E Aruaru i te Au Tu Atua i te Ora Anga Ngutuare Tangata
“O atu kia Iehova, e te uanga o te au tangata e, o atu kia Iehova i te kakā e te ririnui.”—SALAMO 96:7.
1. Kua akamataia e Iehova te oraanga ngutuare tangata ki roto i teea tu?
KUA akamataia e Iehova te ora anga ngutuare tangata ma te ponuiaau e te mataora i tana kapiti anga i te tangata mua e te vaine mua ra na roto i te akaipoipo anga. Ko te tika, no to Adamu ra mataora maata e kua taiku aia i tona rekareka ki roto i te pee mua tei tataia ra: “E ivi teia no toku nei ivi, e kiko oki no toku nei kiko: ka tuatuaia aia e, E vaine, no te mea no roto aia i te tane, i te rauka anga mai.”—Genese 2:23.
2. Eaa ta te Atua i manako no te akaipoipo anga tei kapitiia atu ki te apaianga mai i te mataora ki tana tamariki tangata nei?
2 I ta te Atua ra akapapa anga mai i te akaipoipo anga e te akanoonoo anga ngutuare tangata, e maata atu tana i roto i tona manako i te apaianga mai i te mataora ki tana tamariki tangata nei. Kua inangaro aia ia raua kia rave i tona anoano. Kua tuatua mai te Atua ki nga tokorua mua ra: “Kia anau korua, e kia maata roa, e e akaki i te enua nei, e e akavi; e kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.” (Genese 1:28) Ko tetai angaanga tutakianga meitaki tikai. Mei teaa ra te mataora anga a Adamu, e Eva, e ta raua tamariki i te tuatau ki mua naringa taua nga tokorua akaipoipoia mua ra i rave akarongo i to Iehova ra anoano!
3. Eaa te umuumuia ra no te au ngutuare tangata kia akono i te tu Atua ra?
3 Inara, noatu i teia tuatau nei, te maata ra te mataora o te au ngutuare tangata me kia angaanga kapiti ratou i te rave i to te Atua ra anoano. E mei teaa ra te au manakonako anga meitaki te vaira no taua au ngutuare tangata akarongo ra! Kua tata te apotetoro ko Paulo: “Te akono i te Atua ra, e puapinga to te reira i te au mea katoa nei, e meitaki tei akakiteia mai to te reira i teianei ao, e te ao a muri atu.” (1 Timoteo 4:8) Te au ngutuare tangata te rave ra ma te akono tau tikai i te Atua te aru ra i te au kaveinga no te Tuatua a Iehova e te rave ra i tona anoano. Te aruaru ra ratou i te au tu Atua e ka kitea e ratou te mataora anga i te oraanga “i teianei.”
Akakino Anga i te Oraanga Ngutuare Tangata
4, 5. Eaa ra i raukaʼi kia tuatuaia e te akakinoia ra te oraanga ngutuare tangata i teianei takapini te ao katoa?
4 E tika ra, kare e kitea e tatou te au e te mataora ki roto i te au ngutuare tangata ravarai. I te akakiteanga i tetai kimikimi anga tei raveia e tetai akaaerenga no te kimianga i te au tupuanga o te tangata tei tapaia ko te Konitara Tare Anga Tangata, kua akakite The New York Times: “Te aiteite ra te au enua puapinga maata e te au enua putaua, te tupu maata ra te taui anga i te akapapa anga o te oraanga ngutuare tangata.” Te taikuia maira tetai vaine akaaere i teia kimikimi anga i te na ko anga: “Ko te manako e te ngutuare tangata e taokotai anga ngaueue kore e te piri mou te akono ra te metua tane ei oronga mai i te puapinga e ko te metua vaine te akono ra ei utuutu i te manako ngakau e mea ngaro ia. Ko te tika ra e ko te tupu anga te au tu metua vaine akaipoipo koreia ra, te tupu anga maata te kopae anga, [e] te meangiti anga mai te au ngutuare tangata . . . te rokoia nei ia i te ao katoa.” No te reira au tu, e au mirioni ua atu te au ngutuare tangata te ngere ra i te tu ngaueue kore, te au, e te mataora, e manganui te ngaangaa katoa ra. I Paniora kua kake te tupu anga o te kopae anga ki te 1 i roto i te 8 au akaipoipo anga i te akamata anga o te raungauru openga o te 20 anere mataiti nei—ko tetai rere anga maata mei te 1 i roto i te 100 i te 25 mataiti i mua akera. Kua ripotiia mai e ko Engarani tetai o te tupu anga teitei roa o te kopae anga i Europa—e 4 i roto i te 10 akaipoipo anga kua puapinga kore. Kua kite katoa te reira enua i te tupu anga kia maata te numero o te au ngutuare tangata e okotai ua te metua.
