Eaa ta Iehova e Pati Mai ia Tatou i Teia Tuatau?

“Tetai reo maira no roto i taua tiao ra, na ko maira, ‘Ko taku Tamaiti akaperepere teia, kua mareka rava au iaia; e akarongo kotou iaia.’”​—MATAIO 17:5.

1. I naea te Ture i akatupu ei i tana akakoroanga?

NA Iehova i oronga te Ture ki te iti tangata o Iseraela, ma tona au tuanga e manganui. No runga ia ratou, kua tata te apotetoro ko Paulo: “E e au peu i akonoia no te kopapa ra i tukuia mai ia ratou, e kia aaki te tuatau e akameitaki ravaiaʼi ra.” (Ebera 9:10) I te taki anga te Ture i tetai toenga no to Iseraela kia ariki ia Iesu ei Mesia, me kare ei Karaiti, kua akatupuia e ia tana akakoroanga. No reira a Paulo i akakite ei: “Ko te Mesia oki te akaope i te Ture.”​—Roma 10:4; Galatia 3:19-25; 4:4, 5.

2. Koai ma i raro ake i te Ture, e i naea ratou i matara mai ei i te reira?

² Te riro ra ainei te aite anga o teianei e kare tatou i raro ake i te tapekaanga a te Ture i teia tuatau? Ko te tika, kare rava te tuanga maata katoa o te au tangata nei i riro ki raro ake i te Ture, mei ta te tata taramo i akataka maira: “Kua akakite [a Iehova] i tana tuatua kia Iakoba; i tana au akonoanga e tana au tuatua-tau kia Iseraela. Kare aia i pera ki te pa enua ravarai: e tana ra au tuatua-tau, kare ia ratou i kite.” (Salamo 147:19, 20) I ta te Atua ra akanoo anga i te koreromotu ou na te tumu anga ki runga i te atinga o Iesu, noatu rai ko te iti tangata o Iseraela kare oki ratou i raro ake i te apainga kia akono i te Ture ra. (Galatia 3:13; Ephesia 2:15; Kolosa 2:13, 14, 16) I reira, me kare e mana tapekaanga o te Ture ra, eaa ta Iehova i pati i te aronga tei anoano ra kia tavini atu iaia i teia tuatau nei?

Ta Iehova i Pati Atura

3, 4. (a) Eaa tikai ta Iehova e pati maira ia tatou i teia tuatau? (e) Eaa tatou i tau ei kia aru vaitata i to Iesu au takainga vaevae?

³ I te tuatau o te mataiti openga o ta Iesu angaanga i te enua nei, kua aere kapiti atura tana nga apotetoro ko Petero, ko Iakobo, e Ioane oki ma ia katoa ki tetai maunga teitei, penei ki tetai tuaivi o Maunga Heremona ra. I reira kua kite ratou i tetai orama totou anga no Iesu i te tu kaka maata e kua akarongo atu i te reo o te Atua uaorai i te na ko anga: “Ko taku Tamaiti akaperepere teia, kua mareka rava au iaia; e akarongo kotou iaia.” (Mataio 17:1-5) Ei akatumu anga, ko te reira ta Iehova e pati maira ia tatou​—kia akarongo ki tana Tamaiti e kia aru i tana akatauanga e te au apiianga. (Mataio 16:24) No reira, kua tata te apotetoro ko Petero: “I mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.”​—1 Petero 2:21.

⁴ Eaa tatou ka tau ei kia aru vaitata i to Iesu ra au takainga vaevae? No te mea na te aruanga iaia, te aru ra tatou i te Atua ko Iehova. Kua kite meitaki roa ra a Iesu i te Metua, i te mea kua pou iaia e au pirioni ua atu au mataiti ma ia katoa i te rangi ra i mua ake i te aerenga mai ki te enua nei. (Maseli 8:22-31; Ioane 8:23; 17:5; Kolosa 1:15-17) Iaia i te enua nei kua mono tiratiratu tikai a Iesu i tona Metua. Kua akataka mai aia: “Ko ta taku Metua ra i apii mai iaku ra, ko taku ïa i tuatua nei.” Ko te tika, no te aru tau tikai a Iesu ia Iehova e kua rauka iaia kia tuatua: “Ko te akara mai iaku nei, kua akara ïa i te Metua.”​—Ioane 8:28; 14:9.

