Te Ariki ra Ainei Koe i ta te Atua i Rave?

“Kia inangaro te tangata i te aru mai iaku ra, e akaruke aia iaia uaorai, ka apai ei i tona rakau tamamaeanga i tera ra i tera ra, ka aru tamou mai ei iaku.”​—LUKA 9:23, “NW.”

1. Eaa etai au apinga aroa meitaki ta te Atua ra i oronga mai?

E KAIOU to tatou oraanga ki te Atua. Naringa kare aia i anga mai i te tangata, kare tatou i anauia mai i reira. Inara e maata atu ta te Atua i anga mai i te oraanga anake ua. Kua anga mai aia ia tatou kia rauka te rekareka ia tatou i te au mea e manganui: te reka o te kai, te maana o te ra, te tangitangi o te apinga akatangi imene, te meitaki o te reva o te ra tupuanga rakau, te maru o te aroa. E tere katoa atu, kua oronga mai te Atua i te manako no tatou e te anoano kia kite iaia. Kua akauru aia i te Puka Tapu, tei oronga maira i te aratakianga tau, te akakite maira kia tatou e akapeea e mataoraʼi te ora anga, e kua oronga katoa mai i te manakonakoanga no te oraanga e tuatau ua atu i tana ao ou no te tuatua tika ra. Kua oronga katoa mai te Atua i tona vaerua tapu, te turu anga a te putuputuanga i to tatou ngai, te aroa o te au tane e te au vaine pakari te ka tauturu ia tatou kia vai maroiroi i tana angaanga ra.​—Genese 1:1, 26-28; 2 Timoteo 3:15-17; Ebera 10:24, 25; Iakobo 5:14, 15.

2. (a) Eaa te apinga maata rava ta te Atua i rave no tatou nei? (e) Ka rauka ainei ia tatou te rave e au angaanga ei tutaki no te ora?

² Kapiti atu ki te reira mea katoatoa, e kua tono mai te Atua i tana uaorai Tamaiti anau mua kia akakite mai kia tatou e maata te au apinga ta te Metua e tapapa maira mei ia tatou nei e kua oronga mai i te “tataraanga na te oko” no te aronga ravarai te ka ariki i te reira. (Ephesia 1:7, NW; Roma 5:18) Kua karanga taua tamaiti ra, a Iesu Mesia e: “Kua aroa mai te Atua i teianei ao, e tae rava ki tona oronga anga mai i tana Tamaiti anau tai, kia kore e mate te irinaki ki roto iaia, mari ra kia rauka te ora mutu kore.” (Ioane 3:16, King James Version) Te ora te ka rauka mai no te reira oko e puapinga maata rava ia e kare e mataara e raukai i tetai i te rave i te angaanga ei tutaki i te reira, e mea papu rava oki e kare a te au angaanga mua i raveia ra i raro ake i te Ture a Mose ra. No reira, a Paulo i tataʼi e: “Kare ua te tangata e tika i te angaanga a te ture, i te akarongo ra ia Iesu Mesia.”​—Galatia 2:16; Roma 3:20-24.

Akarongo e te au Angaanga

3. Eaa ta Iakobo i tuatua no te akarongo e te au angaanga?

³ Ka rauka mai te ora i te akarongo, inara ka tau te akarongo e te arikianga no ta te Atua au mea katoatoa i rave kia akakeu ia tatou kia angaanga. Ka tau ia kia opara ia tatou kia rave i te au mea te akaari ra i to ratou akarongo. Kua tata a Iakobo ka akateina a Iesu e: “Te akarongo, kare e angaanga, e mea mate katoa ïa.” Kua karanga katoa aia: “Ka akakite mai ana i toou akarongo kare e angaanga ra, ka akakite atu ei au ia koe i toku nei akarongo i taku nei angaanga.” Kua tou atura Iakobo e noatu ko te au temoni “kua akarongo e kua rurutakina,” inara e mea papu e kare te au temoni ra e rave i te angaanga e tau i te Atua ra. I tetai pae, ko Aberahama, e akarongo tona e te au angaanga katoa oki. “Kua aere kapiti tona akarongo ma tana au angaanga e na tana au angaanga i tika ravaʼi tona akarongo.” (NW) Kua taiku akaou ra a Iakobo e: “Te akarongo kare e angaanga ra, e mea mate katoa ïa.”​—Iakobo 2:17-26.