5 I te akara anga e kare e rauka i etai au tangata kia tatari no tetai kopae anga. E manganui te aere atura ki te “Ngai Tipuanga Tapeka” i vaitata i Tokyo, i Tiapani. Te arikiia maira i teianei iero Tinitau te au patianga no te kopae anga e no te akangaangaa anga i etai atu au pirianga anoano koreia ra. Ka tata tetai tei akamori ra i tana patianga ki runga i tetai papa rakau angiangi ua, e ka akatautau mai i te reira ki roto i te ngai akamori anga ra, e ka pure no tetai pauanga. Kua akakite mai tetai nutipepa i Tokyo e i te akanoo anga i taua ngai akamori anga ra e vaitata i te anere mataiti kua topa, “kua tata te au vaine a te aronga okooko apinganui i ta ratou au pure ma te patianga e kia akaruke atu ta ratou au tane i ta ratou au vaine ke e inangaro ra e kia oki mai kia ratou ra.” Inara, i teia tuatau, ko te maata anga o te patianga no te kopae anga ia, kare no te akaongi anga. Kare e ekoko anga, te akakinoia ra te oraanga ngutuare tangata takapini teianei ao. Ka tau ainei kia poitirere te au Kerititiano i teia tu? Kare, no te mea te oronga maira te Pipiria i te kite kia tatou no roto i te tu kino o te ngutuare tangata i teia tuatau nei.
No Teaa ra te Tu Kino o te Ngutuare Tangata?
6. Eaa te akatupuanga no ta 1 Ioane 5:19 i akakite maira no te tu kino o te ngutuare tangata i teia tuatau nei?
6 Ko tetai tumu no te tu kino o te ngutuare tangata i teia tuatau ko teia ia: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Eaa ta tatou ka manakonako atu i taua vaerua kino ra, koia Satani te Tiaporo? Koia tetai pikikaa kino, e te akono tau kore oki. (Ioane 8:44) No reira rai tona ao te takaviri nei i roto i te pikikaa e te akono anga tau kore, te akakino maata ra i te oraanga ngutuare tangata! I vao ake i ta te Atua ra akaaerenga te akakoko ra te mana o Satani kia akapou i ta Iehova akapapa anga no te akaipoipo anga e kia apai mai i tetai akaope anga ki te oraanga ngutuare tangata ponuiaau ra.
7. Akapeea te akatupu anga ki te au ngutuare tangata na te au tu ravenga ta te au tangata e manganui e akakite maira i teia tuatau openga nei?
7 Ko tetai atu tumu no te au manamanata no te au ngutuare tangata te akakino nei i teianei i te au tangata te akakiteia maira ia 2 Timoteo 3:1-5. Te akakite maira ta Paulo au tuatua totou tei tataia ki reira e te noo nei tatou i “taua tuatau openga ra.” Kare te au ngutuare tangata e noo ponuiaau ua e te mataora me ka riro to ratou au mema “ei akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore, ei viivii, ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua; e tutu akono i te Atua to ratou, kareka te mana ra, kua akakore ratou i te reira.” Kare tetai ngutuare tangata e mataora takiri me okotai ua o tona au mema te ngere ra i te aroa tikai me kare e tiratiratu kore. E akapeea te tu ponuiaau te oraanga ngutuare tangata me e rotoriri ua tetai i te ngutuare e ei akaatikau koreromotu ra? E kino roa atu oki, akapeea e raukaʼi te au e te mataora me e anoano i te au mea e navenave ei ra te au mema o te ngutuare e kare i anoano i te Atua? Ko teia te au tu ravenga a te au tangata i teianei ao ta Satani e tutara nei. No reira rai te mataora anga ngutuare tangata i ngata roaʼi kia akatakaia i teia tuatau openga nei!
