“E Kimi i te Au e Aruaru Atu”

“Kia akamaataia a Iehova, ko tei rekareka i te au o tona ra tavini.”​—SALAMO 35:27, “NW.”

1. Eaa te au ta tatou i rekareka i teia tuatau?

MEI teaa ra te rekareka i roto i teianei ao tatakake kia vai ma te au ua! Mei teaa te rekareka kia akamori ia Iehova, koia “te Atua au,” e kia piri atu ki roto i te au akameitakianga o tana “koreromotu au”! Mei teaa ra te akapumaanaanga, i rotopu i te au taomi anga o te oraanga, kia kite i “te au o te Atua, ko tei maata ua atu i te kite tangata” e te kite anga i ‘te ruru o te au’ te taokotai nei i te au tangata o te Atua noatu rai eaa to ratou iti tangata, te reo, te kopu, me kare te tu ora anga!​—1 Tesalonia 5:23; Ezekiela 37:26; Philipi 4:7; Ephesia 4:3.

2, 3. (a) Noatu rai e ka akakoromaki tamou te pupu katoa o te au tangata o te Atua ra, penei eaa te ka tupu ki te au Kerititiano tataki tai? (e) Eaa ta te Puka Tapu e raurau maira ia tatou kia rave?

² Ei au Kite no Iehova, te akaperepere nei tatou i teianei au. Inara, kare tatou e tau kia akono manako kore ua i te reira. Kare te au e vai tamou ua mai e no te mea te piri atu nei tatou ki te putuputuanga Kerititiano me kare no te mea e tuanga tatou no tetai ngutuare tangata Kerititiano. Noatu rai, e ka vai tamou te toenga o tei akatainuia ra e to ratou au oa o te “E mamoe ke atu” ra ei anana okotai tae roa atu ki te openga, e aronga tatakitai ra ka ngaro to ratou tu au e ka topa ke atu.​—Ioane 10:16; Mataio 24:13; Roma 11:22; 1 Korinetia 10:12.

³ Kua akamatakite maira te apotetoro ko Paulo i te au Kerititiano akatainuia i tona tuatau ra: “Kia matakite, e te au taeake, ko te vai aea te ngakau kino akarongo kore katoa ki roto i tetai o kotou, i te akaruke anga i te Atua ora.” (Ebera 3:12) Te piri katoa ra teia akamatakiteanga ki te urupu maata. No reira te raurau ra te Puka Tapu i te au Kerititiano: “E kimi i te au, e aruaru atu. Tei te aronga tuatua-tika ra to Iehova mata, e tei ta ratou kapiki tona taringa; e mata ke ra to Iehova i te aronga i rave i te kino ra.”​—1 Petero 3:10-12; Salamo 34:14, 15.

“Te Akono Anga Oki i ta te Kopapa Nei”

4. Na teaa e raukai kia tamanamanataia to tatou au ma te Atua ra?

⁴ Eaa te ka arairai i ta tatou aruaru anga i te au? Kua taiku maira Paulo i tetai apinga i tana tuatua anga: “Ko te akono anga oki i ta te kopapa nei, ko te mate ia; kareka ko te akono anga i ta te vaerua ra, ko te ora ia e te au; no te mea, ko te akono anga i ta te kopapa nei e ke anga ia ma te Atua ra.” (Roma 8:6, 7, NW) Te tuatua “kopapa” te taiku ra a Paulo no to tatou turanga tei topa ra ei au tangata apa ua ma te tuangaia i te au inangaro no te rave ara. Na te tuku ua anga ki te au anoano o te kopapa tei topa ra ka takore i to tatou au. Kia rave te Kerititiano i te akaturi ma te tataraara kore, ka pikikaa, ka keia, ka rave apinga akakona me kare na tetai atu mataara te aati anga i te ture na te Atua ra, kua tamanamanata te au kia Iehova e te reira rekareka anga tei ngaro. (Maseli 15:8, 29; 1 Korinetia 6:9, 10; Apokalupo 21:8) Pera katoa oki, me ka akatika ua aia i te au apinga kopapa nei kia riro ei apinga maata atu nana i te au apinga i te pae vaerua, tei roto tona au ma te Atua ra i te turanga kino roa.​—Mataio 6:24; 1 Ioane 2:15-17.