5. Eaa te ture tei raro akera te au Kerititiano, e i naea taua ture ra i akamanaiai?

⁵ Eaa te o atura ki te akarongoanga ia Iesu e te aruanga iaia? Te riro ra ainei te aiteanga e tei raro koe i tetai ture? Kua tata a Paulo: “Kare aku ture.” Te taiku ra aia i konei i “te koreromotu taito,” koia te Ture papauia ma to Iseraela. Kua akatika ra Paulo e “tei raro ake ra [aia] i te ture i te Mesia.” (1 Korinetia 9:20, 21; 2 Korinetia 3:14) I te openga te Ture koreromotu taito ra, kua mana mai tetai “koreromotu ou ra” ma te “ture a te Mesia” ra ta te au tavini katoatoa o Iehova te tau nei i teianei tuatau kia apai ma te akarongo.​—Luka 22:20; Galatia 6:2; Ebera 8:7-13.

6. Penei e akapeea te akataka anga i “te ture a te Mesia” ra e akapeea tatou i te akono anga i te reira?

⁶ Kare a Iehova i akapapa i “te ture a te Mesia” ra mei te tu o tetai tata anga, tei akapapaia ra ki roto i te au tu tuke tuke, mei tei raveia ma te Ture koreromotu taito ra. Kare teianei ture ou no te au pipi a Karaiti i kapiti i tetai papaanga apinga kia raveia e te au apinga auraka kia raveia. Inara, i roto i tana Tuatua, kua akanooia mai e Iehova e a au tataanga tau tikai no te oraanga e te au apiianga no tana Tamaiti. Pera katoa, kua akauruia e te Atua tetai papaki o ta Iesu au pipi mua ra kia oronga i te au apiianga tataia no te ravenga a te tangata, te au akatereanga i te putuputuanga, te tu akono i roto i te ngutuare tangata, e etai atu au tumu oki. (1 Korinetia 6:18; 14:26-35; Ephesia 5:21-33; Ebera 10:24, 25) Me ka akono tatou i to tatou au oraanga kia tau ki te akaraanga e te au apiianga a Iesu Karaiti e ka akarongo i te akoanga a te aronga tata Pipiria o te anere mataiti mua tei akauruia ra, te akarongo ra tatou i “te ture a te Mesia” ra. Te pati maira Iehova i teia i tana au tavini i teianei tuatau.

Te Puapinga Maata no te Aroa

7. Akapeea ta Iesu ra akaketaketa anga i te tumu o tana ture i te tuatau o te Pasa openga ma tana au apotetoro?

⁷ I te mea e puapinga maata te aroa i raro ake i te Ture, ko te ngakau tikai ia, me kare tuanga maata rava, no te ture a te Mesia. Kua akaketaketaia te reira tika e Iesu i tona akaputu anga ma tana au apotetoro kia akono i te Pasa o te 33 T.N. Kia tau ki ta te apotetoro ko Ioane akapapa i tei tupu i taua po ra, kua kapiti ta Iesu au tuatua manako ngakau ra e 28 taiku anga i te aroa. Na teianei i akaketaketa atu ki tana au apotetoro i te tumu, me kare te vaerua, o tana ture ra. E mea meitaki katoa oki, kua oronga a Ioane i tana akakite anga i te au tupu anga o tana aiai rongonui ra na te tuatuaanga: “Ou te oroa pasa ra, kua kite anā Iesu e kua tae ki tona ora, ka akaruke mai ei i teianei ao, ka aere atu ei ki te Metua ra, i aroa aia i tona tangata i te ao nei, aroa ua atura aia ia ratou e tae ua atura ki te openga ra.”​—Ioane 13:1.

8. (a) Eaa tetai akakite anga e e maroanga tetai tei raveia ra i roto i te au apotetoro? (e) I akapeea ta Iesu apii anga i tana au apotetoro i tetai apiianga taakaaka?