8, 9. Eaa te akatupu anga no te tu akono o te tamariki ki runga i te mataora anga o te ngutuare tangata ra?
8 Inara te vaira tetai atu tumu i ngere ei te au ngutuare tangata e manganui i te au e te mataora anga, ko te tu akono kino o te tamariki. I ta Paulo totou anga i te au tu i te au ra openga ra, kua totou aia e e manganui te au tamariki te ka akarongo kore ki te au metua. Me ko koe tetai e tangata ou, te tauturu ra ainei toou tu akono kia akariro i toou ngutuare tangata kia ponuiaau e kia mataora?
9 Kare etai tamariki i te tu akono meitaki. Ei akatauanga, kua tata tetai tamaroa ou ki tona metua tane i teianei reta akariri: “Me ka kore koe e rave atu iaku ki Alexandria kare au e tata reta atu kia koe, me kare e tuatua atu kia koe, me kare e tuatua noo akera kia koe, e me ka aere koe ki Alexandria kare au e mou i to rima me kare e aravei akaou atu ia koe. Ko teia te ka tupu me ka kore koe e rave iaku . . . Inara e tuku mai i tetai [kitara], te pati atu nei au ia koe. Me ka kore koe e rave, kare au e kai e kare au e inu. No reira tira rai!” Te aite ra ainei te tangi o te reira ki to teianei tuatau? Inara, ko taua reta ra mei ko mai i tetai tamaroa ki tona metua kua tataia i Aiphiti i taito ra e tere atu i te 2,000 mataiti kua topa.
10. Akapeea e raukaʼi i te aronga ou te tauturu i to ratou ngutuare tangata kia aruaru i te au tu Atua ra?
10 Kare te tu manako o te tamaiti Aiphiti ra i akatupu i te au no te ngutuare tangata. Inara, e kino roa atu te au apinga te tupu ra ki roto i te au ngutuare tangata i teia tuatau openga nei. Inara, ka rauka ua ia kotou aronga ou na te tauturu i to kotou ngutuare tangata kia aruaru i te au tu Atua. Akapeea ra? Na te akarongoanga i teianei ako no te Pipiria: “E te au tamariki e, e akarongo i to kotou au metua i te au mea katoa nei, e mea mareka te reira na te Atu.”—Kolosa 3:20.
11. Akapeea e raukaʼi i te au metua kia tauturu i ta ratou tamariki kia riro ei au tavini tiratiratu no Iehova?
11 Akapeea kotou te au metua? E tauturu aroa atu i ta kotou tamariki kia riro ei au tavini tiratiratu no Iehova. “E apii i te tamaiti i te arataa e tikaʼi iaia kia aere ra,” ta Maseli 22:6 i tuatua. “E kia pakari aia ra, kare e akaruke i taua arataa ra.” Ma te au apiianga meitaki i te Tuatua Tapu e te au akatauanga meitaki a te metua ra, kare te au tamaroa e te au tamaine e manganui e akaruke i te arataa tika kia pakari mai ratou ra. Inara e maata tei runga i te tu e te maata oki o te terenianga no te Pipiria e i runga katoa i te ngakau o te tamaiti ra.
12. Eaa ra i tau ei te ngutuare Kerititiano kia ponuiaau?
12 Me te tauta ra te au mema katoatoa o to tatou ngutuare kia rave i to Iehova ra anoano, ka tau tatou kia rekareka i te au tu Atua ra. Ka tau tetai ngutuare Kerititiano kia ki ma te ‘au oa no te au.’ Te akaari maira Luka 10:1-6 e ko taua tu tangata ra ta Iesu i manako ana i tana tono anga e 70 au pipi kia aere ei au orometua ma te tuatua anga kia ratou: “E te are ta kotou e tomo ra, e akamata na i te karanga atu, Ei au to teianei ngutuare. E tei reira te tamaiti no te au, e vai rai ta kotou au ra i rungao iaia.” Ei au tavini no Iehova e aere ma te ponuiaau mei tera are ki tera are ma “te tuatua aere anga i te au,” te kimi ra ratou i te au oa no te au. (Angaanga 10:34-36; Ephesia 2:13-18) E tika tikai, ko tetai ngutuare Kerititiano e au oa katoatoa ratou no te au ka tau oki kia ponuiaau.