5. Eaa te kapitiia maira ki te aruaru anga i te au?

⁵ I tetai pae, kua karanga a Paulo: “Ko te akono anga i ta te vaerua ra, ko te ora ia e te au.” (NW) E tuanga te au no te au ua o te vaerua, e me ka akamatau tatou i to tatou ngakau kia ariki i te au apinga vaerua, ma te pure anga kia tauturu mai te vaerua o te Atua ia tatou i teia, ei reira tatou ka kopae ke ei i “te akono anga i ta te kopapa nei.” (Galatia 5:22-24) Ia 1 Petero 3:10-12, kua kapitiia te au ma te tuatua tika katoa. (Roma 5:1) Kua na ko ra a Petero e ko te aruaruanga i te au te kapiti ra i ‘te kopae anga i te kino, e ka rave ei i te meitaki.’ Ka rauka i te vaerua o te Atua i te tauturu ia tatou “E aruaru atu i te tuatua-tika” e kia akatinamou i to tatou au ma te Atua.​—1 Timoteo 6:11, 12.

6. Eaa tetai apainga na te aronga pakari no runga i te au o te putuputuanga?

⁶ Ko te aruaru anga i te au e manako maata ia no te aronga pakari o te putuputuanga. Ei akatauanga, me ka tamata tetai i te tauru mai i etai au ravenga taviivii, na te aronga pakari te apainga kia paruru i te putuputuanga na te tautaanga i te akatikatika i tei rave ara ra. Me ka ariki aia i taua akatikatika anga ra, ka rauka akaou mairai tona au. (Ebera 12:11) Me kare ra, penei ka akaateaia atu aia ki vao kia vai tamou mai ei te pirianga au o te putuputuanga ma Iehova katoa ra.​—1 Korinetia 5:1-5.

Te Au ma to Tatou au Taeake

7. Ko teea akakite anga o ‘te akono anga i te kopapa’ ta Paulo i akamatakite atu i to Korinetia ra?

⁷ Ka rauka i ‘te akono anga i ta te kopapa’ i te takore atu kare i to tatou au anake ma te Atua ra mari katoa ra to tatou pirianga meitaki ma etai atu au Kerititiano katoa. Kua tata a Paulo ki to Korinetia: “Tei ta te kopapa rai oki kotou i teianei; te vai ra oki te vareae, e te taumāro, e te pae ke, i roto ia kotou na, kare aina tei ta te kopapa rai kotou, e mei to te tangata nei rai to kotou aerenga?” (1 Korinetia 3:3) Ko te vareae e te taumaro ko te tua patoi ia i te au ra.

8. (a) Penei eaa te ka rokoia ki tetai tei akatupu ra i te vareae e te pekapeka i roto i te putuputuanga? (e) Tei runga to tatou au o te Atua i teaa?

⁸ Ko te tamanataanga i te au o te putuputuanga na te akatupuanga i te vareae e te taumaro e mea kino roa ia. I te tuatuaanga i te tu tei piri atu ki te au ei ua no te vaerua, kua akamatakite mai a Ioane: “Kia karanga tetai tangata e, Te anoano nei au i te Atua, e kare i aroa i tona taeake, e pikikaa aia; ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra?” (1 Ioane 4:20) Mei te reira katoa te tu, me ka akatupu tetai tangata i te vareae me kare taumaro i rotopu i te au taeake, ka tika ainei e te au ra aia ma te Atua? Kare ravaia! Te raurauia maira tatou: “Kia tamou te rekareka, kia akatikatikaia, kia akapumaanaia, kia taokotai te manako, kia noo au ua; e ka vai mairai te Atua o te aroa e te au ia kotou na.” (2 Korinetia 13:11, NW) Ae, me ka tamou tatou i te noo anga au ua tetai ma tetai, ei reira te Atua o te aroa e te au e vai mai ei kia tatou.

