Pene 70

Akaoraanga Tangata Tei Anau Matapoia

I TE tamata anga te ngati Iuda i te pei ia Iesu ki te toka, kare aia i akaruke ia Ierusalema. I muri akera i te Tapati, te aaere ra ratou ko tana au pipi i te oire kua akara atura ratou i tetai tangata matapo mei te anau anga mai. Kua ui maira te au pipi kia Iesu: “E rabi, naai te ara, nana uaorai aina e na nga metua ainei, i anau matapo mai ei aia?”

Penei te irinaki ra te au pipi, mei tetai pae rapi ra, e ka rauka ua i tetai i te rave ara i roto i te vairanga tamariki o tona metua vaine ra. Kua karanga atura Iesu: “Kare to te ara a teianei tangata, e te ara a nga metua ra: No te mea ra, kia kitea te angaanga a te Atua iaia nei.” Kare te matapo anga o te reira tangata i te utunga no tetai apa tikai me kare ara tei raveia e te tangata ra me kare na tona nga metua. Na te ara a te tangata mua ra koia a Adamu i riro ei te au tangata ravarai ei apa ua, e no reira kua tupu ua te tu kino mei te anau matapo angaia mai. Na teia tu kino i te reira tangata ra i oronga mai te tuatau no Iesu kia akakite i te au angaanga a te Atua ra.

Kua raurau maira Iesu i te tu rapurapu no te rave anga i te reira au angaanga. “Ka rave [tatou] i te angaanga a tei tono mai iaku nei, koi vai ake te ao,” e nana ei. “Te vaitata mai nei oki te po, kare roa e tangata e angaanga i reira. Te noo nei au i te ao nei, ko au te mārama o teianei ao.” Kare e roa ake ka uri atu to Iesu matenga iaia ki roto i te poiri o te tanumanga te ngai kare e rauka iaia i te rave i tetai apinga. I teianei, ko ia te tumu no te marama ki teianei ao.

Oti akera te tuatua anga i te reira au mea kua tutua iora Iesu i te uavare ki runga i te one, kua maani iora i te vari ma tona uavare. Kua tuku atura aia i te reira ki nga mata o te tangata matapo ra e kua karanga atura: “Ka aere, ka orei i te vai paî i Siloama ra.” Kua akarongo te tangata ra. E i tana rave anga, kua kite aia! Mei teaa ra tona rekareka anga i tona oki anga, i te kite anga no te taime mua, i tona oraanga ra!

Kua umere tona au tangata tupu e etai katoa oki tei kite iaia ra. Kua ui ratou: “Kare ainei teia te tangata i noo ua ma te pati i te apinga ra?” “Koia oki teia,” e na tetai aronga ei. Inara kare tetai papaki i irinaki i te reira: “Kare ko ia, mei iaia nei rai te tu. Ko au ra aia” (NW) i tuatua maira taua tangata.

I akapeeaia to mata i pueraʼi?” te anoano ra te au tangata kia kite ratou.

“I oiia te vari e tetai tangata ko Iesu te ingoa, e kua amo maira ki toku mata, kua na ko maira kiaku, ka aere ki te vai paî i Siloama ra, ka orei: Aere atura au, orei iora, e kite atura.”

“Teiea taua tangata ra?” ta ratou ia i ui atura.

Kua tuatua maira aia: “Kare ua au i kite.”

Kua arataki atura ratou i te tangata i matapo ana ki to ratou au arataki akonoanga, koia te au Pharisea ra. Kua ui katoa oki ratou kiaia i akapeea i pueraʼi tona mata. “I amokia e ia taku mata i te vari, orei iora, e kite atura,” ta te tangata ia i akataka atura.

E tika tikai, e mea tau kia rekareka te au Pharisea ra i te ora anga te reira tangata patipati ra! Kareka ra, kua akaapa ratou ia Iesu. “Kare teia tangata i to te Atua,” ta ratou ia i tuatua. Eaa ratou i tuatuaʼi i te reira? No te mea, “kare aia i akono i te sabati.” Inara kua manako ua tetai pae o te au Pharisea ra: “Eaa e tikaʼi i te tangata ara kia rave i te akairo mei teianei?” Kua tupu te takake anga i rotopu ia ratou ra.

I reira, kua ui atura ratou i te reira tangata: “Eaa taau tuatua kiaia, koia i akapuera i to mata na?”

Kua karanga atura aia: “E peroveta tikai aia.”

Kare takiri te au Pharisea e irinaki i te reira. Kua papu to ratou manako e e koreromotu muna tetai i rotopu ia Iesu e teia tangata ei akavare i te au tangata. No reira ei akaoti i te reira tumu, kua tiki ratou i nga metua o taua tangata patipati ra e kia ui ratou kia raua ra. Ioane 8:59; 9:​1-18.

▪ Eaa te tumu i matapo ei te tangata ra, e eaa ra i kore ei?

▪ Eaa te po e kore ei te tangata e angaanga?

▪ I te ora anga te tangata ra, eaa te manako o te aronga tei kite ra iaia?

▪ Akapeea te akatakake anga i te au Pharisea no runga i te tangata i akaoraia ra?