⁸ Kua aroa a Iesu i tana au apotetoro, noatu rai e i tauta aia ma te akaraanga puapinga kore kia tauturu ia ratou kia autu i te akakore i to ratou anoano maata no te mana e te turanga oki. E au marama ua atu i mua ake i to ratou taeanga ki Ierusalema, ‘kua taumaro ratou i roto ia ratou uaorai e koai tei maata.’ E i mua ua ake i to ratou aere maianga ki te oire no te Pasa, kua mura akaou mai te maroanga no te turanga teitei. (Mareko 9:33-37; 10:35-45) Ko teianei tetai manamanata roa te tupuanga te akakiteia maira i tei rokoia i muri poto ake i te tomo anga te au apotetoro ki te pia i runga ra kia akono kapiti i ta ratou akonoanga i te akaputuanga Pasa openga ra. I taua tuatau ra kare tetai o ratou ra i mou i te tika kia rave i te peu, angaanga akamanuiri anga i te oreianga i nga vaevae o etai ke ra. Ei apii anga ia ratou i te taakaaka, kua riro na Iesu uaorai i orei i to ratou au vaevae.​—Ioane 13:2-15; 1 Timoteo 5:9, 10.

9. I akapeea ta Iesu akono i te turanga tei rokoia ra i muri ake i te Pasa openga ra?

⁹ Noatu rai taua apiianga ra, i muri ake i te akono anga i te Pasa e ta Iesu oronga anga i te Akamaaraanga i tona matenga tei vaitata maira, e akara i tei tupu akaou. Te tuatua ra ta Luka tataanga Evangeria: “E tauetono anga oki tei tupu i roto ia ratou i to ratou e ka maata.” Kare ra a Iesu i riri atu e te taekeanga ia ratou, kua ako aroa atura Iesu ia ratou i te umuumu anga kia tuke mei te aronga tutara mana noinoi o te ao nei. (Luka 22:24-27) I reira kua oronga aia i tei tau kia tapaia e ko te toka tiava o te ture a te Karaiti ra, i te nakoanga: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.”​—Ioane 13:34.

10. Eaa te akauenga ta Iesu i oronga ki tana au pipi, e eaa tei o atu ki te reira?

¹⁰ I muri poto mai i taua aiai ra kua tou atura Iesu e akapeea te mamao te aerenga tau no te aroa tau i to Karaiti ra. Kua tuatua aia: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata maata atu i te reira.” (Ioane 15:12, 13) Te tuatua ra ainei a Iesu e ka tau tana au pipi kia mareka kia mate no tona au taunga me ka rokoia mai tetai atianga tau no te reira? Ko ta Ioane te reira i kite, koia tetai tei akara mata i teia atianga nei, no te mea kua tata aia i muri iora: “Ko te mea teia i kite ei tatou i te aroa, ko te Mesia i oronga i tona uaorai ora no tatou: e kia oronga katoa tatou i to tatou ora no te au taeake e tikai.”​—1 Ioane 3:16.

11. (a) Akapeea tatou me akatupu i te ture a te Karaiti? (e) Eaa te akatauanga ta Iesu i oronga atu?

¹¹ No reira, kare tatou e akatupu i te ture a te Karaiti na te apii ua anga ia etai ke nona ra. Ka tika katoa tatou kia akono e kia rave mei ta Iesu i rave ra. E tika, kua taiku a Iesu i te au tuatua manea, tei iki meitakiia ra i tana au akoanga. Inara, kua apii katoa aia na te akatauanga. Noatu rai e ko tetai mea ora mana a Iesu i te rangi ra, kua mou aia i te tika kia tavini atu i te au apinga a tona Metua i runga i te enua nei e kia akaari mai e akapeea te ora anga tau no tatou. E taakaaka aia, e takinga meitaki, e te akamanako mai, i te tauturuanga i te aronga apainga teiaa ta ratou e te taitaia oki. (Mataio 11:28-30; 20:28; Philipi 2:5-8; 1 Ioane 3:8) E kua raurau atura Iesu i tana au pipi kia aroa ratou tetai i tetai, mei iaia i aroa atura ia ratou.