9. Akapeea tatou i kite ei e te tupu ra te pekapeka e te au maroanga i roto i te au Kerititiano i etai tuatau?

⁹ Kare te aiteanga o teia e kare e pekapeka e tupu mai i rotopu i te au Kerititiano. I nga epetoma i muri ake i te Penetekote ra, kua tupu tetai pekapeka i roto i te putuputuanga Kerititiano ou ra no runga i te tua anga i te manga no te au ra tataki tai. (Angaanga 6:1) I tetai atu atianga no tetai pekapeka i rotopu ia Paulo raua ko Banaba kua taki atu ki “te taumāro maata” ma te riri. (Angaanga 15:39) Kua ako atura Paulo ia Euodia raua ko Sunetuke “kia okotai rai o raua ngakau i te Atu nei,” kare e ekoko anga e tuaine maroiroi raua e te meitaki. (Philipi 4:2) No reira rai a Iesu i orongaʼi i te apiianga taka meitaki no te akakore atu i te tu akakino i te au i rotopu i te au Kerititiano e kua raurau maira i te tu rapurapu no te akonoanga i taua au manamanata ra auraka e taroaroa. (Mataio 5:23-25; 18:15-17) Kare aia e oronga mai i te reira akoanga naringa kare aia i manako e ka tupu mai te reira au tu ngata ki rotopu i tana au pipi.

10. Eaa etai turanga e tupu ana ki roto i te putuputuanga i etai tuatau, e eaa te apainga e tukuia ra ki runga i te aronga katoa e o atura ki roto i te reira?

¹⁰ No reira, i teia tuatau nei, penei ka riri tetai no te tuatua tau kore me kare no te manga tarevake o tetai taeake Kerititiano. Penei ko tetai tu tamanata o tetai tangata ka akaongoongo atu i tetai ke ra. Penei kare e rotai ana te tu ei tangata. Penei te vai ra tetai kare e akatika i te tuku anga tika a te aronga pakari ra. I roto tikai i te pupu o te aronga pakari uaorai, penei te vai ra tetai o taua aronga pakari ra e manako marokiakia tona e ka tauta kia aru atu te aronga pakari i tana tika. Noatu rai e ka tupu te reira au apinga, te vai ra te mea tau no tatou kia kimi i te au e kia aruaru atu i te reira. Ko te akaaoanga ko te akono i te reira au manamanata na roto i te mataara Kerititiano kia raukai te akatinamou i “te ruru o te au.”​—Ephesia 4:3.

11. Eaa te au apinga ta Iehova i oronga mai ei tauturu ia tatou kia aruaru atu i te au tetai ma tetai?

¹¹ Te na ko ra te Puka Tapu: “Kia akamaataiā Iehova, ko tei mataora i te [au, NW] meitaki o tona tavini.” (Salamo 35:27) Ae, te anoano maira a Iehova kia au tatou. No reira, kua oronga mai aia e rua nga mea meitaki rava ei tauturu ia tatou i te akatinamou i te au i rotopu ia tatou uaorai e ma ia katoa oki. Ko te vaerua tapu tetai, ko te au tetai ona ua, kapiti katoa mai etai nga tu o te au aiteite, mei te akakoromaki rai, te takinga meitaki, te maru, e te akono meitaki. (Galatia 5:22, 23) Ko tetai atu ko te pakari no te Atua mai, ko ta tatou ia ka tatau: “Te pakari no runga maira, e mea iro koreia ïa, e mea au ïa, e te maru, e te akarongo ngoie, kua ki i te aroa, e te takinga-meitaki.”​—Iakobo 3:17, 18.

12. Eaa ta tatou ka rave me te tamanataia maira to tatou tu au ma to tatou au taeake?

¹² No reira, me ka tamanataia mai to tatou tu au ma etai atu ra, ka tau tatou kia pure no te pakari no runga maira kia akakite kia tatou e akapeea te akono, e ka tau katoa tatou kia pati i te vaerua tapu ei akamaroiroi ia tatou kia rave i te mea tika. (Luka 11:13; Iakobo 1:5; 1 Ioane 3:22) Kia rotai atu ki ta tatou pure, ka akara tatou ki roto i te tumu no te pakari no te Atua maira, koia te Puka Tapu, no tana arataki anga, e pera katoa te akara i te au puka apii Puka Tapu no te ako anga e ka akapeea te akapiri anga i te au Tuatua Tapu. (2 Timoteo 3:16) Penei katoa oki ka anoano tatou i te apiianga mei ko mai i te aronga pakari o te putuputuanga ra. Ko te takainga openga ko te aru i te arataki anga tei rauka maira. Te na ko ra a Isaia 54:13: “Te au tamariki katoa naau ra e apiiia e Iehova; e ei au nuingangare to te au tamariki naau ra.” Ko te aite anga o teia e tei runga to tatou au i ta tatou akono anga i te au mea ta Iehova e apii maira ia tatou.