4. Eaa ta Iesu i tuatua te ka tau kia rave te aronga tei anoano kia aru iaia ra?

⁴ Kua akakite katoa a Iesu i te puapinga o te au angaanga tika ra, i te na ko anga: “Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te [rangi, NW] ra.” “Kia inangaro te tangata i te aru mai iaku ra, e akaruke aia iaia uaorai,a ka apai ei i tona rakau tamamaeanga i tera ra i tera ra, ka aru tamou mai ei iaku.” Me “akaruke” tatou ia tatou uaorai ka akakore tatou i te manganui i ta tatou i iki no te mataara o te oraanga. Kua kite tatou e e kaiou na tatou ki te Atua ra te au mea ravarai nei, no reira ka oronga tatou ia tatou uaorai kiaia ei tavini nona, ma te kimianga kia kite e akapeea te rave i tona ra anoano, mei ta Iesu i rave ra.​—Mataio 5:16; Luka 9:23, NW; Ioane 6:38.

Te Akatukeia Anga ki te au Oraanga

5. (a) Eaa ta Petero i akakite te ka tau kia akatupuia ki to tatou tu oraanga? (e) Eaa te au angaanga meitaki tana i akaue mai?

⁵ Kua tou maira a Petero e ko te “toto apinga maata” o te Mesia ra, tei orongaia mai no tatou, e maata rava atu tona puapinga e ka tau to tatou manako ariki i te reira kia kiteaia i to tatou mataara e te oraanga katoa ra. Kua akapapa maira te apotetoro i te au mea e manganui te ka tau to tatou manako ariki kia opara ia tatou kia rave. Kua ako maira aia: “E kopae rava atu i te ravenga kikino katoa.” (NW) “Kia kaki tikai i te u iro koreia ra.” (NW) “Kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra.” “E kopae i te kino, e rave i te meitaki.” “Kia akakite atu ki te tangata katoa e ui mai ia kotou i te manako i roto ia kotou na.” “Kia kore [koe] e noo i te toenga o [toou] manga tuatau i te kopapa nei ma te akono i te anoano o te tangata, ma te akono ra i te inangaro o te Atua.”​—1 Petero 1:19; 2:1, 2, 9; 3:11, 15; 4:2.

6. (a) I akapeea te akakite anga a te au Kerititiano o te anere mataiti mua ra i to ratou akarongo? (e) Eaa te akaraanga ta te reira i akanoo mai no tatou?

⁶ I akono te au Kerititiano o te anere mataiti mua ra i to ratou akarongo. Kua taui te reira i to ratou manakonakoanga e to ratou tu katoa oki, kua akakeu ia ratou kia akono i to ratou oraanga kia rotai ki to te Atua ra anoano. Kua mamae ratou i te tuikaa, te pepeiia ki te toka, te papaanga, te tapekaanga, e te mate oki kare ra i akakore i to ratou akarongo. (Angaanga 7:58-60; 8:1; 14:19; 16:22; 1 Korinetia 6:9-11; Ephesia 4:22-24; Kolosa 4:3; Philemona 9, 10) Kua karanga te tata tuatua enua o Roma ko Tacitus, tei anauia e vaitata i te 56 T.N., no te au Kerititiano e “kua mate ratou i te tutungiia i te mura ai, tei taʼuia ra ei akamarama i te po, i te kore anga te marama ra.” Tera ra kare rava ratou i ngaueue!​—The Annals, Puka XV, parakarapa 44.