13, 14. (a) Eaa ta Naomi i anoano no Ruta raua ko Orapa? (e) Ka tau te ngutuare Kerititiano ei tetai ngai akaangaroianga no teea tu?
13 Ka tau te ngutuare ei tetai ngai no te au e te akaangaroianga. Kua manakonako te vaine takaua ruaine ko Naomi e kia oronga te Atua ki tana nga unonga vaine ou takaua, ko Ruta raua ko Orapa, i te akaangaroianga e te pumaana te ka tupu mai no tetai tane meitaki e te ngutuare. Kua tuatua a Naomi: “Kia oronga mai oki a Iehova i te akaangaroianga no korua i te ngutuare o ta korua puke tane.” (Ruta 1:9) No runga i ta Naomi i anoano, kua tata tetai tangata apiipiiia ra e i roto i taua tu ngutuare ra “ka kitea e Ruta raua ko Orapa te akaora anga mei te akaangaroianga kore e te apiapi. Ka kitea e raua te akaangaroianga. Ka riro ia ei tetai turanga e raukaʼi ia raua kia noo ua, e ki reira e kiteaʼi te merengo anga e te akaangaroianga i to raua au manako ngakau maru e te au inangaro ngateitei roa. Te akakiteia maira te mana takake o te tuatua Epera . . . i te akakite anga meitaki i te tu o te au tuatua kapitiia mai ia [Isaia 32:17, 18].”
14 E akamanako ine i teia taiku anga kia Isaia 32:17, 18. Ka tatau tatou i reira: “E ko ta te tuatua-tika angaanga, ko te au ïa; e te openga o te tuatua-tika ra, ko te pekapeka kore ïa, e te mataku kore, e tuatau ua atu. E noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai.” Ka tau tetai ngutuare Kerititiano ei tetai ngai kanga koreia mai no te tuatua tika, e pekapeka kore, e mataku kore, e te au tu Atua ra. Inara ka peea me ka tu mai te au timataanga, te au tuke anga, me kare etai atu manamanata? Ei reira ka umuumuia kia kite tikai tatou i te mea anoanoia no te mataora anga ngutuare tangata ra.
E A Kaveinga Puapinga Maata
15. Akapeea koe me akataka i te mea ngaro no te mataora anga o te ngutuare tangata ra?
15 E kaiou ta te au pamiri ravarai i runga i te enua nei i tona ingoa ki te Atua ko Iehova, koia Tei Anga mai i te au pamiri. (Ephesia 3:14, 15) No reira te aronga te anoano ra i te mataora anga pamiri ka tau kia kimi i tana aratakianga e kia akapaapaa iaia, mei ta te tata taramo ra: “O atu kia Iehova, e te uanga o te au tangata e, o atu kia Iehova i te kakā e te ririnui.” (Salamo 96:7) Ko te mea ngaro no te mataora anga o te ngutuare tangata te vaira i nga kapi o te Tuatua a te Atua ra, koia te Pipiria, e te akono anga i te au kaveinga o te reira. Ko te ngutuare tangata te ka akono i teianei au kaveinga ka mataora e ka rekareka i te au tu Atua ra. No reira e akara tatou i nga kaveinga puapinga maata e a no teia.