“E Ao to tei Akamoeau”

13, 14. (a) Eaa te akakiteia maira e ta Iesu tuatua no te “akamoeau”? (e) Akapeea tatou e riro ei ei aronga akono e te au?

¹³ I ta Iesu Tuatua i runga i te Maunga ra, kua na ko aia: “E ao to tei akamoeau: e karangaia ratou e ‘tamariki na te Atua.’” (Mataio 5:9) I konei ko te tuatua “akamoeau” kare e taiku ana no tetai tei maru ua ra tona tu. Ko te aiteanga o te tuatua Ereni i akamata mai ei, e “aronga akatupu au.” Ko te tangata akatupu au e karape i te akaoraanga i te au me ka tamanataia mai te reira. E meitaki atu oki, ka tauta te tangata akatupu au kia kopae i te tamanataanga i te au i mua ake ka tupu ei. ‘E mana te au i roto i tona ngakau.’ (Kolosa 3:15) Me ka tauta pakari te au tavini o te Atua ei aronga akatupu au, ei reira e meangiti mai ei te au manamanata.

¹⁴ E riro ei ei tangata akatupu au ka tau kia kite i to tatou uaorai au tu paruparu. Ei akatauanga, penei ko tetai Kerititiano e riri vave me kare e viviki e te ngoie ua te riri. I raro ake i te taomi anga, no tona tu manako ngakau penei ka ngaropoina ua iaia te au kaveinga o te Puka Tapu. Kare teia i te mea manako koreia i te au tangata i te tu apa ua nei. (Roma 7:21-23) Tera ra, te papaia nei te makitakita, te karo, e te riri e e au angaanga anake no te kopapa. (Galatia 5:19-21) Me ka kite tatou i teia au tu i roto ia tatou uaorai​—me kare kia akakiteia mai kia tatou e etai ke atu ra—​ka tau tatou kia pure akatenga e kia tamouia te rave i te reira no te vaerua o Iehova kia akatupu ki roto ia tatou i te akono meitaki e te maru. E tika oki, ka tau te katoatoa kia tauta pakari i te tatanu i te reira au tu ei tuanga no tona tu tangata ou.​—Ephesia 4:23, 24; Kolosa 3:10, 15.

15. Eaa te tuke anga o te pakari no runga maira ki te tu marokiakia e te mako kore?

¹⁵ I etai atianga, ka tamanataia te putuputuanga me kare te pupu o te aronga pakari i tetai tangata marokiakia, tei maro ua atu i tana uaorai tika. E tika rai, i te ture na te Atua, ka tau te Kerititiano kia ketaketa te manako, kia kore e paruparu mai. E me manako tatou e ko ta tatou te ravenga meitaki ei puapinga no etai atu, kare e tarevake kia akataka papu ia tatou uaorai, kia akataka meitaki ra tatou i ta tatou au tumu. Inara kare tatou e anoano kia aite atu ki to teianei ao ko tei “kore e akatika i tetai ua atu koreromotu.” (2 Timoteo 3:1-4, NW) Ko te pakari no runga maira e mea au ia, e te mako. Ko te aronga tei akanoo i te akaraanga no te marokiakia e kare e paruparu mai ka tau kia akarongo i ta Paulo ako ki to Philipi ra kia ‘kore e rave i te taemoemo.’​—Philipi 2:3, NW.

16. Akapeea te tauturu anga ia tatou o ta Paulo ako i roto i te puka ki to Philipi ra, kia akakore atu i te tu taemoemo anga?

¹⁶ I roto i te reira reta tikai, kua raurau a Paulo e ka tau ‘ei ngakau akaaka,’ to tatou ma ‘te manako e e meitaki atu etai ia tatou uaorai.’ E tuke teia i to te tu taemoemo. Kare te Kerititiano kua pakari e manako kia maro atu i tana uaorai tika na mua, ma te rave kia manakoia mai, me kare te paruruanga i tona uaorai turanga e tona mana. Ka tuke teia ki ta Paulo akamaroiroi anga kia ‘kore te tangata e akono i tona anake uaorai au mea, e akono katoa ra i to etai ke ra au mea.’​—Philipi 2:4; 1 Petero 5:2, 3, 6.

