaerua maata i te taangaangaia