Pene 56

Na Teaa e Viivii ei te Tangata?

KUA ketaketa rava atu te patoi anga ia Iesu ra. Kare ko te akaruke anake anga o tana au pipi e manganui iaia mari ra te tapapa ra te ngati Iuda iaia e ta, mei ta ratou i rave iaia i Ierusalema i te tuatau o te Pasa i te 31 T.N.

I teianei kua tae ki te Pasa i te 32 T.N. No te akauenga a te Atua kia akono, kua aere atura Iesu ki te Pasa i Ierusalema. Inara, kua rave aia i te reira ma te matakite no te mea te vaira tona oraanga i roto i te tu kino. I muri akera kua oki atu aia ki Galilea.

Penei kua tae atu a Iesu ki Kaperenauma i aere atu ei te au Pharisea e te au tata tuatua mei Ierusalema ki ko iaia ra. Te kimi ra ratou i te au tumu e akaapaʼi iaia no te aati anga ture a te akonoanga ra. Kua ui maira ratou: “Eaa te aronga pipi aau nei i akaapaʼi i te tuatua a te aronga taito ra? kare oki ratou i orei i to ratou rima ka kai ei i te kai.” Kare teia i te mea umuumuia e te Atua, inara te manako ra te au Pharisea e e apa kino roa te reira no te kore e rave i te reira peu tupuna, tei kapiti ra i te orei anga kia tae roa ki nga poorima ra.

Kare a Iesu i pau atu i ta ratou akaapa anga, kua tou atura aia i ta ratou rave anga kino e te aati akakoro i te Ture a te Atua ra. “Eaa kotou uaorai i akaapaʼi i te akauenga a te Atua i ta kotou ikuiku?” kua inangaro aia kia kite. “Ei akaraanga, kua tuatua te Atua, ‘E akangateitei atu i to metua tane e to metua vaine’; e, ‘Ko tei akakino i te metua tane me kore metua vaine ka mate ia.’ Inara te tuatua nei kotou e, ‘Ko tei karanga atu ki tona metua tane me kore metua vaine: “Te au mea katoa naku e puapingaʼi korua na e apinga tapu orongaia ki te Atua ra,” auraka rava aia e akangateitei i tona metua tane.’ ”​—NW.

Ae, te apii ra te au Pharisea e te moni, te apinga, me kare tetai ua au mea ra tei akatapuia ei apinga orongaia ki te Atua no te iero te reira e kare rava e tau kia orongaia no tetai atu akakoroanga ke. Kareka ra, ko te te apinga akatapuia ra ka vai rai ki te tangata tei akatapu ra i te reira. Na teia tu te tamaiti, i te tuatua ua anga e ko tana moni me kare apinga e “kopani” (NW)​—koia e apinga akatapuia ki te Atua me kare ki te iero—​te kopae ra aia i tana apainga kia tauturu i tona nga metua kua ruau, ko tei o atura ki te turanga ngere kino roa.

No te riri tau tikai i te taruri ke anga kino a te au Pharisea ra i te Ture a te Atua, kua na ko atura Iesu: “Kua pera oki kotou i te akakore anga i ta te Atua akauenga i ta kotou uaorai ikuiku. E te au pikikaa e, te tau tikai nei kotou i ta Isaia i tuatua ia kotou, i te na ko anga e, Te topiri mai nei teianei aronga iaku i to ratou vaa, e te akameitaki mai nei to ratou ngutu iaku; tei te atea ke ra to ratou ngakau iaku. E akamorianga puapinga kore ra ta ratou iaku, ka apii ei i tei tukuia mai e te tangata anake ra.”

Penei kua neke atu te urupu tangata ra ki muri kia ateaʼi te ngai no te au Pharisea kia ui atu kia Iesu ra. Ei reira, i te kore anga e pau anga a te au Pharisea ra no ta Iesu akaapaanga pakari ia ratou, kua karanga atura aia kia akavaitata mai taua aronga maata ra. Kua na ko atura aia: “E akarongo mai . . . kia kite i te aiteanga. Kare e mea i vao ake i te tangata te ka na roto iaia te ka akaviivii iaia; inara te au mea te aere maira mei roto mai i te tangata ra, ko te au mea te reira te ka akaviivii i tetai tangata.”​—NW.

I muri akera, i to ratou tomo anga ki roto i tetai are, kua ui atura tana au pipi kiaia: “Te kite nei koe e, kua riri te aronga Pharisea i te akarongo anga i taua tuatua [naau, NW] nei?”

Kua pau atura Iesu: “Te au rakau ravarai tei kore i tanumia e taku Metua i te rangi ra, e kiriti tumuia ia. E vaoo ua atu ia ratou. E au matapo arataki ratou ra. E kia arataki te matapo i te matapo, ka topa kapipiti ia raua ki roto i te vaarua.”​—NW.

E akara anga poitirere to Iesu, i tana au pipi ra, i ta Petero pati anga kia akatakaia e eaa te mea e viivii ei te tangata. Kua na ko atura Iesu: “Kare katoa kotou nei i kite? Kare rai kotou i kite e, tei o atu i te vaa e tae ïa ki roto i te kopu, e akarukeia atura ki vao? Kareka ta te vaa i tuku mai, no roto mai ïa i te ngakau; koia te mea e viivii ei te tangata. No roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua. Ko te au mea ïa e viivii ei te tangata: kareka te kai ua ma te rima orei koreia ra, kare te tangata e viivii i te reira.”

Kare a Iesu i akakore ana i te tu ma i tau ra. Kare aia i taumaro ana e kare e tau kia orei te tangata i tona nga rima i mua ake i te teatea mamao anga i te manga me kare te kaikai anga. Mari ra, te akaapa ra a Iesu i te ravenga pikikaa a te au arataki akonoanga tei rave kikite ra i te kopae i ta te Atua au ture tuatua tika na te maro anga kia akono i te au ikuiku kare i tau i te Tuatua Tapu ra. Ae, na te ravenga kikino e viivii ei te tangata, e kua akaari maira Iesu e i akamata mai te reira no roto i te ngakau o te tangata ra. Ioane 7:1; Deuteronomi 16:16; Mataio 15:​1-20; Mareko 7:​1-23; Exodo 20:12; 21:17; Isaia 29:13.

▪ Eaa te patoianga ta Iesu i aro atu i reira?

▪ Eaa te akaapaanga ta te au Pharisea i rave inara kia tau ki ta Iesu i tuatua, i akapeea te au Pharisea i te aati akakoro anga i te Ture a te Atua ra?

▪ Eaa ta Iesu i akakite maira e ko te au mea ïa e viivii ei te tangata nei?