Au Tuatua Au Ua

17. Eaa te taangaanga tarevake i te arero te ka tamanata i te au o te putuputuanga?

¹⁷ Ko tei aruaru i te au ra ka matakite i te taangaanga i tona arero. Kua akamatakite a Iakobo: “Koia katoa te arero nei e melo mea ngiti, e akatietie maata ra tana. Ka akara na i te maata o te vaie e ka i te ai mea ngiti ra!” (Iakobo 3:5) Te tuatua puapinga kore ua, te akaapa ia etai ke i muri i to ratou mokotua, te au tuatua aro kore e te riri, te koumuumu e te akakinoanga, pera katoa te tuatua tiratiratu kore no te akameamea ua ei akateitei iaia uaorai​—pouroa anake te reira e angaanga na te kopapa te ka tamanata i te au o te au tangata o te Atua.​—1 Korinetia 10:10; 2 Korinetia 12:20; 1 Timoteo 5:13; Iuda 16.

18. (a) Me ka rave tarevake tetai ma tona arero ma te manako kore ua, eaa te mataara tika na te katoatoa tei piri atu ki te reira? (e) Me no te riri tetai i tuatua tamamae ei, eaa ta te au Kerititiano pakari ka rave?

¹⁸ E tika, i karanga a Iakobo e: “Kareka te arero nei, kare ua e tangata e vi ei te reira.” (Iakobo 3:8) Noatu ko te au Kerititiano pakari ka tuatua rai i etai apinga te ka mii tikai ratou i muri akera. Pouroa tatou katoatoa te manakonako ra e kia akakore mai etai ke ra i to tatou tarevake mei ia tatou katoa oki e akakore atu i ta ratou ra. (Mataio 6:12) I etai tuatau ka akatupu mai te mura anga o te riri ra i etai tuatua akamamae. Ei reira te akamoeau e maaraʼi e “ko te tuatua maru ra tei akaanga ke i te riri: kareka te tuatua akakoko ra, ko te riri ïa te tupu.” (Maseli 15:1) E putuputu, e ka uti oonu aia i te aʼo e ka akakore i te pau anga i te au tuatua riri ma etai atu tuatua riri. I muri akera, kia maru maira te riri, ka kite te tangata ngakau maata i te akatupu i te au, e akapeea te akakore atu i te au mea i tuatuaia ra i te tuatau poto o te riri. E ko te Kerititiano taakaaka ra ka kite e akapeea te pati anga kia akakoreia tana apa e ka tauta kia akaora i te mamae ngakau tei tupu ra. E akairo ia no te manako maroiroi kia rauka te tuatua e, “te mii nei au” kua tarevake au.

19. Eaa ta tatou i kite mei ia Paulo raua ko Iesu mai e akapeea te oronga i te akoanga?

¹⁹ Penei ka taangaangaia te arero ei ako atu ia etai ke ra. Kua akaapa pakari atura Paulo ia Petero ki mua i te au tangata i to Petero rave anga tarevake i Anetioka. E kua ako pakari atura Iesu i tana au tuatua ki nga putuputuanga e itu ra. (Galatia 2:11-14; Apokalupo, pene 2, 3) Me ka apii tatou i teia au akaraanga, ka kite tatou e kare e tau kia maru roa te ako e ka ngaro ei tona tumu tikai. Tera ra, kare a Iesu raua ko Paulo i nga tangata kino me kare takinga kino. Kare ta raua ako i te tuku anga i to raua uaorai pekapeka. Te tauta tika ra raua i te tauturu i to raua au taeake. Me ka kite te tangata te oronga ra i te ako e kare e meitaki tona tu akono i tona arero, penei ka iki aia kia tapu poto ua e kia manga maru mai i mua ake ka tuatua akaou ei. Me kare ra, penei ka tuatua ua aia i te au tuatua tau kore e ka akatupu kia maata atu te manamanata i tana e tauta ra kia akono.​—Maseli 12:18.

