“Kia Vai Teateamamao Rai Kotou”

¹ I roto i tana totouanga maata no runga i te openga o teia akatereanga o te au mea, kua akamatakite mai a Iesu auraka e varenga ua ki te au mea ua nei o te oraanga. (Mata. 24:​36-39; Luka 21:​34, 35) I te mea e ka tupu te akamataanga o te mate maata a tetai taime ua, e puapinga tikai e kia akarongo tatou i ta Iesu akoanga: “Kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” (Mata. 24:44) Eaa te ka tauturu ia tatou i roto i teia tu nei?

² Tamaki Atu i te Au Pekapeka e te Au Tamanamanataanga: Tetai o te au ereere ta tatou ka matakite koia oki ko te au pekapeka o te oraanga. (Luka 21:34) I tetai au enua, ko te tu putaua, te kore e ngai angaanga, e te kake o te akapouanga moni no te oraanga te akangata ra i te rauka anga mai o te au apinga no te oraanga. I tetai au enua ke atu, e mea ngoie ua te rauka anga mai o te au apinga. Mei te mea e te akamata ra te manata no runga i te au apinga o te kopapa i te akatere i to tatou manako, ka ngaro ia tatou i te akara mou ki runga i te au mea tika tikai o te Patireia. (Mata. 6:​19-24, 31-33) Na te au uipaanga Kerititiano e tauturu ia tatou i te akono marie i taua manako akara mou ra. Ko toou akakoroanga ainei ia kia tae ki te au uipaanga pouroa?​—Ebera 10:​24, 25.

³ Te ao o teia tuatau kua ki i te au tamanamanataanga te ka keia ngoie ua i to tatou taime puapinga. Te taangaanga i te komupiuta ka riro ei ereere me akapou puapinga kore ua tetai i te taime i te akarakara i te Internet, te tatau e te tuku E-mail, me kore i te kanga anga i te au kangakanga komupiuta. E maata te au ora ka pou ki te tivi, te au teata, te au angaanga rekaia, te tatau, e te au tarekareka, e meangiti ua i reira to tatou taime me kore maroiroi ka vai mai no te au anoano i te pae vaerua. Noatu e ka oronga mai te tamataoraanga e te akaangaroianga i te akaoraoraanga poto ua, ko te apiianga ra i te Pipiria naau uaorai e na te ngutuare tangata ka akatupu te reira i te au akameitakianga mutu kore. (1 Timo. 4:​7, 8) Te taporoporo ra ainei koe i te tuatau i te akamanakonako no runga i ta te Atua tuatua i te au ra?​—Ephe. 5:​15-17.

⁴ Mei teaa ra to tatou mareka ua anga e kua akanoo to Iehova akaaerenga i tetai porokaramu ikuikuanga i te pae vaerua i te tauturu ia tatou ‘kia tau ia tatou te ora i teianei au mea katoa e vaitata mai nei, e kia tu tatou ki mua i te aroaro o te Tamaiti a te tangata’! (Luka 21:36) Kia taangaanga pu tikai tatou i teia au apinga i orongaia mai e ‘kia akateateamamao ia tatou uaorai’ kia riro to tatou akarongo “ei akameitaki, ei teitei, e ei meitaki, i te mama anga mai o Iesu Mesia.”​—1 Pe. 1:7.