Te Vaitata Maira te Rapakauanga Temeio o te Au Tangata

“TEIA ua nei rai i kiteaʼi e matou teianei ravenga.” I karangaʼi te aronga tei kite mata i ta Iesu rapakauanga temeio e te viviki i tetai tangata ngoru. (Mareko 2:12) Kua rapakau katoa a Iesu i te matapo, te murare, e te pirikoki, e kua pera katoa tana au pipi. Noai te ririnui i rave ei a Iesu i te reira? Eaa ta te akarongo tuanga i roto i teia? Eaa te marama anga ta teia au kite anga anere mataiti mua e akaari maira no runga i te rapakauanga temeio i teia tuatau?​—Mataio 15:30, 31.

“Kua Ora Koe i Toou Akarongo”

E reka ana te aronga rapakau akarongo i teia tuatau i te tuatua i ta Iesu tuatua ki tetai vaine e 12 mataiti te mate ua anga i te atekeria tei aere mai kiaia no te rapakau anga: “Kua ora koe i toou akarongo.” (Luka 8:43-48) Te akakite maira ainei ta Iesu tuatua e tei runga ua i tona akarongo e rapakauiaʼi aia? E akaraanga ainei te reira o te “rapakauanga akarongo” tei aite ki tei raveia i teia tuatau?

Me tatau meitaki tatou i te papaanga Pipiria, ka kite tatou i te maata o te au atianga kare rava a Iesu e tana au pipi i umuumu ana e kia akakite tei maki ra i tona akarongo i mua ake ka rapakauiaʼi. Te vaine i taikuia i runga ake nei, kua aere mai aia, ma te kore i tuatua kia Iesu, kua amiri maru ua i tona kakau na muri mai “e mao iora tona atekeria i reira.” I tetai atu ati anga, kua rapakau a Iesu i tetai tangata i rotopu i te aronga tei aere mai i te tapeka iaia. Kua rapakau katoa aia i tetai tangata kare aia i kite koai a Iesu.​—Luka 22:50, 51; Ioane 5:5-9, 13; 9:24-34.

Eaa i reira ta te akarongo tuanga i roto i teia? Ia Iesu e tana au pipi i roto i te tapere o Turia e Sidona, kua aere mai tetai vaine Phenia e kua kapiki mai: “E te Atu, e te Tamaiti a Davida, e aroa mai koe iaku! kua maata te mate o taku tamaine i tetai demoni.” Ka akamanako ana i tona taitaia i tona pati anga: “E te Atu, turu mai koe iaku!” Ma te tu tangi, kua pau atu a Iesu: “E maine, e akarongo maata toou: ko taau i inangaro ra, kia akaperaia koe.” E kua rapakauia tana tamaine “i reira ra.” (Mataio 15:21-28) Ma te taka meitaki, kua o mai te akarongo, inara toai akarongo? Kia marama e no te metua vaine te akarongo ta Iesu i akapaapaa kare no te tamaine maki ra. E e akarongo ki roto i teaa? Na te tuatua anga ia Iesu ko “te Atu, e te Tamaiti a Davida,” te akatika atea ra te vaine e ko Iesu te Mesia tei taputouia. Kare na tetai akarongo ngoie ua ki roto i te Atua me kore te akarongo ki roto i te ririnui o tei rapakau ra. I to Iesu tuatua anga, “Kua ora koe i toou akarongo,” tana aite anga me kare e akarongo ki roto iaia ei Mesia, kare rai taua aronga maki e aere mai kiaia kia rapakauia.

Mei teia au akaraanga Tuatua Tapu, te kite nei tatou e tuke rava atu te rapakauanga tei raveia e Iesu i tei matauia i te kitea me kore i te karangaia i teia tuatau. Kare e akaariari anga manako ngakau ketaketa​—te aoaanga, te amuanga, te apareanga, te matapoirianga, e te vai atura​—mei te urupu tangata e kare o Iesu tu putakaiti maata. Pera katoa, kare rava a Iesu i autu kore ana i te rapakau i te aronga apikepike te akamanako anga e kare o ratou akarongo me kore ra kare ta ratou moni i rava no te oronga mai.

Rapakau Anga na te Ririnui o te Atua

Akapeea te au rapakauanga a Iesu e tana au pipi i te tupu anga? Te pau ra te Pipiria “e tei reira te mana o te Atu i te akaora ia ratou.” (Luka 5:17) I muri ake i tetai rapakauanga, i karangaʼi a Luka 9:43, “kua umere anake atura ratou i te mana maata o te Atua.” Ma te tau i reira, kare a Iesu i apai ana i te paapaa anga kiaia uaorai ei tangata rapakau. I tetai ati anga kua akakite aia ki tetai tangata tana i akarangatira ra mei te tamanata anga a te temoni: “Ka aere i to ngutuare i toou au taeake, e akakite atu kia ratou i taua mea maata ta te Atua i rave io nei i te aroa ia koe.”​—Mareko 5:19.