16. Eaa te tuanga tau na te akono meitaki kia rave i te oraanga ngutuare tangata?
16 Tei runga tetai o teianei nga kaveinga i teia: Ko te akono meitaki e puapinga maata ia ki te au tu Atua ra i roto i te oraanga ngutuare tangata. Kua tuatua te Ariki ko Solomona e: “Mei te oire koro kore e te ngaangaa ra, koia katoa te tangata kare i akavi i tona uaorai vaerua.” (Maseli 25:28) Te akavianga i to tatou vaerua—te akonoanga i te akono meitaki—e mea puapinga ia me te anoano ra tatou kia rauka tetai ngutuare tangata mataora e te ponuiaau. Noatu rai e te apa ua nei tatou, ka umuumuia tatou kia rave i te akono meitaki, koia tetai ua o te vaerua tapu o te Atua ra. (Roma 7:21, 22; Galatia 5:22, 23) Na te vaerua e akatupu i te akono meitaki ki roto ia tatou me ka pure tatou no teianei tu, e rave i te akoanga Pipiria no te reira, e taokotai atu ma etai ke te akakite ra i te reira tu. Na teia aerenga e tauturu ia tatou kia “rere ke atu i te akaturi.” (1 Korinetia 6:18) Ka tauturu katoa oki te akono meitaki ia tatou kia kopae ke i te ta ua, kia kopae me kare kia akakore i te kona kava, e kia akono maru ma te au turanga ngata ra.
17, 18. (a) Eaa te aite anga ta 1 Korinetia 11:3 e akapiri maira ki te oraanga ngutuare Kerititiano? (e) Akapeea te kite anga i te taoonga upoko i te akatupu anga i te au tu Atua i roto i tetai ngutuare tangata?
17 Tetai atu kaveinga umuumuia ka rauka kia tuatuaia na roto i teia mataara: Te kite anga i te taoonga ei upoko ka tauturu ia tatou kia aruaru i te au tu Atua i roto i to tatou au ngutuare tangata. Kua tata a Paulo: “Teia ra toku inangaro, kia kite kotou e, ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.” (1 Korinetia 11:3) Te aite anga o teia e na te tane e akono i te arataki anga i roto i te ngutuare, e e turu tiratiratu tana vaine, e ko te tamariki e akarongo. (Ephesia 5:22-25, 28-33; 6:1-4) Ka akatupu taua tu akono ra i te au tu Atua ra i te oraanga ngutuare tangata.
18 Ka tau te tane Kerititiano kia maara e kare te taoonga upoko o te Tataanga Tapu i tetai pu tangi kore ra. Ka tika aia kia aru ia Iesu ra, i tona Upoko. Noatu rai e kua riro koia “ei upoko i rungao i te au mea katoa,” kare a Iesu “i aere mai kia taviniia tona, ei tavini ra.” (Ephesia 1:22; Mataio 20:28) Na roto i te tu aiteite, ka akono tetai tangata Kerititiano i tona taoonga ei upoko na roto i te tu aroa te ka rauka iaia kia utuutu meitaki i te au apinga anoanoia no tona ngutuare tangata. E e mea tika tikai ka anoano te vaine Kerititiano kia taokotai atu ma tana tane. Ei “tauturu tau” nona e “tetai akaoti” oki, ka oronga aia i te au tu tei ngere ra tana tane e na reira te oronga anga kiaia i te turu anga anoanoia ra. (Genese 2:20; Maseli 31:10-31) Ka tauturu te akono tika i te taoonga upoko i te au tane e te au vaine kia akono tetai i tetai ma te akangateitei e ka akakeu i te tamariki kia akarongo. Ae, ka akakeu te kite i te taoonga upoko i te au tu Atua i roto i te ngutuare tangata.
19. Eaa ra i umuumuiaʼi te komunikeiti anga meitaki no te au e te mataora o te ngutuare tangata ra?
19 Ko te toru o te kaveinga puapinga maata ka rauka kia akakiteia na roto i teianei au tuatua: E puapinga maata te komunikeiti anga no te au e te mataora no te ngutuare tangata. Te akakite maira Iakobo 1:19 kia tatou: “Kia rapurapu ua te tangata ravarai i te akarongo, kia tavarevare i te tuatua, kia tavarevare oki i te riri.” Ka tau te au mema ngutuare tangata kia akarongo e kia tuatua tetai ki tetai no te mea ko te komunikeiti anga ko tetai mataara e rua ia aerenga. Inara, noatu me ko te tika ta tatou e tuatua ra, penei ka akatupu kia maata atu te kino i to te meitaki me ka tuatuaia na roto i te tu tangi kore, akaparau me kare tu manako kore ua. Ka tau ta tatou tuatua ei tuatua rekaia mai, “kia rapakauia i te tai.” (Kolosa 4:6) Te au ngutuare tangata tei aru ra i te au kaveinga Tataanga Tapu e te komunikeiti meitaki ra te aruaru ra i te au tu Atua.
