“Kua Taui Kotou i Toku Manako no te Au Kite o Iehova”

AKAPERA tetai opita are auri Polish i te tuatua anga i tetai atikara no runga i te angaanga a te Au Kite o Iehova, mei tei ripotiia i roto i ta tatou itiu o Okotopa 15, 1998. Kua tata te atikara, “Te Ariu Mai Anga te Au Ngakau Toka,” i te tu manuia o te Au Kite o Iehova i te angaangaanga ma te aronga mouauri i Wołów, Poland.

I mua ake ka tukunaiai te makatini Punanga Tiaki tei taikuia i runga akenei ki te tangata ravarai, kua akanooia tetai uipaanga takake kia oronga i te reira ki te au mouauri ia Tepetema 13, 1998, i te are tapekaanga i Wołów. Ko te aronga tei patiia kia tae mai kua kapiti mai i te Au Kite i reira, te au mouauri papetitoia e tetai tei inangaro, e tetai atu au opita o te are tapekaanga. Ko te ka aru mai ko tetai o te au manako tei tuatuaia e te aronga tei tae mai.

Kua tuatua a Jerzy, ko tetai o te Au Kite o Iehova tei papetitoia i roto i te are auri e maata atu i te rima mataiti i topa akenei, e: “Mataora tikai au, e ka rauka iaku i te tatau i teia ra no runga i te angaanga maata a te au taeake mei te au putuputuanga i te pae mai no te tauturu anga ia matou.” Kua tuatua mai aia: “Te tauta nei au i te akameitaki iaku, e te kite nei au ia Iehova i te akatikatika anga mai iaku.”

Kua tuatua tetai mouauri, ko Zdzisław tona ingoa, no runga i te angaanga akakite anga i roto i te are auri: “I teianei, e a mouauri te akapapa nei e kia papetitoia, e te aere tamou mai nei te aronga ou tei inangaro ki te au uipaanga i to matou are uipaanga. E akakeu anga ririnui teia atikara kia matou kia akamaata i te angaanga i roto i teia ngai.” Mei teaa te tu papu tikai, i te akamanakoanga e te vaira e 19 mataiti toe no Zdzisław kia akapou i roto i te are auri!

I muri ake i te tatauanga i te atikara no runga i te are tapekaanga i Wołów, kua tuatua tetai opita are auri e: “Kua akangateitei ia tikai matou. Kare au i manako ana e ka rauka i teia are tapekaanga i taua akakitekite anga papu i roto i te 130 au reo i te ao katoa. E reka ana au ia kotou, e te ariki nei au i ta kotou au tauta anga no te au mouauri.” Kua tuatua mai tetai opita ke: “Kua taui kotou i toku manako no te Au Kite o Iehova. I mua ana, kua manako au ia kotou ei aronga akonoanga neneva. I teianei te kite nei au e e au tangata kotou ma te kaveinga.”

Kua kata te akaaere o te are auri Wołów, ko Marek Gajos, e kua tuatua e: “I te akamata anga kua manako matou e meangiti ua te ka rauka ia kotou i te akatupu. Kua manako matou e ko kotou tetai akonoanga ma te anoano pakari kia akono akaoki ma te Pipiria i te au mouauri. Inara, i te kite anga i te tupuanga o ta kotou angaanga kua iki matou i te kapiti taokotai atu. Kua aere mai kotou ki konei ma te kore e roiroi e iva mataiti i teianei, e te ariki nei au i ta kotou i rave i teianei.”

Inara, akapeea, te atikara i te ariki angaia e te katoa anga o te are auri i Wołów? Kua teitei tikai te inangaro i roto i te aronga mouauri e kua pou te makatini a te Au Kite i roto i te are auri. Kua akaari katoa te au opita are auri i te inangaro na te pati mai anga e 40 kopi na ratou uaorai. E aro atu ei i te umuumu anga kia akamaata, kua tauturu mai te au putuputuanga i reira e kua oronga mai e 100 kopi na te au taeake i roto i te are auri. I taua taime rai, kua maata tei tae atu ki te uipaanga i roto i te are auri.

Kua tuatua a Piotr Choduń, e opita are auri tei taokotai vaitata ma te Au Kite o Iehova e: “Kua iki matou i te akaari i teia atikara i roto pouroa i te au ngai akaariari anga o to matou are tapekaanga. Te manakonako nei matou e pouroa te au mouauri kare i apii ake i te Pipiria ma kotou ka tatau i te makatini.”

Kua tupu ua atu te meitaki o te akaraanga meitaki o te Au Kite e ta ratou tauta anga no te tutu anga. Kapiti atu ki te 15 mouauri tei tere ki mua e kua papetitoia, e 2 opita are auri kua akatapu i to raua oraanga kia Iehova, e kua pati mai tetai opita are auri i tetai apii Pipiria. E tikai, te oronga ra te au taeake i roto i te are auri Wołów i te akameitaki anga ki te Atua ko Iehova no tei manuia ratou.​—Akaaite ia 1 Korinetia 3:6, 7.

[Tutu i te kapi 28]

E toru Au Kite e tetai mouauri i ko i te oronga angaia te makatini i roto i te are uipaanga tuatua anga o te are auri