12. Eaa ka raukai kia tuatuaia e kare te ture a te Karaiti e akameangiti mai i te umuumu anga kia anoano atu ia Iehova?

¹² Eaa te ngai no te aroa no Iehova​—koia te akauenga maata rava i te Ture ra​—i roto i te ture na te Karaiti ra? (Mataio 22:37, 38; Galatia 6:2) E ngai tua rua? Kare rava ia! Te aroa no Iehova e te aroa no to tatou au taeake Kerititiano te kapiti ketaketaia ra. Kare e rauka tikai i tetai te aroa ia Iehova ma te kore e aroa katoa i tona taeake, no te mea kua akakite te apotetoro ko Ioane: “Kia karanga tetai tangata e, te anoano nei au i te Atua, e kare i aroa i tona taeake, e pikikaa aia; ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra?”​—1 Ioane 4:20; akaaite ia 1 Ioane 3:17, 18.

13. Eaa te tupu anga no te akarongo o te au pipi ra ki te akauenga ou a Iesu?

¹³ I ta Iesu oronga anga i te akauenga ou ki tana au pipi kia aroa ratou tetai i tetai mei iaia i aroa ra ia ratou, kua akataka aia i te tupu anga a te reira. “Ko te mea teia e kite ei te tangata katoa e e pipi kotou naku,” tana i tuatua, “kia aroa kotou ia kotou uaorai.” (Ioane 13:35) Kia tau ki ta Tertullian, tei ora ra e tere atu i tetai anere mataiti i muri ake i to Iesu matenga, kua akatupu te aroa taeake o te au Kerititiano mua ra i taua tu tikai. Kua tuatua katoa a Tertullian no te aronga kare i te Kerititiano i te tuatuaanga no te au pipi a Karaiti: ‘E akara i akapeea to ratou aroa ia ratou uaorai e akapeea oki to ratou papa anga kia mate tetai no tetai.’ Penei ka ui tatou ia tatou uaorai, ‘Te akaari ra ainei au i taua aroa ra no te au taeake Kerititiano e kia akapapu ia e ko au tetai o te au pipi a Iesu ra?’

Akapeea Tatou te Akapapu Anga i to Tatou Aroa

14, 15. Penei eaa te akangata ra kia akono i te ture a te Karaiti, inara na teaa e tauturu ia tatou kia rave i te reira?

¹⁴ E mea puapinga maata kia akakite te au tavini o Iehova i te aroa tau i to Karaiti ra. Inara te kite ra ainei koe e mea ngata kia aroa atu i te au taeake Kerititiano tei akakite maira i te au tu noinoi? I na, mei ta tatou i kite akenei, noatu ko te au apotetoro kua taumaro e kua tauta kia akatupu i to ratou uaorai au manako. (Mataio 20:20-24) Kua akatupu katoa to Galatia i te pekapeka i roto ia ratou uaorai. I muri ake i te tou anga e ko te aroa i te tangata tupu e akatupu anga i te Ture, kua akamatakite a Paulo ia ratou: “Kareka ra kia aae ra e kia akapou ia kotou uaorai, e matakite, ko te pou takiri oki kotou ia kotou uaorai.” I muri ake i te akatukeanga i te au angaanga a te kopapa ma te au ua o te vaerua o te Atua ra, kua kapiti atura Paulo i te akamaroiroi anga: “Eiaa tatou e akateitei puapinga kore ua, e te akaongoongo anga tetai ki tetai, e te vareae anga tetai ki tetai.” I reira kua raurau atura te apotetoro: “Ka rave atu tetai i ta tetai apainga, kia pera kotou i te akatika i te ture a te Mesia.”​—Galatia 5:14​–​6:2.