I te mea kua rapakau a Iesu e te au apotetoro na te mana ririnui o te Atua, e ngoie ua i te kite te tumu i kore ei te akarongo e anoano uaia no te rapakauanga i te tangata e rapakauia ra. Inara, kua anoanoia te akarongo ketaketa i te tangata rapakau ra. No reira, i te kore anga e rauka i te au pipi a Iesu i te tuaru i tetai temoni ririnui tikai, kua akakite a Iesu kia ratou te tumu: “No to kotou akarongo kore.”​—Mataio 17:20.

Te Akakoro Anga o te Rapakau Anga Temeio

Noatu e maata ta Iesu rapakauanga i rave i tana angaanga orometua katoatoa i te enua, kare aia e aruaru tikai ra i tetai ‘angaanga orometua rapakau anga.’ Tona rapakau anga temeio​—kare aia i tiati ana i te au tangata e kare aia i ariki ana i tetai ua atu moni tauturu​—e tuanga rua te reira ki tona akakoro anga maata, koia oki “te ako anga i te evangelia o te basileia.” (Mataio 9:35) Te karanga ra te papaanga e i tetai ati anga “kua kapo atura aia ia ratou, tuatua maira kia ratou no te basileia o te Atua, e akaora akera i te aronga maki.” (Luka 9:11) I roto i te au papaanga Evangeria, kua tuatua putuputuia a Iesu e ko te “Orometua” inara kare rava ei “Tangata Rapakau.”

Eaa, i reira, a Iesu i rave ei i te au rapakau anga temeio? Te tumu maata ei akatumu i tona akataka anga ei Mesia tei taputouia. I te tapeka angaia a Ioane Papetito ma te tika kore, kua inangaro aia i te akapapu anga e kua akatupu aia i ta te Atua i tuku iaia kia rave. Kua tono aia i tana uaorai au pipi kia Iesu kia ui: “Ko koe aina te tae mai, e ko tetai ke ainei ta tatou e tapapa atu?” Ka akara ana i ta Iesu i akakite ki te au pipi a Ioane: “Ka aere, ka akakite atu kia Ioane i te au mea ta korua e akarongo nei, e ta korua e akara nei: Te rauka nei te kite i te matapo, kua aere te pirikoki, kua tamāia te lepera, kua akarongo te taringa turi, kua akatuia tei mate, e kua tuatuaia atu te evangelia ki te tangata rikiriki.”​—Mataio 11:2-5.

Ae, te tika e kua rave a Iesu kare anake te rapakauanga mari katoa ra tetai atu au angaanga temeio tei tataia i roto i te au Evangeria kua akatumu papu i tona akataka anga e ko ‘tei tae mai,’ te Mesia tei taputouia. Kare e anoanoia kia ‘tapapaia atu tetai ke.’

Te Au Rapakau Anga Temeio i Teia Tuatau?

Ka tau ainei tatou i reira, kia tapapa atu i te Atua kia akapapu mai i tona ririnui i teia tuatau na roto i te rapakau anga? Kare. Ma te au angaanga temeio tana i rave na roto i te ririnui o te Atua, kua akatumu a Iesu ma te ekoko koreia e koia te Mesia ta te Atua i taputou e ka aere mai. Kua tataia ta Iesu au angaanga ririnui i roto i te Pipiria no te katoatoa kia tatau. Kare te Atua e anoanoia kia akapapu i tona ririnui na te ripitianga i taua au angaanga ki te au uki tangata katoatoa.

Ma te tau, kua riro te au rapakau anga e tetai atu au angaanga temeio ei akakeu anga papu rai. Kare katoa etai aronga tei kite mata i ta Iesu au temeio i irinaki ana e tei iaia te turuanga a tona Metua i te rangi. “Rave ua atu rai aia i te akairo e manganui ua atu i mua i to ratou aroaro, kare akerai ratou i akarongo iaia.” (Ioane 12:37) Ko te tumu ia, i muri ake i te uriurianga i te au apinga aroa temeio tukeke​—te totouanga, te tuatua i te au reo ke ke, te rapakauanga, e te vai atura​—ta te Atua i oronga ki te au mema tukeke o te putuputuanga Kerititiano anere mataiti mua, kua akauruia te apotetoro Paulo kia tuatua: “Kareka te au totou ra, e kore ïa; kareka te tuatua ke ke ra, e kore ïa; kareka te kite ra, e akakoreia te reira. Te kite papaki tai ua nei tatou, e te totou papaki tai nei. Kia tae ra ki te mea tika tikai ra, ei reira te mea papaki tai ua ra, e akakoreiaʼi.”​—1 Korinetia 12:28-31; 13:8-10.