7. Penei eaa te turanga ta tetai papaki au tangata ka kite ia ratou uaorai?

⁷ I etai putuputuanga ka kitea e koe tetai au tangata tei aere atu ana ki te au uipaanga no te au mataiti kua roa. Te inangaro ra ratou i te akaaerenga a Iehova, te manako ra i tona au tangata e ko te aronga meitaki roa ta ratou i aravei ana, te tuatua meitaki ra no te tuatua mou, e ka paruru i te tuatua mou i te aronga o vao ra. Inara te vaira tetai apinga te tu ra i roto i to ratou mataara, e apinga tetai te tapu ra ia ratou. Kare roa ratou i rave ana i te takainga meitaki tei raveia ra e te aronga e 3,000 i te ra o te Penetekote, ta te tangata Etiopia akarongo i ui ra, me kare ta Anania i raurau ia Saula kia rave i muri ua ake i te kite anga taua tangata takinga kino ra e ko Iesu tikai te Mesia. (Angaanga 2:41; 8:36; 22:16) Eaa te apinga te ngere ra te reira tu tangata i teia tuatau nei? Eaa ra ratou i kore ei i rave i te takainga te kapikiia ra e te Puka Tapu ko te “patianga ki te Atua no tetai akava ngakau meitaki”? (1 Petero 3:21, NW) Me kite rai koe ia koe uaorai i te reira turanga​—i te kiteanga i te tuatua mou mari ra te tapupu ra i te rave angaanga no te reira—​e manako koe i teia tumu tuatua nei e i teateamamaoia no te aroa takake ia koe na.

Autuanga i te au Arairai no te Papetito Anga

8. Me kare koe e meitaki i te apii, eaa te mataara pakari kia rave koe i teianei?

⁸ Eaa te ka tu mai ki mua i toou mataara? I te tumu tuatua i mua akenei te akakite maira e penei te vaira te manamanata no tetai papaki no runga i te apii tatakitai. Kua orongaia mai e te Atua te manako meitaki no tatou, e te manako ra aia ia tatou kia taangaanga i te reira ei tavini atu iaia. Ko tetai papaki au tangata kare ra i kite i te tatau e i muri akera kua tauta ratou uaorai kia kite kia raukai te kite maata i te Atua e tana au akakoroanga. Ka peea oki koe? Me kua kite ke ana koe i te tatau, te apii tika ra ainei koe, mei ta to Berea i rave ra, i “te kimi anga i te tuatua i tataia ra” kare e ra i kapea kia kite me e tika taua au mea ra? Kua kimi ainei koe “i te tipoto, e te tiroa, e te oonu, e te teitei” o te tuatua mou? Kua ko ainei koe kia rava te oonu ki roto i te Tuatua a te Atua? Kua kite ainei koe i akapeea ra te umere tikai te reira? Kua akatupu ainei koe i te inangaro tikai kia kite to te Atua anoano? E kaki ainei tikai toou no te tuatua mou?​—Angaanga 17:10, 11; Ephesia 3:18.

9. Eaa te mea tika kia rave koe me e manamanata toou ma tetai i te putuputuanga ra?

⁹ I etai tuatau te unui ra te au tangata ki muri no te manamanata tikai me kare e manako ua i rotopu ia ratou ma etai atu i te putuputuanga ra. Kua akariri kino mai ainei tetai ia koe? E aru i reira i te kaveinga ta Iesu i akakite mai ra na teia au tuatua nei: “E aere e akakite atu i tana apa korua anake ua.” (Mataio 18:15) Penei ka poitirere koe mea kite e kare ua taua tangata ra i kite e kua riri koe. Inara noatu e kite aia, penei ‘ka rauka ia koe to taeake,’ mei ta Iesu i tuatua ra. Penei ka rauka ia koe i te tauturu iaia kia kore e akaturori i tetai ke ra. E pera katoa, me ka tamanako ua koe, koai taau e tavini tika ra​—ko te reira tangata me kare ko te Atua ainei? Kua kotingaia ainei toou aroa no te Atua e kia tuku ua koe na te tarevake o tetai tangata apa ua ra e akakino i toou aroa Nona ra?

10, 11. Eaa taau ka tau kia rave me e ara muna tetai te tapu ra kia kore koe e aere ki mua?