¹⁵ Na te umuumuanga i te akarongo ki te ture a te Karaiti, te maata roa ra ainei ta Iehova e pati maira ia tatou? Noatu rai e penei ka raveanga ngata kia takinga meitaki atu i te aronga tei akamura maira kia tatou e kua aae ia tatou i te pae manako ngakau, e apainga ta tatou ‘kia aru i te Atua, mei te tamariki akaperepere ra; ei aerenga aroa to tatou.’ (Ephesia 5:1, 2) Ka tau tatou kia akara tamou i te akatauanga a te Atua, tei “akamaata ua maira te Atua i tona aroa i tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) Na te tamataanga kia tauturu atu ia etai ke ra, kapiti katoa i te aronga tei takinga kino maira ia tatou, ka rekareka tatou i te merengo anga no te kiteanga e te aru ra tatou i te Atua e te akono ra i te ture a te Karaiti.

16. Akapeea tatou i te akapapu anga i to tatou inangaro no te Atua e Karaiti oki?

¹⁶ Ka tau kia maara tatou e ka akapapu tatou i to tatou aroa na ta tatou ka rave, kare i ta tatou ua ka tuatua. Noatu rai ko Iesu kua kite i tetai tuanga no to te Atua ra anoano ei mea ngata kia ariki no te au tumu katoatoa tei o atura. “E taku Metua, kia tika ia koe ra, e apai ke atu koe i teianei kapu,” ta Iesu i pure. Mari ra kua kapiti viviki atura aia: “Kia tupu ra toou anoano auraka toku.” (Luka 22:42) Noatu ra ta Iesu katoatoa i mamae ra, kua rave aia i to te Atua ra anoano. (Ebera 5:7, 8) Ko te akarongo anga te akapapuanga i to tatou aroa e te akaari ra te kite nei tatou ko ta te Atua te aerenga meitaki roa. “Teia oki te inangaro i te Atua,” ta te Pipiria i tuatua “ko te akono i tana au akauenga.” (1 Ioane 5:3) E kua tuatua a Iesu ki tana au apotetoro: “Kua anoano kotou iaku ra, ka akono i taku ra au akauenga.”​—Ioane 14:15.

17. Eaa te akauenga taka ke ta Iesu i oronga ki tana au pipi, e akapeea tatou i kite ei e te kapiti ra ia tatou i teia tuatau nei?

¹⁷ I te pae atu i te akaueanga i tana au pipi kia aroaia ratou uaorai, eaa tetai atu akauenga takake ta Karaiti i oronga kia ratou ra? Kua akaue atura aia e kia rave ratou i te angaanga tutu aere tana i tereni atura ia ratou. Kua tuatua a Petero: “Kua ikuiku maira aia ia matou e tuatua aere matou ki te tangata, e akakite ua atu oki.” (Angaanga 10:42) Kua akaue taka meitaki atura Iesu: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20; Angaanga 1:8) Kua akakite katoa a Iesu e ko taua au akauenga ra te tau ra ki tana au pipi i teianei i “te tuatau openga,” no te mea kua tuatua aia: “E tutu aereia te evangelia o te basileia nei e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Daniela 12:4; Mataio 24:14) Inara, no te Atua te anoano e kia tutu aere tatou. Tera ra, penei ka manako tetai papaki e ko te umuumuanga kia rave tatou i teianei angaanga e maata rava ia no te Atua kia pati mai ia tatou. Inara e tika ainei te reira?

Eaa i Akara Anga Ngata ei te Reira

18. Eaa ta tatou ka tau kia maara me ka mamae tatou no te raveanga i ta Iehova i pati maira?

¹⁸ Mei ta tatou i kite akenei, kua pati a Iehova i te au tangata kia akono i te au umuumuanga tuke tuke i te tuatua enua katoa. E mei te tuke anga o tei patiia ra kia rave ratou, mei te reira katoa oki te tu o te au timataanga tei tupu kia ratou. Ko te Tamaiti akaperepere a te Atua ra tei rokoia e te au timataanga ngata roa, i te openga kua tamateia i tetai tu kino roa no te raveanga i ta te Atua i pati atura. Inara me ka mamae tatou no te raveanga i ta Iehova i pati mai ia tatou, ka tau tatou kia maara e kare nana i oronga mai te apainga no to tatou au timataanga. (Ioane 15:18-20; Iakobo 1:13-15) Na te meameaau a Satani i akatupu mai i te ara, te mamae, e te mate oki, e nana i akatupu mai i te au turanga tei akariro putuputu ra kia ngata rava kia rave i ta Iehova i pati maira i tona au tavini.​—Iobu 1:6-19; 2:1-8.