E tika, te raukaanga te akarongo i roto i te Atua e puapinga ia no tatou. Inara, na te akanoo anga i to tetai akarongo ki roto i te au taputou pikikaa o te au rapakau anga ka arataki anake ki te apiapi anga. Pera katoa, i teia tuatau openga, te oronga ra a Iesu i teia akamatakiteanga: “E au Mesia pikikaa oki te ka tu mai ki runga, e te peroveta pikikaa, e ka akakite mai i te akairo e te au ravenga mamaata; e tae ua atu te vare i te aronga i ikiia ra, naringa e tika.” (Mataio 24:24) I te pae i te aronga akamea ua i te rapakau e te aronga pikikaa, ka tupu katoa te au akaari anga o te ririnui temoni. Te ka tupu, te au rongo o te tupu anga akataka koreia kare ia e riro ei mea poitirere kia tatou, e kare teia i te tumu no te akarongo tae tikai i roto i te Atua.

I te mea kare e tangata okotai i teia tuatau e rave ana i te au rapakau anga mei ta Iesu i rave, kua puapinga kore ainei tatou? Kare roa. Te aronga tikai ta Iesu i rapakau ka roko akaouia e te maki a muri ake. Kua ruaine katoatoa ratou e kua mate atu. Te au puapinga anga rapakau ta ratou i rauka kua poto ua te reira. Inara, e aite anga puapinga tikai to te au rapakau anga temeio a Iesu no te mea kua akaata ratou i te au akameitakianga a te tuatau ki mua.

No reira, i muri ake i te akara matatio anga i te Tuatua na te Atua, koia te Pipiria, kare a Alexandre e Benedita, tei taikuia i mua, i tuku akaou i to raua akarongo ki roto i te au rapakauanga akarongo e te purepure o teia tuatau. I taua taime rai, kua papu ia raua e kare te au rapakauanga temeio i te au mea o te tuatau i topa. Eaa ra? Mei te au mirioni ua atu i te ao katoa, te akara ra raua ki mua ki te au akameitakianga rapakauanga i raro ake i te Patireia o te Atua.​—Mataio 6:10.

Kare Akaou e Maki e te Mate

Mei ta tatou i kite i mua ake nei, te akakoro anga tikai o ta Iesu angaanga orometua kare no te rapakau i te maki e te rave i tetai atu au temeio. Mari ra, kua akariro aia i te tuatua aere anga i te tuatua meitaki o te Patireia o te Atua ei angaanga tumu tikai nana. (Mataio 9:35; Luka 4:43; 8:1) Ko te Patireia ta te Atua ravenga no te akatupu i te rapakauanga temeio o te tangata e te akakore atu i te kino ravarai ta te ara e te tu apa ua i akatupu ei takino i te pamiri tangata. Akapeea e aea aia e akatupu ei i teia?

Te akara anga ma te au anere mataiti ki mua, kua oronga a Iesu Karaiti i tetai orama totou ki tana apotetoro ko Ioane: “Teia mai nei te ora, e te maroiroi, e te basileia, o to tatou Atua, e te mana o tana Mesia.” (Apokalupo 12:10) Te akaari maira te au akakite anga tika e mei te 1914 mai kua tiriaia mai tei patoi maata i te Atua, ko Satani, ki te enua nei, e te angaanga tikai ra te Patireia i teianei! Kua akanooia a Iesu ei Ariki no te Patireia Mesia e te papa ra i teianei no te rave i te au taui anga maata i te enua nei.

I te tuatau vaitata tikai i mua, ka tutara to Iesu kavamani i te rangi ki rungao i tetai taiate tangata ou e te tuatua tika, koia tikai “te enua ou.” (2 Petero 3:13) Mei teaa i reira te tu o te au turanga a te reira taime? Teia tetai akara anga kaka ki mua: “E kite atura au i te rangi ou e te enua, kua kore oki tei muatangana rangi e tei muatangana enua . . . E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:1, 4.

Ka rauka ainei ia koe i te akamanako e mei teaa te tu o te oraanga me tupu mai te rapakauanga temeio o te tangata ei mea tika? “Kare oki to reira e karanga e, Kua maki au: te au tangata e noo i reira, kua apai keia ta ratou ara.” Ae, ka akatupu te Atua i tei kare rava e rauka i te aronga rapakau akarongo i te rave. “Nana e akakore rava i te mate e tuatau ua atu.” E tikai, “na te Atu ra na Iehova e orei i te roi-mata i te au mata ravarai.”​—Isaia 25:8; 33:24.

[Tutu i te kapi 7]

I raro ake i to te Atua Patireia ka rapakau temeioia te au tangata