20. Eaa koe ka tuatuaʼi e e mea umuumuia te aroa no te au o te ngutuare tangata?
20 Te a o te kaveinga ko teia ia: Te aroa e mea umuumuia kia au e kia mataora te ngutuare tangata. Penei ka akatupu te inangaro i tetai tuanga puapinga maata i roto i te akaipoipo anga, e ka tupu oki te anoano oonu i roto i te au mema o tetai ngutuare tangata ra. Inara, e tere atu te puapinga o te aroa te akatakaia maira e te tuatua Ereni a·gaʹpe. Ko teianei te aroa ta tatou e tatanu ra no Iehova, no Iesu, e no to tatou tangata tupu. (Mataio 22:37-39) Kua akaari mai te Atua i teianei aroa no te au tangata na te oronga anga mai i “tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Mei teaa ra te meitaki te reira e kia rauka ia tatou te akakite i taua tu aroa rai no to tatou au mema ngutuare tangata! Ko teia aroa akateiteiia “ko taua tatua apa kore ua ra ïa.” (Kolosa 3:14) Te tapeka kapiti ra te reira i nga tokorua akaipoipoia e te akakeu ra ia raua kia rave i tei meitaki roa no raua raua rai e no ta raua tamariki. Me tupu mai te au tu ngata, ka tauturu te aroa ia raua kia akono i te au tumu ma te taokotai anga. Ka papu ia tatou teia no te mea “kare te aroa . . . e kimi i te meitaki nona uaorai . . . E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.” (1 Korinetia 13:4-8) E mataora tikai te au ngutuare tangata tei akapiritia ra te aroa o tetai e tetai na te aroa no Iehova ra!
E Aruaru Marie i te Au Tu Atua
21. Eaa te raveanga penei ka akatupu kia maata te au e te mataora o toou ngutuare tangata?
21 Kua akapapaia te au kaveinga i mua akenei e etai atu oki no te Pipiria mai ki roto i te au puka ta Iehova i oronga takinga meitaki mai na roto i “te tavini akono meitaki e te pakari.” (Mataio 24:45) Ei akatauanga, ka kitea taua akakitekite anga ra ki roto i te puka e 192 kapi The Secret of Family Happiness, tei orongaia mai i te Uruoaanga Tapere “Au Karere o te Au Tu Atua” o te Au Kite o Iehova tei raveia takapini i teianei ao i te 1996/97. E manganui te au puapinga te ka rauka i te apii anga tataki tai e te apii ngutuare tangata oki i te au Tataanga Tapu ma te tauturu anga a taua tu puka ra. (Isaia 48:17, 18) Ae, na te akono i te ako Tataanga Tapu penei ka akatupu kia maata te au e te mataora o toou ngutuare tangata.
22. No runga i teaa ta tatou ka tau kia rave i to tatou oraanga ngutuare tangata?
22 E au apinga memeitaki ta Iehova te vai maira na te au ngutuare tangata te rave ra i tona anoano, e te tau ra ta tatou akapaapaa e te tavini atu kiaia. (Apokalupo 21:1-4) No reira kia rave kapiti atu toou ngutuare tangata i tona ora anga i te akamori anga i te Atua mou ra. E kia akameitaki to tatou Metua aroa i te rangi ra, ko Iehova, ia koe ma te mataora ia koe e aruaru ra i te au tau i te Atua i toou ora anga ngutuare tangata ra!
Akapeea Koe me Pau?
◻ Eaa te umuumuia ra me kia rave te au ngutuare tangata ma te akono tau i te akamori anga?
◻ Eaa ra i tupu ei te kino ki te ngutuare tangata i teia tuatau nei?
◻ Eaa te mea ngaro no te mataora anga te ngutuare tangata ra?
◻ Eaa etai kaveinga te ka tauturu ia tatou kia akatupu i te au e te mataora anga ki roto i te oraanga ngutuare tangata?
[Tutu i te kapi 24]
Ka tauturu te komunikeiti anga ia tatou kia aruaru i te au tu Atua ra i roto i te oraanga ngutuare tangata