20. Eaa te mea tau ei mana i te au mea ravarai ta tatou ka tuatua atu me kare ka tuatua no runga i ta tatou au tungane e te au tuaine?

²⁰ Mei tei taiku keia na, e pirianga vaitata to te au e te aroa ei ua no te vaerua. Naringa ta tatou e tuatua atu ki te au taeake​—me kare no ratou ra—​e akakite anga i to tatou aroa no ratou, ka tauturu i reira i te au o te putuputuanga. (Ioane 15:12, 13) Ka tau ta tatou ka tuatua “ei tuatua aroa ua anake ta kotou, e kia rapakauia i te tai.” (Kolosa 4:6) Ka tau ei mea reka i te tongi anga, kia manakoia mai e te ngakau. Kua ako maira Iesu: “Kia vai mairai te tai i roto ia kotou, e tamou oki i te au kotou kotou uaorai.”​—Mareko 9:50.

“E Rave Maroiroi Rava Koe”

21. Eaa te akamaramaanga no runga i te au tangata o te Atua i ta ratou au uipaanga epetoma e te au tuatau akaputuputu anga e te uruoaanga?

²¹ Kua tata te tata salamo: “I na oki, te meitaki e te mataora, kia noo katoa te au taeake ma te tau tikai!” (Salamo 133:1) E tika rai, ka mataora tatou i te kapiti anga ma to tatou au taeake, e maata atu oki i ta tatou au uipaanga epetoma e i te tuatau o te au akaputuputu anga e etai atu uruoaanga mamaata. I te reira au tuatau te kitea meitaki ua ra e te aronga o vao to tatou tu au.

22. (a) Eaa te au pikikaa ua te ka manako to te pa enua ravarai e te rauka maira ia ratou, e ka taki atu ia ki teaa? (e) Eaa te au tikai ta te koreromotu a te Atua no te au te ka arataki atu?

²² E roa poto akenei ka manako to te pa enua katoatoa e ka taea e ratou te au me kare a Iehova. Inara ia ratou e tuatua ra, “E Au e te tinamou!” ei reira e rokoia uaia mai ei e te mate viviki te aronga ravarai kare ra ratou i au ma te Atua. (1 Tesalonia 5:3, NW) I muri ake i te reira, ka rave ua atu te Ariki maata o te Au i te rapakauanga i te au tangata katoa mei te au tupu anga kikino no te ngaro anga te au muatangana o te tangata ma te Atua ra. (Isaia 9:6, 7; Apokalupo 22:1, 2) Ei reira, ka tupu ta te Atua ra koreromotu no te au e au anga no te ao katoa e pini ua ake. Noatu rai ko te au puaka o te kainga katoa ka kite i te akaangaroi anga mei te au takinga kino anga no te riri.​—Salamo 37:10, 11; 72:3-7; Isaia 11:1-9; Apokalupo 21:3, 4.

23. Me ka akaperepere tatou i te manakonako anga o te ao ou ma te au, eaa ta tatou ka tau kia rave i teianei?

²³ Mei teaa ra te meitaki a te reira tuatau! Te tapapa atura ainei koe ki te reira? Me koia ia, “e umuumu i te au i te tangata katoa nei.” E kimi i te au i teianei ma toou au taeake, e kia maata atu oki kia Iehova ra. Ae, i te mea “ko te reira au mea ta kotou e tatari ana, ka akamaroiroi, kia rokoia mai kotou e ia ma te au, ma te topata kore, e te apa kore.”​—Ebera 12:14; 2 Petero 3:14.

Maara Ainei ia Koe?

◻ Eaa te ka rauka kia akapueu i to tatou au ma Iehova?

◻ Eaa te tu pekapeka te tau ra kia akatikatikaia i roto i te putuputuanga?

◻ Eaa ta Iehova i oronga mai ei tauturu ia tatou kia kimi i te au e kia aruaru atu i te reira?

◻ Eaa etai tu akono a te kopapa te ka tamanata i te au o te putuputuanga, e akapeea e raukai ia tatou i te takore atu i te reira?

[Tutu i te kapi 22]

Te tupu maata ra te au i rotopu i te aronga na Iehova e apii ana ia ratou

[Tutu i te kapi 24]

Mei teaa ra te mataora o te au o te au taeake te tavini taokotai ra!