19. Eaa ra i tika meitaki ei kia rave tatou i ta te Atua i pati mai ia tatou na roto i tana Tamaiti?

¹⁹ Na roto i tana Tamaiti, kua arataki a Iehova e i teia tuatau o te openga nei, ka rave Tona au tavini i tetai akakite anga ki te ao katoa e ko te rapakau anake no te mamaeanga o te au tangata katoa ko te tutara Patireia ia. Na teianei kavamani a te Atua e takore takiri atu i te au manamanata katoatoa i runga i te enua nei​—te tamaki, te rave kino, te putaua, te ruaine, te maki, e te mate. Ka apai katoa mai te Patireia i tetai enua parataito kaka, ka riro katoa noatu ko tei mate ra ka akatuakaouia mai ki reira. (Mataio 6:9, 10; Luka 23:43; Angaanga 24:15; Apokalupo 21:3, 4) Mei teaa ra tetai tika meitaki kia akakite aere i te tuatua meitaki no taua au apinga ra! Te taka meitaki ra, i reira, e kare e manamanata i ta Iehova e anoano ra ia tatou kia rave. Te rokoia ra tatou e te patoianga, inara na Satani te Tiaporo e tona ao teianei rave anga.

20. Akapeea e raukai ia tatou kia akakoromaki i tetai ua atu akaaoanga tei orongaia maira e te Tiaporo?

²⁰ Akapeea tatou ka autu ei i tetai ua atu akaaoanga tei orongaia maira e Satani? Na te tauruanga ki roto i te manako i teianei au tuatua: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Maseli 27:11) Kua oronga a Iesu kia Iehova i tetai pauanga ki te akakino anga mai a Satani na te akaruke atu anga i tona ngai tinamou o te oraanga i te rangi kia aere mai e rave i te anoano o tona Metua i te enua nei. (Isaia 53:12; Ebera 10:7) Ei tangata kua akakoromaki a Iesu i te au timataanga tei tukuia mai ki runga iaia, tae roa ki te matenga ki runga i tetai rakau tamamae anga. Me ka aru tatou iaia ei Akatauanga no tatou, ka rauka katoa ia tatou kia akakoromaki i te au mamaeanga e kia rave oki i ta Iehova ka pati mai ia tatou nei.​—Ebera 12:1-3.

21. Akapeea toou manako ngakau no te aroa tei akaariia mai e Iehova raua ko tana Tamaiti?

²¹ Mei teaa ra te aroa o te Atua raua ko tana Tamaiti i akaari mai no tatou! No to Iesu atinga, kua rauka i te au tangata akarongo te manakonako no te oraanga e tuatau ua atu ki Parataito. No reira auraka tatou e tuku i tetai apinga kia arai i to tatou manakonako anga. Kareka ra, e tuku tatou uaorai ki te ngakau i ta Iesu i oronga maira, mei ta Paulo i rave, tei tuatua ra: “Te Tamaiti a te Atua, ko tei aroa mai iaku, e kua oronga mai iaia uaorai noku.” (Galatia 2:20) E kia akaari manako ngakau akameitaki ki to tatou Atua aroa, kia Iehova, tei kore rava ra e pati mai kia maata roa ia tatou nei.

Akapeea Koe me Pau?

◻ Eaa ta Iehova e pati mai nei ia tatou i teia tuatau?

◻ I tona aiai openga ma tana au apotetoro, i akapeea ta Karaiti akaketaketa anga i te puapinga maata o te aroa?

◻ Akapeea tatou me akapapu e te aroa ra tatou i te Atua?

◻ Eaa ra i riro ei ei tika meitaki kia rave i ta Iehova i pati mai ia tatou?

[Tutu i te kapi 23]

Eaa te apiianga ta Iesu i apii mai na te orei anga i te au vaevae o tana au apotetoro?

[Tutu i te kapi 25]

Noatu te patoianga, e akameitaki anga te akakitekiteanga i te tuatua meitaki