To Iesu Oraanga e te Angaanga Orometua

Rekarekaanga i Tetai Pirianga Vaitata

ARU mai i te oroa akamaaraanga, kua rave a Iesu i te akamaroiroianga i tana au apotetoro ma te tuatua anga ngakau ki te ngakau. Penei kua paati i te turuaipo. Kua raurau atura Iesu: “Ka tu, ka aere ke tatou.” Inara, i mua ake ka akaruke ei ratou, kua akakeuia a Iesu e tona aroa no ratou, kua tuatua ua atu, ma te oronga i te akatutuanga akakeu.

“Ko au te vine mou, e ko taku Metua te tanu-kai,” ko tana ia i tuatua atu. Ko te Atua ko Iehova te Tanu Kai Maata, kua tanu aia i teia vine akatutuia i tana akatainu anga ia Iesu i te vaerua tapu i tona papetito angaia i te tuanga openga o te 29 T.N. Inara kua rave ua atu a Iesu i te akakite e te akatutu maira te vine e tere atu iaia uaorai, i te na ko anga:

“E te au rara ua kore katoa i roto iaku nei, nana ia e tipu ke atu; e te au rara ua katoa, nana ia e tope, kia maata ua atu te ua. . . . Mei te rara kare e ua koia anake ra, kia kore e piri ki te vine ra; kare katoa kotou, kia kore e piri mai kiaku ra. Ko au te vine, kotou te au rara.”

Ia Penetekote, e 51 ra i muri akera, kua riro mai te au apotetoro e etai katoa atu ei rara no te vine ra i te riringi angaia te vaerua tapu ki rungao ia ratou ra. I te openga ka riro mai te aronga e 144,000 katoa ei rara no te vine akatutuia ra. Kapiti atu ma te pu vine katoa ra, koia a Iesu Mesia, ka riro ko ratou te vine akatutuia ra te ka uua mai i te ua no te Patireia o te Atua ra.

Kua akataka maira Iesu i te taviri no te akauaanga kia ua mai: “Ko te topiri kiaku ra, e ko te topiri atu au kiaia ra, koia te ua maata: i taka ke kotou iaku ra, kare rava e mea e tika ia kotou.” Inara, me kare tetai e uua mai, e na Iesu ei, “e akarukeia ïa mei te rara ra, marō atura ïa, ko te akaputuia ra, tiria atura ïa ki roto i te ai, pou atura ïa i te ka.” I tetai pae, kua taputou maira Iesu e: “I topiri mai kotou kiaku ra, e kia noo marie taku tuatua ki roto ia kotou na, e pati ua kotou i ta kotou e anoano ra, e e orongaia mai ïa kia kotou.”

Kua rave ua atura Iesu i te akakite ki tana au apotetoro i te ka akakaka i te Metua ra, koia oki, “kia maata to kotou ua anga; e riro kotou ei pipi naku i reira.” Te ua ta te Atua e umuumu maira i te au rara kia akakite ratou i te au tu mei to te Mesia rai, kia maata oki te aroa. Pera katoa, i te mea e akakitekite a Iesu i te Patireia o te Atua ra, ko te ua umuumuia kia kapiti katoa oki i ta ratou rave anga i te akariro anga tangata ei pipi mei ta Iesu i rave ra.

“Kia noo kotou ma te akaperepereia atu e au,” ko ta Iesu ia i manono atu i reira. Inara, ka akapeea tana au apotetoro i te rave anga i te reira? Kua karanga aia: “I akono kotou i taku au akauenga, e vai akaperepereia atu kotou e au.” Kua rave ua atura Iesu i te akataka anga: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata aroa maata atu i te reira.”

I nga ora tokoiti ua, kua akakite a Iesu i te reira aroa maata rava na te orongaanga i tona oraanga no tana au apotetoro, e pera katoa no etai atu te ka akono i te akarongo kiaia ra. Ka tau tana akatauanga kia opara i tana au pipi kia rave katoa oki i te reira tu atinga aroa ratou tetai i tetai. Na teia aroa e akataka ia ratou, mei ta Iesu i tuatua i mua akera: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”

I te akatakaanga i tona au oa, kua karanga a Iesu: “Ko kotou toku oa, kia akono kotou i te au tuatua katoa taku i akaue atu ia kotou na. Kare atura au e karanga kia kotou e e tavini; kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.”

Mei teaa ra te pirianga oko maata tei rauka​—kia riro mai ei oa piri vaitata no Iesu! Inara e tamou ei te rekareka anga i te reira pirianga, ka tau tana au pipi “e kia uua te ua.” Kia pera ratou ra, kua karanga a Iesu e, “[ka] oronga mai te Metua kia kotou i ta kotou e pati ma toku nei ingoa.” E tika tikai, e tutaki meitaki te reira no te uua anga i te ua no te Patireia!

I muri akaou ake i te raurau anga i te au apotetoro kia “aroa kotou ia kotou uaorai,” e kua akataka katoa atu a Iesu e ka makitakita to te ao ia ratou. Inara, kua akapumaana atura aia ia ratou: “Kia riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou.” Kua akakite atura Iesu kia ratou eaa to te ao i makitakitaʼi i tana au pipi, i te na ko anga: “No te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou.”

I te akataka ua atu anga i te tumu o teianei ao i riri ei, kua karanga atura Iesu: “No toku nei ingoa ra e pera mai ei ratou kia kotou, no te mea kare ratou i kite iaia [te Atua ko Iehova] i tei tono mai iaku nei.” Na te au angaanga semeio a Iesu ra, i akaapa i te aronga tei riri ra kiaia, mei tana i akakite maira: “Naringa au kare i rave i rotopu ia ratou, i te angaanga rave koreia e te tangata katoa, kare ïa a ratou ara: i teianei ra, kua kite ia ratou, e kua riri mairai iaku e taku Metua katoa oki.” No reira mei ta Iesu i tuatua ra, tika atura te tuatua i tataia: “I riri ua mai ratou iaku kare e ara.”

Mei tana i rave i mua akera, kua akapumaana akaou atura Iesu ia ratou na te taputouanga kia tuku atu i te tauturu, koia te vaerua tapu, ko te mana rave ririnui o te Atua ra. “Nana au e akakite: E e akakite katoa oki kotou.” Ioane 14:31–15:27; 13:3, 35; Galatia 6:16; Salamo 35:19; 69:4.

▪ I naea a Iehova i tanu ei i te vine akatutuia ra, e i naea etai atu i riro ei ei tuanga no te vine ra e i akapeea ia?

▪ I te openga, eia katoa rara o taua vine akatutuia ra?

▪ Eaa te ua ta te Atua e umuumu ra mei te au rara maira?

▪ Akapeea tatou e riro ei ei oa no Iesu?

▪ Eaa ra to teianei ao ka riri ei ki te au pipi a Iesu ra?