¹⁰ Penei na te ara muna e tapu i te tangata kia kore e papetitoia. Penei e apinga teia tei tupu i te tuatau kua topa ra, me kare penei e tu tarevake te rave tamouia ra. Me e manamanata teia noou, kare ainei teia i te tuatau tau no te akatikatika i te reira? (1 Korinetia 7:29-31) E manganui te au tangata o Iehova tei taui i to ratou oraanga. Te karanga ra te Puka Tapu: “E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o [Iehova, NW] ra.”​—Angaanga 3:19.

¹¹ Noatu rai eaa taau i rave i te tuatau kua topa, ka rauka ia koe te tataraara, te taui, e ka pati ei ki te Atua e akakore i taau ara. “E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore . . . Kua kopae oki kotou i te tangata taito ra e tana katoa au ravenga; E kua akatangata ou, ko tei akaouia i te kite mei te tu katoa o Tei anga iaia ra.” Ka rauka ia koe i te taui i toou oraanga kia rotai ki tona mataara, kia rekareka i te akava ngakau ma, e kia rauka te manakonakoanga no te ora mutu kore ki roto i tona ao ou no te tuatua tika. Kare ainei te reira i te mea tau noatu eaa te tauta anga e raukai?​—Kolosa 3:5-10; Isaia 1:16, 18; 1 Korinetia 6:9-11; Ebera 9:14.

12. Eaa taau ka tau kia rave me te tu ra te avaava, te kona kava, me kare te kaki apinga akakona i rotopu ia koe e te akava ngakau ma?

¹² Te tu ra ainei te kai avaava, te kai tau kore i te kava, me kare te kaki apinga akakona i rotopu ia koe e te akava ngakau ma? Kare ainei te reira tu ravenga akakoko i te oraanga e akakite maira i te akangateitei kore i ta te Atua ra apinga aroa koia te oraanga umere tikai? Me te tu ra te reira au ravenga ki roto i toou mataara, e mea papu e kua tae te tuatau no te akatikatika i te reira. E tau ainei te reira au ravenga no toou oraanga? Kua karanga a Paulo: “E tamā ua tatou ia tatou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.” Te rava ra ainei toou manako ariki i to te Atua ra mataara ma e te tuatua tika kia rave koe i te reira?b​—2 Korinetia 7:1.

Au Apinga Kopapa

13, 14. (a) Eaa ta te au Tuatua Tapu tuatua no te au akakoroanga apinga kopapa nei? (e) Eaa ra i puapinga maataʼi kia tuku i te au apinga no te rangi ei mea mua?

¹³ Te ao o teia tuatau te tuku ra i te au mea puapingaia e “te akatietie o te ora anga nei” ki mua atu i etai au apinga ravarai. Inara kua akaaite atu a Iesu i “te au mea apiapi o teianei akatereanga o te au mea nei ma te akavare anga a te mana o te apinganui” mei te “tataramoa” e pokia atura te tuatua a te Atua. Kua ui katoa oki aia: “Eaa ta te tangata puapinga, kia rauka iaia to teianei ao katoatoa, e riro atura tona [meta, NW]?”​—1 Ioane 2:16, NW; Mareko 4:2-8, 18, 19, NW; Mataio 16:26.

¹⁴ Kua tou atura Iesu e kua akanoo te Atua ra kia rauka i te manu te kimi i te kai e kia manea te pua o te riri vai. E kua karanga atura aia: “Kare aina e meitaki maata to kotou i to te au manu ra? . . . E maata atu to te Atua manako kia akakakau ia kotou!” E pakari, ta Iesu akakite anga e “auraka oki e apiapi” no te au apinga kopapa nei. Kua tuatua aia e “kimi tamou i te patireia o te Atua ra, e ka kapitiia mai teia au mea na kotou.” Kua tou maira aia e ka tau tatou kia akono i te au mea no te rangi na mua no te mea ‘i te ngai tei reira ta kotou apinganui, ko te ngai katoa ia o to tatou ngakau.’​—Luka 12:22-31, NW; Mataio 6:20, 21, NW.

Angaanga a te Atua ma to te Atua Tauturu

15. Eaa te akamaroiroi anga meitaki ta te akaraanga o te au Kerititiano o te anere mataiti mua ra i oronga mai no tatou nei?

¹⁵ Te akara anga manamanata ra ainei kia koe te tuatuaanga ki etai atu. Te unui ra ainei koe ki muri no te akama? Me koia ia, e mea puapinga kia maara e i akapera ana te manako ngakau o te au Kerititiano i te anere mataiti mua ra mei ia tatou i teianei tuatau. Kare te Atua i iki e manganui te aronga pakari e te aronga mana, mari ra kua iki aia i “te au mea paruparu o te ao nei, kia akariro ei aia i te au mea ririnui kia akama.” (1 Korinetia 1:26-29, NW) Kua patoi te au arataki akonoanga i teia aronga “noa nei” e kua ikuiku ia ratou kia akamutu te tutu aere. Eaa ta te au Kerititiano i rave? Kua pure ratou. Kua pati ratou i te Atua no te mataku kore, e kua orongaia mai e ia kia ratou. Ko tei tupu, kua ki a Ierusalema i ta ratou tuatua e i muri akera kua akangaueue i te ao katoa nei!​—Angaanga 4:1-4, 13, 17, 23, 24, 29-31; 5:28, 29; Kolosa 1:23.

16. Eaa taau i kite mei te “urupu maata i Kite nei” tei akatakaia mai ia Ebera pene 11 ra?

¹⁶ No reira, kare e tau te mataku i te tangata kia tu mai ki rotopu ia tatou e te angaanga a te Atua. Te akakite maira a Ebera pene 11 i te “urupu maata i kite nei” tei mataku ra i te Atua, kare i te tangata. Ka tau katoa tatou kia akaari i te reira tu akarongo. Kua tataia e te apotetoro ra e: “E teianei, kua akapiniia tatou e taua urupu maata i kite nei, e kopae atu tatou i te au mea teiaa ravarai, e te ara e rokoia ngoie ei tatou nei, e oro tamou marie ei i teianei oroanga i tukuia mai ki mua ia tatou nei.”​—Ebera 12:1.

17. Eaa te akamaroiroi anga ta te Atua i oronga mai i roto ia Isaia?

¹⁷ Ka rauka i te Atua i te oronga mai te tauturu maata ki tona au tavini. Kua tuatua Tei anga i te ao katoa e pini ua ake kia Isaia: “Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e [roiroi, NW].”​—Isaia 40:31.

18. Penei ka akapeea koe i te akakore anga i te tu akama i te tutu anga i te patireia?

¹⁸ Te au Kite mataku kore e te mataora taau e kite i toou putuputuanga ra e tuanga iti ua ia no te au tavini totomapu e tere atu i te toru e te apa mirioni i te ao katoa nei. Te rekareka ra ratou i te tuanga o te angaanga ta Iesu uaorai i totou maira i teia au tuatua e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” Me te manamanata ra koe i te raveanga i te tutu aere noatu rai e kua tau koe no te rave i te reira, eaa koe ka kore ei e pati i tetai Kite te meitaki ra aia i te angaanga tutu aere e kia aere kapiti atu koe ma ia katoa kia rave kapiti korua i te angaanga tutu aere anga? Te oronga tika maira te Atua i te “mana maata atu i tei matauia,” penei ka poitirere koe i te kite i te rekareka tikai o taua angaanga atua nei.​—Mataio 24:14; 2 Korinetia 4:7, NW; e akara katoa ia Salamo 56:11; Mataio 5:11, 12; Philipi 4:13.

19. Eaa te angaanga apiianga ta Iesu i akaue atura i tana au pipi kia rave?

¹⁹ Te manako maira a Iesu i te aronga tei ariki i te tuatua no te Patireia ra, kia rave i te reira. Kua karanga aia: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

20. Me te tere ra koe ki mua i te pae vaerua, eaa te uianga penei ka tau kia uiia kare e roa?

²⁰ Te akakeu ra ainei toou arikianga, i te au akameitakianga a te Atua, e te “toto oko maata” o Iesu, e pera katoa te manakonakoanga meitaki no te oraanga mutu kore, kia rave koe i te angaanga? (1 Petero 1:19) Kua akono ainei koe i toou oraanga kia rotai ki te au umuumuanga tuatua tika a te Atua ra? Te rave putuputu ra ainei koe i te akariro anga i te tangata ei pipi? Kua akaruke ainei koe ia koe uaorai e kua akatapu i toou oraanga ki te Atua? Me taau pau anga ki teia nga uianga e e ae tika tikai, penei kua tae te tuatau no te ui atu ki tetai o te aronga pakari o te putuputuanga taau e piri atura, i te uianga ta te tangata Etiopia akarongo i ui ra kia Philipa e: “Eaa au nei e kore ei e bapetizoia?”​—Angaanga 8:36.

[Au Tataanga Rikiriki i Raro]

Maara Ainei ia Koe?

◻ Eaa te au tumu takake ta tatou no te akameitakianga i te Atua ra?

◻ Eaa te mea tau na te akarongo e te manako ariki kia akakeu ia tatou kia rave?

◻ Penei eaa te au manamanata te tu ra i rotopu ia tatou e te akarongo anga i te Atua, e eaa te ka rauka ia tatou kia rave no te reira?

◻ Eaa etai au uianga te ka tau te aronga kare ra i papetitoia kia ui ia ratou uaorai?

[Pia i te kapi 18]

‘Eaa toku nei tu ei “one”?’

Kua oronga maira a Iesu i te akatutuanga no tetai tangata tei aere ra i te ruru ua. Ko etai ua kua topa ki te pae mataara e kua kainga e te manu. Ko etai kua topa ki te ngai e papa toka e kare i maata te one. Kua tupu ake te ua, inara i te iti mai anga te ra, kua mae e kua mate atu. E te vaira etai ua tei topa ki roto i te tataramoa e kua pokia iora. Kua karanga a Iesu e ko teia au pupu toko toru ra te akatutu maira: te mea mua, ko te tangata tei “akarongo ra i te tuatua no te patireia e kare i kite i te aite anga o te reira”; te rua, koia tei ariki ra i te tuatua inara kua ariu ke atu no te vera o te “mate me kare takinga kinoanga”; e ko te toru, ia o te tangata no “te anoano maata i to teianei ao e te pikikaa o te apinga pokia atura te tuatua.”

Inara kua tuatua katoa a Iesu no tetai atu ua ra tei topa ki te one meitaki. Kua karanga aia e: “Koia te tangata e akarongo, e kite akera, e ua maira tana.”​—Mataio 13:3-8, 18-23, NW.

Penei ka tau kia ui kia tatou uaorai: ‘Eaa toku nei tu ei “one”?’

[Pia i te kapi 19]

Kua mate ratou no to ratou akarongo

Kua kite ainei koe i tetai ua atu tei akatika kia mate e auraka kia akakore i tona akarongo? E au tauatini ua atu te au Kite o Iehova tei pera. I roto i The Nazi State and the New Religions: Five Case Studies in Non-Conformity (Te Tuanga Enua Nazi e te au Akonoanga Ou: Rima au Apii Turanga no te au Kaveinga), kua tataia e Dr. Christine E. King e: “Okotai o nga Kite katoatoa o Tiamani tei tapekaia, e okotai i roto i te a tei mate.”

I te openga o taua puakapa takinoanga ra, i te 1945, “kua kake te numero o te au Kite ra e kare rava i raveia te akatika anga no te reira.” I roto i The Nazi Persecution of the Churches (Te Takinga Kinoanga a te Nazi i te au Ekaretia), kua tata a J. S. Conway no te au Kite ra e: “Kare atu e akonoanga ke tei akakite i tetai apinga kia aite atu te manako papuanga i te aro atu ki te nuku katoa o te Gestapo [Akava Muna o Tiamani] no te Takinoanga.”

Kare te au Kite o Iehova ra i takinga kinoia no te angaanga poritiki me kore no te kara tangata. Mari ra, kua tamamaeia no to ratou inangaro anake i te Atua e to ratou kore e akatika kia akakino i to ratou akava ngakau tei akamatauia ki runga i te Puka Tapu.